Filipino at mga Katutubong Wika: Kasangkapan sa Pagtuklas at Paglikha

Marhay na aldaw! Maayong adlaw! Maupay nga adlaw! Magandang Araw!

Sa ating ginagalangan at butihing punong-guro, ma’am Francy Perillo, sa mga dedikado’t
nagagalingang guro ng Tapayas National High School, sa mga mag-aaral, kaibigan, magulang at
mga panauhing naririto ngayon, isang mapagpalang araw po sa inyong lahat.
Nais ko pong ipabatid sa inyong lahat na ako’y lubos na nagagalak sa pagkakataoing ito.
Isa pong pribilehiyong maituturing na maanyayahan maging panauhing tagapanayam sa
pagdiriwang na ito. Tulad ninyo, noon ako’y isa ring mag-aaral, nakaupo riyan, nagmamasid at
nakikinig sa mga tagapag-salita sa entabladong ito.
Tunay nga namang nananalaytay sa ating mga dugo ang pagka-Pilipino, kahit tapos na ang
buwan ng Agosto ay heto pa rin kayo at nagdiriwang ng Buwan ng Wikang Pambansa. Patunay
lamang ito na patuoy nating tinatangkilik at binubuhay ang ating Wikang Pambansa, ang Wikang
Filipino. Kaya’t bilang pakikiisa sa Pagdiriwang ng Buwan ng Wikang Pambansa mahalagang
maunawaan natin ang mensaheng nais ipabatid ng tema para sa taong ito na “Filipino at mga
Katutubong Wika: Kasangkapan sa Pagtuklas at Paglikha.
Kasabay ng paglipas ng panahon, maraming pagbabagong naganap. Para ba tilang
nilalamon ng makabago at modernong panahon ang kinagisnan ng mga tao. Mga pagbabagong
hindi lamang naganap sa ating kapaligiran kundi maging sa ating wika. Hindi na rin kasi natin
maipagkakaila ang malaking gampanin ng wika. Ang Wikang Filipino at mga katutubong wika ay
ang pundasyon ng ugnayang pangkaunlaran sa iba’t ibang larangan. Ano mang sektor, mapa
ekonomiya, agrikultura, kalusugan at edukasyon ay kinakailangan ng agapay ng wika. Ang mga
wikang ito ay mabisang kasangkapan sa pagkamit ng makamundong kaalaman at pagtuklas sa
tunay na kalagayan ng ating lipunan. Sa matalinong paggamit ng wika ay nakatutuklas tayo ng
mga iba’t ibang kaparaanan sa pagtuturo at iba’t ibang talento at kakayahan sa bawat isa sa atin.
Ang wika ay patuloy na nabubuhay sa mumunting tuklas na nagiging daan sa pag-usbong at
dakilang imbensyon at pagyabong pa lalo nito. Kaya’t sa pamamagitan nito ay nagagawa nating
makipagsabayan sa mga pagbabagong nagaganap.
Hindi na rin lingid sa ating kaalaman na nanganganib na ang kalagayan ng mga katutubong
wika. Unti-unti ng naglalaho ang wikang salamin ng ating lahi at masaklap pa ay may ilan ng
namamatay sa katutubong wika sa ating bansa. kaya’t kinakailangan na mabigyang karapatan
ang mamamayang katutubo sa malayang pagpapahayag, pagkakaroon ng edukasyon at
partisipasyon sa gawaing pampamayanan gamit ang katutubong wika bilang pangunahing tulay sa
pagpapanatiling buhay ng mga wikang pamana. Nararapat lamang na ipakita natin na higit nating
mapayayaman ang wikang Filipino kung gagamitin natin ito at bibigyang respeto ang bawat wika
sa ating bansa. Sa paggamit din ng mga katutubong wika ay higit nating mapapatatag ang
pundasyon ng unang wika. Ang patuloy na pagbibigay ng halaga, pag-aaral at paggamit sa
Wikang Filipino at mga katutubong wika ay maituturing na paghahasik ng binhi tungo sa mas
mayabong na wika at higit na lilinang sa kognitibong kaalaman at kasanayan ng bawat isa.
Gawin nating susi ang wikang Filipino at mga katutubong wika sa laganap na
globalisasyon. Wikang naiintndihan, wikang nagbubuklod sa ating lahat at nagsisilbing identidad
bilang isang Pilipino.
Tandaan “WALANG WIKA ANG NANGINGIBABAW SA IBA! BAWAT WIKA AY MAGKAKAPANTAY-
PANTAY, DAHIL BAWAT WIKA AY MAY NATATANGING KATANGIAN. KAYA’T ATIN ITONG
TANGKILIKIN AT MAS LALONG PAGYAMANIN PA!