KHIATNA NEI LAAITUI TE’ KAMPAU PAWLKHAT

A kaikhawm: Cimcii

Vungh Tual’ Bawng hawl: Pu Vungh Tual in a sanggamte tawh bawng ahawl na ah a bawng
uh nuak hat hihtuak. A bawng uh a nuak dam in lam pai leh a Vungh Tual na nuak leuleu.
Vunghtual nemzo leh bawng na nuak, bawng nemzo leh Vungh Tual na nuak. Tua mana tu
dong, a nuak hat te "Vungh Tual leh bawng hawl" cih paunak aa ki neisuak.

Nialhat Thawng Za Langh: Thawng Za Langh, thunial hat mahmah in thu anial ciangin zong
mawknial loin a maan lopi nangawn teci tawh lakthei hi. Khatvei a lawm ten “Ni (Sun) hizah
taka saa cileng a gei ah omleng kituisuak mai vak” acih leh TZL in “Hilo; Ni kiangah om leng
khuadam lua in ki kongkaw vak” acih leh a lawm ten lamdang sa lua. “A bang cin maw” acih uh
leh TZL in “Ni (Sun) tawh kigamla semsem leng lum semsem aa, kinai semsem leng vot semsem
hi ven. Na up kei uh leh gungei ah pai le uhcin khua lum mahmah aa, Mualsang dawn ah kahto le
uhcin vot mahmah hi ven, Ni kiangah omleng ki kongkaw zo takpi vak” ci aa dawngkik. A lawm
ten nial thei nawnlo. Tua mana thu nialhat a om leh “Thawng Za Langh no aw/Nial hat Thawng
Za Langh aw" cih paunak in kineisuak hi.

Ngul Thawng’ bawng zon: Ngul Thawng in bawng lei nuam. Bawng nei citeng kiangah dawp
kawikawi. Tua leh bawngnei ten zong “A bangdan a deih nei a” a cih uh leh Ngul Thawng in "A
gol, a thau, a tawmman" na ci ziau. Tua paa kipan van dawp kawikawi te “Ngul Thawng bawng
zon” ci aa paunak aa kineisuak.

Ki Elbawk: Khanglui lai Zubeel tawh zu a kiluup lai in, a kangh aa kiciam leh a hai aa kiciam
na omsak uh hi. A kangh aa akiciam uh leh zubeel gong dong adimsa aa kileih tui pen a
kimuhloh (akan) dong tep uh hi. A hai aa akiciam uh leh zubel gong ah tui adimsa banah Tui hai
dimkhat tawi kawm in tepzel, leih zel in, a hai aa tui a bei ciangin a zo kici hi. Ahih hangin Pu
Elbawk in a hai aa kiciam hi napi in a hai aa tui a bei ban ah a zubel gong a tui teng zong a
kan(abei) siang dong, a zu tep-in haikhat leh kanghkhat nekhawm niloh hi. Tua manin tuni dong
zubeel kilupna ah Pu Elbawk zatdan zong kizang thei cihtawh “Elbawk ding maw, bawk lo ding”
ci in kidong in, zuteep dan ding kampau zat in kineisuak hi.

A tui in puak vang: VSL te agam giakna ah a ciah niding zingsang un Vagik khat meh aa nei.
Zing-an neekzawh cianga ciahdinga kithawi in, a Vagiksa uh khut tunghawm. A lawm ten inn aa
te puak dinga tuun ngeingai uh. Tua leh VSL inbel "Ken innkuanpihte a tui in puak zaw vang ee"
ci in ne ciatciat ci hi vaw. Sa divaw.

Ki nileh: ESM ta suaktuung khat sipah hihtuak. Sihgui hunzatna ah VSL in "I nau pen a ki
nileh hi" ci zanzan thong. Tudong naungek suaktuung aa si omleh ‘Ki nileh’ ci aa thucinn aa
kineisuak.
Hon gal et: VSL in zu khamte i gei ah a tut hangin hon et teh "Hon gal et ciaicuai veh
aw” ci kaikai.

Sawn a kullo mihing: SDP in a innnuai aa antanghte a nawn dingin KP zawn. KP inzong
ip khatta aa nawnpah ngekngek. Tua leh PMT zong alung himawh hiding hiven “SDP in KP a
nawnsak sangin peivel(leng) khat tawh nawn leh zo baih zaw ding hi ven” a cihthong leh a gei
paa VSL in “peivel(leng) hi leh sawn kul dinga KP sawn kullo hi ven” na ciziau.

Ba zong un hon ci na: VSL leh PMT te saphu leh saham zongin gamlak ah tawlkhat
vakvak hihtuak. Khat zong a mat loh uh teh a cih nading uh theilo in, VSL in "Zong un, na zon
uh leh mu ding hon ci hilo niam, ba zong un hon ci thong nei aa" ci aa Pasian bangh pausuah
liang.

A ma lam ah tai ding: VSL, GDT, ZSG te lawmta Mizogam Khawluhlian aa sing nawn
aa om. Gim lua ahih cianga mun khat ah tawlnga a bok dipdep. Tua leh ZSG in a lawm te keh
“tulaitak numei khat a guaktangin hong pai vat leh bang ih ci tam” acih leh GDT in “ih taipah
vingveng kei de” a cihleh VSL in “Ama lam ah maw” na ci sese.

Bak 2 sanga Bak khat a deihhuai zaw Sabak: VSL te lawmta Tuitawh ah Gospel pai. An
nek cianga TZK in kithusiam sak lua. VSL sa bak 2 suah ven cin, tua zawh cianga sabak ngeng
khat ama kuang ah la. Tua leh VSL in na mu sese aih cia, “Kei aa Bak 2 sangin nang aa bak
khatmah deihzaw mai ing” na ci sese. Sia KGL zong an thalh lianga nui ci pah sap.

Ap dong a kinelo an: PMT a LST sangkah lai, an a neek zawh uh teh "Tei lai setsat ve hang e
leh" ci miau. Tua leh Siapipa inzong za kik ven cin, PMT tawh a kimuhkik uh ciang ua, “PM,
nang, an na kham teh am pialpual maw” cikik ziau miau. Tua zong nuampak khol kiak.

Vakiang kapna: Vakiang i cih vasa namkhat lah hi, vasa geinai, vasa kiang cihna inzong
kizangh thei hi. TLP a sangkah lai, sang nasep a om sim aa a siapa TGL in sailii (Gawphel) khat
paw thapai. Vasa kap leh a gei/a kiangta khaden, a vasa kha thei mahmah lo aih cianga TLP in
zong bang nuammawh hiam ah a siapa kiangah "Siapa aw na vakiang kapna hon kawm dih aw"
va ci sese.

Sang a paibaih mahmah TLP: TLP a LST sangkah lai, khatvei khualam ah khuado siim aa
va ciah. Kaalnih khawng va taam hit-hiat. Khua paa Sang a paikik cianga zingsang sang
lapnuam ahih cianga zingsang nai 4 aa pai. Tua lai motor cycle cihbang omnailo ahih cianga khe
tawh nai 4 sung bang pai. Sang a tun leh a siapa DGM in “khuado siim a nop hia? Hong paihak
sicia” a cihleh TLP in "Sia aw zingsang nai 4 pek aa hong pai hi veng aw. Hong paibaih
peuhmah hi veng” na ci hilhial. A dotna leh a dawnna kituak nakpi’n, ...

A nuamlo, a thuuk Luivak: HKL kiangah a lawmte in “luivak leng nuam peuhmah, ngasa
khawng sunsiah meh in nei leng lim peuhmah” ci-a zawn. Tua leh HKL zong ukpian pah in
khatvei a lawmte luivak zui pah. Upmawh bang loin tuahsia. Ngasa khat zong manlo ahih ciang
ua sunsiah meh dinga Tuaiki-teh meh. Tua leh HKL in a lawmte lak a "Luivak nuam ci na uhcin
thuuk takpi sang ee" ci veuviau thong.

Na gal te an na vak in: PKS in Kawl vakhu, Zusakang leh Keel cihkhawng khawi
ngeingai. Tua leh ZHM inzong bang nuammawh hiam “Pu PS, na Kawl vakhu khawi bang na
deih ei aa leh” acih leh “Vakhu ih cihbel Khasiangtho lim hi in, vasa dangdang te sanga thupi
zaw hi” ci aa dawngziau. ZHM in dong leuleu in “Tua ahihleh Vakhu bel phadawm ven, Zusa
khawng ih an te hon neksaksak hi aa, a bangcia gal te khawng khawi mawkmawk nei aa leh”
acih se leh PS in “Kei bel no banga Pastor leh LST tampi a theibel hikeng in, ahizongin LST in
na gal te a gil a kial leh an na pia in cihkhat om a, an a piapia mah hing e” a cih ziau leh ...