“ Binhi at serbisyo, bakit kailangang maabuso ”

Ryan C. Eroles

Ang patuloy na pag-unlad ng isang lipunan ay tila kapares ng paglago ng isang halaman
sapagkat makikita sa mga sanga nito kung gaano kalusog ang pundasyon o mga ugat nito.
Samakatuwid, ang sektor ng manggagawa at magsasaka ay dalawang mahahalagang bahagi
ng lipunan na bumubuo sa pundasyon ng ekonomiya. Ngunit sa kabila ng kanilang papel na
nagpapayaman sa bansa, mapapansin natin ang ilang mga isyung patuloy na kinakaharap ng
sektor na ito.

Sa larangan ng manggagawa, isa sa mga pangunahing isyu ay ang kawalan ng

seguridad sa trabaho. Maraming manggagawang kontraktwal ang nakakaranas ng kawalan ng
trabaho sa oras na hindi na kinakailangan ang kanilang serbisyo. Ang kakulangan sa
benepisyo, proteksyon at hindi naaayong oras ng pagtatrabaho para sa mga manggagawa ay
nagdudulot ng kawalan ng katiyakan at pangangailangan ng masusing reporma sa tinatawag na
labor laws. Sa kabilang banda, ang sektor ng magsasaka ay nakakaranas din ng iba't ibang
hamon. Ang kawalan ng modernisasyon sa agrikultura, sariling lupang sakahan, kakulangan sa
teknolohiya, at limitadong suplay ng mga binhing pananim ay nagiging hadlang sa mas mataas
na ani at kita para sa mga magsasaka. Mahalaga ang pagbibigay ng sapat na suporta at
oportunidad para sa mga magsasaka upang makapaniguro sa kanilang kabuhayan at
makapagbahagi sila ng kaunlaran ng bansa.

Sa pangkalahatan, ang isyung pang manggagawa at magsasaka ay naglalarawan ng

hindi sapat o hindi patas na pagkalinga sa mga sektor dito sa ating bansa. Bilang isang
indibidwal na lehitimong naninirahan sa bansang Pilipinas, naniniwala akong sa pamamagitan
ng maayos na implementasyon ng makatarungan at makabuluhang mga patakaran, maaaring
matugunan ang mga pangangailangan ng manggagawa at magsasaka na naglalayong
magtagumpay hindi lamang ang mga indibidwal kundi ang buong ekonomiya.

Panahon na upang ang bawat kabataang Pilipino ay maging boses o tinig ng mga sektor
na nagsisilbing ugat ng progresibong tinatamasa ng ating lipunan. Sa huli, mainam at sabay
sabay nating ipaglaban ang karapatan ng bawat magsasaka at manggagawang Pilipino.