29 Nov 2023
MIERCOLES SA IKA-XXXIV SEMANA SA
ORDINARIONG PANAHON
ENOT NA BABASAHON
Daniel 5:1-6. 13-14. 16-17. 23-28
Pagbasa sa Libro ni Profeta Daniel
Sarong banggi, inalok ni Hadeng Belsazzar an
sangribong kalalakihan sa sarong dakulang
bangkete, asin nag-irinoman sinda. Mantang nag-
iirinoman sinda, nagboot si Belsazzar na darahon
saiya an mga bulawan saka platang kagamitan na
sinamsam kan ama niyang si Nebukadnezzar sa
Templo sa Jerusalem. Ipinakua kan hade an mga ini
tanganing iyo idto an pag-inoman niya, kan mga
iginagalang na lalaki sa palasyo, kan saiyang mga
agom, asin mga kasaroan. Dinara man tolos an mga
kagamitan, asin duman na sinda nag-irinom. Nag-
irinom sinda nin arak, asin nag-oromaw sa mga
dios-dios na gibo sa bulawan, plata, bronse,
lansang, kahoy, saka gapo. Kan oras man sanang
idto, may sarong kamot nin tawo na tuminunga asin
nagpoon magsurat sa lanob kan palasyo, sa lugar na
orog na naliliwanagan kan mga ilaw. Nahiling kan
hade an kamot mantang nagsusurat ini. Nanlongsi
an hade asin natakot nin marahay kaya nagtakig an
saiyang mga tuhod. Dinara tolos si Daniel sa
atubang kan hade, asin nagsabi ini, “Ika si Daniel,
an nabihag na Judio na dinara digdi hale sa Juda kan
sakong amang hade? Nadangog kong nasa saimo an
espiritu kan banal na mga dios, sa saimo makukua
an liwanag, pakasabot saka an nalalaen na
kadonongan. Alagad nadangog kong nakakatao ka
nin mga paliwanag asin nakakapahayag nin mga
misteryo. Kun mabasa mo ining nasusurat dangan
masabi mo sako an kahulogan kaiyan, gugubingan
ka nin purpura, magsusulot nin bulawan na kulintas,
asin magigin ikatolo ka sa kapangyarihan sa
kahadean.” Nagsimbag si Daniel, “Dai mo na ako
pagtawan nin mga regalo. Itao mo na sana iyan sa
iba. Alagad babasahon ko para saimo an isinurat
asin sasabihon ko saimo an kahulogan kaiyan. kundi
ilinangkaw mo an saimong sadiri tumang sa
Kagurangnan nin langit. Ipinakua mo an mga
bulawan na kagamitan na sinamsam sa Templo
tanganing pag-inoman mo, kan mga iginagalang na
lalaki sa palasyo, kan saimong mga agom asin kan
saimong mga kasaroan patin inomaw mo an mga
dios na gibo sa bulawan, plata, bronse, lansang,
kahoy, saka gapo—mga dios na dai nakakahiling o
nakakadangog asin dai nakakaaram nin anoman.
Dai mo ginalangan an Dios na nagkakapot kan
saimong buhay asin nakakaaram kan gabos mong
ginigibo. Iyan an dahelan kun tano ta ipinadara niya
an kamot tanganing magsurat kaining mga
tataramon. “Iyo ini an nasusurat: ‘MENE, MENE,
TEKEL, asin PERES.’ Iyo ini an kahulogan kaiyan:
MENE, binilang na nin Dios an mga aldaw kan
saimong paghahade asin tinapos na; TEKEL,
tinimbang ka sa timbangan asin nakuang
nagkukulang; PERES, binanga na an saimong
kahadean asin itinao sa mga taga Media saka sa
mga taga Persia.”
Tataramon nin Kagurangnan.
SALMO RESPONSORIAL
Daniel 3:62. 63. 64. 65. 66. 67.
Simbag: Itao sa Dios an kamurawayan asin danay na
kaomawan.
Omawon nindo an Kagurangnan, kamo gabos na
langitnon na kapangyarihan; mag-awit kamo nin
pag-omaw saiya asin tawan nindo siya nin onra
sagkod lamang.
Omawon nindo an Kagurangnan, aldaw saka bulan;
mag-awit kamo nin pag-omaw saiya asin tawan
nindo siya nin onra sagkod lamang.
Simbag: Itao sa Dios an kamurawayan asin danay na
kaomawan.
Omawon nindo an Kagurangnan, kamong mga
bitoon sa langit; mag-awit kamo nin pag-omaw
saiya asin tawan nindo siya nin onra sagkod
lamang.
Omawon nindo an Kagurangnan, uran saka ambon;
mag-awit kamo nin pag-omaw saiya asin tawan
nindo siya nin onra sagkod lamang.
Simbag: Itao sa Dios an kamurawayan asin danay na
kaomawan.
Omawon nindo an Kagurangnan, kamo gabos na
doros; mag-awit kamo nin pag-omaw saiya asin
tawan nindo siya nin onra sagkod lamang.
Omawon nindo an Kagurangnan, kalayo saka init;
mag-awit kamo nin pag-omaw saiya asin tawan
nindo siya nin onra sagkod lamang.
Simbag: Itao sa Dios an kamurawayan asin danay na
kaomawan.
EVANGELIO
Lucas 21:12-19
Pagbasa kan Evangelio na Sinurat ni San Lucas
Alagad bago mangyari ini gabos, dadakopon asin
papasakitan kamo; dadarahon kamo sa mga
sinagoga, saka sa mga bibilanggoan; iaatubang
kamo sa mga hade asin sa mga kagsakop dahel
sako. Panahon na nindo ini sa pagpahayag kan
Marahay na Bareta. Ibugtak na nindo sa saindong
isip na dai kamo mahadit kun paano kamo
masimbag, huli ta tatawan ko kamo nin mga
tataramon asin kadonongan, na dai masusudya o
masisimbag kan saindong mga kaiwal. Ipapaarestar
kamo maski kan saindong mga magurang, mga
tugang, mga kadugo saka mga katood; ipapagadan
ninda an iba saindo. Ikakaongis kamo kan gabos na
tawo dahel sako. Alagad maski sarong buhok sa
saindong payo dai mawawara. Kun makatagal
kamo, makakamtan nindo an buhay.
Marhay na Bareta kan Kagurangnan.