KA SIA HOIH THUPIANGTE - 1

Uiphuk Suang lampi

Dolluang Uiphuksuang lampi a thei tampi om mai thei.

Lamdang tawh kibang ee. Suang lah ci, lampi lah ci. Uiphuksuang Lampi kici Mualnuam (D)
khawkhung pan Thangsan khawtaw kikal motor lampi ahihi. Lampi aa om suang te uiphukvun
bangin phok liplep hi. A leitang leisan ahih manin guahzu leh naal zalzal hi. Uiphuksuang lampi
lampidung tengah singkung leh mun pawlkhat ah guakung te in liah khipkhep hi. Tuuk-hun ciang
bangin motor cih thadah motorcycle nangawn baih lo. Khuakhaal hileh zong singkung tamin daam
ahih manin leikeu sitset cih kitam muhlo hi. Tuuk-hun tung leh lampi naal. Khuakhal hun tung leh
lamnaal keu nailo. Phalbi tung leh daitui kai in lampi kawtsak.
Kum kivei in khuahun kikhel taleh a kikhel theilo Dolluang Uiphuksuang lampi tunga
motor khekhap guam te, Motorcycle khekhap kuak te, mihing khekhap kom te ahi hi. Mitkha ah a
mang theilo lamdunga kai zilzial guateh te. Leisan lampi tunga motorcycle pei taalna maa te.
Leisan lamnaal uiphuksuang lampi a tawnkha ten a phawkna uh a tuam tek hi dingin ka um hi. Kei
adingin ahih leh ka nuntakna ah ka mangngilh theih nawnloh ding, ka mangngilh sawm nawnloh
thu manpha, tua lampi in hong hilh hi. Tua lampi ka totna aa thupiang in kei adingin Ka sia hoih
thupiang khat ahi hi.
Tuuk laitak ahi hi. Thangsan khua mualdawn ah meiipi kaai in, Zozang (Lower) khua sungah
guahmal hong kia seuhseuh ta hi. Hong then seuhseuh guahmal te nuai ah Dolluang RHC monthly
meeting nei dingin ka lawm numei khat tawh cycle khatah tuangkhawm in Zozang (Lower) khua
panin ka kithawi uhi. Mualnuam (D) khua ka tun uh ciangin Uiphuksuang lamnaal ading ci_in
Mualnuam (D) AMW nu in ka cycle pei nunglam uah chain sikkhau hong vialh sak zihziah hi.
Muanhuai mahmah in lamnaal nawk ding bang ka kihta nawn kei hi.
Ka pai khia ta uhi. Guahmal te hong gol semsem. Ka maitang uh guahmal in hong theh
seuhseuh hi. Kiimlepaam aa meiipi te hong zing semsem in ka maitang uh guahmal in hong
khaknawh semsem. Ka lampi tung ua hong kia guahmal ten zong matlehzet in leitang khaknawh
semsem.
Guahmal te nawkkawm in damdam in ka pai toto uh hi. Guahmal te lei sungah tum zo
nawnlo in ka lampi tung uah tu i in hong luang dede hi. Ka maitang uh hong kap guahmal te lei ah
siksan in ka pai toto uhi. Kiimlepaam kikhuadak thei mahmah lo. Maitang sangsak ding cileng
guahmal in ka mit uh hong kha zel ahih manin kihak pha theilo. Ka lampi uh en gige, sal lile sa in
leisan lamnaal uiphuksuang lampi ka tung ta uhi. Ka cycle pei nunglam uah chain sikkhau ka velh
uh ahih hangin angei mah bangin lampi na naal lua! Cycle pei lamtham ah hong kipei velvel ta. Ki
paikhia zo lo. Ka nih un tuakin ka cycle uh ka sawn uhi. Tawlkhat mah ka tosawn uhi. Guah lah zu
ziahziah. Ka khua ul uh lah guahmal tawh kikim hel_in taak ziahziah. Ka nih un ka khuisa uhi.
Tawlkhat khit Lam hoihdeuh na khat panin ka tuangkik uhi.
Khua hong kihong pian ta hi. Thangsan khuataw mual dawn aa meeilumpi te hong
kihem ta uhi. Mualnuam (D) khua a tuam meiivom te leh guahmalte damdam in hong vengh
pianpian ta hi. Ki khuadak thei ta ahih manin munzang lamkawi khatah tawmvei ka tawlnga uhi.
Guah zuk kik ding lau kahih manun sawt khawl ngam lo in tawlkhat khit ciangin ka lampi uh ka
zomkik uhi. Leisan lamnaal uiphuksuang lampi ka kheng nai kei uhi. Ka nung et uh ciangin ka
taalkhak na uh cycle khekhap te zul demdam hi. Ka mailam uh ka et uh ciangin a naaltuak
mahmah leisan lampi muhtawp dong mahah san to pekpak lai hi. Kidawm takin ka paipai uhi.
Cycle hawl ka hih manin ka pukkhak loh nadingun ka kidawm mahmah hi. Lam hoihlo, lamnaal
vive lak mahah ahoih zawk deuhna te ka tawnsak hi. Puk ding lau in hat pai ngamlo in ka
damhawl mahmah hi.
Tua leh upmawh hetloh, kiginkholh loh, lamet loh pi in munkhat ah ka ki baw-loih uhi.
Ka nih un ka puk uhi. A kiphong pak thei zaw tuan om lo in ko tum tuakin hanciamin ka thokik
uhi. Ka kisuang mahmah aa paikik ding bang ka kihta mahmah hi. Lawmnu hong tuang ngam
nawn tam maw ci in ka lung patau mahmah hi. Tua leh ka lungsim ah thu tampi tak hong suak in "
lawmnu'n bang hong ci tam maw. Hoih tak hawl buang ve, kidawm ve, lawmlawm! Siamlo" ci_in
hong tawnggawp tam maw ci _in ki suangtaak in a maitang zong ka en ngam kei hi. Zong
bangmah ka hopih ngam kei hi. Ka pumtunga buan te ka khut tawh ka nulnul kawmin maizum
pipi "Na bang ci ei, na liam hia, cycle hawl siam kei tak ing" ka va cih khiankhian hi. "Ai ve . . .
Lawmlawm. Siam kei tak mah teh" hong ci inteh ci in ka lamet kimkalai, ka upmawhloh lamtak in
"Eii . . . Ih lampi ahi ci ngiat!" hong ci mawk. Lamdang sa lua in amah bang ka en gega hi. A meel
ah dahmeel, dipkuat meel a pua kei hi. A om hithiat lel hi. Kei kisuantaak lam bang lo in hong
dawnna kammal in ka lungtang hong kha vat hi. Tua kammal ka bil ah khum mahmah hi. Kei
hong mawhsak nuam leh aki ngah lua kimlai hong mawhsak lo. A mah'n lampi ah kipuk theilua
cih na tel lua. Amah'n lampi haksat lam na tel lua. Mi khempeuh khial thei, pukthei cih na tel lua.
Tawlkhat ka khawl khit uh ciangin ka khualzinna lampi uh ka zomkik uhi. Lam kaalah ka lawmnu
kammal ka ngaihsun kikkik hi.
"Ih lampi a hici ngiat . . ."
Hih kammal cikciangin ka mangngilh thei tam maw. Hih kammal in Thu tampi tak hong ngaihsun
sak hi. Mipil te kammal pawlkhat zong ka phawkkha vat hi.
"Gualzawhna taktak ih cih bel puk ngeilo cih hilo in puk napi aa thawhkik zawhna nahi
zaw hi."
- Vince Lombardi

" Ih minthanna pi pen bel ih tuukna pan ih thawhkik zawhna ahi hi "
- Confucius

" Nuntakna thusim ahih leh 7 vei ih puk leh 8 vei thawhkik ding na hi thong hi "
- Paulo Coelho

" Ih puk leh opcip lo a ih thawhkik zawh ciang bekin ih ma a kitun thei bek hi veh aw"
- Ralph Waldo Emerson

" Mihing te bel lawhcin lua ding kisa, a kituuk phot zawzen thei mah hi ei"
- Mary Kay Ash

Ka nuntak khualzinna lampi zong paak kiphah lampi hilo, ling tawh kidim lampi hithei.
Khat vei leh ka nuntakna lampi naal in kidawm mahmah taleng akipuk thei kai ve. Tua hun ciang
"ih lampi a hici ngiat " ka ci thei tam maw. Tua hilo in keilekei, ka lawm te, ka tungsiah te, ka nuai
aa te, ka kiim ka paam peuh ka mawhsak kha tam maw? Ka lampi omzia theilo in Ka pukna ah ka
omcip kha tam maw. Ahih keileh ka pukna pan thokik in ka lampi ka zomkik zo tam maw. Thokik
in zomkik kei leng ka nuntak khualzinna tungngei lo ding kai ve!
Hih bangin lamkaal ah thu ka ngaihsut kawmkawmin ka pai kawmkawm uh aa sawt lo
in ka pai nading uh Dolluang ka tung thei uhi! _

Go Mung(Save the Children -Tedim)

Date : 12.8.2016