I.

PAMAGAT NG PELIKULA
Anak (2000)

II. MGA TAUHAN

Pangunahing tauhan:
1. Josie Macalalag (Vilma Santos) – Matapang, masipag at responsableng ina
2. Carla Macalalag (Claudine Barreto) – Mabisyo, pabaya at mapagpatawad
3. Rudy Macalalag (Joel Torre) – Responsableng ama, masipag, mapagmahal
4. Micheal Macalalag (Baron Geisler) – Mahiyain, walang kibo, matalino
5. Daday Macalalag (Shiela Mae Alvero) – Wala pang alam
Pantulong na tauhan:
1. Mercy (Cherry Pie Picache) – Umiintinding kaibigan, masipag
2. Lyn (Amy Austria) – Mabuti, maasahan at mapagkakatiwalaang kaibigan
3. Brian (Leandro Muñoz) – Mabuting nobyo
4. Bernadete (Jodi Sta.Maria) – Mabait at mabuting kaklase
5. Norma (Tess Dumpit) – Mabuti, responsableng tao at siya rin ang tumayong ina
sa mga bata
6. Arnel (Cris Michelena) – Mabuting kamag-anak ni Josie at tumayong ama sa
mga bata

III. TAGPUAN
 Pilipinas – Pangunahing nagaganap ang kwento sa mga pamilya at komunidad
ng lower middle class sa Pilipinas. Dito nakatira si Josie (Vilma Santos) kasama
ang kanyang pamilya bago mag-abroad para magtrabaho. Inilalarawan ng
tagpuan ang mga hamon at katotohanan ng pang araw-araw na buhay para sa
maraming pamilyang Pilipino, kabilang ang kahirapan sa pananalapi.
 Hong Kong – Pumunta si Josie sa Hong Kong para magtrabaho bilang
kasambahay para sa isang mayamang pamilya. Makikita sa pelikula ang
pagkakaiba ng buhay niya sa Pilipinas at ng buhay niya bilang Overseas Filipino
Worker (OFW) sa Hong Kong. Inilalarawan ng setting na ito ang mga hamon na
kinakaharap ng mga OFW, kabilang ang kalungkutan, malupit na amo, at
pagnanais na makasama muli ang kanilang mga pamilya sa Pilipinas.
IV. BUOD NG PELIKULA
Si Josie, isang OFW sa Hong Kong, ay nagtrabaho para sa kinabukasan ng
kanyang mga anak. Bagamat malayo, tiniis ni Josie ang hirap ng trabaho at paghihirap
sa kamay ng kanyang amo. Pagkatapos ng ilang taon, nagdesisyon si Josie na umuwi at
magnegosyo na lamang. Ang pagbabalik niya ay sinalubong ng malamig ngunit
masalimuot na pagtanggap ng kanyang mga anak. Napagtanto ni Josie ang bisyo at mga
problema ng kanyang mga anak, tulad ng paninigarilyo, paglalagay ng tattoo, at
paghithit ng rugby. Dumating ang mga pagsubok, tulad ng pagkawala ng iskolarship ni
Michael at ang pagsisisi ng kasosyo sa negosyo. Sa kabila ng kanyang pagmamahal,
natuklasan ni Josie ang kanyang mga pagkukulang bilang ina. Ang paglaki ni Carla
nang walang inang gabay ang naging sanhi ng pagrebelde nito. Sa gitna ng alitan,
naintindihan ni Carla ang pagmamahal ni Josie at nagbalik-loob sa kanyang ina. Bilang
panganay, nagpasya si Carla na maging gabay at magsilbing ilaw para sa kanyang mga
kapatid sa pag-absent muli ng kanilang ina.

V. DULOG NA GAGAMITIN
 Sosyolohikal
 Feminismo

VI. MGA KAGANAPAN SA PELIKULA

 Sosyolohikal – Ang pelikulang "Anak" ay naglalarawan ng mga isyu at
karanasan ng mga pamilyang Pilipino, lalo na ang mga nasa mababang antas ng
lipunan. Una, Kwento ng Pamilya. Ang pelikula ay nagpapakita ng mga
karanasan at problemang nahaharap ng isang pamilya na nakikipagsapalaran at
nahaharap sa kahirapan. Si Josie ay isang ina, na nagpapakahirap sa pagtrabaho
sa ibang bansa upang matugunan ang pangangailangan ng kanyang pamilya,
habang ang kanyang anak na si Carla ay lumaking walang ina kaya nagrebelde
at naligaw ang landas. Pangalawa, Epekto ng Pandadarayuhan. Inilalarawan
nito ang mga pagsubok at hamon na kinakaharap ng mga Overseas Filipino
Workers (OFW), tulad ng kalungkutan na mawalay sa kanilang mga pamilya, at
diskriminasyon at pang-aabuso sa lugar ng trabaho. Sa kabuuan, nababagay ang
dulog sosyolohikal dahil, ang mga pangyayari tulad nang kahirapan,
pakikipagsapalaran ng mga Pilipino, at pagrebelde ng mga anak ay isa sa mga
totoong nangyayari sa ating lipunan.
 Feminismo - Sa kwentong ito, ang dulog ng feminismo ay mahalaga sa
paglalarawan ng karanasan ni Josie. Binabatid nito ang kahalagahan ng mga
kababaihan sa pagtahak ng kanilang sariling landas at pagharap sa mga hamon
ng buhay. Ipinapakita ng kwento ang tapang at determinasyon ni Josie, isang ina
na nagtatrabaho sa ibang bansa upang tustusan ang pangangailangan ng kanyang
pamilya. Ang kanyang karakter ay naglalarawan ng kakayahan ng mga
kababaihan na magsikap at maging matatag sa gitna ng mga pagsubok.
Gayundin, ang kwento ay nagpapakita ng pag-unlad ng karakter ni Carla, na sa
huli ay nagpasyang maging gabay para sa kanyang mga kapatid. Ipinapakita nito
ang kakayahan ng mga kababaihan na maging lider at tagapagtanggol sa
kanilang pamilya. Sa pamamagitan ng paglalakbay ng mga karakter na ito,
ipinakikita ng kwento ang kakayahan at kahalagahan ng mga kababaihan sa pag-
ahon mula sa mga pagsubok ng buhay.