Kontekstwalisadong Komunikasyon sa Filipino

Mount Carmel College of Casiguran, Inc.

Casiguran, Aurora 3204
Name: Alvin A. Trucilla Date: February 06, 2024
Course and Year: BEEd – 2 Instructor: Mr. Renny Boy P.
Espaňa

“Sulong Wikang Filipino, Edukasyong Pilipino para Kanino?”

ni: Dr. Neri
(Repleksyong Papel ni Alvin A. Trucilla)
Isang palaisipan sa payapang gabi ang tila nagpamulat sa akin sa magdamag na nag-iisip. Lunas bang
maituturing ang pagpapalit ng iilang nakasanayan, o panahon na para ibahin ang tila sa tingin ng iba’y sagabal
lamang sa pag-unlad? Ako ngayo’y litong lito at tila di mapakali kung bakit mismong sariling atin ay siya
ngayo’y hindi tatangkilikin. Ito ba’y walang linamnam sa panlasa ng iba o sadyang binabalewala lamang ang
taglay nitong sarap? Sa pagmulat ng mga mata sa umagang kayganda, itong sagabal sa pag-unlad sa tingin ng
iba, ay nagagamit na agad, sa pagsulat ng talata, sa talastasan, sa pagbibigay kaalaman, at marami pang iba. Ito
ay ang wikang Filipino, susi sa paghubog ng kaunlara’y matamo.
Isang malaking palaisipan pa rin sa iilang nakakapagbantay sa kalagayan ng edukasyon sa Pilipinas
ang pagtanggal sa Filipino at Panitikan bilang mga “Core Subject” o ang dalawa sa pinakamahalagang
asignatura na dapat kunin sa kolehiyo. Noong 2013, naglabas ang Commission on Higher Education ng
Memorandum Order No. 20, Series of 2013. Ayon sa kanila, tama lang na tanggalin na bilang college subject
ang Wikang Filipino at Panitikan dahil kabilang na ito sa K-12 basic education curriculum. Tila hindi yata nila
batid ang pwedeng maging implikasyon nito sa mga kabataan sa kasalukuyang panahon? Oo, at sigurado ako,
magdudulot ito ng malaking epekto. Ang wikang Filipino at panitikan ay balwarte ng malayang pag-iisip.
Paano natin maikokonsidera ang ating sarili bilang isang globally competitive na indibidwal kung hindi natin
magagamit ng maayos ang ating wikang pambansa, at ito ay kung tuluyan ng mawawala ang wikang Filipino
bilang panghubog sa kasanayan sa kolehiyo.
Ang wikang di ginagamit, pinag-aaralan at binibigyang halaga ay wikang patay. Sa midyum ni Dr.
Neri na “Sulong Wikang Filipino: Edukasyong Pilipino para Kanino” malinaw na naipapakita at
naipaliwanag dito ang pagkukulang ng mga namumuno sa pagpapahalaga sa wikang pambansa sa sistema ng
edukasyon. Layunin ng midyum na ito na mag-focus sa kahalagahan ng pagtuturo at pagpapahayag sa wikang
Filipino para sa ikabubuti ng edukasyon at pangkalhatang kaunlaran ng mamamayan. Sa aking palagay, ang
pag-alis ng wikang Filipino bilang asignatura sa kolehiyo ay maaaring makaapekto sa komunikasyon, pag-
unlad ng kasanayan sa pagsulat at pangunahing pag-iisip ng mga mag-aaral. Bagama’t pag-aaralan pa din ang
wikang Filipino sa basic education, bilang kabahagi ng K-12 program ng Department of Education, ito ay
magiging kulang pa din sa paghubog ng mga kasanayan na maaaring matamo ng mga mag-aaral. Dagdag pa
dito, mahigit isang daan libong (100,000) mga gurong nagtuturo ng wikang Filipino sa bansa ang
maapektohan nito. Huli, ang pag-aalis nito sa kurikulum ng kolehiyo ay higit na magresulta ng implikasyon sa
pagpapahalaga sa sariling wika at identidad ng mga Filipino.
Sa pabago-bagong panahon, pag-usbong ng mga teknolohiya’t instrumento, at ang globalisasyon,
matutunan nawa nating ipagtanggol ang wikang mayroon sa atin. Marapat lamang na ating ipagmalaki,
mahalin at gamitin. Sa isang interbyu kay Sen. Loren Legarda, “ang pundasyon ng isang bansa ay lalong
mapgtitibay kapag ang mga mamamayan ay nagkakaunawaan gamit ang isang wika na siyang nagbubuklod
sa ating mga adhikain. Kasabay ng ating pagpapayabong sa Pambansang wika, hinihikayat din ang
pagpapahalaga sa iba’t ibang katutubong wika sa bansa na maiituring natin na kayamanang buhat pa sa
ating mga ninuno.” Ang ating wika ay sumisimbolo sa atin bilang isang Pilipino, ngunit hindi lamang maging
simbolo ito, bagkus ay kailangang gamitin dahil ito ang kumakatawan sa mga sarili natin. Patuloy nawa natin
tangkilikin ang wikang likas sa atin. Atin sana itong ipagmalaki at patuloy na ingatan. Huwag nawa nating
ipagsawalang bahala at ipagpalit sa mga pan-dayong salita. Sabi nga ng Ama ng Wikang Pambansa na si
Manuel L. Quezon, “di iiral ang pambansang kaluluwa kung walag wika na nagbubuklod”. Halina’t
ipagtanggol ang wikang sa ati’y nagbuklod. Wikang Filipino ang gamit ko, angat ito sa mundo.
####