SUBALTERN KRISMAS

-Debbie Rinawmi

Mizoram Presbyterian kohhran hnuaia Sacrament department zirlai hnuhnung berah chuan Isua
pianna chungchangah beramputen Isua pian thu an hriat hmasak ber thu tar lan a ni a; chu chuan
subaltern krismas hlimthla fiah zetin a hril ruak mai le. Zirna huangah chuan ‘subaltern’ tih thumal
hian hman a hlawhin tunlaiah chuan tawngkam lar tak a ni. He thumal hi Antonio Gramsci-a hman
tan niin India ramah chuan Ranajit Guha hi a hmang hmasa bertu a ni a, mi rethei leh hnuaihnung
zawkte sawi nan a hmang a ni. Chutiang chuan mihringte kan chen ho naa engemaw avanga
endawng emaw hmuh hniam emaw tawkte sawi nan hman thin a ni. Historian Fernando Coronil
chuan a tum ber chu mi hnuaihnung zawkte chanchin ngaihthlak a ngaihtuah a, an aw ngaihthlak a
nih thu a sawi a. An chunga indah a, an aw leh an thusawite pawh mahni duhdana lo hrilhfiah ve
ngawt hi inthliarhranna leh midang dah hniama chungtlakna pakhat tho a ni a, hetiang lakah hian kan
fimkhur thiam a tul a ti nghe nghe a ni.

Kan nun ho naah hian thiltihtheihna (power) hi a tangkaiin a pawimawh hle a; a chhe zawngin leh a
tha zawngin a hman theih a. Hemi duh hian mi tam tak chu an hmanhlel a, thiltihtheihna avanga
thiltih theih leh thil neih theih hi a tam em em a ni. Thiltihtheihna a hrilhfiahnaah Max Weber-a
chuan, “Kan nun ho naah miin a hnial leh hnial loh pawh ngai pawimawh lova mi chunga len
theihna,” (Economy and Society: An Outline of Interpretive Sociology, 53) a ti hi a chiang kelh kawlh
viau a. Heta tanga lang chiang em em chu mihringte ngaihah thiltihtheihna hi a ropui a, a kawltu te
pawhin ngaihsan an hlawh viau thin a ni. Han thlir zau deuh ila, khawvel huap ang pawhin
community hran te te a awm a- mi hnuaihnung an awm a, mi vantlang an awm a, millionaire ho an
awm, billionaire club te a awm a ni. Chutiang chuan kan veng leh kan kohhran theuh han thlir ta ila,
mi hausa leh mi awm thei vak lo kan dawnsawn dan chu inang lo tak a ni; a inan loh dan chu mi harsa
te hian an hre khawp mai. Helaiah tak hian mihring kan nihna leh thilsiam kan nihna lo lanna chu a
ni.

Isua’n khawvela rawng a bawl lai kha chu sawi lova lum a ni a; a pianna chungchangah ringawt pawh
khan mihringte aia a danglamna hmuh tur tam tak a awm a. Kha Krismas hmasa berah khan tlawmna
a langsar a, a chungnung hle a. Lal Isua pian thu hre hmasa bertu chu beram vengtute kha an ni tlat
nia! Khawvel thilah pawh mi tlawm tak an ni a, lal meuh a piang a ni a, ropui taka puanzar te kha
mihring rilruah chuan a lian thin a; mahse mihring ngaiha thil ropuite hi Pathian tan chuan
hnawmhne mai a ni a; hlut nachang kan hriat loh te hi Pathian ngaiha thil ropui tak a lo ni fo thin a ni.
A pianna pawh a tlawm a, Mizote zingah pawh Isua pianna chhehvelah chuan kan sawi tam ber pawl
a ni ti ila kan sawi sual awm lo ve. Patea’n, “Bawng in tlawmah ka Lal riangvai tak saw, a chun riang
Marin a chawi e”, (KHB 94) a tih te leh Rokunga’n, “Ngai teh, van Lal Fa chu, Bethlehem bawng in
tlawmah, hringmi hraichawiin a lo piang a”, (KHB 127) a tih ah te hian a chiang viau awm e. Tunlaiah
phei chuan media a chak tawh em em a, England lal chhungkuaah nau piang thar an awm chuan
media in an bawr hut hut a, an ram chhungah phei chuan lawm an hlawh hle thin a nih hi. Lal Isua
erawh chu khawvel lal ni chung si a pianna atana bawng in a thleng tlat mai hi khawvel ngaiha thil
ropui lo leh hmuhsita en hniam hlawh thinte a ngaih pawimawhzia leh a thilsiamte chunga
thliarhranna a neih loh zia tilangtu te pawh a tih theih awm e.

Krismas hmasa khan danglamna tak a nei a, kha hunah khan Isua pianna bakah thil ropui tak thleng a
awm a. Zaipawl ropui tak, van zaipawl zai kha a ropuina tizual tu an ni. Van zaipawl chuan,

“Chungnung berah Pathian ropui takin awm rawh se,

Lei chunga a lawm em em mihringte hnenah rem thu leng rawh se,” tiin an fak a (Luka 1:14). Van
zaipawlte hi engzata tam nge an nih a, engtiang taka zaithiam nge an nih ang tih hi mihringte
ngaihtuah thiam phak bak a ni a. Chuti chung chuan a ngaithlatute te kha an tlawm em em a, mihring
ngaih pawha mi ropui tak ni lo, beram vengtute kha an ni a. An tlawm bakah an tlem hle a; mahse
chu chu thil thlen dan a ni tlat si a ni. Van zaipawlte berampute hmaa an zai duh mai khan mihring
ngaiha thil tlawm te hi Pathian mitah chuan an hlutna a nep chuang lo tih a lang chiang hle a. He
Krismas hmasa berah hian lei mite leh van mipuiten a huho vin Lal piang an lawm a ni, lei leh van
inzawmna leh a hring a hrana nau piang lawm ho na an nei hi a thukin a ril a, hetiang reng reng hi a
awm hriat a ni zui ta lo a ni.

He Krismas hmasa ber lawmnaah hian mi hausa leh mi ropui te sawm an ni lo va; mihring ngaiha mi
hnuaihnung zawk te chuan van mite nen an lawm ho a ni. Isua pianna chhehvela mi pawimawh leh
hre hmasatu te hi mi hnuaihnung zawkte an ni zat zat a, a hnu zelah pawh Isua hian a ngaih
pawimawh zui te an ni ta zel a. Hemi atanga lang chiang em em chu mi hnuaihnung zawkte hi Pathian
mitah mi lian an ni a; mi ropui kan tih te chu chawisan hran an ngai lo va, mi hnuaihnung zawkte
erawh chu an chanpual chan phak loh an ngah avangin intluktlang vek kan nih angin Pathianin chu
chu a tilangah a ngaih theih a, hei hi ‘subaltern krismas’ a nihna lai pawh a ni awm e.