folktales/legends of samoki

Nan kuling

Ad Paingan, waday nan sin akhi ay nanguso, cha Pangesfan ken Kitongan. Si Pangesfan nan yon-a,
Nan kinnapidwan ama cha, nauyong ya kiyayotan.Adina panganen chaicha nu adi cha en madno.

Isa’y akhew kanan ina cha, “enkhayo manga-ew tay maid isunor tako.” “Wen Ina”, inisfat cha.Sacha’t
alan nan pinnang ya umey cha manga-ew. Nu adicha abfuluten siya et adi cha mangan wenno mafaig
cha.

Misuyao nan sinmaalan cha. Ensaad cha nana wit cha iska aw-wichan. Fumala si inacha ya palalo nan
layad nay a kanana, “Ah! Sinmaar kayo, akayo ta mangan kayo, nay nauto nan safog.” Maschem pay ya
in-uto si inacha. Ala nay a chumtena na chey kaew cha. Sanat chentan ya ad-I fumichang. Palalo et nan
sunget na. Kanan, “ngag man nan kina-ew yo’y nay, ad-I fumichang. As wakas ilaen yon an luting, faken
nan ferfer.”

Mawakas pay, umey cha kasin manga-ew. Kinmalab si Pangesfan isnan kaanchuwan ay kaew. Tinmukcho
isnan chakchakowag ay panga sana’t alan nan pinnang nay a putongena nan siki na sanat ibkhas ken
Kitongan ay nauchi na. Kanana, “Ke sikim na mo?” Sungfat Pangesfanfan, “Alaem ketya”. Sana’t akhes
putlongen nan limana ya ibkhas na kasin ken Kitongan. “Ke limam na?” “Fetkem ketya ta sumaar ka ya
kanam ken ina en, ensaar mo nan ab-afichang ay kaew” kanan Pangesfan. “Adik ammo nan chalan,”
sungfat nan nauchi na. “Engka ketya”, sungfat Pangesfan, saet tet-ew sumaar siya. Pachong na pay ka
chalan, wad-ay nan yun-ana ay mangun-unod ken siya sanat kanan en “Wikoko! Wanwanchem nan
aliwa-ew ko engkhana’s afong tako.”

Sinma-ar pay et natakhang si ina cha isnan inilana ay kaew na. Saet intangad ya wad-ay nan
chakchakowag ay ay-ayam ay menlewliwes isnan afong cha. Nen falin siya ay ay-ayam. Saet inkali ad
tongcho kanan en, “Panganem ya ad-im chacham-en ay mamaifaig isnan nauchik.” “Et ad-ik,” inisfat
inacha ay cha en akhar tay palalo nan fafawina. Cha pay umey nan akhew, khad-in umali nan chey ay ay-
ayam ay enlewliwes isnan tongcho nan ili ay mamantay ken nauchi na. Nan ay-ayam ay nay et siya nan
kanan cha ay “Kuling.”