Interneti është bërë një domosdoshmëri në ditët e sotme dhe nuk e
imagjinoj dot veten në një ditë pa internet. Po të mos kisha një ditë internet, nuk mendoj që do të ishte fundi i botës, por vështirësi do të kisha pasi asnjëherë nuk më ka munguar interneti në shtëpi apo edhe jashtë saj. Unë mendoj se kjo mund të jetë një lloj varësie por edhe domosdoshmërie. Po të mungonte një ditë interneti, në radhë të parë pajisjet si telefoni, laptopi, tableti etj., nuk do kishin asnjë vlerë sepse asgjë nuk mund të bëhet pa internet në ditët e sotme. Do të shqetësoheshin të afërmit për mua; do të thoshin: “Pse nuk më shkrove? Më bëre merak....”. Pastaj nëse do të më duhej të bëja një detyrë për në shkollë, do të më duhej t’i kërkoja falje mësueses të nesërmen që s’i bëra dot detyrat, “se nuk kisha internet, o zysh!”. Pa internet, ditën e pushimit nuk do të qëndroja në shtëpi, sepse nuk do të luaja lojrat e mia të preferuara, apo të shikoja filmat që kam qejf, por do të dilja me shokët. Pa internet nuk do të mund të orientohesha për të shkuar në vendet që dua, nuk do mund të flisja me njerëz të tjerë që ndodhen larg meje apo të gjeja informacionin që më duhet. Një ditë pa internet do të ishte krejt ndryshe nga ditët e tjera; çdo gjë do të dukej e pamundur. Do të më dukej vetja i përhumbur, e shpëtimin do ta gjeja te librat për çdo gjë. Pa internet do të duhej të ktheheshim te mënyrat e vjetra të komunikimit dhe shumë nga veprimtaritë e përditshme nuk do mund t’i bënim. Një ditë pa internet do ishte e vështirë, por edhe e bukur sepse do kishim më tepër kohë për të kaluar me miqtë dhe familjarët e jo më kohë për t’i kushtuar telefonit e gjërave pa vlerë.