GE (C) – 3 The Contemporary World

Speak in English Zone by Joel Costa Malabanan

( Reflection Paper)

September 13, 2019

Submitted by:

Monton, Vianne M

BSCE – 1C

Dr. Marijane V. Carpio

(Professor)
 Ang pagbabagong dulot ng globalisasyon ay tila isang kisap-mata. Ang wikang

Filipino na noon ay tinatangkilik ngayon ay naisasantabi na lamang. Ang mga

mangagawang Pilipino na sa halip sa sariling bansa manilbihan ay napipilitang mang-

ibang bansa upang makahanap ng mas malaking oportunidad. Ang mga kabataan na

noon ay naisasabuhay ang larong pisikal ngayon ay nahumaling na sa “social media”.

Ang mga ito ay ilan lamang sa mga pagbabagong nailahad ni Joey Costa Malabanan sa

pamamagitan ng isang awitin na pinamagatang “Speak in English Zone” na

nagpapatunay na mula noon hanggang ngayon ay nasa ilalim pa rin tayo ng

impluwensya ng dayuhang bansa.

“Ang bayan ko ay Speak in English Zone

Paghahandang yakapin ang globalisasyon

Nag-eeksport kami ng manggagawa't caregiver

Mga graduates namin ay nasa call center”

Ang patuloy na pagyakap ng bansang Pilipinas sa globalisasyon ay tuluyang

paglimot na rin sa wikang ating nakasanayan. Hindi masama ang matutong magsalita

ng Ingles ngunit ang hindi tama ang tangkilikin ito higit pa sa ating sariling wika.

Ipinapahiwatig din ng ikatlo at ikaapat na linya na tila ba nagsilbing hulmahan ang mga

paaralan sa Pilipinas ng mga kabataan upang maglingkod sa ibang bayan. Ang mga

nakapagpatapos ng pag-aaral ay mas piniling magtrabaho sa “call center” dahil sa

mataas na sahod higit pa sa sahod ng natapos nilang kurso.

“At ang bansang Pilipinas kahit pa agricultural

Walang makain ang mga mamamayan
Ang aming isip, salita at gawa ay kolonyal
Lahi kami ng alipin sa sarili naming bayan.”
 Kilala ang Pilipinas na mayaman sa sektor ng agrikultura ngunit hindi mabilang

ang mga Pilipino na naghihirap at walang makain. Hindi nabibigyan ng pansin ang mga

magsasaka na maliit lamang ang kita sa pagsasaka. Higit pa na nabibigyang atensyon

ang mga isyu na walang maidudulot na maganda sa ating bansa. Sa paglipas ng

panahon, hindi maitatanggi na ang impluwensyang dayuhan ay naisasabuhay pa rin

mula noon hanggang ngayon. Ang pagtangkilik sa mga produktong mula sa ibang

bansa ang isa sa mga patunay nito. Hindi lamang umuunlad ang ibang bansa dahil sa

pagtangkilik natin sa kanilang produkto ngunit sumisimbolo rin ito ng pagtalikod natin sa

sarili nating bayan.

“Sariling wika ang ang siyang magpapalaya

Sa sambayanang gapos ng tanikala!”
Wika ang isa sa patunay ng paglaya natin sa pagsakop ng mga dayuhang bansa

ngunit tayo mismo ang nagsasawalang bahala nito. Ang higit na paggamit ng wikang

Ingles ay patuloy na pagpapasailalim natin sa mga dayuhan na minsan nang inalipin

ang mga Pilipino. Sa katunayan, hindi na mga dayuhan ang dahilan kung bakit

hanggang ngayon ay nakagapos pa rin tayo sa tanikala. Ang naglagay sa atin sa bakal

na rehas ng pagkaalipin ngayon ay ang mga sarili natin, mga Pilipino.