Isang pelikula na nagpakita ng buhay ng isang OFW ay ang "Anak" na
ipinalabas taong 2000. Sa panahon ngayon maraming kabataan ang nagrerebelde
at maraming hindi nakikita ang hirap at kayod ng kanilang mga magulang para sakanilang kinabukasan. Kaya ang pelikulang Anak ay isa sa magandang panoorin ng mga kabataan ngayon katulad ko. Ito ay tungkol sa isang inang nag sakripisyo sa kanyang pamilya, at anak na hindi nakikita ang sakripisyo ng kanyang ina. Ang kuwento sa pelikulang ito ay tungkol sa isang ina na pinangunahan ni Vilma Santos na kung saan nawalay sa kanyang mga anak at nagtatrabaho bilang isang Domestic Helper sa Hong Kong. Ito ay kanyang ginawa upang makapag padala ng pera para sa magandang buhay at kinabukasan ng kanyang tatlong anak na sila Carla, Michael at Daday. Dahil sa tagal niya sa Hong Kong nagkaroon ng sumpungan, tampuhan at galitan sa pagitan ng kanyang mga anak dahil tila nag iba na ang mga ito lalo na si Carla. Sa pag-uwi niya sa Pilipinas, siya ay sobrang sabik na makita ang kanyang mga anak. Siya at ang kanyang mga kaibigan ay naisipan na lamang na mag negosyo kesa bumalik pa sa Hong Kong. Ilang araw ang nakalipas hindi nya makilala ang mga kilos ng kanyang anak dahil sa pagkawala niya ng matagal. Naramdaman niya na may galit sa kanya ang anak na si Carla. Ito ay nag rebelde sa pamamagitan ng pagkakaroon ng kasintahan, nag droga, naglalasing, naglayas at napabayaan ang sarili. Nagkaroon ng kaunting pagsisisi si Josie dahil iniwan niya ang kanyang mga anak at hindi niya akalain na ganoon ang kanyang madadatnan pagkauwi. Nais niya ng magandang buhay sa mga anak ngunit tila hindi naging maganda ang buhay ng mga ito ng wala siya. Sa kabilang dako, nawala si Michael sa kanyang pagiging iskolar na kung saan hindi niya masabi sa kanyang ina. Sa kalaunan, napagtanto ni Josie na ang bilis ng paglabas ng pera dahil sa mga bilihin, gastusin at sumabay pa ang tuition fee ni Michael. Dahil naisumbat niya ito umalis si Michael ng ilang araw pero bumalik agad at humingi ng tawad sa ina. Naging malapit sa kanya ang dalawang anak at nagkaroon ng magandang pagsasama. Ang matinding problema sa pelikulang ito ay ang pagrerebelde ni Carla dahil iniisip niya na mas mahalaga pa kay Josie ang pera kesa ang makapiling ang mga anak. Hindi na siya nirerespeto ni Carla kaya silang dalawa ay nagkaroon ng bangayan na kung saan nasabi ni Josie lahat ng kanyang saloobin lalo na ang kanyang pinagdaanan sa ibang bansa. Hindi naging madali ang pamumuhay niya roon dahil sila ay pinahirapan. Isa na ay ang kaniyang amo na kung saan kinuha ang kanyang passport kaya siya ay hindi nakauwi kahit na malamang namatay ang kanyang asawa. Naging mahirap ang buhay niya dahil sa pagkalungkot. Sa pag-aaway ni Carla at Josie, ibinahagi niya sa anak ang naging buhay at ang pakiramdam na impiyerno ang kanyang pagtatarabaho at ang pagiisa. Dito nasabi ang kilalang linya na nasabi ni Josie “Kung hindi mo ako kayang respetuhin bilang isang ina. Respetuhin mo man lang ako bilang isang tao.” Ito ay nagdala ng madaming emosyon sa mga manonood. Hindi na nakapag pigil si Josie na magalit kay Carla pero ito ang naging daan upang mabuksan ang isipan ni Carla. Kaya agad itong bumawi at kinausap ang kanyang ina. Sinabi niya na kahit siya mismo ay hindi na niya kilala ang kanyang sarili dahil sa kakulangan at paghahanap ng gabay mula sa ina. Humingi siya ng paumanhin at ganun din si Josie sa kanya. Naging maayos na ang pagsasama ng pamilya dahil sa kanilang pagkakaintindihan. Sa pagtatapos, si Josie ay bumalik muli sa Hong Kong upang ipagpatuloy ang pagkayod at ang mga anak niya ay naging masaya at maintindihin sa kanyang ina. Pinapadalhan na ni Carla ang kanyang ina ng sulat at nagkakaroon si Josie ng kaalaman sa nangyayari sa kanyang mga anak.
Ang “Anak” ay isang drama na uri ng pelikula na tungkol sa sakripisyo ng
isang magulang bilang OFW. Ito ay ipininalabas noong 2000 na handong ng Star Cinema para sa mga inang nag sasakripiso para sa kanilang pamilya sa iba’t-ibang dako ng mundo. Ang direktor ng pelikulang ito ay si Rory Quintos. Kahit na matagal na ang pelikulang ito, madami pa ring mga Pilipino ay patuloy at paulit-ulit itong pinapanood dahil sa kagandahan ng istorya at aral na meron dito. Ito ay naglalahad ng magandang moral para sa ating mga kabataan pati narin sa mga magulang. Naipahatid din ng maayos ng pelikula na ang buhay natin sa mundo ay hindi madali na kung saan mayroong problemang kinakaharap ngunit atin ding masosolusyonan. Layunin ding ipahatid sa atin na kaya nating maging matsaga, matapang at lalo na ang maging mahusay na tao. At sa pag tapos ng pelikula naging mahusay sila sa paggawa dahil naintindihan ko ito, hindi nakakalito, nailagay at magagamit ko sa aking buhay ang mga layuning ipinahatid nito. Dagdag pa rito, ang mga salitang ginamit ng mga karakter ay hindi malalalim na mapapaisip ang mga manonood. Ngunit, may pagkakataon na nagmumura ang karakter dahil sa galit na nararamdaman. Ang pagpapahayag ng saloobin ng mga karakter katulad na lamang ni Carla at Josie ay direkta at walang paikot-ikot. Dahil sa mga salitang ginamit, mas naunawaan at naramdaman ng mga manunod ang nais ipahayag ng pelikula. Panghuli ay ang mga tauhan na gumanap sa pelikula na kung saan nagampanan ng maayos ni Vilma Santos ang kanyang karakter na si Josie, isang inang nag sakripisyo para sa kanyang pamilya. Sumunod naman si Claudine Barretto isang anak ni josie na si Carla na kung saan hindi niya maintindihan ang mga sakripisyo ng kanyang ina na naging dulot ng pag bibisyo niya at parerebelde. Isa pa si Baron Geisler na si Michael na anak ni josie. Siya ay isang tanyag na mag-aaral na nakakuha ng iskolar ngunit ito ay nawala at nahirapang sabihin sa kanyang ina. Ang huling anak ay si daday na ginampanan ni Sheila Junsay. Siya ang bunsong anak ni Josie na kung saan nahirapan din itong kausapin ang kanyang ina dahil sa pag kahiwalay nito habang siya ay sanggol pa. Ang mga gumanap sa pelikula ay mahuhusay na kung saan naging epektibo ang pagpapahayag ng paksa, aral at mga emosyon sa mga manunuod. Ipinakita kung gaano sila kagaling na artista na kung saan ako mismo ay napaluha dahil sa naramdamang emosyon sa kanilang pag arte. Lahat lahat, naging epektibo para sa aking ang pelikula at maraming mga aral na mapupulot lalo na para sa mga kabataan.
Sa konklusyon, ang pelikulang ito ay nararapat na mapanood ng lahat higit sa
lahat ang mga anak at magulang na nawalay sa isa’t-isa upang magkaroon ng magandang buhay. Hindi ko masisisi si Carla dahil siya lamang ay naghanap ng isang ina na gagabay sa kanya. Ngunit naipakita rito na naintindihan at nabuksan na ang isipan ni Carla si Josie matapos nitong malaman ang mga detalye sa sakripisyo na nagawa ng kanyang ina habang ito ay malayo sa kanilang piling. Kaya naman, malaking aral sa kabataan ngayon na maging matalino, mahusay at responsable sa kanilang mga kilos, paggastos at mga desisyon sa buhay dahil bawat magulang ay nagsasakripisyo para lamang mabigyan ng magandang kinabukasan ang anak. Sa pagtatapos, ang ating mga dakilang OFW ay maituturing nating bayani na dapat nating tingalain at respetuhin.