ARALIN 1.

Ang Kahulugan ng Ekonomiks

 Ayon kay Viloria (2000), ang Ekonomiks ay isang sangay ng Agham Panlipunan na nag-aaral kung paano
tutugunan ang tila walang katapusang pangangailangan at kagustuhan ng tao gamit ang limitadong
pinagkukunang-yaman.
 Ito ay nagsimula sa salitang Griyego na oikonomia, ang oikos na nangangahulugang bahay at nomos na
pamamahala.
 Pinag-aaralan sa ekonomiks ang pamamamaraan kung paano nagbabahagi ang mga mamamayan at
ang bansa ng kanilang limitadong resources.
 Pinag-aaralan din kung papaano gagamitin ng tao at lipunan ang limitadong resources upang
makagawa at maipamahagi ang iba’t ibang produkto at serbisyo sa mga tao at iba’t ibang pangkat ng
lipunan.

May dalawang mahalagang bahagi na binibigyang-pansin ang ekonomiks.

 Ang sambahayan at ang pamayanan.
 Sa sambahayan, pinaplano kung paano hahatiin ang limitadong resources sa maraming
pangangailangan at kagustuhan.
 Sa loob ng sambahayan, pinagpapasyahan naman kung magkano ang ilalaan sa
pangangailangan sa pagkain, tubig, kuryente at iba pang mga bagay na maaaring makapagdulot
ng kasiyahan o pakinabang sa isang pamilya.
 Sa aklat ni Mankiw (1997), ang ekonomiya at sambahayan ay magkatulad sapagkat pareho
silang gumagawa ng desisyon.

 Ang pamayanan ay gumagawa ng iba’t ibang desisyon katulad ng sambahayan. Lumalabas dito
ang apat na katanungan para matugunan ang suliranin sa pagkakaroon ng limitadong resources.
 Ang mga katanungang ito ay ang mga sumusunod:
 Anu-anong mga produkto at serbisyo ang gagawin?
 Gaano karami ang gagawin?
 Paano gagawin?
 At para kanino?
 Dahil sa may limitasyon ang ating pinagkukunang-yaman ay umiiral ang suliranin sa kakapusan. May
kakapusan sa pinagkukunang-yaman sapagkat walang katapusan ang pangangailangan at kagustuhan
ng tao. Ang likas na yaman ay maaaring maubos at mahirap na palitan. Ang yamang kapital din ay may
limitasyon kaya limitado ang nagagawang produkto at serbisyo para sa tao. Kaya ang kakapusan ay
kaakibat na ng ating buhay sapagkat may limitasyon ang lahat ng bagay sa daigdig.

Ang Mahahalagang Konsepto sa Ekonomiks

 Sa pag-aaral ng ekonomiks ay nalalaman natin ang mga mahahalagang konsepto para makatulong sa
pagbuo ng matalinong pagdedesisyon. Sinasabi na sa buhay ng tao ay kalakip na ang pagkakaroon ng
choice o pagpipilian. Sa pang-araw-araw na pamumuhay ng tao, siya ay napapaligiran ng iba’t ibang
pagpipilian kaya mahalaga na pagtuunan ng pansin kung paano makabuo ng matalinong pagpapasya
ang tao.
Trade-off: Ito ay ang pagpili ng isang bagay kapalit ng ibang bagay. Mahalaga ito sa pagbuo ng matalinong
desisyon sapagkat sinusuri muna ng isang tao ang kanyang pagpipilian. Isang halimbawa ay ang paggamit ng
iyong oras sa paggawa ng takdang aralin o paglalaro ng computer games. Kapag sinuri ng mabuti ang
dalawang pagpipilian ay makabubuo ka ng isang pinakamainam na desisyon.
Opportunity Cost: Ito ay tumutukoy sa halaga ng bagay na handang ipagpalit sakali mang ikaw ay nakabuo na
ng desisyon. Sa naunang halimbawa, kapag pinili ang paggawa ng takdang aralin, ang opportunity cost nito ay
ang hindi paglalaro ng computer games.
Incentives: Ito ay mga inaalok ng mga negosyante para maaari pang magbago ang desisyon ng mga mamimili.
May mga pagkakataon na ganap na ang ating desisyon sa pagbili ng iba’t ibang produkto at serbisyo subalit
hindi maiiwasan na magbago ang ating isip sa bandang huli. Ang halimbawa ng incentives ay ang pagbibigay
ng discount sa mga bilihin. Ang promo gaya ng buy one take one ay maaari ding makapagbabago sa ating
desisyon. Bilang mag-aaral, maaaring mailalarawan ang incentives sa pagbibigay ng pabuya kapag ikaw ay
nakakuha ng mataas na marka.
Marginal Thinking: Sinusuri muna ng isang tao ang karagdagang halaga maging ito ay gastos o pakinabang na
makukuha sa pagbuo ng desisyon. Kaya sa pag-aaral ng ekonomiks, may kasabihan na “Rational people think
at the margin”. Nagiging rasyonal ang tao sa mga bagay na dapat gawin para humantong sa isang matalinong
pagdedesisyon.
Ang Kahalagahan ng Ekonomiks

Sa pag-aaral ng ekonomiks ay mas lalo nating mauunawaan ang pagbuo ng isang matalinong
pagpapasya. Aalamin natin ang kahalagahan ng ekonomiks bilang mag-aaral, bilang bahagi ng iyong pamilya
at bilang bahagi ng lipunan.

Bilang mag-aaral, kapag naunawaan ang kahalagahan ng ekonomiks ay mas lalo kang maging mapanuri
at mapagtanong sa mga nangyayari sa iyong paligid. Nakatutulong ito sa pagbuo ng mga matatalinong
pagpapasya tungo sa kinabukasan. Hinuhubog nito ang iyong pag-unawa sa mga bagay-bagay na maaaring
makatulong sa loob ng tahanan. Nagkakaroon ka ng interes sa mga usaping pang-ekonomiko na nakatutulong
sa mas malawak na pag-uunawa sa buhay mo at buhay ng ibang tao.

Bilang bahagi ng iyong pamilya, ang mga natutunan sa ekonomiks ay magagamit sa mga pagdedesisyon
sa loob ng tahanan. Ang iyong kaalaman ay magagamit sa pagbibigay ng mga makatuwirang opinyon tungkol
sa pagdedesisyon ng iyong pamilya. Ang mga desisyong ito ay may kinalaman sa usapin sa pag-aaral,
pagnenegosyo, paggasta, at pagtugon sa maraming pangangailangan at kagustuhan ng iyong pamilya. Ang
mga sariling pananaw na maibabahagi sa iyong pamilya ay hango sa iyong natutunan sa pag-aaral ng
ekonomiks.

Bilang bahagi ng lipunan, mas mauunawaan mo ang iba’t ibang usaping panlipunan kasama na ang
usaping pang-ekonomiko. Magagamit mo ang mga natutunan mo sa ekonomiks lalo na sa mga batas at
programa na ipinatupad ng pamahalaan na may kinalaman sa pagpapaunlad ng ekonomiya at ng buhay ng tao.
Mas lalo mong lubos na mauunawaan ang mga nangyayari sa paligid at ang mga isyung kinakaharap ng bansa.
Magagamit mo ang iyong mga natutunan sa ekonomiks para makapagbigay ng sariling pananaw sa mga
suliranin na kinakaharap at dinaranas ng bansa