Vandag wil ek graag 'n buitengewone individu aan julle bekend
stel, iemand wat deur middel van sy harde werk en vasberadenheid, 'n uitstekende prestasie gelewer het in sy matriek jaar.
Tydens sy finale jaar van skool in 2020 moes hy die Covid-19
pandemie in die gesig staar. Nie net dit nie, maar later daardie jaar het hy sy pa aan kanker verloor. Ten spyte die uitdagings het hy steeds 'n fenomenale akademiese prestasie gelewer en met ‘n 94,7% gemiddeld en welverdiende plek op die Top10 uit gestap aan die einde van matriek. Hy beland in die Top 3 in die Wes- Kaap vir ekonomie en in die Top10 vir wiskunde.
Asof sy bordjie nie al klaar propvol was tydens sy matriek jaar
nie, het hy en twee vriende op 14 Augustus ‘n nie winsgewende organisasie gestig met die naam CarbonSpek wat CO2 emissies sowel as armoede aanpak. Hy het die finansiële afdeling en toekomstige beplanning vir die besigheid gedoen.
Hy is vandag hier om vir ons almal ‘n boodskap te deel oor harde
werk, motivering en deursettingsvermoë, veral in die gesig van uitdagende omstandighede. Hy het definitief gewys dat jy, ongeag wat die lewe na jou toe gooi, jou kop bo water kan hou en uitstekende prestasies kan lewer.
Hy is ook nie ‘n man waarteen jy sal wil baklei nie. Na 10 jaar se
oefening was hy in 2019 genooi na Japan om sy swart belt in karate te ontvang. Na ‘n week se oefening onder uiterse omstandighede het hy die gradering deurgekom en sy swart belt met trots verwerf. Die vorige jaar, 2018 het hy met dubbel silwer uitgestap by die nasionale kampioenskap vir Goju-kai karate.
Ek het die voorreg om te sê dat hy tans in sy finale jaar van sy
akademiese loopbaan is, waar hy Aktuariële Wetenskappe studeer by Stellenbosch Universiteit. Hy het nie net sy akademiese prestasies voortgesit nie, maar het ook sy passie vir die natuur en avontuur gekombineer deur lid te word van die Berg en Toer klub, saam met wie hy al verskeie staproetes gestap het. Vir die toekoms het hy groot planne. Een van sy grootste drome, soos baie van ons s’n, is om die wêreld te sien. Hy het al ‘n paar goeie pogings gemaak vandat hy skool verlaat het om die droom te laat waar word. Laas jaar bevind hy homself in Indië tydens die Junie vakansie en in die VSA tydens die Desember vakansie. Hierdie Junie vakansie is hy op pad Amsterdam toe, maar van sy avonture kan hy self vir julle meer vertel.
Sy voetspore lê diep getrap in die staproetes van Suid-Afrika,
maar dieper in die harte van die mense wat hom ken. Al sy vriende en familie kan getuig van watse besonderse mens en inspirasie hy is. Ek is trots om hierdie oud-Durbie aan julle bekend te stel, en nog trotser om te sê dat hy my ouer broer is. Sy prestasies is 'n herinnering dat jy, ongeag wat jy deurgaan, kan uitstaan en 'n sukses kan maak van jouself. Hier saam met my op die verhoog, Jean-Pierre Scholtz.