NASKAH TÉMPAS SISINDIRAN

LAKON DURMA (DURIAT MATÉMATIKA)

Anggoeun pikeun Patandang Pasanggiri Sisindiran wawakil ti SMA Negeri 1 Garawangi,

Kontingén Kabupaten Kuningan.

(Intro kawih Mobil Butut)

Lalalalala….
Lalalalala….
LALAKI:
MEULI BAJU JEUNG CALANA
MEULI SABUN POHO PARPUM
PALAWARGI SADAYANA
ASSALAMU’ALAIKUM

(Haleuang intro kawih mobil butut)

AWÉWÉ:
LEULEUMPANGAN CARA KUYA
TULUY MEULI SÉRÉH SALAM
WALERNA MAH TI SADAYA
WA’ALAIKUMSALAM

LALAKI & AWÉWÉ:

PULANGKEUN IEUH PULANGKEUN
PULANGNA KA PAJARATAN
TEPANGKEUN IEUH TEPANGKEUN
PATANDANG NU TI KUNINGAN

LALAKI : Sok lah tuluykeun! (LALAKI ngadadak jebi)

AWÉWÉ : Naha atuh manéh téh? Hih! Naha ari manéh?
BORO-BORO DISAPATU
CALANA GÉ TATAMBALAN

1
BORO-BORO RÉK DIAKU
DITANYA GÉ TEU NÉMBALAN
Hih cicing waé!
TANGKAL JAMBU SISI BALONG
DAHANNA EUNDEUK-ENDEUKAN
MUN SAKOLA UKUR MELONG
TAYA ÉLMU KEUR ISUKAN
Jéh kalah ka nundutan!
KA KULAH NYIAR KAPITING
NYOCOK LOBAK BOBODASNA
ULAH SOK LIAR TI PEUTING
OSOK LOBA GOGODANA
Hudang!

LALAKI : Hadeuh! Puguh ieu téh.

JALAN-JALAN KA CIGALAGAH
MULANGNA LIWAT PANGKALAN
SAKOLA TEUING KU WEGAH
HORÉAM TEU KATULUNGAN

AWÉWÉ : Héh, yeuh déngékeun geura!

ULAH ULIN DI MUSOLA
MUN ÉRÉK ULIN KA SAWAH
PENTING PISAN YEUH SAKOLA
SANGKAN URANG ASAK WARAH
Bener teu?

LALAKI:
LAIN EMBUNG SALAK ATAH
NGAN TEU NGEUNAH KARASANA
LAIN EMBUNG ASAK WARAH

2
NGAN GEUS LEUNGIT SUMANGETNA

AWÉWÉ
UYAH GARING DISAPUKEUN
KATINCAKAN KU MANÉHNA
ULAH TEUING DIHAYUKEUN
KABIASAAN ENGKÉNA
Ogoan! Ogoan!

LALAKI
SUNGIL MAH PIKASIEUNEUN
MAJARNA SIEUN CILAKA
DIAJAR ASA TEU RAJEUN
KOMO MUN MATEMATIKA
Beuki teu rajeun waé!

AWÉWÉ: Sok cicing heula, diuk kadinya. Urang rék ngahariring, sok regepkeun.
HAYANG NÉWAK MANUK PUTER
DITÉWAK GEUNING TIKUKUR
MUN MATEMATIKA PINTER
BISA JAGO KANA NGUKUR

LALAKI : Duh, enya nya, moal wé pinter téh!

AROMANIS KEMBANG GULA
GIUNG-GIUNG LOBA RASA
SALILA-LILA SAKOLA
ASA SAGALA TEU BISA

AWÉWÉ:
SAPEUPEUTING NULIS SAJAK
BÉNTANG HATÉ SAMAGAHA

3
ULAH LOBA POK KUDU PRAK
ANGGURSI GEURA USAHA

LALAKI:
AYA ORAY SISI SAWAH
DIPAÉHAN KU SARATI
USAHA SATÉKAH POLAH
ANGGER HÉH TEU NGARTI-NGARTI

AWÉWÉ:
LIMA WELAS JEUNG SAPULUH
JADI SALAWÉ JUMLAHNA
DIAJAR TEU JUUH-JUUH
JALMA PANGHADÉ-HADÉNA

LALAKI:
KA JAKARTA MAWA KISA
NGABEBERA RÉK USAHA
NGAMUSUH LAIN TEU BISA
IEU MAH ARAL SUBAHA

AWÉWÉ:
PINANGGIH JALAN KASUSAH
DATANGNA KA DUKUN LEPUS
HAYANG NYAHO DIRUSIAH
DATANGNA URANG KA PERPUS

LALAKI:
AHMAD BAKRI DUKUN LEPUS
BAHEULA BANDAR TANGKULAK
RÉK NANAHAON KA PERPUS
BUKU NUMPUK PABALATAK

4
AWÉWÉ:
KU LUMÉHO BUBUR LEMU
MURAG BASA NAÉK BÉCA
BUKU TÉH PANCURAN ÉLMU
NGOCORNA KUDU DIBACA

LALAKI:
HÉSÉNA DIAJAR NYETIR
KOMO LAMUN ARÉK PARKIR
ULAH TEUING JADI PIKIR
BISI JADI JALMA PAKIR
Barina ogé tong sok mikiran hirup batur. Dulur-dulur lain, komo kabogoh!

AWÉWÉ: Heuh, teu apaleun!

KABOGOH MAH URANG BANJAR
NGAN CAN APAL NGARANNA
PERLUNA URANG DIAJAR
BEKEL HIRUP KAHAREUPNA

LALAKI:
WARNA HÉJO DAUN SEUREUH
KAANGINAN MALUGURAN
HIRUP TÉH HEUHEUY JEUNG DEUDEUH
SURAHANEUN LALAMPAHAN
Urang mah hirupna gé heuheuy jeung deudeuh atuh, jadi teu kudu aya bekel-bekel sagala.
AWÉWÉ:
DADAMPAR SAUNG TALUPUH
SUHUNANAN KU KARARAS
AYEUNA KUMAHA ATUH
RÉK KA PERPUS TA KA KELAS

5
LALAKI:
PANGANDARAN BATU KARAS
NEUTEUP ÉNDAH PAMANDANGAN
RÉK KA PERPUS RÉK KA KELAS
ASAL SALIRA NYARENGAN

AWÉWÉ: Yu atuh.
KA KANTIN MEULI GORÉNGAN
URANG JALAN BABARENGAN

LALAKI: Asik lampu héjo euy.

RAJEUN DIPICIEUN CANGKANG CAU
POKONANA MAH I LOVE YOU
Hayu atuh!

AWÉWÉ: Ké heula asa aya nu poho sisindiranna, naon nya? Éh inget ayeuna mah. Sok cing
tebak naon yeuh?
GUDANG KACA DIJILIDAN
KEREPUS DI PARAPATAN

LALAKI:
KERIS-KERIS SARANGKAEUN
GEULIS-GEULIS TÉH MUSINGKEUN
Naon atuh nya, lah batan rudet mending nanya ka nu lalajo. Panongton aya nu apal teu?
Tuh Panongton gé teu apaleun naon atuh?
AWÉWÉ: wangsalna téh nya PERPUS atuh!
LALAKI: Oh atuh, yu ah!
AWÉWÉ : Yeuh méméh urang indit kudu pamit heula.
LALAKI: Aéh heueuh! Keun bagian urang tamah.
NÉANGAN DUIT BAKAT KU BUTUH
ASALAMU’ALAIKUM ATUH.
Garawangi, 2018