PAMANTAYAN SA PAGKAKATUTO:

Naipapamalas nang mag-aaral ang pangunahing kaalaman, kasanayan, at

pagpapahalaga sa agrikultura, entrepreneurship at ICT, ekonomikong pantahanan, at
sining pang-industriya na maaaring makatulong na mapabuti ang buhay ng sarili at
pamilya.

PAMANTAYANG PANGNILALAMAN:
Naipapamalas ang pang-unawa sa panimulang kaalaman at kasanayan sa pag-
aalaga ng hayop sa tahanan at ang maitutulong nito sa pag-unlad ng pamumuhay

PAMANTAYANG PANGGANAP:
Naisasagawa ng makawilihan ang pag-aalaga sa hayop sa tahanan bilang
mapagkakakitaang gawain

DUNONG TUDLAAN:
Natatalakay ang kabutihang dulot ng pag-aalaga ng hayop sa tahanan
Natutukoy ang mga hayop na maaaring alagaan sa tahanan
Naiisa-isa ang wastong pamamaraan sa pag-aalaga ng hayop
a. pagsasagawa nang maayos na pag-aalaga ng hayop
b. Pagbibigay ng wastong lugar o tirahan
c. Pagpapakain at paglilinis ng tirahan

MGA GABAY NA TANONG:

 Ano-ano ang mga hayop na maaring alagaan sa ating bakuran?
 Ano ang mga benepisyo na maari nating makuha sa pag-aalaga ng mga hayop?
 Gaano kahalaga sa ating mga Pilipino ang pag-aalaga ng mga hayop?
 Ano ano ang mga tamang pamamaraan sa pag-aalaga ng mga hayop?

Pangkalahatang Ideya

1|EPP 4
 Maraming gawaing mapagkakakitaan ang magagawa sa loob ng tahanan o
bakuran. Kailangan lamang ang kasipagan, tiyaga, at wastong kaalaman sa mga
gawaing ito. Kabilang na dito ang paghahayupan. May mga uri ng hayop na inaalagaan
sa sakahan tulad ng mga baboy, kambing, at manok. Mayroon namang maaaring
alagaan sa tahanan.
Maraming pamilya ang nagigiliw at nalilibang sa pag-aalaga ng aso, pusa,
kuneho, at iba pa. Isa itong gawain na ikinasisiyang gawin ng bawat kasapi ng pamilya
lalo na ang mga bata. Para sa karamihan, dito sila unang natuto ng pagiging responsible
at kung paano mag-alaga ng iba at magpahalaga ng ibang buhay. Bukod sa mga hayop na
nabanggit, ano pang hayop ang maaaring alagaan sa tahanan?

Mga Kabutihang Dulot sa Pag-aalaga ng Hayop sa

Tahanan
Sa pag-aalaga ng hayop, natutuo ang isang bata na maging maalalahanin,
responsible, matiyaga, at malinis. Sa mga nakatatanda, nagiging libangan nila ito o
hanapbuhay.
Narito ang mga kahalagahang dulot ng pag-aalaga ng hayop sa tahanan:
 Nakapagpapasaya sa mag-anak, mainam na libangan, at nakapapawi ng pagod
mula sa maghapong paghahanapbuhay.
 Nakatutulong ito sa pagpapaunlad sa kabuhayan ng mag-anak.
 Maaaring kumita ang mag-anak sa pag-aalaga ng mga hayop sa pamamagitan ng
pagpaparami at pagbebenta nito.
 Natututo ng konsepto ng pag-aaruga ang isang batang nag-aalaga ng hayop.
 Nagsisilbing libangan ng mag-anak ang pag-aalaga ng mga hayop.
 Nagiging malapit sa isa’t isa ang mga miyembro ng pamilya dahil sa pagmamahal
at pag-aaruga sa hayop.
Mga Hayop na Maaaring Alagaan sa Bahay

Dagang costa Love birds kuneho

aso
Dalawang pusaUri ng
Pag-aalaga
kalapati ng Hayop

2|EPP 4
 Narito ang dalawang uri ng pag-aalaga ng mga hayop. Ang mga ito ay
nakatutulong sa pagpapaunlad ng pamumuhay ng tao. Kailangan lamang nito ng sipag,
tiyaga, at pagmamahal sa mga hayop na aalagaan.

 Pambahay na pag-aalaga o Backyard production

Ito ay isang paraan ng pag-aalaga kung saan sa likod bahay inaalagaan ang mga
hayop.

 Pangmalakihang pag-aalaga o Commercial Production

Ang paraang ito ay mangangailangan ng malawak na lugar, malaking pondo para
sa kulungan, pagkain, at iba pang gastusin. Kailangan din ng permiso sa pamahalaan at
barangay para maisagawa ito. Hindi ito pinapayagan sa mga lugar na tirahan ng tao.

Sa pag-aalaga ng hayop, maging pambahay o pangmalakihan, may mga dapat

isaalang-alang at bigyan ng sapat na pag-aaral tulad ng:
 Uri ng hayop na aalagaan
 Pagkukunan ng malinis na tubig
 Maayos na bahay o kulungan
 Pagtatapunan ng dumi
 Pagkain o feeds
 Mga taong mag-aalaga
 Angkop at ligtas na lugar
 Kapital o puhunan

Wastong Pamamaraan sa Pag-aalaga ng Hayop sa

Tahanan
Ang pag-aalaga ng hayop ay inaangkop sa espasyong mayroon at sa
kakayahan at capital ng mag-anak na nais mag-alaga ng mga hayop.
May mga natatanging pamamaraan sa pag-aalaga sa mga hayop depende sa
kanilang uri. Subalit, may mga ilang pamamaraan na nagagamit sa lahat. Ilan dito ang
mga sumusunod.

 Pagpapagawa ng tamang lugar na paglalagyan o tirahan para sa alagang

hayop
Kailangang sapat ang laki ng lugar o kulungan at
may malayang pinagdadaluyan ng hangin ang hayop upang
makahinga ng maluwag. Kapag nadagdagan ang inaalagaan,
kailangang lakihan ang kulungan upang lumaki nang maayos
at malusog ang mga hayop. Siguraduhin ding naaayon ang
tirahan sa uri ng hayop. Huwag pagsasamahin ang
magkaibang uri ng hayop sa iisang kulungan.

 Pagbibigay ng wasto at sapat na pagkain at malinis na tubig

Mahalaga ito para sa malusog na paglaki ng alagang
hayop. Bagamat mahalagang huwag kukulangin ang pagkain,
dapat ding bantayan na huwag sumobra ang pagpapakain sa
hayop.

3|EPP 4
  Pagbibigay ng bakuna at bitamina
Maraming uri ng hayop ang nangangailangan ng bakuna upang maging ligtas ang paglaki
at hindi makapinsala sa mga taong nasa paligid.

 Pagkonsulta sa manggagamot
Kapag may kakaibang napansin sa alaga tulad ng
pagkamatamlay, pagdudumi, at hindi pagkain nang wasto,
makabubuting patingnan ito sa beterinaryo.

Pagpaparami ng Alagang Hayop

Bukod sa kasanayang dulot ng pag-aalaga ng hayop sa tahanan,
maaari rin paramihin ang mga ito upang maibenta at pagkakitaan.
Kinagigiliwan ng mga bata ang pag-aalaga ng mga ibon tulad ng
kalapati.

Pag-aralang mabuti ang paraan ng pag-aalaga at pagpaparami

nito.

 Pag-aalaga
ng kalapati
Ang kalapati ay nabubuhay kahit saang lugar at
anong klima. Masaya sila sa lugar na may maraming puno.
Kailangang mataas ang bahay ng kalapati upang ligtas sa
daga, pusa, at ahas.
Kailangan din ng may bubong o pagsisilungan kapag
masama ang panahon lalo na kung matindi ang init ng araw o
malakas ang ulan.

Tirahan ng Kalapati:
1. Gumawa ng kulungan na may maraming bukas na pinto.
2. Lagyan ng tuyong dahon ang loob ng bahay ng kalapati.
3. Maglagay ng malaking lalagyan ng tubig na magiging inuman at paliguan kung
mainit ang panahon.
4. Dalawang pugad ang kailangan ng kalapati. Ang isa ay para sa pangingitlog at isa
naman para sa pagpipisa.

Ang karaniwang ipinakakain sa mga kalapati ay ang mga sumusunod:

 munggo
 sorghum
 palay
 buto ng sunflower
 mais na giniling
 prito at giniling na mani
 mumo ng tinapay

4|EPP 4
 Paraan ng Pagpaparami ng Kalapati
1. Natural na pagtatalik – pinababayaan lamang silang pumili ng asawa sa kanilang
sariling panahon at kondisyon.
2. Pilit na pagtatalik – kinukulong ang dalawang pares ng kalapati sa loob ng
dalawang linggo. Ang itlog ng kalapati ay nililimliman ng labing pitong araw.
Pagkaraan ng 25 hanggang 30 araw, maaari nang ipagbili ang mga batang kalapati.

Pag-aalaga ng Kuneho
Isa sa pinakamadaling alagaang hayop ay ang
kuneho. Maaari itong alagaan sa bahay o sa
bakuran kahit hindi gaanong malaki ang lugar o
epasyo. Wala ring paghihigpit ang mga lokal na
pamahalaan kahit sa mga mabahay na lugar. Hindi
kasi ito maingay tulad ng mga baboy at manok at
hindi masama ang amoy nito. Walang amoy ang
dumi nito at mainam gamiting pataba sa lupa
nang hindi na kailangan pang iproseso. Maaari na itong direktang ihalo sa
pinagtataniman nang hindi nakasisira sa ugat ng halaman.
Sa Pilipinas, madalas inaalagaan ang kuneho bilang pet lalo na sa mga tahanang
may bata. Bagamat maselan at hindi maaaring hawakan nang tulad sa paghawak sa aso at
pusa, kinagigiliwan itong alagaan lalo na’t tahimik at
malinis. Hindi pangkaraniwan lalo na dito sa bansa,
may ilang nag-aalaga ng kuneho para sa karne nito.
Mainam kasi sa kalusugan ang karne ng kuneho, hindi
ito mataba at mababa ang cholesterol.

Mga Dapat Tandaan sa Pag-aalaga ng

Kuneho

1. Bigyan ng matibay na kulungan ang alagang kuneho na may sapat na espasyo

upang makagalaw, kumain, umunat, at dumumi. Maaari itong palabasin upang
makapag-ehersisyo sa mas malawak na lugar.
2. Ang mga kuneho ay magugulatin kaya’t mahinahon lamang ang pagsasalita at
iwasan ang labis na pag-iingay.
3. Siguraduhing lagi itong may sapat na inuming tubig na malinis.
4. Pakainin ng sariwa at masustansiyang pagkain. Pakainin lamang nang sapat.
5. Panatilihing malinis ang kulungan at paligid.
6. Siguraduhing tuyo ang alaga, huwag itong hahayaang mabasa ng ulan. Mas
mainam sa mga kuneho ang malamig na klima at kapaligiran. Ilayo ang kulungan
sa mga maaaring panggalingan ng init tulad ng lutuan o matinding sikat ng araw.

Pagkain ng Kuneho
5|EPP 4
 May mga nabibiling pellets na pinapakain sa mga
kuneho. Mainam ito sa mga alaga dahil kumpleto sa
sustansiya at magiging maganda ang paglaki at pagtubo ng
balahibo. Mahilig din itong kumain ng damo at madahong
gulay na sariwa. Siguraduhin lamang na hindi sosobra ang
pinapakain. Iwasan din ang matatamis na prutas tulad ng
saging at mansanas.

Pagpaparami ng Alagang Kuneho

Dahil madali at hindi magastos alagaan ang kuneho, maganda itong pagkunan ng
dagdag na pagkakakitaan ng pamilya.
Ilan sa mga paalala para sa mga gustong sumubok ng ganitong uri ng hanapbuhay
ang sumusunod.

 Bilang panimula, mamuhunan muna para sa dalawang babaeng kuneho na

dalawang buwan gulang at isang lalaking kuneho na malusog, agresibo, at walang
depekto.
 Pumili ng malusog na lahi tulad ng New Zealand o California White.
 Ipagtanong ang pinaglahian ng kunehong babae. Mainam kung ang bibilhin ay
nagmula sa kunehong malakas at marami kung manganak.
 Magpagawa ng hiwa-hiwalay na kulungan para sa mga alaga at ipuwesto ito sa
may lilim, upang maprotektahan sa init ng araw.
 Ang karaniwang sukat ng kulungan ay may laking 2.5 x 4 na talampakan at 2
talampakan ang taas.

Tandaan:
 Ang pag-aalaga ng mga hayop sa tahanan ay makatutulong sa pagpaparami
ng makakain, pag unlad ng kabuhayan ng mag-anak. Hindi lamang
panghanapbuhay ito kundi isang libangan na nagbibigay kasiyahan sa tao.
 Ang paghahayupan ay makatutulong sa pagkakaroon ng karagdagang kita ng
pamilya.
 Ito rin ay magsisilbing hanapbuhay upang kumita ang mag-anak, umunlad
ang isang pamayanan, at gumanda rin ang kalagayan ng ekonomiya ng bansa.

Faith Formation:

TAGAPANGASIWA NG NILIKHA

Mahalaga ang mga hayop sa ating mga tao. May pagkakataong dito tayo kumukuha
ng bagay na isinusuot, dito rin tayo kumukuha ng ilang makakain sa pang araw-araw,

6|EPP 4
nagsisilbi rin silang pampagaan ng loob sa ating mga tao lalo na kapag sila’y inaalagaan.
Katulad nating mga tao, sila rin ay nilikha ng Diyos, sila rin ay may buhay. Patuloy natin
silang alagaan at mahalin upang hindi maubos at patuloy pang makita ng mga susunod na
henerasiyon.

Bible Verse:
Kaya nilikha ng Dios ang tao, lalaki at babae ayon sa wangis niya.
( Genesis 1:27 )

Sanggunian:
Peralta Gloria A. (2016) Masayang Paggawa, Maunlad na Pamumuhay Vibal Group, Inc.
Gregorio Aranet Avenue, Quezon City ISBN 978-971-07-3800-7

7|EPP 4