THE VICAR APOSTOLIC OF TAYTAY

Bishop’s Residence, Curia Bldg.,

AVT Mission Center, St. Joseph the Worker Village
5312 Taytay, Palawan, Philippines

Liham sa mga Altar Servers

“Ako’y iyong nakikita, O Panginoon, ang lahat ng gawain ko’y pawang iyong
nalalaman.” (Salmo 139:3)

Mahal kong mga Altar Servers,

Ako ay natutuwa na bata pa kayo, kayo ay nagbibigay na ng panahon para

maglingkod sa Diyos sa pagiging Altar Servers. Malaki ang tulong na binibigay
ninyo sa mga pari. Marami sa inyo ay hindi lang naglilingkod sa Misa ngunit kasama
din kayo sa paghahanda ng mga bagay para sa Misa at sa paglilinis pa nga sa
simbahan. Sa maayos ninyong paglilingkod, nakakatulong din kayo sa mga tao sa
kanilang panalangin sa pagbibigay ninyo ng angkop na paggalang pagpaparangal sa
Diyos.

Sana kayo ay napapalapit din sa Diyos dahil sa inyong paglilingkod sa Misa. Sikapin
ninyong magdasal sa Misa. Ang Banal na Misa ang pinakamabisang panalangin at
pagsamba sa Diyos, kaya sa buong Misa nandoon kayo sa loob ng simbahan o ng
chapel at hindi sa likod ng sacristy. Sabayan ninyo ang mga sagot at mga awit at
magdasal din kayo. Mapalad nga kayo kasi nandoon kayo sa harap at nakikita at
naririnig ninyo ang lahat ng ginagawa at sinasabi sa Misa. Makinig kayo sa mga
pagbasa at sa homilia. Sa ganitong paraan mas magiging malapit kayo sa Diyos at
mas lalo ninyo siyang makikilala dahil sa inyong pagiging Altar Server. Tumanggap
din kayo ng Banal na Komunyon sa mga Misang pinaglilingkuran ninyo. Tanggapin
ninyo ang Katawan ni Kristo.

Manghikayat din kayo sa iba pang kapwa kabataan ninyo na sumali sa pagiging Altar
Servers lalo na sa mga chapels na wala pang Altar Server. Masaya ang maglingkod
sa Diyos.

Dahil sa kayo ay nakikita sa harap ng simbahan at sa tabi ng altar sa Misa, may

paghanga din sa inyo ang inyong kapwa kabataan at ang mga tao. Huwag ninyong
hayaang mawala ang paghangang ito. Sikapin ninyo na mamuhay ng maayos,
magalang, at madasalin sa school at sa bahay. Maging halimbawa kayo sa iba.
Ipakita ninyo na kayo ay palaging nasa harap ng Diyos kahit na kayo ay nasa labas
na ng simbahan. Ang totoo naman talaga ito. Kahit nasaan tayo, nakikita tayo ng
Diyos at mahal niya tayo.

Ang panalangin ko ay sa paglaki ninyo, maalaala ninyo na kayo ay naging altar

servers, kaya napapahalagahan ninyo ang Banal na Misa at palagi kayong lumalapit
kay Jesus.

Ang kasama ninyong lingkod ni Jesus,

Obispo Broderick Pabillo

Obispo ng Bikaryato ng Taytay
March 1, 2023
THE VICAR APOSTOLIC OF TAYTAY
Bishop’s Residence, Curia Bldg.,
AVT Mission Center, St. Joseph the Worker Village
5312 Taytay, Palawan, Philippines