Wojna w łoczach ołmy Zofiki

Łojziymdziejsiunt szejś lołt tymu w Dańcu (wtory w tamtym czajsie leżoł na terynie Niymiec)
urodzióła się moja ołma Zofia. My gołdomy do niyj Zofika. Zawsze żech lubioł suchać łopowieści
mojej ołmy, ftoroł ujrzała co to je wojna jak miała yno 9 lołt. Łubia tyż łoglondać filmy wtore
pokazywały wojna. Jak to widzieli zwykli ludzie. Ołma miyszkała w Dańcu i te łopowiejści bydom z
tum okolicą zwionzane. Jak to padała moja ołma kampanii wrzejśniowyj w 1939r wtoroł buła na
wschodzie nie łodczuła. Wojna prziszła z armią czerwuną , wtoroł wlazła do Dańca 21 stycznia 1945.
W 1944 wuł wszyndzie fligealarm. Ludzie byli wystraszyni. Nie wiedzieli co robić. Kedy
słyszeli wybuchy i larmo zaczli uciekać do lasa. Amerykany leciały w strona Zołwadzkiego bo tam buły
łobiekty przemysłowe. Zajś w Izbicku buło Niemieckie lotnisko szkolne. Kolumny czołgów ruskich
jechały łod Łozimka w strona Łopola choć most w tamta strona buł szprignięty. Niymieckie łoddziały
skludziuły się w łokolicznym lesie. No i kedy te czołgi jechały od lasa połd huk. To niymiecki żołnierz
szczeloł do Rusa siedzącego na pancerzu i łun slecioł z czołgu ranny. Jego towarzysze łoddali połra
szczałow i Niemiec połd. Rus bul poszczelony w rynka. Łod razu zaniyjśli go do ciotki Hanki wtoroł
wrołz z ołmą go łopatrzuly. Tyn jym bardzo dziykowoł. Chop ujżoł babka co jom kobiyty upiykły. A że
buł godny wziuł babka i wylołz z chałpy. Ciotka poleciała za niym i urwała konsek ciasta. Mama ołmy
zawołała dzieci do dum. Chałpa Zofiki stoła na ulicy Łozimskiyj. Z łokna buło widać jak na kuńcu drugi
stoi srogi ruski kanon co strzyloł do tych czołgów na drugyj strunie drugi ,wtore tyż buły Ruskie. Jedyn
wojołk się złonaczył co łoni robią i szczeluł w luft żeby się kapli że niszczom swoich. No i tak Zofija i
łod nij rodzyństwo patrzyli na te wojynne wydarzynia a ich mama cały czas jym wajała że muszom się
trzimać z zdala łod okna bo jeszcze ich uszczelą. Nojmodszoł siostra ołmy buła małoł i łoddali i ją pod
opieka do znajomyj żeby nic się jej nie stało.
Połra dni puźnij szli w trojka drugą prziszoł do nich rus i pedzioł: „chadziajko idź do dom bo
przijdom inny i byndom połlic”. Tuż wszyjscy poszli po nojmodszol siostra i szli nazołt do chałpy.
Potym richtich przylazły take mongołle co łajziyli po chałpach i kradli. Mojyj ołmie wlyjźli do chałpy i
szukali w szranku Hitlera! Wziyli se krauzy z jagodami. Nie umieli ich lotworzić bo buły na guminy a
nie na dekliki. Besto rozwalyli krauzy o mur i zostały na niym sroge fleki po jagodach. Rusy czynsto
włazióły do chałpy ołmy. Łojciec Zofiki buł wojołkym. Nigdy nie kurzył cigaretów i swój przydział
wysyłoł do dom. Tam je skludzali na piyntrze w bifeju. Nazbiyrala sie srogoł szuflołda połnoł
cigaretów. Mama Zofiki rozdołwała je wojołkom żeby se poszli. Nojpiyrw po 5 cigaretów a potym
gorść. Jak sie skończóły to łazili i szukali czy kajś jeszcze połra niy ma. Na wsi stoł sklep „Nojwald”.
Jego właściciele to buły Niymce co sie bołli Rusów i besto uciykli. W tym sklepie wisioł łobrołz Adolfa
Hitlera i besto mongołle zchajcowali cały sklep. Na nieszczyńscie oprócz czołgów co jechały łod
Łozimka jechała tyż drugoł armia łod struny Krojśnicy. Te żołniyrze jechali na furach co kunie ciągły. Ci
zajś w Dańcu kradli słoma i łowies żeby nafutrować konie. Ale pieruny kradły tyż zwierzynta . Mojyj
ołmie porwali krowa co ją Łysina nazywali. Rusy zbierały krowy żeby je wysłać na wschód ale jak
Łysina uciekala to ja zaszczelyli. Słyszoł żech tyż historia o tym jak mama ołmy Zofiki miała
zapeklowane w beczce świńskie miynso. Boła się o to besto w studole wruła ją trocha w ziymia i
przikruła trocinami żeby jej nie podwandzili. Pech chciał że widzioł to somsiołd Dynis i nakapowoł
Rusom. Łuni szli prosto do studoły wziyli nojlepsze konski miynsa i poszli. Ruscy skłołdali swojoł
amunicja do skrzyń przed kapliczka. Pewnego dnia lecioł nad niom Niymiecki fliger. Łon ujrzoł te
skrzinie i ściepnuł bomba. Ołma pedziała że jakby w nie trafiuł to by pu Dańca nic nie łostało. Dziynki
Bogu bomba trafiuła połra cali łod amunicji. Rusy tak się wystrachali że zarołz skludziyli amunicja po
chałpach i w kapliczce.
Take to łopowiastki wojynne opowiadoł mi moja ołma. Jak se tak potym o tym myślam to
widza jak ci ludzie ciynżko mieli. Nie umiam se wyobrajzic co łuni czuli. Durch bołli się co baje na
drugi dziyń . Bardzo bych chciał żeby tych łopowieści nie zapumniec. To jest czynś historii a jak
pedzioł Józef Piłsudzki: „Naród, który nie szanuje swej przeszłości nie zasługuje na szacunek
teraźniejszości i nie ma prawa do przyszłości”. Tyn zbiór historyjek to wojynne wspumniynia mojej
praołmy Zofiji.