VAJZËRIA

Kur je shtatëmbëdhjetë vjeç dhe kur je vajzë, e gjithë botën të thotë se çfarë të bësh
me trupin tënd: mbulo shpatullat, mbulo këmbët, mos e vish atë fustan sepse është
shumë i shkurtër, shumë transparent, me shkëlqim gjithashtu. Ata na bëjnë të
ndihemi sikur duke lindur femra jemi tashmë fajtore për diçka.
Që kur ishim më të vegjël, na thuhej të respektojmë burrat, t'i dëgjojmë ata, të na
interesojë për mendimin e tyre që kanë për ne dhe madje t'i pyesim se çfarë të
bëjmë me veten . Është në rregull që një burrë të ketë ambicie, ide dhe zgjedhje, por
kur bëhet fjalë për gratë, ne duhet të diskutojmë gjithçka me babin, vëllain ose burrin
tonë dhe nuk mund të bëjmë asgjë pa lejen e tyre, sepse burrat e dinë gjithcka më
mirë.
Kur isha më e vogël, dikush më tha: “Mos u mërzit, ai është thjesht një djalë. Djemtë
piqen më ngadalë se ju. Jini më tolerantë pme ta.” Por nuk i kam dëgjuar kurrë të
thonë: “Djemë, vajzat piqen më shpejt se ju. Shikojini ato si shembuj inteligjence dhe
lidershipi.” Dhe kjo është ajo që më bën kaq të mërzitur, është fakti që kur një djalë
bën një gabim, të gjithë përpiqen ta justifikojnë dhe ta mbrojnë, por kur një vajzë bën
të njëjtin gabim, të gjithë janë gati ta kritikojnë dhe ta gjykojnë atë.
Çdo ditë shohim gra në televizion me një post, me diplomë, me një pozicion, por a e
dimë në fakt me sa probleme dhe vështirësi përballen ato çdo ditë? Burrat mund të
jenë kushdo që duan të jenë, dhe të bëjnë çfarë të duan të bëjnë dhe nuk duhet të
mendohen dy herë përpara se të bëjnë ose të thonë diçka. Sa për gratë, ne duhet të
analizojmë gjithçka që bëjmë dhe themi sepse mund të tingëllojë e dobët nga goja
jonë dhe mund të duket më pak strategjike dhe e menduar mirë, sepse gratë
kontrollohen nga emocionet dhe burrat nga logjika, apo jo?
Kur burrat shtypen është një tragjedi… kur gratë shtypen është zakon. Pyetni një
burrë se çfarë është një grua e mirë dhe shikoni atë të përshkruajë një skllave.
Më duket shumë e trishtueshme që të thuash "Kam një të dashur" është mënyra më
efektive për ta bërë një mashkull të të lërë të qetë. Sepse ai respekton një burrë
tjetër më shumë sesa ju thjesht duke thënë "jo". Nuk ka asnjë vajzë apo grua të rritur
që nuk e ka përjetuar kurrë frikën se mos lëndohet apo preket pa leje sa herë që
perëndon dielli dhe sa herë që ecin vetëm dhe nuk i fajësoj. Ne dëgjojmë histori
tragjike të përditshme ku gratë masakrohen dhe torturohen nga familjet e tyre, burrat
ose të huajt. Si mund të pajtohemi dhe të jemi në rregull me këtë? Si i lejojmë gratë
të abuzohen, përdhunohen dhe vriten nga krijesa që ne i quajmë baballarë, vëllezër,
burra?
"Jo të gjithë burrat" thonë ata... por nëse një pëerdhunues dhe një hero duken
saktësisht njësoj, si duhet t'i dallojmë ata?
Gratë ... ne jemi të bukura, të zgjuara dhe plot jetë. Dhe ne kemi ambicie, ide dhe
dëshira dhe ndihem e semure kur njerëzit më thonë se kuzhina është i vetmi vend ku
gratë përshtaten.; Jam lodhur duke u zgjuar çdo ditë dhe me duhet t'i provoj botës se
jam e barabartë me një mashkull dhe se mund të bëj gjithçka që ai mundet, se duhet
të paguhem saktësisht në të njëjtën shumë si ai dhe se kam të drejta që duhet të
respektohen, një zë që duhet dëgjuar dhe kufij që nuk duhen rrezikuar dhe
kërcënuar.
Prandaj, ju lutem, sa herë që mendoni të ulni një grua dhe ta lëndoni atë, imagjinoni
atë si nënën, motrën ose vajzën tuaj dhe sa shkatërruese do të ishit ta shihnit atë të
vuante dhe të ndihej keq.
Dhe nëna, sigurohuni që t'u thoni vajzave tuaja të vogla se ato mund të sundojnë
botën dhe se nuk kanë nevojë për një burrë që të ndjehen si gra.
Dea Cenkaj