ACARA PARTANGIANGAN PASSION

PARJOLO

HKBP IMMANUEL RESSORT PEKANBARU II

SELASA, 04 APRIL 2023 MASUK PUKUL 19.30 WIB
1
I. PARTANGIANGAN: (P: Parjamita, L: Liturgis, R: Ruas, S: Sude)
1. Marende sian BE. No.76:1,2 BL.199 “Sada nama sangkap ni rohangku”
➢ Sada nama sangkap ni rohangku di sandok portibi on. Ndang tagamon na so
las rohangku molo jumpang au inon. Naeng ma sai ingoton ni rohangku na
binaen ni Jesus tu tondingku. Uju pinorsanNa i saluhutna dosangki.
>> Ay.2. Ruas jongjong <<
➢ Ingkon sai Ibana ingotonku uju na tarpajal i. Tu hau pinarsilang
ginantungkon, sai mabaor mudarNa i. Ai humophop au ditaon uasNa, asa
dohot au muse upaNa, ai ditatap do au on, di pandokNa: “Nunga sun”.
2. VOTUM - INTROITUS - TANGIANG. (P: Parjamita, L: Liturgis; R: Ruas; S: Sude)
L: Marhitehite Goar ni Debata Ama, dohot Goar ni AnakNa Tuhan Jesus Kristus,
dohot Goar ni Tondi Parbadia na tumompa langit dohot tano on.
R: Amen !
L: Balga do holong ni rohaM di ahu ale Tuhan. Ai olo do Ho mamelehon diriM
manaon sude, sahat ro di na mate, humophop au pardosa on.
R: Ho do Sintua ni Malim na bolon i, na jongjong mandapothon
habangsa parasian i. Mamelehon pangidoan dohot elek-elek,
mardongan angguk bolon dohot ilu-ilu.
L: Ho do Anak ni Debata na Badia i, na gok hasangapon dohot habadiaon.
Dipatuduhon Ho do, pangoloion tu Ama i, marhite sude na tinaonMi.
R: Monang do Ho ala ni pangoloion dohot habengetonMu manaon
sude na bernit i. Gabe Sipalua Ho tu sude jolma angka na porsea.
L: Martangiang ma hita: Ale Tuhan Debata, Ama ni saluhut parasirohaon.
Nunga ditatap Ho hami bangsoM on, ai ndang manjua Ho mangalehon
AnakMu na sasadai, Tuhan Jesus Kristus, tu tangan ni pardosa, asa taononna
haleaon, dohot siak ni bagi, ro di hau pinarsilang. Tuhan, paloas ma hami
marningot sude na tinaonMu, dohot hamamateM, asa huarsakkon hami
dosanami, asa tubu di hami haporseaon na sintong, asa marroha holong
hami jala manongtong mangihuthon Ho, ro di hamatean. Amen !
→Ruas hundul.
3. Marende sian BE.No.161:1 BL.133 “Tangihon angguk-anggukkon”
➢ Tangihon angguk-anggukkon, asi rohaM Jahowa. Mansai tarponjot
rohangkon, dibaen godang ni dosa. Tung sura dibaloshon Ho; luhut na sala
dompak Ho; Tung ise tartahansa.
4. PARJEHEON NI SI JUDAS.
L: Alai diboto si Judas i do inganan i, ai jotjot do marpungu disi dohot angka
sisean i. Ia si Judas diarahon ma angka soldadu dohot angka naposo ni sintua
ni malim, didapothon ma tusi mantat sulusulu, palito dohot sinjata. Diboto
Jesus do saluhut na naeng songgop tu Ibana, jala ruar ma Ibana didok ma

2
 tu nasida: “Ise do na jinalahanmuna? Gabe ninna nasida ma mangalusi
Ibana:
R: “Jesus halak Nasaret i do”
L: Sai dohot do si Judas parjehe i jongjong di lambung nasida. Asa dung didok
tu nasida: “Ahu do i”, sumurut ma nasida, martinggangan ma tu tano. Dung
i diulangkon ma manungkun nasida “Ise do na ni luluanmuna? Jadi didok
nasida ma:
R: “Jesus halak Nasaret i do”.
L: Dungi ninna Jesus ma mangalusi nasida: “Nunga hupaboa tu hamu, Ahu do
i. Asa molo Ahu dilului hamu,loas ma laho angka on, ai naeng do jumpang
na nidokNa i: “Ndang adong mago hubaen agia sada na nilehonMi tu Ahu”.
Alai nunga dipabotohon parjehei hian partinandaan di nasida: “Ia i huumma,
Ibana mai, ima tangkup hamu. Asa, pintor didapothon ma Jesus, didok ma:
”Tabe di Ho Guru” laos diumma. Alai ninna Jesus ma mandok ibana:
R: Marhua ho ro tuson anggia,O Judas, pangummaon do hape dibahen
ho, pasahathon Anak ni jolma i.
L: Dungi ro ma nasida, dilaluhon ma tangan nasida tu Jesus manangkup Ibana.
Dungi,adong ma sian dongan ni Jesus mangalaluhon tanganna disintak ma
podangna, ditampulhon ma tu naposo ni malim i sahalak,dipisikkon ma
pinggolna. Jadi didok Jesus ma tu ibana:
R: Pasarung podangmi,ai na manintak podang,mago ma bahenon ni
podang.
L: Ai naso tarbahen Ahu di roham mangido sian Damang, asa dipadiri di Ahu
saonari lobi sampulu dua loksa surusuruan? Alai songon dia ma disi saut hata
ni surat i na mandok: Ingkon masa do na songoni?. Uju i ma didok Jesus tu
natorop i; Hira na dompak panamun do hamu hehe marpodang jala
marlombutlombut manangkup Ahu. Ariari do nian Ahu hundul mangajari
dibagasjoro, soadong ditangkup hamu Ahu. Alai masa do sude na on, asa
jumpang hata ni Panurirang i. Dungi, ditadingkon saluhut sisean i ma Ibana
laho maporus.
5. Marende sian BE.No.84:2 BL.195 “Aut na ginorga tu rohangku”
➢ Aut na ginorga tu rohangku, bohiM di na lao mate Ho. Aut na huingot O
Tuhanku, tongtong panghophopMi di au. Ai Ho do paluahon au,dosangku
do pinorsanMi; di daoni Ho parsahitonku; martua au binaen ni i.
6. PANAONON NI TUHAN JESUS:
L: Dungi ditangkup angka soldadu dohot induk nasida ro di angka naposo ni
Jahudi ma Jesus jala diihoti, jadi ditogihon ma Ibana jumolo tu si Hannas,
ima simatua ni si Kayapas naung mandok tu angka Jahudi; Dengganan do
mate sada halak humophop bangso. Dungi disungkun sintua ni malim i ma
3
 Jesus taringot tu angka siseanNa dohot taringot tu podaNa i. Jadi dialusi
Jesus ma ibana ninna ma:
R: Patar do hatangKi di hatoropan, na tongtong do Ahu mangajari di
parguruan, nang dibagasjoro pe dohot di parpunguan ni saluhut
halak Jahudi, ndang adong huhatahon marsibuni, boasa Ahu
disungkun ho?. Nasida naung umbege hatangKi, i ma sungkun, ai
diboto nasida do na Huhatahon i.
L: Dung didok Jesus songoni, dipastap sada opas na jongjong disi ma
Ibana,huhut ma didok: Songon i pangalusiM tu sintua ni malim?.Dungi ninna
Jesus ma mangalusi: Ia hurang na Hudok,hajongjongkon na hurang i, alai
anggo hona do, boasa pastaponmu Ahu?.
7. Marende sian BE.No.88:1 BL.106 “Jesusku naung manobus au”
➢ Jesusku naung manobus ahu sai naeng haholonganku Ho.Tu dolok Golgata
Ho laho, nionjar ni holongMu do. Hupuji nasa asiMi, alai gumodang
holongMi.
L: Asa, disuru si Hannas ma Ibana, naung tinali i,tu sintua ni malim Kayafas.
Disi do marpungu angka sibotosurat dohot sintua ni natorop i. Alai sai
mangihut do si Petrus mandaodao, sahat ro di alaman ni sintua ni malim i.
Laos bongot ma ibana tu bagas laho hundul tusi rap dohot angka naposo
marnida ujungna. Angka sintua ni malim ro di sandok rapot godang
mangalului panindangion gapgap dompak Jesus na tuk mambahen Ibana
marutang hosa. Alai nang pe hehe torop angka sitindangi gapgap, ndang
adong jumpangsa. Alai parpudi ro ma dua halak ninna ma: Didok halak on
tarbahen Ahu do mangalohai Bagasjoro ni Debata jala pajongjongonNa i
dibagasan tolu ari. Dungi hehe ma sintua ni malim i mandok tu Ibana:
R: Ndang alusanMu na hinatindangkon nasida i dompak Ho? Alai sai
hohom do Jesus.
L: Dungi dipangkulingi sintua ni malim i ma Ibana: Hupatolon ma Ho tu Debata
Sipangolui, asa dipaboa Ho tu hami manang na tutu Ho Kristus Anak ni
Debata?.Dungi didok Jesus ma tu ibana: Songon na nidokmi ma tutu. Alai
hudok ma tu hamu, olat ni on ma idaonmuna Anak ni jolmai hundul disiamun
ni hagogoon, jala ro di atas ni ombun ni langit. Gabe diribakkon sintua ni
malim ma paheanna mandok: Na mangaleai Debata do Ibana, beha do di
rohamu?
R:Jadi ditijuri nasida ma bohiNa, na deba manombuk, na deba
mangalinsingi huhut mandok: Surirangi hami Kristus, ise do
mamunu Ho?.
L: Alai hundul do anggo si Petrus di alaman i, jadi didapothon sada parompuan
ma ibana mandok: Dohot do ho dongan ni Jesus na sian Galilea i, alai diporso
4
 si Petrus do didok ma: Ndang huboto jala ndang huantusi na nidokmi. Laos
ruar ma ibana tu alaman jolo-jolo jala martahuak ma manuk. Alai marnida
ibana, diulahi naposo boruboru ima mandok tu na jongjong disi: On do sada
sian nasida. Alai mamorso muse anggo si Petrus. Jadi dung satongkin nari,
didok angka na jongjong disi ma muse mandok si Petrus: Tongon do dongan
nasida do ho, ai halak Galilea do ho. Gabe dipungka ma mamurai dirina huhut
manolon-nolon.
R: Ndang hutanda na nidokmuna i.
L: Dungi, martahuak ma manuk i paduahalihon, jadi diingot si Petrus ma na
nidok Jesus i tu ibana: Tolu hali do soadahononmu Ahu andorang so
martahuak manuk paduahalihon. Jadi marningot i tumatangis ma ibana.
→Ruas Jongjong.
8. MANOPOTI DOSA:
L: Tatopoti ma dosanta na godang i di adopan ni Debata. Martangiang ma
hita! Ale Tuhan Debata, Pargogo naso Hatudosan jala Amanami,hujou
hami do GoarMu Na Badia i ala targogot hami marningot dosanami.
R: Sai marasi ni roha ma Ho mida hami on.
L: O, Tuhan Jesus Kristus, Anak ni Debata na gabe jolma alani hami, na mate
jala hehe sian na mate.Jotjot do husoadahon hami Ho marhitehite
pangalaho dohot hatanami naso ture.
R: Asi rohaM tu hami, sai patongtong ma rohanami mangihuthon
lomo ni rohaM.
L: Sai unang tulak hami,sai tangihon ma hami Ho ale Debata Ama, Anak dohot
Tondi Parbadia. Amen !
S: (Mangendehon) BE.No.88:3 BL.106 “Jesusku naung manobus au”
➢ Jotjotna i husoadahon Ho, Sipangolu tondingkon. Mabiar lao mang-
hatindangkon Ho na manghophop au tongon. Hupuji nasa asiMi, alai
gumodang holongMi.
L: BAGABAGA NI DEBATA TARINGOT TU HASESAAN NI DOSA:
Songon on do hata ni Tuhan Jahowa, nunga diarsaki ho Ahu marhite sian
angka dosam, jala nunga dilojai ho Ahu marhite sian angka hajahatonmu.
Ahu tutu, Ahu sandiri manelesei angka pangalaosim ala ni hadirionHu,
jala ndang Hupaingot-ingot angka dosam. Hasangapon ma di Debata na
di ginjang !
R: Amen ! → Ruas hundul
L: Jadi dung diida si Judas parjehei naeng hona uhum na ma Jesus, disolsoli
ma rohana, dipaulak ma na tolu pulu rupia i tu angka Sintua ni Malim dohot
Sintua ni bangso: Sala do ahu hujehehon do halak na so marpipot. Alai didok
nasida ma: Ndang ro di hami i, ho do na sari disi. Jadi ditimpalhon ma perak
i tu bagasjoro i laos sumurut sian i laho maningkot. Alai ninna Sintua ni Malim
5
 ma: Ndang jadi padomuon i tu arta ni joroi, ai tuhor ni mudar do i. Jadi mardos
ni roha ma nasida manuhorhonsa tu ladang ni pande hudon bahen
parbandaan ni halak dagang.
R: Alani ma umbahen margoar i “Ladang mudar” sahat ro di sadari
on.
9. Marende sian BE.No.82 : 1 BL.21 “O Jesushu tu bugangMu”
➢ O Jesushu tu bugangMu ro marsomba rohangkon. Sai tarpuji, sai tarpuji
na pamalum tondingkon.
10. JAMITA: LUKAS 21:36
Alai dungo ma hamu mardongan tangiang,asa margogo hamu,pasiding
saluhut na naeng masa i,laho jongjong dijolo ni Anak ni Jolma i.
11. Marende sian BE.No.169:1-.. BL.224 “Ho, Sipangolu au” → PELEAN
➢ Ho Sipangolu au, sai topot ma au on. Sai unang mandaodao. Ho sian
rohangkon. Ro Sipangolu ro tibu, baen ma au anakMu tutu.
Dohot mudarMi buri au ias songon hapas ma au. Ias tutu, ias
tutu, dohot mudarMi buri au. Ias songon hapas ma au.
➢ Gogo ni mudarMi papatar ma di au. Tondi Parngolu i tongtong manogu
au. Ro Sipangolu ro tibu, d.u…
>> Orgen << → Ay.3. Ruas jongjong
➢ Togu ma rohangkon,sai taiti au tu Ho. Ai langkaMi tongtong, naeng
tiruonku do. Ro Sipangolu ro tibu, d.u…
12. PANUTUP: Tangiang (Pelean + Ale Amanami + Pasupasu) + Amen 3x.
===========================================================================
SUNGGUL-SUNGGUL:
1. Marsogot Ari Rabu, 05 April 2023 patupaonta dope Acara “Partangiangan
Passion Paduahon” maringanan di gareja on masuk pukul 19.30 WIB sahat
tu na simpul.Renta ma hita ro tu acara i.
2. Ari Jumat, 7 April 2023 ima Parningotan Ari Hamamate ni Tuhan Jesus,
markebaktian do hita di gareja on: 1. Kebaktian Manogot masuk pukul 08.00
WIB, dohot 2. Kebaktian Arian masuk pukul 10.00 WIB; laos “Marulaon Na
Badia” do hita di dua sesi ibadah i. Pukul 14.00 WIB patupaon ni Hurianta ma
muse “MARULAON NA HOHOM”, ima na marningot di Detik-detik Hamamate
ni Tuhan Jesus di Hau Pinarsilang.Renta ma hita mandohoti acara i.