MINGGU VIII DUNG TRINITATIS

30 JULI 2023

Evanggelium: 1 Musa 28:10-22

Debata Na Mandongani Jala Na Mangondihon

I. Hatorangan

Na borhat do si Jakob sian Beer Seba laho tu Haran laho paholangkon dirina siala biarna diondam
ondam ni hahana si Esau na naeng mamunu ibana ala naung manolukkon pasupasu ni Amana si Isak na
aturanna tohap ni hahana si Esau (ay.10). Laos diturpuk jamita on dibaritahon do ala naung botari gabe
marborngin ma ibana di sada inganan na margoar Lus (ay.19b). Alai di na modom i ibana hape di ida ibana
ma di nipina sada tangga napinagohon tu tano, tolhas ro di langit, ia ujungna , jadi ida ma sai marnaek
mijur sian i angka suru suruan ni Debata. Jongjong di ginjangna do ianggo Jahowa., jala ninna do: “ Ahu do
Jahowa Debata ni ompum si Abraham dohot Debata ni si Isak, ia tano na pinodomanmon, lehononku ma
tu ho dohot tu pinomparmu (ay.11-13). Laos dinipinai didok do tu ibana; “ sobokkon orbuk ni tano on sogot
torop ni pinomparmu, jala angka rarat ma hamu tu hasundutan dohot tu habinsaran, dohot tu utara dohot tu
dangsina, jala dapotan pasupasu sogot nasa marga na di tano on, marhite hite ho, dohot pinomparmi
(ay.14). Laos diuduti mandok tu si Jakop: “ ida ma sai na dongananku do ho, jala ramotanku do ho,
manang tu dia pe ho mangalangka, jala togihononHu do ho mulak tu tano on , ai ndang tadingkononHu
ho , nda jolo sahat hubahen na huparbagai tu ho (ay.15). Molo lam tapamanat aha na gabe bagabaga
niDebata tu si Jakop di nipina dohononta ma: “Jahowa sandiri do na ro mandapothon si Jakop. Ndada alani
napinangido ni si Jakop asa ro Jahowa mandapothon ibana, alai holan inisiatif ni Debata sandiri do na ro
manopot ibana, papatarhon hadirionNa paboa Ibana do Debata ni ompuna si Abraham dohot si Isak
amanai. Laos Debata sadiri do pabotohon inganan parbornginannai naeng lehononna tu ibana, jala
pasupasuon ni Debata ibana torop jala maringan disaluhut inganan, laos diujungna didok Jahowa tu ibana
sai na dongananku do saleleng ni lelengna. Secara singkat naeng botoonta marhite panopoton ni Jahowa
tu si Jakop, paboa Debata do na ro manopot hita, jala Debata Jahowa do mual ni saluhut na adong di
hita,jala holan Debata Jahowa do na satia mandongani hita saleleng ni lelengna.

Di na tarsunggul si Jakop sian na modom i , di ingot ibana ma sude angka namasa di nipina i
taringot tu na ro Debata mandapothon ibana jala dipatandahon Debata Jahowa hadirionNa tu ibana,
sekaligus angka bagabaga ni Debata Jahowa (tano,pinompar na tung massai torop namaringan di sude liat
portibion) bahkan gabe pasupasu tu saluhut jolma nahumaliang, jala tung so tadingkononna ibana saleleng
nilelengna., Alani i gabe di dok ibana ma: “ Inganan ni Jahowa do on hape, na songkal, bagas ni Debata,
baba pintu ni langit laos gabe dibuat ibana ma batu pinarhalang ulunai, jala dipajongjong bahen
partinandaan, jala diusehon miak tu ginjangna, dungi, dibahen ma goar ni inganani “Bet – El” (bagas ni
Debata). Aha na binahen di si Jakop na gabe alusna songon tanda ni las ni rohana di naung ni dapothon
Debata ibana, namambagabagahon angka ragam ni pasupasu nanaeng pasahatonna tu ibana jala
namarpadan do Debata natong tong mandongani ibana diparngoluonna sahat tu na manaruhon mulak
muse ibana tu huta ni amana si Isak mangonjar rohana laho mambahen sada “tanda” diinganai gabe
inganan bagas joro ni Jahowa/inganan habadiaon ni Debata/Bet-El (penampakan wajah Allah). Ndada
holan na pajongjongkon di inganan i sada tanda kehadiran Allah, alai sekaligus do nang ibana marbaga
baga dingoluna tu Debata marhite namandok ; “Molo didongani jala molo diramoti Debata ahu, di dalan na
hudalani on, jala dilehon di ahu sagu sagu sipanganon dohot ulos siparoloshononkon, jala marsonang
sonang ahu mulak ditogihon tu bagas ni damang, sai Jahowa ma Debatangku. Sada padan namassai uli
dipadanhon ibana tu Jahowa ima: naeng “pita/Polin/sada, ndang marlaok” pardebataon ni si Jakop. Alai
holan tu Debata Jahowa naung papatarhon diriNa tu Ibana. Jala tanda ni hapitaon ni haporseaonna tu
Debata Jahowa ima marhite namarpadan do ibana pajongjong bagas joro ni Debata Jahowa di inganan i,
laos mangalehon/mamelehon tu Debata parsampuluanna. Ido nanidok ni ibana: jala batu nahupajongjong
on, bahen partinandaan ima gabe bagas ni Debata, jala sude na nilehonmu tu ahu, parsampuluhonoku mai
tu Ho”.

Sihangoluhononhon.

DEBATA NA MANDONGANI JALA MANGONDIHON

1. Didapothon, dipapatar Debata Jahowa do hadirionNa dibagasan Jesus Kristus tu hita.

2. Dibagabagahon Debata do angka ragam ni pasupasu hasonangan di ngolutta
3. Sai donganan ni Debata do hita sahat ro di ujung ni ngolutta
4. Bahen ma ngolum gabe inganan habadiaon ni Debata jala garari saluhut angka bagabagam tu Ibana.

AMEN Pdt.Rimhot Simamora, M.Th.