Katong minta dangke banya, tagal Bapa pung hati bae par katong. Dangke par Bapa pung berkat yang abis-abis par katong pung hidop. Katong mangaku, kalo katong ada sampe sakarang ini, samua tu tagal Tuhan pung sayang. Katong seng ada pung apapa par balas Tuhan pung bae. Cuma dangke banya-banya yang katong bisa bilang par Bapa di sorga. Labe-labe, katong minta dangke par Tuhan pung sayang sampe katong pung Kegiatan Pelatihan Penerjemahan Alkitab Dalang Bahasa Malayo Ambon di Klasis Kairatu ni bisa bajalang deng bae-bae. Kasi katong hikmat, sio Tuhan. Biar kegiatan yang katong su biking ni bisa bawa hal-hal bae par Tuhan pung karja yang katong biking di katong pung jamaat-jamaat. Biar deng budaya yang Tuhan su kasi ni, katong bisa pake akang par puji-puji Tuhan pung nama tarus-tarus. Katong sombayang, minta Tuhan kasi berkat par Bapa/Ibu dari Badan Penerjemahan Alkitab GPM, yang su datang par barbage apa yang dong tau par katong samua. Tuhan mau jaga deng pimpin dong dalang dong pung sagala tugas. Pake dong tarus Tuhan, par jadi berkat dimana sa dong ada. Deng katong jua minta Tuhan pung berkat salalu ada par dong pung kluarga. Bapa yang ada di sorga, Katong sombayang par katong pung pamimping-pamimping di Klasis GPM Kairatu. Tuhan yang pili dong, Tuhan yang utus. Katong minta biar Tuhan mau kasi dong hikmat lai dalang dong pung sagala tugas. Jamaat GPM Lohiatala yang su buka hati deng tangang par sambut deng dukung kegiatan ni dari hari partama sampe oras ni, katong minta biar Tuhan jua mau kasi berkat par dong samua. Ibu Pandita, Majelis Jamaat, pemimping-pamimping di negri Lohiatala, deng samua anana negri yang ada, Tuhan mau jaga, pimping deng kasi berkat par dong jua. Katong seng bisa balas dong pung bae, mar katong parcaya Tuhan seng tutu mata par samua yang dong su biking par Tuhan pung karja. Dangke banya, Bapa. Katong samua taru katong pung hidop di Bapa pung tangang. Sagala hal yang mangkali Beta seng bisa bilang deng beta pung mulu yang pono dosa ni, mar akang nai dari samua orang yang ada disini pung hati, katong minta Bapa dengar akang jua. La Bapa jawab iko Bapa pung mau, jang iko katong pung mau. Ampong katong pung dosa deng sala, Bapa. Dalang Tuhan Yesus pung nama, katong su sombayang par Bapa di sorga. Amin.
ANAK NA KAHOU Cipt. Dompak Sinaga (Anak Na Lilu) Sai Songon Ursa Na Horahan Tene, Bai Sampalan Na Dargis in Lungunan Janah Sai Siholan Do In, Bai Bah Pakon Hubangan in Usih Sonai Ma Au Tuhan Sihol