Zanina Pathian chibai buk tura lo kal zawng zawngte kan Lalpa Isua Krista hmingin chibai ka buk

che
u a, Zanin ah Pathianin hun tha min siamsak leh hi ka lawm hle mai a, hun a chawpchilh viau nain
zanin ah hian ka sawichak em em mai “Chhandamna” chungchangthu sawina hun tha ka nei hi ka
lawm a, thusawitu thenkhat leh keimah ngei pawhin hun chan dawna kan huphurh thu te, kan
inbuatsaih that loh thu te kan sawifo thin a, zanin ah erawh hi chuan ka phur a, ka chak a, sawi hlan
ka nghakhlel a ni.

Sawitawh ang khan mihring lamah chuan inbuatsaihna hun tha ka neilo viau mai a, amaherawhchu,
engmaw lai deuh atang khan kan kohhranah hian “Chhandamna” chungchang hi sawi ka chak em em
mai a, a chhan chu BD kan zirlaia kan thian ho Whatsapp group pakhatah chhandamna a bo theih leh
theih loh chungchang kan khel vak mai a, chuta ka ngaihtuahnaa lo awmah chuan rawngbawlna
kawnga thui tak kal tawh chung pawh hian a chianloh ve theih dawn a nih hi a ka ti a, tin, kan
kohhran bikah phei chuan Salvation kan camping kan tih ang chite hi kan neikhat fu mai a, kan hriat
ve phakah leh Kohhran history a hrim hrim pawh hian vawikhat emaw bak chu kan la neilo niin ka
hria a, hmundanga ngaithla a sawi thin tanlo phei chuan “chhandamna” chungchang hi kan ngaithla
tamlo viauin ka ring a, a sawi pawh kan sawi tam lo a, naupang lamah phei chuan a chianloh ve theih
viau ang a tihte rilruah a lo awm a, chung hrang hrang ngaihtuahnaa lut chung chuan zanin ah hian
chhandamna chungchang hi ngaihtuah ho kan tum dawn a ni.

Pathian thu thianghlim chhiarin i lo ngaithla ang u.

Rom 3:8-26, 2Timothea 1:9, Ephesi 2:1-9

Zorama christiante hi ngatinge kan ngheh loh em em a, kan dak hma em em tih hi ka ngaihtuah fo
thin a. Camp ah te kan han lut a, hlim leh lawm takin kan chhuak a, nuam kan ti a, van nun leia tem
lawk ni awm takin kan lam delh delh a, thla hnih khat a rala ngai kan awh leh mai thin a. Piangthar
chiang viau niin kan inhria a, a rei tulh tulh a, kan chiang lo leh tulh tulh a, kan inring hlel nasa tulh
tulh a, kan bei a dawng leh fo thin. Engvang nge ni ang? Ka ngaihtuah ka ngaihtuaha a mawl thei ang
bera ka hriatthiam dan chuan “Isuan min chhandam a ni” tih hi kan chianglo ni berin ka hria.

Chhandamna a bo theih leh theih loh chungchangte kan sawi a, a thenin a bo thei an tia, a thenin a
bo theilo an ti bawk a, a tang huai deuh pawlin chhandamna chu a bo theilo a, mihring erawh hi
chuan kan bosan thei kan ti a, a tam ber hi chu chutiang ang ngaihdan nei chu kan ni awm e. Keimah
ngei pawh hian mihring hian chhandamna hi kan bosan thei tiin na takin ka lo tang ve tawh thin a,
amaherawhchu ngun zawka ka ngaihtuah hian a “dawih aw” ka ti a, chhandamna bosan thei nih
inring tlat chunga piangthar emaw ka intih ve lai khan ka lo chianglo em em a, Isua’n ka tuar ai a
tuara, ka tan Kros lera thiin ka sual ngaihdam nan leh chhandam ka nih theih nan a nun a hlan a ni
tihah hian ka lo chianglo hle a ni tih hi tunah chuan ka testimony a ni ta a, keimahah chuan chiang ka
inti hle mai. Min hnial duh in awm chuan banah min hnial thei ang. Isua ka ring inti siin keimah ka lo
inring thin a, ka tihthat leh that loh ah chhandam ka nih leh nih loh kha a in nghat emaw ka tih tlat
avangin ka lo chianglo hle mai thin a lo ni a, nimina ka tihthat vak loh chuan nimin khan lo thi tai la
chhandam ka ni awm si lo a ka ti a, vawiinah an titha deuh a, zing thawhhlim atanga zan ka mut
dawn thlengin Pathian lam ka hawi riauin ka hria a, chhandam nih inringin ka confi em em a, a tuk a
lo ni a, sual lam ngaihtuahnain ka thinlung a hneh a, ka inringhlel leh mai thin a, chutiang chu ka nih
tlat thin avangin chhandamna hi a bo thei emaw ka ti a, a nih loh pawn chhandam na hi ka bosan
thei emaw ka inti tlat thin.
Zanina ka sawi tur hi in mutthluk san ang tih ka hlau hle mai, a chhumbung a ngaihthlak chi a ni lo a,
in ngaihthlak karthlak nuai chuan in buai ang, meng hram hram rawh u, tin, nidanga ka thusawithin
aiin a rei deuh maithei a, ngaithla hram hram turin ka sawmin ka ngen duh che u a ni.

Mi tamtakin piantharna an sawi hian nun inthlakthleng a ni an ti thin a a dik khawp mai, vei lama kal
thin kha ding lamah a kal a, hnung zawnga kal thin kha hma zawngin a kal a, right about turn a ni an
ti, a dik e, ka hniallo, mahse hei hi a basic,a bulthut erawh a ni lo, kristian nun, piangthar nun zawk a
ni a, chumi nei tur chuan a bulthut ah kan man a ngai a, chhandamna ah hian kan chian a ngai hle a
ni. A basic a chiang si lo hian Kristian nun kan inzirtir a, nun kawng dik kan inkawhhmuh a, sual kalsan
rawh, thil tha ti rawh kan inti a, zu in thin kha zu i intur a nilo kan inti a, eiru thin kha i eiru tur a nilo
kan ti a, drugs ngawl vei kha i sim tur a ni kan ti a, hmeichhiat mipatnaah i filhlim tur a ni kan inti a,
chung hma chuan thil sual leh thil tha kan teh a, zu kan in loh khan piangthar emaw kan inti a, eiruk
kan bansan khan piangthar emaw kan inti a, hmeichhiat mipatnaa kan fihlim khan piangthar emaw
kan inti a, kan inchiuna hriau kan paih khan tithe viau ah kan in ngai a, nimahsela, chung kan tih loh
avang chuan piangthar kan ni ringawt em? Hindu tlangval hi khing sual nia kan hriat hrang hrangah
khian a fihlim thei, mosolman pa hi a filhlim thei, mahse piangthar a ni em? Chhandam a ni angem?
Vanram a kai angem? A ni si lo tiraw? Ka thenawmpa camp chhuak a hlimim a tui em em a inkhawm
tluk tluk a, thenawmpa chu a piangthar chiang hle mai a, a piangthar tha hle mai, kohhran ah a tuiin
a tangkai hle mai kan ti a, a kumhlui thlah zo lo kum bul atangin a chuai leh deuh a, he pa hi a
piangthar tak tak lo a nih hi kan ti leh a, a va dah leh hma em! A peih tawh silo a a chhandamna a
bosan leh daih a lawm, kan peih chhung chhauha chhandam nia kan inhriat tlatna chhan hi chu Isua
hnathawh hian kan nun a khawih tlat lo a, Rinna avanga khawngaihnaa chhandam in ni; nangmahni
thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang
dah ang e tiin Bible in a sawi chung chung pawhin chhandamna thawkchhuak nei niin kan inziritir in
kan hria a, ka thiltihthat ka chhuang tlat a, vanram kai pui ka tum tlat a, ka peihloh hun a lo thleng a
ka bosan leh mai zel a ni.

Nichina kan bible chang chhiar ho kha kan enchuan chhandamna hi Pathian khawngaihna avanga
Isua Krista zara kan chan a ni tih an sawi a, bible hmun hrang hrangah hian kan hmu tam em em a ni.
Zanin ah hian chu thu chu kan hriatchian a ngai hlein ka hria. Nang leh kei, Adama leh Evi
bawhchiatna avanga Pathian nena inzawm thei tawhlo hi ka tihthat hian min chhandam zo tawhlo a,
tithe turin chakna pawh ka nei tawhlo a, ka thianghlim thei tawhlo a, chu dinhmun chhe tak, Pathian
nena lengdun thin lengdun thei tawhlo, Pathian nena inmihran tawhchu Pathian chuan min
khawngaih em em a, kan tan chhandamna kawng min ruatsak a, chu chu Isua thisen a ni, ka thil tih
leh tih loh lam ni lovin Isua thisen chuan nang leh kei hi min chhandam zawk a ni, ka thil tih that
emaw ka tihsual emaw hi Pathian lawmna leh lawmlohna, a lungawina leh lungawilohna a ni lo a,
Isua thina ah khan Pathian hi a lungawi a, chu chu ka tan chhandamna ah a ruat a ni, a va ropui em.
Chu chu ka lo amen mai a, Isua thihna chu ka rin mai kha a tawk em em a ni. Lalpa chu fakin awm
rawh se.

Chu Pathian khawngaihna avanga chhandamna chu miin a hriat chian chuan hmangaihtu Isua chu
hmangaihlet ve a duh a, chu chuan a nun a lo thlakthleng mai thin zawk a ni. That te, felt e, sim te hi
tum urh viau chi a ni lo a, that phawt a, fel phawt a, dik phawta pianthar tum hi a hahthlak thin a,
Kros daihlim hnuaia chawl si lo hian hah takin kalvari tlang lam panin kan lo tlan ve chiam thin a lo ni.
Nun danglam neih kan tum a, min tidanglamtu Isua kan nei tel si lo a, hah takin kan theihtawpin kan
tlan ve a, kan peihloh chinah chhandam ni emaw kan intihna chu kan bosan leh mai thin,
chhandamtu Isua kan neih tlat loh avangin.

Kristian nun te, piantharna te kan han sawi tak tak hi chuan Isua hnathawn hi kan dah bo daih thin a,
hetah hian Pathian a awm a, hetah keini kan awm a, chu chu Pathianin a en a, Pathian in a ngaidam
theih tawhlo a, a laiah Isua hi a awm a ngai a, keimah min en lo a Isua a en chiah khan keini chu Isua
thlazar hnuaiah chuan kan awm a, ama zara chhandamin kan lo awm ta a ni. Evi leh Adama te an
saruaknaa khuhbo tura Savun kawrfual a siamsak ang khan nang leh kei saruakna khuhbo tur hian
Isua Krista min pe a, chu chu kan sin a, kan haka mai hian min lo tuam mawi a, kan saruakna leh kan
fellohna khuhboin a awm a, Pathian hmaa inlan ngamin kan lo awm ta chauh thin a ni, chu Isua chu
ka rin mai chuan chhandam ka lo ni a, piangthar ka lo ni a, kristian nun chu ka zawh ve tan dawn
chiah a ni.

A lera kan thuaia sim phawt, fel phawt, that phawt, dik phawt kan tum hian a harsa thin a, ka thiltih
hi ka nun min thlaktu a nih chuan ka tih peihloh hunah ngai ka awh leh thin a, nimahsela Isua
hnathawhin ka nun min thlak erawhchuan Tirkoh Paula’n nitin ka thi thin a tih ang khan nitin hian
Isua duhdan a awm chaknain ka nun a hruai tawh zawk anga, amah Paula vekin Chrita mi manchhan
chu ka man theih dan lawm maw tiin a umin ka um zawk a ni a tih ang khan Pathian duhzawng tih
chakna chu a umin kan um zawk dawn lo a ni reng mai. Lalpa chu fakin awm rawh e. Ni, Isua tell ova
ka nun thlak ka tum ve hi chuan ka confi theilo a, da leh theiah ka in ngai a, bo leh theiah ka in ngai a,
hlauhnain ka khat thin a, Kristian nun chu ka tan phurrit a lo ni a, a hrehawm em em mai a, hawina
lam apiangah Kross put tur kan hmu a, kan chauhpui zel mai a lo ni a, mahse, Pathian khawngaihna
leh Isua hmangaihna hian min chhandam a ni tih kan pawm chinah chuan Automatic in Kristian
nundan tha chu ka nundan turah ka ngaia, “Ka khawngaihna i tan a tawk e; ka thiltihtheihna hi chak
lohnaah asin tihfamkimin a awm ni,” a ti ta a. Chutichuan Krista thiltihtheihna chu ka chunga a awm
theih nan lawm em emin ka chak lohnate hi ka chhuang tawh zawk ang” tih ang khan chaklo, tlinglo,
fello ka nih avanga chhandam ngai ka ni tih chu ka inhre nawnfo anga, Isua’n min chhandam a ni tih
chu ka pawm anga lawm em emin engmah ka nilo a, Isua chauh hi engkim a ni tih ka hre thar zel
dawn a lo ni.

Aw, kan lo inteh ve a, sawpa chu zu a in a vanram a kai lo ang, a eiru a Pathianin a hrem ang te kan lo
ti ve, tungemaw nia kan inhriat midang hi sual lo ti ve em em nge kan nih le? Nang leh kei, mi fel leh
misual te hi Pathian hmaah chuan ang khat vek kan ni a, ka inkhawm peih leh peihloh, ka zu nghei
leh nghei loah hian min teh dawn lo, chungah chuan min teh dawn sela tumah Pathian hmaah ding
tlak kan awmlo, min tehna tur zawk chu Isua Krista a ni a, Isua chu kan ring mai tur a ni a, kan tan
chhandamna a ni tlat si a.

Zaninah hian in mutthluk san ka hlauh em emna chhan kha tawitein sawi ka duh, mi thenkhat chuan
ka sual pawhin chhandam ka nit ho, ka ruih pawhin chhandam ka ni tho te an ti, an sawi te pawh ka
hre fo, an hmaichhanah te hian “Tlangval, i man lo hle mai” tih hi ka chak rum rum thin.
Chhandamna hi kan hrechiang a, Pathian khawngaihna hi kan man fuh a nih ngat chuan ruih hi a
nuam tawhlo, sual hi a nuam tawhlo, inkhawmloh te hi a hrehawm tawh zawk. Hmankar chawlhni
zana kan thusawituin Pathian hnena lawm avangin thawhlawm kan thawh a tih ang kha, miin
chhamdamna a hriatthiam a, Pathian hnathawh a man fuh tak tak tawh chinah chuan chu chuan a
nun thlakdanglam a, Pathian tan thiltha tih a chak a, Isua duhzawng tih a chak a, lawm chungin Lalpa
rawng a lo bawl mai thin a ni.