Miercoles Santo

APOSTOLES at mga KABABAIHAN

1. San Pedro Apostol

Ang pinuno ng labing dalawang apostol ni Hesus, isang mangingisda mula sa Bethsaida,
Galilea. Nang kanyang ipinahayag na si Kristo ay ang anak ng Diyos, Pinalitan ni Hesus ng
Pedro ang pangalan niyang dating Simon, na ang ibig sabihin ay “Bato” sa wikang griyego.
“Mapalad ka, Simon na anak ni Jonas! Sapagkat ang katotohanang ito'y hindi inihayag sa iyo ng
sinumang tao kundi ng aking Ama na nasa langit. At sinasabi ko sa iyo, ikaw ay Pedro, at sa
ibabaw ng batong ito ay itatayo ko ang aking simbahan at ang kapangyarihan ng kamatayan ay
hindi magtatagumpay laban sa kanya.” (Mateo 16:16-19) Siya’y naging martir sa pamamagitan
ng pagpapako sa Krus na nakapatiwarik. Ang imahen ay nasa pangangalaga ni Arnel at Marlyn
Dela Paz

2. San Judas Tadeo Apostol

Ang alagad ni Hesus na pinsan din niya. Anak nina Santa Maria Cleofe at San Cleophas. Noong
Huling Hapunan siya ang nagtanong kay Hesus kung bakit ipinakita niya ang sarili sakanila at
hindi pa sa Sanlibutan? Sagot ni Hesus, “Ang sinumang magmahal sa akin ay susunod sa aking
aral.” Minartir sa pamamagitan ng pagpalo ng isang pamalo. Ang karaniwang hawak ng
kanyang imahen ay isang medalyon na may mukha ni Hesus dahil sinasabing kamukha niya ito.
Ang imahen ay nasa pangangalaga ng Parokya ng Inmaculada Concepcion

3. Santa Maria Jacobe

Tagasunod ni Hesus, at Ina ni Santiago Menor Apostol. Kilala rin bilang “Hakobo” Siya ay
saksi sa kamatayan, paglilibing, at muling pagkabuhay ni Hesus. Ang karaniwang hawak ng
kanyang imahen ay isang walis. Ang imahen ay nasa pangangalaga nina Randy at Mabel Ong

4. Santa Maria Salome

Tagasunod ni Hesus at asawa ni Zebedeo, at Ina ni San Juan at Santiago Menor Apostol, Saksi
rin sa kamatayan ni Hesus, gayundin sa paglilibing at muling pagkabuhay niya. Ang
Karaniwang hawak ng kanyang imahen ay isang insenso. Ang imahen ay nasa pangangalaga ng
Parokya ng Inmaculada Concepcion.

5. Santa Maria Magdalena

Siya ang pangunahing Babae na disipulo ni Hesus. Sakanya, pitong demonyo ang pinalayas ni
Hesus. Pagkatapos ng pangyayaring iyon siya’y naging masugid na disipulo ni Hesus, Saksi sa
kamatayan, paglilbing at muling pagkabuhay ni Hesus. Ang karaniwang hawak ng kanyang
imahen ay pabango at ang kanyang buhok dahil sa sinasabing binuhusan niya ng pabango ang
paa ng Panginoon at pinunasan pa ng kanyang sariling buhok. Ang imahen ay nasa
pangangalaga nina Roy at Lhot Atienza.

MGA PANGYAYARI SA BUHAY NI HESUKRISTO

6. Si Hesus at ang Babaeng Samaritana

Ang pakikipag-usap ni Hesus sa isang babaeng na kilala rin sa pangalang Photina, sa tabi ng
balon ni Hakob sa Sicar, Samaria. Kung saan winika ni Hesus “Ang bawat uminom ng tubig na
ito ay muling mauuhaw, subalit ang sinumang umiinom ng tubig na aking ibibigay ay hindi na
mauuhaw magpakailanman. Ang tubig na aking ibibigay sa kanya ay magiging isang bukal ng
tubig tungo sa buhay na walang hanggan.” Ang imahen ay nasa pangangalaga ng Pamilya
Javier.

7. Hesus Cautivo
Pag-iwan ng mga alagad, ito ang imahen ng Panginoong Hesukristo na simbolo ng pag-iwan ng
mga alagad. Nabanggit sa ebanghelyo ni San Mateo; “Ngunit ang lahat ng ito ay nangyari
upang matupad ang mga sulat ng mga propeta.Nang magkagayon, iniwan siya ng mga alagad at
sila ay tumakas.” Ang imahen ay nasa pangangalaga ni Kgwd. Bryan at Gng. Jean Castillo at
pamilya.

8. --------

9. Jesus Desmayado
Ang pagbagsak at pagkalupaypay ng Panginoong Hesukristo matapos hagupitin dahil sa hirap at
pagod. Gaya ng ipinahayag ni Propeta Isaias; “Nang dahil sa ating mga kasalanan siya’y
nasugatan, hinampas dahil sa kasamaang ating ginawa, ngunit hinilom tayo ng parusang
kanyang tinamo, at pinatindi pa ng mga hagupit na kanyang tinanggap.” Ang imahen ay nasa
pangangalaga ni Julius at Cherie Buenaventura.

10. Hesus dela Pacencia

Ang pagninilay-nilay ng ating Panginoong Hesukristo, matapos hagupitin at bugbugin.
Makikita sa imahen ng Panginoon ang matinding pagod at sakit na kanyang natamo habang siya
ay nakaupo. May pagmumuni-muni na may tagos-pusong pagtanggap sa sinapit niya.
Nabanggit mula sa sulat ni Propeta Isaias; “Malupit siyang pinarusahan, ngunit tinanggap niya
ito ng may kababaang loob. Hindi siya nagsalita tulad ng isang kordero na kakatayin o tupang
tatanggalan ng kanyang balahibo.”Ang imahen ay nasa pangangalaga ng Pamilya Javier.

11. Jesus Nazareno

Ang pagpapasan ng ating Panginoong Hesukristo ng krus patungo sa bundok ng Golgotha,
matapos ang paghatol ni Poncio Pilato ng parusang kamatayan sa udyok ng mga Punong
Saserdote. Si Hesus ay kanyang inilabas sa templo upang pasanin ang mabigat na Krus patungo
sa lugar na kanyang pagpapakuan. Ang krus na binuhat ni Kristo ay hindi lamang simbolo ng
mga kasalanang ating ginawa. Bagkus, ito rin ay sumisimbolo ng sakripisyong ating dapat
yakapin at ng mga yapak na dapat nating sundan. Sinabi na rin ni Hesus; “Kung ang sinuman na
nagnanais sumunod sa akin, talikuran niya ang kanyang sarili, pasanin ang kanyang krus, at
sumunod sa akin.” (Mateo 16:24) Ang imahen ay nasa pangangalaga ng Pamilya De Asis.

12. Santa Veronica

Ang ginang nag pahid sa kalunus-lunusang mukha ni Hesus habang pinapasan ang Krus. Siya’y
kilala rin sa pangalang Serabia. Ayon sa Pasyong Mahal; “Di nabatat, di natiis, naawa siya’t
nahapis nang makita at masilip ang mukhang tigib ng sakit ng dugo at madlang pawis.” Ang
imahen ay nasa pangangalaga ni Jose Martin Reyes.

13. Nasalubong ni Hesus ang Kanyang Ina

Nang magkasalubong si Hesus at ang namimighating niyang Ina, hindi rin maitatago ang
pasakit na pinagdaraanan ng Mahal na Ina, sa bawat hagupit, sa bawat pagpapahirap. Ngunit
tahimik niya lamang itong tinanggap. Ayon sa Pasyong Mahal; “Oh bunso kong sinisinta
ngayon ay magdalita ka iyang mabigat mong dala, bitiwan at ang kukuha ang nahahabag Mong
Ina!” Ang imahen ay nasa pangangalaga ni Mark Ordoñez at Pamilya.

14. San Juan Apostol y Ebanghelista

Siya ang alagad na kinalugdan ni Hesus. Anak ni Zebedeo at ni Santa Salome, at kapatid ni
Santiago Menor Apostol. Isang mangingisda at dating disipulo ni San Juan Bautista. Siya ay
saksi sa mga mahahalagang yugto sa Buhay ni Kristo. Kasama niya si Pedro nang utusan sila ni
Hesus upang magpunta sa lungsod upang ihanda ang kanilang hapunan para sa pista ng
paskuwa. Siya lamang ang buong tapang na hindi nagtago, bagkus, nanatili pa hanggang sa
paanan ng Krus kung kaya sakanya ihinabilin ang Mahal na Birheng Maria bago malagutan ng
hininga. Sa lahat ng mga alagad siya lamang ang hindi namartir. Ang imahen ay nasa
pangangalaga ni Dr. Nelson Tobillo.

15. Mater Dolorosa

Ang Mahal na Birheng Maria na nagdadalamhati, sa pagpapatuloy ng pagpapahirap sa
Panginoon, ay hindi rin malilingid ang pasakit na pinagdaraanan ng Mahal na Ina, sa bawat
hagupit, sa bawat pagpapahirap. Ngunit tahimik niya itong tinanggap, Kahit sanggol pa lamang
si Hesus mula noong inaalay pa lamang sa templo alinsunod sa batas ni Moises, nahulaan na ng
Propetang si Simeon ang misyon ni Hesukristo at ang pighating daranasin ni Maria. Sinabi noon
ni Simeon kay Maria “Tandaan mo, ang batang ito'y nakatalaga sa ikapapahamak o ikaliligtas
ng marami sa Israel. Dahil dito, ang puso mo ay para naring sinaksak ng isang balaraw.” (Lucas
2:25-49) Ang imahen ay nasa pangangalaga ng Pamilya Salas.