Araling Panlipunan 8

Ikaapat na Markahan
KAPAYAPAANG PANDAIGDIG

Upang hindi na masundan pa ang Ikalawang Digmaang Pandaigdig, humanap ng paraan ang mga bansa
upang tuluyan nang makamit ang kapayapaan. Isa sa mga hakbang na ginawa nla ay ang pagtatatag ng United
Nations. Basahin mo ngayon ang teksto sa ibaba tungkol dito.

Ang Mga Bansang Nagkakaisa (United Nations)

Hindi pa natatapos na Ikalawang Digmaang Pandaigdig, naisip ni Pangulong Roosevelt ng United States na
muling magtatag ng isang samahang pandaigdig na papalit sa Liga ng mga Bansa.
Apat na buwan bago sumalakay ang mga Hapones sa Pearl Harbor, sina Pangulong Roosevelt at Punong
Ministro Winston Churchill ng Inglatera ay bumalangkas nang deklarasyon, ang Atlantic Charter, na siyang saligan ng
26 na bansa sa nilagdaang Deklarasyon ng Mga Bansang Nagkakaisa (United Nations). Sa isang kumperensiya sa
Moscow noong Oktubre 1943, ang United States, Great Britain at Soviet Union ay nagkasundo na pairalin at
panatilihin ang kapayapaan sa sandaling matalo ang Axis. Sinundan ito ng Deklarasyon ng Apat na Bansa, kasama ang
Tsina, para maitatag ang isang pangkalahatang samahang pandaigdig upang mapanatili ang kapayapaan at kaligtasan
sa mundo. Limampung bansa ang nagpulong sa California, United States, upang balangkasin ang Karta ng mga
Bansang Nagkakaisa. Noong ika24 ng Oktubre, 1945 ay itinatag ang Mga Bansang Nagkakaisa o United Nations (UN).
Muling nagpulong ang mga kinatawan ng mga bansa sa London noong 1946 at nahalal na unang Sekretaryo-Heneral,
si Trygve Lie ng Sweden.

Ang Mga Bansang Nagkakaisa ay may anim na pangunahing sangay:

1. Pangkalahatang Asemblea (General Assembly) -ang sangay na tagapagbatas ng samahan. Binubuo ito ng mga
kinatawan ng lahat ng mga kasaping bansa, at dito isinasagawa ang mga pangkalahatang pagpupulong.
2. Sangguniang Pangkatiwasayan (Security Council)- ang sangay tagapagpaganap. Binubuo ito ng 11 kagawad na
ang lima ay permanenteng miyembro, samantalang ang anim ay inihalal sa taning na panunungkulan na dalawang
taon.
3. Kalihim (Secretariat) -ang pangkat ng mga tauhang pampangasiwaan ng U.N. na nagpapatupad sa mga gawaing
pang-araw-araw.
4. Pandaigdig na Hukuman ng Katarungan (International Court of Justice) -ang siyang sangay na nagpapasya sa
mga kasong may kinalaman sa alitan ng mga bansa.
5. Sangguniang Pangkabuhayan at Panlipunan (ECOSOC) -binubuo ng 54 na kasaping bansa. Ito ang sangay na
namamahala sa aspeto ng pangkabuhayan, panlipunan, pang-edukasyon, siyentipiko at pangkalusugan ng daigdig. 6.
Konseho ng Pagkakatiwala (Trusteeship Council)- ito ang namamahala sa mga trust territories ng League of Nations,
mga teritoryong kinuha mula sa Axis Powers pagkatapos ng Ikalawang Digmaang Pandaigdig.

Layunin ng mga Bansang Nagkakaisa

1. Panatilihin ang pandaigdigang kapayapaan at seguridad
2. Paunlarin ang relasyong pagkakaibigan ng mga bansa ayon sa pagkakapantay pantay na karapatan at
katarungan.
3. Magtamo ng kooperasyon sa paglutas ng mga suliraning internasyonal, sosyal, kultural at pangkabuhayan
4. Tulungan ang mga bansa sa paggawa ng mga kasunduang pangkapayapaan at pagkakaibigan.

Gawain: Kapayapaan ng Mundo…Minimithi Ko!

Panuto: Bumuo ng islogan na nananawagan sa mga bansa na magkaisa at magtulungan lalo’t higit sa panahong ito
ng pandemya. Gawin it sa short size bond paper.