Sermon 3

Ban ieid ka long ban Map

(Ioannis 21:15-17)

Ka Jingsdang

U Bill Buckner u dei u nongialehkai baseball uba ju ieng hajan lane ha ka jaka bakongsan eh
jong ka madan baseball ha kaba u nongtied u donkam ban ktah ban khur point (base) bad ruh
u nong-ap ha sawdong ka madan, ryngkat 22 snem ka jinglong ba jop/seisoh bha ha kane ka
kam, ha ki lympung kiba baheh, uba iap ha u snem 2019 ha ka yrta kaba 69. U Buckner u la
ialam ia kane ka lympung ha ka double arsien bad pyndep ha ka kyrdan ba 10 nalor (top 10)
ha ka jingia knieh bases ruh arsien kynthih. U la long ruh u Nation League batting champion
(lane u nongjop ha ka jingtied ha ka lympung jong ka ri) ha u snem 1981. La kata ruh, lehse
ym don uwei pat u player ha ka histori jong ka MLB nalor u Buckner uba ia ka kam/jingtrei
la rai kut da ka jingbakla, wat halor ka nam bad ka jingtbit.

Ka dei ha ka synrai jong ka snem 1986, ba ka Red Sox ka la lam da 3-2 ha ka

jingialeh bad la lamkhmat da 5-2 halor ka New York Mets ha ka kylla tied kaba shiphew; ki
don satang 3 sien tied na kaba jop ia ka Fall Classic, hynrei ha kaba mar-shiteng jong ka kylla
tied ba shiphew jong ka Game Six Mookie Wilson, jong ki Mets, u nongtied u la tied ia ka
bol sha u Buckner ha ka jaka ap kaba nyngkong, kaba iaid lait napdeng ki kjat jong u bad poi
sha ka bynta ba jngai jong ka madan.

Ki Mets ki la ioh khur point ha ka jinglehkai ban jop ia ka jingialehkai kaba hynriew
bad nangta jop ia ka jingialehkai ban jop ia World Series. Ka jingbakla u Buckner ha ka
khyllipmat kaba kut ka la khynniat ia u sha kliar tam jong ka jingbuh dak (list) jong ka
jinglehkai bakla kaba sniew eh ha ka histori jong ka sport. Hadien ki sngi ialehkai jong u, u la
hap wat ban kynriah noh na Boston sha Idaho namar ka jingbthei ka jingbitar jong kito kiba
ha sawdong jong u.

Ka jingsngewmong hapdeng u Bucker bad ki nongkyrshan ha Boston ka la neh da ki

phew snem, hynrei kiei kiei ki sdang ban kylla ynda haba ka Red Sox khatduh iawai ka la jop
ia ka World Series ha u snem 2004 bad 2007. Ka bor jong ka jingmap ka la paw ha u snem
2008, haba u Bucker u la wanphai sha Fenway Park ban kawang ia ka bol banyngkong jong
ka jingialehkai plie pyrda; Hangne u la ioh ia ka jingieng pdiang/pynkup burom na ki paitbah
da ka jingkmen bad jingrisa kaba la neh kumba ar minit bad kaba la pynlong ia u ban iam.

Ka Pdeng

Kum u Bill Buckner, u apostol Petros u la leh ia ka jingbakla kaba lah ban buh ia ka ha ka
jingbuh dak kum ka jingbakla basniew eh ha ka histori. Kumba lai snem bad shiteng (lai
snem shiteng), u Petros u bud ia U Jisu hajan eh bad sakhi ia ki kambah bakhraw ba la leh da
U Trai. Wat u hi ruh u la long u bynta jong katto katne na kine ki kambah. La ong ba ha
kawei ka jingjia, hadien ba u la pynlut ia ka miet ban pyrshang ban tong dohkha khlem ka
jingseisoh, U Trai u la tur shajan jong u bad ong, “To niat noh ia ka lieng sha kaba jylliew
bad to pynhiar ruh ia ki jar jong phi ban dup ngat.” (Loukas 5:4). Ka jingiathuhkhana ka iaid
shuh shuh ba, “Ki la leh ia kane bad ki la ngat bun bah eh ki dohkha ba ki jar jong ki ki la
sdang kad.” Haba iohi ia kane ka kambah baphylla ka Baibl ka iathuh ba u Petros, “u la dem
khrup ha ki khohsiew U Jisu bad ula ong, ‘Trai, wat wan shajan jong nga! Nga long uba
pop.”

Ha kawei pat ka jingjia, u Petros u don ha kajuh ka pung jong ka Galilaia ryngkat bad
kiwei pat ki synran haba ka eriong kaba khraw ka la wan lynshop ia ki da ka bor ba ka la
pynsheptieng haduh wat ban pynjot ia ka lieng, hynrei hapdeng jong ka eriong U Jisu u la
wan shajan jong ki synran kiba la tieng da kaba iaid halor um. Haba ki synran ki la iohi ia u
briew uba iaid halor ka um ba khihwin ia ki la pynkhaweit bad pyrkhat ba ka la long ka rngai,
bad ki la kyang jam ha ka jingtieng. Hynrei U Jisu u la pynshlur ia ki da ki ktien, “Wat
khuslai! nga dei U Jisu. Wat ym sheptieng.” Kane ka dei ka khyllipmat ha kaba u Petros u
ong, “Trai, lada dei ma me, hukum ia nga ban wan sha me halor ka um.” U Jisu u la ong ia u
wan bad da ka kambah u Petros u la iaid halor ka um jingatphyllung jong ka pung Galilaia

U Mathaios u buh jingthoh ia kawei pat ka bynta ha ka jingdon ryngkat u Petros bad
U Jisu:

Te U Jisu u la kylli, “phi te phi ong nga long uei?”

U Simon u la iathuh bad u la ong, “Me long U Khrist u khun U Blei baim.”

U Jisu u la ong ha u: Simon, u khun u Jonah, me long ba la kyrkhu! Mem shym la

shem ia kane dalade hi. La pynpaw sha me da U Kpa jong nga uba ha bneng. Te ngan khot ia
me u Petros, kaba mut “u mawsiang.” Ha une u mawsiang ngan tei ia ka balang jong nga, bad
ki khyrdop ka dujok hi ruh kin ym lah ia ka. (Mathaios 16:15-18)

Ngi baroh ngin lah ban mynjur ba u Petros u long u rangialehkai bakhraw ha ka
kynhun U Khrist, hynrei ha ka khyllipmat bakhatduh u la pynlong ia ka jingbakla kaba khia-
jur. Ha shwa ka jingshah sahnarphna, U Jisu u la kren ia ki synran da kaba ong, “Phi baroh
phin thut na nga ha kane ka miet…” Ha kane ka jingiathuh ki synran baroh ki la ia peit uwei
ia uwei pat. Te u Petros u la ong, “Lada ki baroh kin thut na me, nga te ngan ym thut lano
lano ruh!” (Mathaios 26:31, 33)

U Petros u la ban ktien bad iai ban biang ba un ym len noh ia la u kynrad!

La katta ruh, katto katne kynta hadien ym tang ba u la len ia U, hynrei u la tim bad u
la smai ba um ithuh ia U Jisu. (Mathaios 26:70-74)

Hoid, u Petros u len ia la u nonghikai. U len ia U haba u la dei ban iasaid-da ia U. Da

ka jingkhawpud u len ia uta uba la khot ia u bad uba leh ia ki kambah baphylla ha ka jingim
jong u. Ha khmat jong ka jingleh bakla kaba kat kane, ia u Petros la pynjot bad la pynlehrain.
Bad kaei phi pyrkhat kaba jia hadien kata?

Kumba la tip, ia U Trai jong ngi la Sahnarphna. Ia ka met jong u la pynthiah ha ka

jingtep, hynrei ha ka sngi kaba lai hadien ka jingiap jong U ia U la pynmihpat. Hadien ka
jingmihpat U la iashem biang ia u Petros, ha kajuh ka jaka ha kaba katto katne snem
mynshuwa u Petros u la sakhi ia ka kambah jong ka jingtong dohkha.

To ngin ia peit ia ka jingiakren kaba u Jisu u la iakren bad u Petros:

Lada phi kwah ban tip, pule ha ka lynnong ba 21 jong ka gospel u Ioannis:

Haba U Jisu bad ki synran jong U ki la dep ban iabamja step, U la kylli, “Simon u
khun u Jonah, me kham ieit ma me ia nga ban ia kine?”

U Simon Petros u la jubab, “Hoid, ko Trai, me tip ba nga ieit ia me!”

“To bsa ia ki khun langbrot jong nga,” U Jisu u la ong

U Jisu u la ong pat ha kaba ar-sien, “Simon u khun u Jonah, me ieit ia nga?”

U Petros u la jubab, “Hooid , ko Trai, me me tip ba nga ieit ia me!”

“To ap ia ki langbrot jong nga,” U Jisu u la ong ha u

U Jisu u la kylli ha kaba lai-sien, “Simon u khun u Jonah, me ieit ia nga?

U Petros u la sngewsih/sngewmong naba U Jisu u la kylli ha kaba lai sien ia u, Me ieit

ia nga? U la iathuh te ha U Jisu, “Ko Trai me me tip ia kiei kiei baroh. Me tip ba nga ieit ia
me.”

U Jisu u la jubab, “To bsa ia ki langbrot jong nga.” (Ioannis 21:15-17)

Ka Jingpynkut

U Petros, kum u Bill Bucker, u la leh ia ka jingbakla kaba jur ia kaba la buh jingthoh ha ka
histori, hynrei u la iohpdiang ia ka jingaiei jong ka jingmap. Samla shynrang bad kynthei, ka
jingiathuhkhana shaphang u Petros ka hikai ia ngi ba ban ieit ka long ban map. Peit-thuh ba
U Jisu u la map ia u Petros wat hapdeng ki jingbakla bad jingbymlah (jingrem) jong u. Bad U
map ia u namarba U ieit ia u. Lehse phi ruh phi la leh ia ka jingbakla bakhia-jur, hynrei ujuh
U Jisu uba map ia u Petros kumjuh ruh U pynpyiar ia ka jingmap jong U sha phi.

Ha kawei pat ka liang, kane ka jingiathuhkhana ka hikai ruh ia ngi ia ka jingmap, thik
kumba U Jisu u la leh. U Trai u la ai ia u Petros ia ka lad kaba ar wat hapdeng ki jingbakla
jong u. Kumjuh ruh, phi bad nga ngi dei ban long kiba kloi ban map. Mynta ka sngi nga khot
sngewbha ia phi ban iohpdiang ia ka jingmap, bad kumjuh ruh ban ai ia ka. Wat ju klet ba
ban ieit ka long ban map.