A PAMMAIH TAKTAK

Banghang in hih sathau namtui Ngun pek za thum in kizuak in, a sum te mizawng te tungah
kipia zaw lo hiam? a ci hi. Jn.12:5

Pammaih cih kammal en leng hih van manpha khat ih mansuah ciang leh ih siatsak ciangin
pammaih kisa aa, mipil misiam, mihau, mi thupi khat a asih ciangin zong pammaih kisa hi.
Tua mah bangin Topa hong piaksa thupha te ih zatsiam loh ciang leh Satan adinga ih zat
ciangin nak pammaih zawkaan lai hi.

John in Judah Iskariot thu leh a lungsim na tel lua mahmah ahih manin mizawng te a khual
hilo in, sumkempa ahih manin a deih banga a zeeknop man hi ci in na gensuk pah hi. Tua
mah bangin Pasian ading na khatpeuh pammaih nasak khak leh Judah Iskariot bangh na hi
ding a, na lungsim leh Pasian kizopna maan nailo hiding hi.

1. Mary in Topa Zeisu pen a hihna tel mahmah ahih manin a sep ding thei, a bawl ding
thei in a bawl ding bangin bawlpah hi. Mary in Zeisu a sih ciangin a luangzut na ding
pen a sih ngak lo in a nuntaklai hun hoih lai in sempah hi. A sep pah manin
lungdamna thu kigenna peuh ah hih thu kigen ding hi, acih mah bangin kigenden
takpi mah hi. Thawhkikni zingsang ciangin Magdala khuami Mary, James nu Mary
leh Salome te daihawh in Zeisu luang sathau namtui zut ding acih leh na thokik khin
in, laplo uh hi. Amau thupha a bawlnop mahmah uh hangin a bawlman nawnlo suak
hi. Hih Topa Zeisu sathau namtui amau a zuut man pen bangzah in hampha ahi hiam?
Lungdamna thu kigenna khempeuh ah kigen takpi mah hi.

Deihna bulpi ah

Mary bangin Zeisu hihna na telthei hiam? Khasiangtho theihsakna na ngah hiam?
Amah na it ding bangin na it thei hiam? Pasian in nahoih sem dingin hong theisak hiam?
Hong theisak napi in na sem nuam kei hiam? Khasiangtho sapna, Khasiangtho sawlna leh
theihsakna te ngah napi na mangnuam kei hiam? cih kidongnuam hang.

Aman tam mahmah sathau namtui bangin na nuntakna, na lungsim khempeuh, na kha
khempeuh, na pilna khempeuh, na hatna, na siamna leh na neih na lamh te khempeuh
tawh Topa na it nai hiam? Tua te Topa ading in pammaih nasa lai hiam?

2. Hun saupi ading en in, na sem in.

Mary in thawhkikni lian aa azut theih lohding theikhol hi. A hun ngak ding hilo hi. Ih
mailam hun te ei khut sungah omlo hi. Pasian khut sung bek ah om hi. Tuhun semsem
ciangin hun lah sia, mite lah sia, mailam lungmuan huai lo hi. Topa ading septheih
bang sem in, piaktheih bang pia in, ih hunhoih te aam in, ih cidamna leh ih hunhoih te
mawk beisak nawn loin Topa adingin pia ni. Na piaksa te lung ngai in, Topan thaman
hong piak ni ciang na hawmthawh kha diam? Na piakna teng hong kitehkik ding hi.
Na piaksa te na ngahkik ding leh vantung na tun hun aa ding ngaihsunkhol, geelkhol
in. A mawknei hun leh dawimangpa ading na zatsa te pammaih mahmah ih.
3. Na hunhoih zatsiam in.
Mikhempeuh in ih ngahzah a kibang ih hunhoih te zatsiam ni. Mang te in ‘Time is
Money’ ‘Hun in sum hi’ a cih mah bangin mi khangto te leh mithupha ngah ih cihte
hun a mawk beisak lo, hun a maanzat, a zatsiam, a zeeksiam te hi. Khamangthang mat
nading, Topa ading nalianpi septheih nading na hun te na mawkbei sak hiam? Topa
Zeisu in “Kei nong up uhleh kei bawl sanga lianzaw na bawlthei ding uh ih”
(Jn.14:12) a cih thu in, gupna thu na gen ciangin mi khatpeuh counseling na piak teh
nang tungtawn a, hong pianthak theih nathu in Pasian nasepna lianpi khat hi a, Pasian
thu gen lo a, na hunhoih na mawkbeisak leh nak pammaih taktak hi cih kiphawksak
nuam hang.
4. Ih zeksiamna tawh a manpha ih lungsim, ih ngaihsutna Topa ading pammaih ih sa
hiam?
Na khempeuh lungsim thu hi. Ih ngaihsutna in sai hi. Pasian mahmah zong ih upna
tungah ki nga hi. Ih muanna tungah kinga hi. Pilat mang pan, “Nang Judah kumpipa
na hihiam” acih teh “na cihbang in ka hi hi” ci ziau hi. Na khat peuhpeuh ih thupi
ngaihsut leh thupi in, ih thupit sak keileh ih ngaihsutna bang hilel hi.
Laisiangtho pen Pasian kammal hi ci aa na san leh Pasian na zahtak thei ding a,
Pasian na zahtak leh a thu na umthei pan ding hi. Pasian na up ciangin gupna ngah in,
ama deihna na telthei semsem ding hi. Ama deihna thei lecin na muang semsem
dinga, Pasian ading na nungta theipan ding hi. Pasian kihello nuntakna in a mawkna
hi a, huihpi nungdelh bang cih leh Paul in “Hi leitung nate ek bangin ka ngaihsun hi”
na ci thei hi. Tua hileh leitung ading bek nungta in, Pasian ading in na nungta thei
dinga, Pasian adingin pammaih nasak hong om nawnlo ding hi.
5. Topa ading in Dimaria 300 pammaih a sa Judah Iskariot in Zeisu 30 bek in zuak aa, a
tawpna ah amah ki gui awk lumh hi. Matt.27:5. Pasian ading pammaih asa Ananias te
nupa in a lozuakna man un a langbek a piak ciangun nungzuipi te, Peter te mai ah puk
in, sihsia in si uh hi. Sawltak.5:5. Pasian ading na khat peuhpeuh pammaih sak
ngamhuai a hi hiam? Sak ngam huai hetlo hi. Naamaan in a letsong piak Elisha in a
sanloh ciangin Gehazi in nungdelh in, Kham talen 2 leh pawipuan 2 ngen hi. A topa
mai ah kilak in, Naaman phaak natna ama suan leh khak te tungah hong tung ziaupah
mawk hi. Na khat peuhpeuh pen pammaih sak luat, iplah luat, huaiham luat pen hoih
hetlo hi. Mite muhna ah kilawmlo ih sak te Pasian mai ah zong na kilawm tuanlo
veve hi.
1. Sawm aa khat na maan zawh keileh Pasian ading pammaih sakna hi.
2. Nang ading bek na khual lehzong Pasian zia hilo in dawimangpa dan hi a,
pianthak loh lam kiphawk huai kasa hi.
3. A cingh thempeuh piangthak hilo in, a piangthak te cingh hamtang uh ih.
4. Huaihamna in muhna toi kalsuanna hi a, sum iplahna zong hipah hi.
5. Ngah nading leh meek nading bek ngaihsutna in angsung pilna hi a, mikim tawh
kilem theilo uh hi.
6. Heb.11:6 “Upna lo tawh Pasian lung kidam sak zolo hi” Lungsim takpi tawh biakna
piakna, phatna, piakna, sepna, itna adeih Pasian hi.
Thukhupna

Tua Pasian nambat khat ah koih leng Pasian ading pammaih ihsak om nawnlo in, Pasian
hong piak thupha namkim te ih zatna, ih zekna hong maan dinga, manh hong neipan ding
hi.

Pasian ading ih zat ih zek te pammaih ahih loh lam leh Pasian ading ih zatkhial, ih
zekkhial loh te a pammaih ahihlam tel aa, Khasiangtho lamlahna zui in, Mary bangin
Topa lamlahna banga a kisap hunhun aa Topa ading nalianpi asem thei dingin Topan hih
kammal te tungtawn in, Topan thupha hong pia ciat hen.