Kurt Dustine S.

Salvatierra Lakbay Sanaysay

STEM 12 – Einstein Pagsulat ng Filipino sa Piling Larang

Byaheng Tagaytay

Panahon na naman ng tag-init at ang hangad ng karamihan ay makapunta sa

isang lugar na magbibigay ng kahalumigmigan at ginhawa sa ating mga balat na
pinagpapawisan. Kaya't balikan natin ang isang malayong paglalakbay sa pangalawang
pinakamalamig na lugar sa Pilipinas. Ito'y isang mahabang paglalakbay na hindi
malilimutan sa anumang alaala na aking dinadala at dadalhin pa. Ano nga ba ang
kapana-panabik sa pagbabalik-tanaw na ito?

Sa aming paglalakbay sa Second Summer Capital of the Philippines o mas kilala

bilang Tagaytay, sariwa pa rin sa aking isipan ang bawat pangyayari na naganap noon.
Ito ay isang karanasang kasama ang aking pamilya upang ipagdiwang ang aming
pagkakaisa. Hindi gaanong matagal ang aming paghahanda para dito sapagkat
biglaang hiniling ito ng aking Lola na nagmula pa sa Canada. Sa panahong iyon, ako ay
nag-aalinlangan pa kung ako ay sasama sapagkat hindi ako sigurado kung kakayanin
kong lumiban mula sa paaralan. Ngunit, alang-alang sa kaligayahan ng aking
minamahal na Lola, ako ay nagpasyang tumuloy at nagpaalam sa aking mga masisipag
na guro.

Nagsimula ang mahabang araw namin sa isang matinding pagsubok at ito ang
maagang paggising. Habang pilit naming binubuksan ang aming mga antok na mata,
maagang dumating ang magarang sasakyan na aming gagamitin, kaya't kami ay
nagmadaling mag-ayos ng aming sarili at mga kailangang gamit para sa paglalakbay.
Mahigit alas sais na ng umaga nang kami ay nakaalis mula sa aming tahanan, subalit
sa hindi inaasahang pangyayari, naipit kami sa matinding trapiko. Habang naghihintay
kami sa biyahe, ang aking atensyon ay nahatak ng mga magagandang tanawin na
aming dinadaanan. Isa na rito ang kahanga-hangang tanawin ng Taal Lake, kung saan
nasaksihan ko ang mga kalderya ng isang malaking prehistorikong bulkan.
 Matapos ang mahabang biyahe, ang unang lugar na aming pinuntahan bago
kami pumunta sa Tagaytay ay ang Caleruega Church sa Nasugbu, Batangas. Ito ay
isang kahanga-hangang simbahan na matatagpuan sa tuktok ng pinakamataas na
burol, na napapalibutan ng malawak at kamangha-manghang tanawin ng sariwang
kapaligiran. Sa mismong pagpasok pa lang sa simbahan, malalaman mo agad na ang
pagbayad ng maliit na halaga para makapasok ay sulit na dahil sa lawak ng espasyo na
meron ito. Mayroong mga istasyon sa bawat sulok at mayroon ring isang hanging
bridge na kahanga-hanga dahil sa taglay na tibay nito. Nagtagal kami roon ng halos
isang oras, at sa dami ng mga litratong aking nakuha, pakiramdam ko ay agad akong
napuno ng mga alaala na hindi ko kailanman malilimutan. Pagkatapos, ipinagpatuloy na
namin muli ang byahe patungong Tagaytay.

Pagdating namin sa Tagaytay, ang una naming pinuntahan ay ang Picnic Grove,
kung saan kami ay nagtagal ng halos tatlong oras. Sa loob ng tatlong oras na iyon,
pinawi namin ang aming gutom sa pamamagitan ng mga dala-dalang masasarap na
pagkain. Pinili naming rentahan ang pinakamalaking kubo kung saan tanaw ang buong
tanawin ng Taal Lake. Habang hinihintay namin ang paglubog ng araw, ginugugol ko
ang aking oras sa paglilibot sa buong lugar at pagkuha ng mga litrato. Pagkatapos,
sinundan namin ang aming paglalakbay sa isang tanyag na lugar na tinatangkilik ng
karamihan, ang Skyranch Tagaytay. Mayroong mga atraksyon dito na maaaring
subukan at sa aking karanasan, ang Log Coaster ang tumatak sa aking isipan dahil
sinubok nito ang aking takot sa matataas na lugar. Sa bahagi ng aming paglalakbay na
ito, ito ang pinakamatagal sapagkat nilaan namin ang limang oras dito.

Matapos ang mahabang paglalakbay, nagpasya kami na magtungo sa Leslie's

Restaurant upang tikman ang mga pagkain na kilala sa Tagaytay, tulad ng bulalo.
Nakakatuwang sabihin na ang kanilang serbisyo ay maayos kahit na matagal ang
paghihintay sa pagdating ng aming pagkain. Dagdag pa rito, sa bawat higop ng sabaw
ng bulalo, napapawi rin ang lamig ng klima na meron ang Tagaytay. Sa aming pag-uwi,
madidilim na kalsada ang aming karamay ngunit ako ay nagpapasalamat at hindi na
gaanong malala ang trapiko, kaya't mabilis ang aming paglalakbay pabalik sa Lipa,
Batangas. Sa loob ng isang araw namin sa Tagaytay, lubos kong nauunawaan ang mga
dahilan kung bakit isa ito sa mga kinahuhumalingan ng mga turista at kung ano-ano ang
mga atraksyon na nagbibigay ng kapana-panabik na karanasan sa bawat isa.

Realisasyon:

Ang paglalakbay na ito ay nagdulot sa akin ng mga malalim na realisasyon. Una,

pahalagahan ang bawat alaala na kasama mo ang iyong pamilya, ito ay isa sa mga
bagay na minsan lamang mangyari sa buhay ng isang tao. Pangalawa, napakaraming
lugar sa Pilipinas na talaga namang kahanga-hanga at dapat itong pagyamanin pa
bilang isang indibidwal na pinagmamalaki ang pagiging Pilipino. Sa huli, natutuhan ko
rin ang kahalagahan ng pagpapasalamat sa Panginoon para sa mga bagong
karanasang kanyang inaalay. Ang paglalakbay na ito ay talagang isang biyaya na dapat
kong ipagpasalamat at itanim sa aking puso habang-buhay.