PIDARTA

Suksma matur ring pangenter acara antuk galah sane katiba ring titiang. Sadurung
titiang nglangturang matur-atur, ngiring sareng-sareng ngastiti bakti majeng ring Ida Sang
Hyang Widhi Wasa majalaran antuk pangastungkara,

“Om Swastiatu”

Para panureksa pacentok sane wangiang titiang, Ida dane sane dahat suksmayang
titiang miwah para yowana sane tresnain tiang. Titiang ngaturang angayubagia ring pangrauh
Ida dane sane sampun prasida ngamiletin acara pacentok Pidarta Basa Bali puniki.
Mungguwing pidartan titiang mamurda “Kawentenan Luu Plastik Sane Ngrusak Keasrian
Segara”

Ida dane sareng sami, ring aab jagate sane sampun modern sakadi mangkin nenten
mresidayang lepas saking piranti sane madasar saking plastik. Sane dumun kantun arang
kawentenan plastik punika, kantun nganggen piranti sane alami. Ngaput ajeng-ajengan
kantun nganggen daun, yening sane mangkin sampun kagentosin antuk piranti plastik.
Yening dumun ke pasar kantun akeh kramane makta sok utawi keranjang angge genah
bebaktaan, nanging sane mangkin sampun kegentosin antuk tas kresek utawi plastik.
Nganutin aab jagate sekadi mangkin kramane akehan sane ngangge plastik, santukan
karasayang danganan ngangge plastik punika. Sakewenten sakadi sane sampun kauningin
kawentenan plastik punika pacang ngametuang pikobet ring jagate, silih sinunggil inggih
punika luu plastik sane meweh terurai ring tanahe. Pikobet tiosan sane pacang ngametuang
saking luu plastik punika. Yening nenten becik antuk midabdabin, akeh kramane sane
ngutang luu nenten ring genahne, sekite keneh ipunne nenten mikayunin kawentenan
palemahanne. Risampunne ngametuang bencana, minakadi gentuh utawi banjir wawu raris
irika ngiwangang pemerintah utawi guru wiwesa. Kasujatinne bencana punika metu saking
pidabdab para kramane sane nenten urati ritatkala ngutang luu ngametuang raris bencana
banjir utawi gentuh punika.

Ida dane sareng sami, boya ja punika kemanten pikobet sane pacang kametuang luu
plastik punika taler pacang ngametuang pikobet sane tiosan silih sinunggul ngrusak
ekosistem segarane. Minab iraga sareng sami sampun uning kawentenan segarane dahat
mabuat pisan ring kauripan iraga sareng sami, ring segara punika maurip makudang-kudang
ulam sane nyokong kauripan iraga sareng sami. Para krama sane magenah ring pesisi taler
ngaruruh pangupa jiwa saking segara, antuk ngejuk ulam ring segarane, wenten taler sane
madue utsaha tambak, utsaha makarya tasik, tambak rumput laut miwah sane tiosan. Ring
musim sabehe akeh luu sane anyud kabakta saking toya tukad ke segarane sane marupa luu
plastik, punika sane ngawinang cemer kawentenan sagarane. Sering iraga miragi wenten
kapanggihin buron segara sane padem munakadi ulam paus sane padem sampun ring pesisi,
santukan kecemerin olih luu plastik punika. Kawentenan luu plastik taler ngrusak keasrian
pesisi segarane, akeh luu plastik kapanggihin sane pakantenane nenten becik. Napi malih ring
Bali puniki pinaka pulo pariwisata, mangda nenten sangkaning luu plastik punika ngawinang
rered pangrauh wisatawanne ke Bali.

Ida dane sareng sami majalaran antuk napi sane sampun kawedar iwawu, ngiring raga
sareng-sareng metu saking angga sarira soang-soang, nangiang pikayunan midabdabin
kawentenan luu plastik ring palemahan iragane antuk parilaksana sane prasida ngirangin
kawentenan luu plastik punka. Akeh pidabdab sane prasida kalaksanayang minakadi
ngirangin ngangge piranti plastik sane mangge apisan utawi sekali pakai. Napi malih sane
mangkin sampun kamedalang peraturan Gubemur Bali no.97 th 2018 indk “Pembatasan
Timbulan Sampah Plastik Sekali Pakai”. Ngiring iraga sareng-sareng nyokong program
Bapak Gubernur punika antuk nglaksanayang napi same sampun kamuat ring Pergub punika.
Ritatkala matumbasan ngiring makta genah saking jro soang-soang mangda nenten akeh
ngangge plastik, milah luu plastik sareng luu daun-daunan. Sampunang ngutang luu ring
tukade. Sapunika taler para kramane sane madue utsaha sane magenah ring pesisi segara
mangde jati - jati urati nyaga kelestarian segara duene, silih sinunggil sane prasida
kalaksanayang inggih punika nenten ngutang luu sekita keneh antuk nyayagayang genah luu.
Punika taler para bendega sane ngrereh pangupajiwa ring segara mangde prasida taler sareng
nyaga kelestarian segara duene, mangde segara duene prasida mapica merta ngantos
ripungkur wekas.

Ida dane sareng sami cutetang titiang indik kelestarian segarang nenten je wantah
dados tanggung jawab krama sane wenten ring pesisi kemanten, sakewanten iraga sareng
sami sane wenten ring sajebag jagate puniki madue tanggung jawab nyaga tur ngupapira
kalestarian segarane santukan iraga sareng sami sane sareng muponin napi sane wenten ring
segarane punika.

Inggih Ida dane sareng sami sane kusumayang titiang, wantah asapunika prasida atur
pidarta titiang, mogi-mogi napi sane aturang titiang iwawu wenten pikenohnyane. Tios ring
punika, titiang tan lali nglungsur geng rena pangampura, manawita wenten kirang atur titiang,
maka wesananing atur, puputang titiang antuk parama santi,

Om Santih, Santih, Santih Om