Preparation is Half Battle Won

Mga hinigugma, nagatilipon kita subong sa pagpangamuyo para sa aton utod nga si N. Aton siya karon
igadul-ong sa iya ulihi nga kahimtangan diri sa duta.

Sa kada lubong nga aton gina-tambungan, usahay kita nagakasaubo tungod sang kamatayon. Ang
kamatayon nagadala guid sang paghibi – paghibi tungod sang kahidlaw kag realization nga, matuod nga
ini nga tion amo ang ulihi nga tion nga kami magaupdanay.

Pero mga utod, ang aton balasahon nagasiling sa aton nga indi pa ini ang katapusan, may ara pa sing
kabuhi matapos ini – kabuhi nga wala sing katapusan.

Gani, wala naton ginasaulog ang kamatayon ni N., kundi aton ginabalikan ang kabuhi nga iya ginpaambit
sa aton diri sang ari pa siya. Sigurado guid nga madamo ang natandog nga mga kabuhi ni N., madamo
ang iya nabuligan, kag madamo ang iya ginpaambitan sang pulong gikan sa iya taguipusoon.

Permi naton mabatian ang isa ka phrase sa mga tion nga kita magpreparar para sa aton mga exams, sa
aton mga training, sa mga contests, kag sa mga events nga aton ginahiwat. Preparation is half battle
won. Ang pagpreparar tunga na sa kadalag-an; buot silingon abanse ka na, may headstart ka na, kag
dako na tsansa mo magdaog sa tanan nga bagay.

Ang tawo nga nagapreparar, kag nagabantay sa present moment amo ang tawo nga nagadaog. Makita
naton kung ano ka importante ang pagpreparar sa tanan nga bagay; sa aton trabaho, sa aton
pagsinalayo, kag sa pagbaton naton sang mga sakramento, kag ilabi na guid sa pagpreparar sa tion nga
kita mapatay.

Mga hinigugma, sa katapusan sang aton pagpanglakaton sa sini nga kalibutan, kita pagahukman sang
Dios paagi sa aton mga binuhatan diri sa kalibutan. Ini nabatian naton sa palaanggiran nga ginsiling ni
Jesus kay Lazaro nga nag-antus sa sining kabuhi tungod sang iya pagkaimol – subong man ang promisa ni
Jesus sa mahinulsulon nga makawat nga Iya ginhambalan nga “Subong nga adlaw, magaupod ka sa akon
sa Paraiso.”

Karon, makapamangkot kita, preparado bala si N.? Sa inyo pagtambong sa sini nga misa, sigurado nga
nakapreparar siya – pero ang preparasyon indi kaangay sang nahibaluan naton nga isa lang ka adlaw nga
preparasayon. Si N., nagpreparar sang iya kaugalingon sa matag-adlaw; sa adlaw-adlaw niya nga
pagkabuhi, sa adlaw-adlaw niya nga pagkamaayo, kag sa adlaw-adlaw niya nga pagsalig kag pagtuo sa
Ginoo.

Kabay, mga utod, indi kita mag-untat sa pagpangamuyo para kay N. Ini makabulig sa iya pagpanglakaton
padulong sa langit, subong man sa pagbulig sa inyo kaugalingon kay ini maayo nga buhat. Gani,
maghanda kamo. Tandaan naton nga preparation is half battle won – kung luyag naton magpalangit,
subong palang magbuhat na kamo sing kaayuhan, magbalik sa Ginoo, kag ang pagsalig kag pagtuo aton
huptan. Amen