Tabacakacaka ni Turaga – Lotu Wesele e Viti LESONI NI MACAWA NI TAMA 2024 AI

VAKAMACALA TAUMADA Eda na goleva vakabibi ena yabaki oqo na iulutaga: “NA NODA
KILA NAI NAKI NI KALOU VEI KEDA NA TAMA, SAI DOLA NI NODA VAKATAUCOKOTAKI”
(KNOW GOD’S PURPOSE IN MANHOOD IS THE KEY TO OUR FULFILLMENT).” Na ulutaga
oqo e vakarautaki mai ena rarama ni vosa ni Kalou ka koto ena Vakatekivu 2:1-17; kei na Vosa
vakaibalebale 19:21. Eda na tara vakabibi tiko ena noda veiwasei ena veibogi ni macawa oqo
na bibi ni “naki ni Kalou vei keda na Tama ka na dolavi kina na noda vakataucokotaki.” Sa inaki
ni noda lesoni me vukei keda ena noda vakasamataka vakabibi na gaunisala meda kila kina nai
naki ni Kalou ena noda bula vakalotu kei na noda veiqaravi meda yaga vakalevu kina e
vuravura. Moniti – 04/03/2024 “A KALOU E KALOU NI NAKI – (GOD IS PURPOSEFUL
BEING)” Tusiti – 05/032/2024 “NA KALOU E BULIA NA KA KECEGA ENA DUA NAI NAKI
SAVASAVA. (GOD CREATED EVERYTHING WITH A PURPOSE)” Vukelulu – 06/03/2-024 “NI
SEGA NI KILAI NAI NAKI, MEDA NAMAKA NA VAKASABUSABU SE VAKAVEITALIA –
(WHERE PURPOSE IS NOT KNOWN, ABUSE IS INEVITABLE.)” Lotulevu – 07/03/2024 “NIDA
VIA KILA NAI NAKI, KUA NI TAROGA NA KA E BULI, TAROGI KOYA KA BULIA. (NEVER
ASK THE CREATION, ASK THE CREATOR)” Vakaraubuka 08/03/2024 “VULI SERE KEI NA
VAKATOVOTOVO” Vakarauwai – 09/03/2034 “SASAMAKI E LOMA NI BAI, VALENILOTU KEI
NA VULI SERE” Siga tabu - 10/03/2024 “NA NODA KILA NAI NAKI NI KALOU VEI KEDA NA
TAMATA, SAI DOLA NI NODA VAKATAUCOKOTAKI” Meda vakaitavi ena lotu ni Sevu na
Turaga kece. Au cavuta na vakavinavinaka vua nai Talatala ni Tabana ni Ovisa, Rev Joeli Mawi
ena kena vakarautaki na lesoni ni Macawa oqo. Sa koto na vakanuinui ni na dua na macawa
vinaka ni noda veiwasei na tagane na macawa oqo. Ena salavata noda rairai kece ena mata ni
Kalou ena Siga Tabu kei na noda isevu. Sa loloma yani kei na masu. Kitione Radrodro
(9910520/7656228, kitioner@methodistfiji.org). Vunivola ni Turaga/Vunivola Vakatawa nii Vuli
ULUTAGA: “NA NODA KILA NAI NAKI NI KALOU VEI KEDA NA TAMA, SAI DOLA NI NODA
VAKATAUCOKOTAKI” (KNOW GOD’S PURPOSE IN MANHOOD IS THE KEY TO OUR
FULFILLMENT) LESONI: VAKATEKIVU 2:1-17; VOSA VAKAIBALEBALE 19:21. NAI
VAKAMACALA TAUMADA Ena yabaki oqo eda na goleva tiko kina e rua na vakasama bibi ena
macawa ni Tama me vaka sa vakadonui oti ena Bose ko Viti. Oya na noda macawa na Tama se
Tagane kei na Macawa ni Sevu (Vanua). Oqo e dusia e dua na tikina bibi meda kila tiko na
Tama ni a tataunaki vei keda na kena maroroi, taqomaki, cakacakataki ka yadravi na vanua
mera tiko sautu ka veilomani kina na tamata. E sega ni tavi rawarawa eda sa nuitaki kina oqori
ka ni gadrevi vakalevu kina na noda vakatucokotaki na Tagane ni bera nida qai
vakataucokotaka na noda i lesilesi e lesi keda kina na Kalou ka na sega ni rawa ni dua na
tamata e veisautaka. E ka bibi na noda tovolea meda semata vata na vakasama e rua oqo ena
macawa oqo ka na gadrevi vakalevu kina na nona veivakatakilai tikoga na Kalou ena noda bula
meda rawata kina nai tavi levu oqo. E sega ni rawa ni cakitaki na nodrau na dui goleva ga na
vakasama e rau dui vakabibitaka me vaka na “TAMA” se Tagane ena vakabibitaka ga nai tavi ni
veivakaitubutubutaki, veimaroroi ena loma ni vuvale, veidusimaki, kai vurevure ni veika kece era
gadreva se taroga na Tina kei na Gone. Ia, na vakasama ni “SEVU” ena goleva ga na
cakacakataki na vanua se were ka me vakacabori vua na Kalou na ulumatua ni veika e rawata
e dua me vaka e vakabibitaka nai Vola Tabu. Ia, na vanua e rau na laki sema kina sai koya na
vakasama ni NAKI o koya ka bibi duadua me rawa ni basika kina na kena vakataucokotaki nai
tavi vaka Tama ena noda vuvale, lotu kei na vanua. O koya gona, sa digitaki kina nai ulutaga
oqo “NA NODA KILA NAI NAKI NI KALOU VEI KEDA NA TAMA, SAI DOLA NI NODA
VAKATAUCOKOTAKI” me semai rau vata na vakasama ni “TAMA kei na SEVU” me da goleva
ena yabaki oqo. Sa nuitaki ni koni na marautaka na veivakasama eso e vakarautaki ka
veitalanoataka vakavinaka me vukea tikoga na kena vakavinakataki nai tavi sei lesilesi vaka
Tama eda kacivi kina e Viti. Ni matata vei keda nai naki ni ka eda cakava ena solia vei keda nai
balebale ni bula ka dolava na katuba kina noda vakataucokotaki ena I tavi eda qarava. E i naki
ni Kalou me kunea na Tama nai naki ni nona a buli. Kevaka eda vinakata meda kunea nai naki
oqo e ka bibi meda kila na yavu ni nona i naki taumada na Kalou kina tamata ka meda na kakua
ni coko ena vuravura ni veilecayaki ka dau vakatubura na nuiqawaqawa kei na tawa
veivakabauti ena i tutu kei nai tavi eda kacivi. E levu nai tovo lolovira sa basika tu e Viti eda
vakaitavi vakalevu na Tama me vaka na veivaqaseni, kucu, veivakasaurarataki, butako, na lasa
i tuba, kei na vuqa tale ka sai vakaraitaki ni noda sega ni kila nai naki ni noda buli kei nai tavi
eda kacivi kina mai vua na Kalou. Sa via oti mai na nodra vakabauti keda na noda matavuvale
ka ni sa tekivu sara tikoga e vale nai tovo lolovira vakaoqo. Eda sa vakauqeti ena noda i ulutaga
ni yabaki oqo meda samaka tale mada nai naki ni nona buli keda na Kalou ka mera gunu mai
na noda lewe ni vuvale ena matata ni naki oya ka me yaco kina me vakataucokotaki nai tavi
levu ni veisusu kei na veidusimaki ena noda vanua. MONITI 04/03/2024: NA KALOU E KALOU
NI NAKI – (GOD IS PURPOSEFUL BEING) Supported Text: Aisea 14:24; Same 33:11; Aisea
55:10-11. E sega ni dua na ka e bulia na Kalou me sega na kena i naki. Ena i Vakatekivu 1 e
tukuna sara ga vakamatata nai valavala ni nona bulibuli na Kalou kei nai naki e buli kina. Na
wasawasa e tu na kena i naki, na vunikau e tu na kena i naki, na qele e tu na kena i naki, na
manumanu vuka kei na manumanu tawa lasa ni vanua e tu na kena i naki, na wai e tu na kena i
naki, ka vakakina na tamata e buli ena dua nai naki. E sega ni buli ka vakaveitalia na Kalou ka
ni bulia na ka me sotavi kina e dua nai naki e gadreva ko koya me vakataucokotaki. Na Kalou e
sega ni bulia rawa e dua na ka qai vaqarai e muri nai naki me sotava, sega! Sa tiko rawa nai
naki qai buli e dua na ka me sotavi kina nai naki oya. Sa kena i balebale ni sega ni dua na ka e
basika vakacalaka e vuravura wili kina na tamata, sa tiko oti na ka e dodonu mo
vakataucokotaka ni bera ni ko qai basika mai ki vuravura. Ko na sega ga ni yacova rawa na ka
mo vakataucokotaka kevaka ko vakaveitaliataka na nomu bula. Taro me veivosakitaki Eda na
kila vakacava na i naki ni Kalou ena noda bula ena veisiga? How can we understand and
recognize the purposeful nature of God in our daily lives? Ena sala cava na noda vakabauta nai
naki ni Kalou ka na tara na noda bula ena veisiga kei na nonai naki na Kalou vei keda. In what
ways does the belief in God's purposefulness impact our own sense of purpose and direction in
life? Vakaraitaka e vica na veika ko sotava ka laurai kina nai naki ni Kalou ki na nomu bula ka
vakavuna na veisau e laurai ki na nomu bula vakataki iko se nomu vuvale. Can you provide
examples from personal experiences that highlight the purposefulness of God and how it brings
about fulfillment in our lives? TUSITI 05/03/2024: NA KALOU E BULIA NA KA KECEGA ENA
DUA NAI NAKI SAVASAVA. (GOD CREATED EVERYTHING WITH A PURPOSE) Supported
Text: Vakaibalebale 16:4; Cakacaka 13:16; Kolosa 1:16; Lako Yani 9:16; Jope 42:2; Vosa
Vakaibalebale 19:21. Na Kalou sa bulia na ka kecega ena dua nai naki. Kena i balebale e sega
ni dua na ka e laiva tu e vuravura e sega na kena i naki. Ni sa bulia na veika bula na Kalou qai
solia vata kei na kaukauwa mera dui vakataucokotaka kina nai naki oya. Ena vuku ni vakasama
oqo eda na taroga se cava na vuna e buli iko kei au kina na Kalou me daru tagane ka sega ni
yalewa? Na cava na vuna e buli iko kina na Kalou mo tagane? Nida sauma rawa na taro sa na
dolava vei keda na katuba matata ni nona biuti keda e vuravura na Kalou. Ena sega ni rawa ni
da bulia e dua na ka vakavo kevaka eda kila ka kunea taumada na cava na vuna eda vinakata
kina meda bulia na ka koya. O ira na vei kabani dau buli ka era tu oqo e Viti (manufacturer), nira
bulia e dua na ka baleta ni sa tiko oti na vakanuinui ni na laki yaga na ka koya ka sega ni
vakalusi gauna walega. The purpose was completed in the mind of the manufacturer before the
design and the production process begin. Mo vakabauta ni ka kece e tu e vuravura e vakainaki
ka sega ni vakavcalaka, wili kina e dua na tamata e sucu me tagane. E nakita na Kalou mo
tagane baleta ni sa kila oti na ka e rawa ni ko vakataucokotaka ena dua na vanua, vuvale kei
bula vakaitikotiko. Taro me veivosakitaki 1. Na sala cava eda na rawa ni taura rawa se ciqoma
nai naki ni Kalou ki na nona veibuli ka wili kina na veika buli kei na tamata. (How can we
understand the specific purpose behind God's creation, including the natural world and human
existence?) 2. Cavuta e vica nai vakadinadina me tokona ni a buli keda na Kalou ena dua nai
naki. (What evidence or indications do we have in religious texts or teachings that support the
belief that God created everything with a purpose?) 3. Cavuta e vica nai vakaraitaki (examples)
ni veibuli ni Kalou ka laurai kina nai naki ni Kalou me baleti ira ka sala cava e tukuna vei keda
me baleta na nonai tuvatuva na Kalou. (Can you provide examples of specific aspects of
creation that demonstrate the purposeful design or intention behind them, and how it informs
our understanding of God's plan?) VUKELULU 06/03/2024: NI SEGA NI KILAI NAI NAKI, MEDA
NAMAKA NA VAKASABUSABU SE VAKAVEITALIA – (WHERE PURPOSE IS NOT KNOWN,
ABUSE IS INEVITABLE.) Supported Text: Roma 6:12; Iperiu 12:1-2; Efeso 5:6; I Joni 2:3-4; I
Koronica 8:2 Na bula ni vakaveitalia se vakasabusabu e basika ena were mai Iteni baleta ni sa
taqusi vakatotolo nai naki e biuti rau kina na Kalou ena loma ni were. Sa doudou na tamata ni
cakava nai valavala ni sa yali nai naki e buli taumada kina oya me veiucui kei na Kalou. O ira
era bulia na motoka era kila ni kena i naki me cici ena vanua mamaca, ia kevaka o veisautaka
nai naki oya mo kauta na motoka ka laki vakaciciva e wai, ena luvu ka ca. Dua tale na kena i
vakaraitaki, nai totogi ni nomu gunuva na wainimate ni co ca na mate. E sega tale ni gadrevi
eke me vakamatei iko na Kalou ni oti nomu gunuva na paisoni, o iko ga vakataki iko o sa
vakamatei iko baleta ni ko sa vakayagataka cala nai naki ni paisoni. So na gauna ena yaga me
matata vei keda ni da sa vakavuna ga na noda leqa. We are victims of our own decision making
because we forgot the purpose of our being created by God. Ni ko vakalecalecava nai naki ni
Kalou vei iko, namaka ni na basika na vakasabusabu, kei na bula vakaveitalia ena nomu bula.
Taro me veivosakitaki 1. Ke sega ni matata nai naki ni nomu buIa, sala cava ena rawa me
vakavuna na kena vakasabusabutaki se vakaveitaliataki na ni lewa matau ena noda bula ena
veisiga. (In what ways does a lack of clearly defined purpose or goals contribute to the potential
for abuse or misuse of power in various aspects of life?) 2. Na sala cava eda na rawa ni vukei
keda kevaka eda kila vakavinaka na i naki se tatadra ni veika baleti keda ena noda bula ena
veisiga.? (How does understanding and aligning with a greater purpose or vision help
individuals and societies avoid falling into abusive patterns or behaviors?) 3. (a) Rawa ni ko
vakaraitaka e dua na vakaraitaki se example ni kena vakasabusabutaki se vakaveitaliataki na i
naki ni noda bula ena veisiga (b) Rawa ni ko vakaraitaka e dua na vakaraitaki se example ni ni
matata nai naki, ena basika na veika vinaka vei keda ((a) Can you provide examples or case
studies where a lack of purpose or direction has led to negative outcomes or abuse, (b) and
conversely, where a clear purpose has fostered positive and ethical behavior?) LOTULEVU
07/03/2023: NIDA VIA KILA NAI NAKI, KUA NI TAROGA NA KA E BULI, TAROGI KOYA KA
BULIA. (NEVER ASK THE CREATION, ASK THE CREATOR) Supported Text: Vakatekivu 1:1;
Iperiu 11:3; Aisea 45:12; Joni 1:3; Roma 1:20; Aisea 42:5; Vakatekivu 1:26. Na leqa ni dua na
ka e buli ena sega ni tarogi kina na ka buli vakataki koya, ia ena tarogi kina o koya ka bulia. Oqo
e dua na yavu ni bulibuli ka, ka na sega ni vakacalai rawa vakadua oya na leqa me tarogi vei
koya e cakava se bulia. Only the manufacturer knows the why and how of his product. Ena
vakavuna vakalevu na leqa kevaka ena beitaki na ka buli. Ia kevaka eda tarogi koya e bulia ena
walia na leqa. E dua tale na kena i tukutukuni, na dina ni dua na ka buli (product) e kila duadua
ga o koya e bulia. Ke sai koya dina oya na yavu ni nonai naki ni veibuli na Kalou, ia na ka dina
baleti keda na tamata e kila duaduaga na Kalou o koya ka buli keda. Kakua tale ni vakarorogo
kina dua na domo baleta ena vakavuna ga vakalevu na kavoro. Sa levu na tama ni vuvale sa
guilecava tiko na dina oqo. Ke leqa nomu veiliutaki mai vale, leqa nomu vakatulewa, de dua ko
sa via kauta ga vakataki iko na nomu leqa. Sega! Kauta vua ka bulia, tarogi koya, masuti koya,
o koya nai wali ni nomu leqa, o koya e kila na ka dina baleti keda taucoko sara na tamata. Taro
me veivosakitaki 1. Na cava nai balebale mo taroga kina na dauniveibuli ka sega ni ko taroga
na ka e buli kevaka e dua na leqa? (What does it mean to seek guidance and understanding
directly from the creator rather than relying solely on the observations and opinions of the
creation?) 2. Na sala cava eda na rawa ni bulia ena noda vakasama meda vakasaqara na vuku
kei na veidusimaki ni Dauniveibuli ni da sotava na bolebole ni bula? (How can we cultivate a
mindset of seeking the wisdom and guidance of the creator when faced with questions or
challenges in life?) 3. Na sala cava eda rawa ni bucina meda vakararavi tikoga kina
vakatabakidua ki vua na Daunniveibuli ka vakasamataka eso nas sala meda biuta laivi na noda
via vakilakila ni da rawa ni rawata vakataki keda n aka kecega. (In what ways does relying on
the creator for answers and insights, rather than relying solely on our own limited
understanding, bring about a deeper sense of purpose, fulfillment, and connection?)
VAKARAUBUKA 08/03/2024: Na porokaramu ena bogi ni Vakaraubula me qaravi kina na
nomuni vakatovotovo, vuli sere kei na ka taucoko sara e vo me baleta nai tuvatuva ena Siga
Tabu. Mera nanumi o ira na Tama era se qai vakaitavi vakadua mera vakayagataki ena Siga
Tabu. Oqo ena gaunisala vinaka talega ni nodra vakayarayarataki mai kina loma ni soqosoqo.
Eso vei ira ena ka vou vua na vakaitavi ia sa noda i tavi na qase meda tuberi ira. VAKARAUWAI
09/03/2024I: Me qaravi kina na sasamaki ka vakuri tale na vuli sere. Koni sa kerei na noda
turaga meda vakarautaka vakavinaka na noda macawa kei na noda Siga Tabu ka me kakua ni
caka ga me rawa. Me basika ena noda macawa na nona veituberi na Yalo Tabu ka kakua ni da
vakalasalasa se vakataratara wale tu ga. SIGA TABU 10/03/2024 NAI TUVATUVA NI LOTU
ENA SIGA TABU MASUMASU ENA MATAKA LAILAI 6am Sere ni Curu Mai – Domo ni
Kacikaci – Sere Masu – lewe 3 Masu ni Turaga Wiliki na lesoni – lewe 2 Veimasulaki – 3 Sere –
Masu kei na Masu ni Veivakalougatataki LOTU ENA SIGALEVU 10am Sere ni Curu Mai –
Domo ni Kacikaci – Veikidavaki – Sere – Masu – lewe 3 Masu ni Turaga – Sere ni Tacake –
Wiliki na Lesoni – Vosa ni Veikidavaki – Sere – Soqosoqo ni Turaga Dolei ni Vosa – Gauna nei
Tuirara/soli – Sere ni Vakavinavinaka – Vunau – Sere – Masu kei na masu ni
veivakalougatataki. LOTU ENA YAKAVI 4pm Sere ni Curu Mai – Domo ni Kacikaci –
Veikidavaki – Sere – Masu – Masu ni Turaga – Sere ni Tacake – Wiliki na Lesoni – Sere ni
vakavinakvinaka – (drama ke tiko, ke sega ia me sogota nai Talatala se Vakatawa ena dua na
vakasama vakayalo ena i ulutaga e vakarautaki ena loma ni macawa). VUNAU ENA 10AM
ULUTAGA: NA NODA KILA NAI NAKI NI KALOU VEI KEDA NA TAMATA, SAI DOLA NI NODA
VAKATAUCOKOTAKI (LESONI: VAKATEKIVU 2:1-17; VOSA VAKAIBALEBALE 19:21) I KAU
Sa tu oqo o Viti ena dua nai musu ni gauna ka levu era sa kaya tiko ni sa gauna vakarerevaki
ka gauna bolebole. Sa levu na veika vakadomobula ka vakarerevaki sa yaco ena noda veiyasa
ni bula kece sara, e tara na bula vakavanua, bula vakavuvale, na bula ni matanitu, bula
vakaveiwekani, na bula ni veivakatorocaketaki, na bula ni vakavuli kei na vuqa tale, sa bau laki
tara talega na bula vakalotu ka sa yaco kina me sa tekivu basika vakamalua na vakasama ni
kena sa sega soti sara ni vakabauti na lotu ni sala vinaka ni kena wali na noda leqa. E levu era
kaya ni revurevu ni veisau e kauta mai ko gauna ena noda vuravura ka sega ni galala kina na
noda vanua ka sa tara sara mai na noda dui mata ni vale yadua. Nai tovo lolovira eso sa basika
tu e Viti e daidai ei vakatakilakila ni so na tikina ena noda bula vakavanua, vakavuvale, vakalotu
sa luluqa mai vakamalua. Na veitovo lolovira me vaka na vakayagataki ni waigaga, na nodra
kucuvi na marama kei na gone, na volitaki vakatawa dodonu ni waigaga, na teivaki mariwana,
na butako ena i vakarau kaukauwa, na saravi ni yaloyalo ca, na veivaqaseni, na leqa ni
veiliutaki ena veivakatagedegede duidui me tekivu mai cake me yaco ki ra ena noda bula
vakaitikotiko. Na veitovo lolovira vakaoqori eda vakaitavi vakalevu sara ga kina e vuqa na Tama
ni vuvale. Niu cavuta tiko na tama, ya o ira era vakawati vou, o ira era sa valauveni, o ira era sa
vakamakubuni kei ira era sega ni tu ni vakawati ka tiko na nodra yabaki ni bula ena 36 ka lako
cake. Ena gauna oqo sa sega soti sara ni vakabauti na vuvale ni vanua vinaka ni veimaroroi ka
ni da sa liutaka sara tiko ga na tama ni vuvale na veitovo lolovira vakaoqori. E vica na taro ena
yaga meda na taroga! Kenai matai, na cava e vakavuna tiko na ka oqo? Kenai karua, na cava
na kena i wali eda rawa ni kunea? Ena macawa oqo eda goleva tiko mai kina na noda i ulutaga
sai koya “Na Noda Kila nai Naki ni Kalou vei Keda na Tama, sai Dola ni Noda Vakataucokotaki”.
E vica na ka e dodonu me matata vei keda ena noda a goleva mai na lesoni ena loma ni
macawa: Kena i matai, o keda na Tama e tataunaki vei keda na kena maroroi, taqomaki,
cakacakataki ka yadravi na vanua mera tiko sautu ka veilomani kina na tamata. Oqo e dusia ni
dua na veinuitaki levu e lesi keda kina na Kalou meda qarava na nodra vakataucokotaki na
tamata se o ira era muri keda tiko. Kena i karua, na veivakaitubutubutaki. Oqo e dusia na nodra
tubu mai ena noda kawa na tamata. Kena i katolu, me matata vei keda nai naki e lesi keda kina
na Kalou. Kena i ka va, meda cakacakataka na vanua se qele ka vakacabora lesu vua na Kalou
na i sevu ni ka eda rawata se da tea. Nida rawata vakavinaka e vica na ka oqo ena macawa
oqo eda sa na dolava kina na katuba ni noda vakataucokotaka na noda i tavi kei na noda i
lesilesi me vaka e kacivi keda kina na Kalou. Ena noda lesoni enai Vakatekivu, eda wilika kina
na itukutuku ni nona veibuli na Kalou. Ena Vosa Vakaibalebale, eda kunea ni veika e rawa ni
vakayacori ena rawa ni sotavi ni da salavata kei na inaki ni Kalou. Meda sa qai raica mada na
veitikina oqo ka raica na bibi ni noda kila na inaki ni noda ituvatuva vakalou ni Kalou. Ena
iVakatekivu 2:1-17 e vakaraitaka vei keda na itukutuku ni kena buli na tamata, na Were ko Iteni,
kei na veidusimaki ni Kalou a soli vei Atama. E vakaraitaka e dua na inaki vakalou ka tali ki na
isulu ni bula ni kawatamata. Na Vosa Vakaibalebale 19:21 e vakananuma vei keda na Vuku ni
sa rawai keda na ituvatuva ni Kalou. Ni da sa kila na bibi ni inaki ni Kalou ena bula vakatamata,
eda sa dolava na idola ni noda vakataucokotaki. E vica na vakasama ekoto oqo e ra: 1. Eda a
buli ena dua nai iNaki: Eda raica ena Vakatekivu, ni Kalou e nakita me bulia na tamata mai na
kuvu ni qele, qai ceguva nai cegu ni bula ki na ucuna. Eda a buli ena dua inaki kei na inaki
vakalou. Ni da tagane, e dodonu meda kila ni da sega ni tiko vakacalaka eke ia eda tiko ga ena
i tuvatuva cecere ni Kalou. Na noda kila na dina oqo ena rawa kina vei keda meda kilai keda
ena yalo dei kei na vakavinavinaka 2. Na veiqaravi kei na na noda i Tavi: E a vakatikori Atama
na Kalou ki na were ko Iteni ka nuitaki koya me qarava na were – me wereca ka vakatawa. Na
cakacaka oqo e vakaraitaka e dua na tiki bibi ni veiqaravi vakatamata. Ni da tagane, eda sa
kacivi meda ivakatawa sega walega ni noda veivanua voleka ia ena noda matavuvale, itikotiko,
kei na ivurevure sa vakarautaka tu na Kalou. Na veivakataucokotaki eda vakasaqara e koto ena
kena vakayacori na itavi oqo ena yalodina, yalododonu, kei na yalololoma. 3. Meda Vakasaqara
i naki ni Kalou E dina ni a vakaitavi o Atama ena kena wereci, teivaki, maroroi ka vakatawai na
were, e dodonu meda kila ni noda inaki na tagane e sega walega ni yaco ena were. Eda mai tu
oqo meda vakaraitaka na ivakarau kei nai tovo ni Kalou, meda lomani ira ka qaravi ira na tani,
ka veivuke ena yalodina ki vei ira na wekada kei na noda i na itikotiko raraba. Na noda
vakacegu e yaco mai ni da ciqoma ka bulataka na inaki cecere oqo, vakasaqara na vuku kei na
veidusimaki mai vua na Tamada vakalomalagi. Meda raica mada eso nai vakaraitaki ni kena
cakacakataki na veivakasama oqo: 1. Vakasaqara na Veidusimaki ni Kalou: Me salavata kei na
inaki ni Kalou, sa dodonu meda vakasaqara vagumatua na Nona veidusimaki. E vakananumi
keda na Vuku ena Vosa Vakaibalebale 19:21 ka kaya, ni noda ituvatuva ena rawa ni cala se
malumalumu, ia na inaki ni Kalou ena tudei tu. Vakasaqara ena veisiga na gauna mo semati iko
kina vua na Kalou ena masu ka wilika vakawasoma na Nona vosa. Me tuvana ko koya na noda
i tuvatuva kei na noda inaki, ka liutaki keda ko koya ena kena vakayacori. 2. Meda ciqoma na I
Tavi se na Veiqaravi Na noda qarava nai tavi se na noda veiqaravi, e sega ni kenai balebale
meda kaukauwa se sivita na nodra bula o ira era qaravi. E dodonu meda bulataka na veiqaravi
vaka-Karisito. Vakasaqara na madigi se sala meda qaravi ira kina na tani, meda lomana na
noda matavuvale ena yaloda taucoko, ka solia na yalovinaka kei na yalololoma vei ira era
vakaleqai tu. Ena cakacaka oqo, eda na kunea kina na vakacegu kei na inaki bibi ni Kalou ki na
noda bula. 3. Meda Veitokoni ka Veivakayaloqaqataki: Ni da vakatokai meda tagane, ia s aka
bibi meda kila ni sa noda itavi meda tokoni ira ka laveti ira cake na tacida. Meda
vakayaloqaqataki ira me ra kunea ka bulataka na inaki ni Kalou. Meda vakabulabulataka e dua
na draki ni veiwekani me rawa ni tubu ka bulabula kina na tamata ena kedra ivakatakilakila kei
na na nodra kacivi ena i naki ni Kalou. Sa na qai rawa meda rawa ni vaqaqacotaka vata na
noda matavuvale, na noda koro kei na vanua eda veimaliwai kina. Tinitini ni Vunau Me sa mai
tini na ivunau oqo, sa ka bibi meda dikeva tale mada na dina titobu ni noda kila na inaki ni Kalou
ki na noda bula. O ya, meda veiucui kai tovo vata kei na Kalou. Na gauna eda kila vinaka kina
nai naki oqo, sa na qai matata na noda vakataucokotaki. Meda sa qai ciqoma na noda inaki ena
vakabauta, yalomalumalumu, kei na gagadre titobu meda vakalagilagia na Kalou ena veika
kece eda cakava. Ni da vakayacora vakakina, eda na rawata na vakacegu kei na reki ka na
rawa walega ni yaco mai ena noda lako vata kei na ituvatuva vakalou ni Dauveibuli. Meda
nanuma, de na mani da guilecava, ni o keda na Tama e tataunaki vei keda na kena maroroi,
taqomaki, cakacakataki ka yadravi na vanua mera tiko sautu ka veilomani kina na tamata. Oqo
e dusia ni dua na veinuitaki levu e lesi keda kina na Kalou meda qarava na nodra
vakataucokotaki na tamata se o ira era muri keda tiko. Kena i karua, na veivakaitubutubutaki.
Oqo e dusia na nodra tubu mai ena noda kawa na tamata. Era na tubu mai ena nona i naki na
Kalou Kena i katolu, me matata vei keda nai naki e lesi keda kina na Kalou. Kena i ka va, meda
cakacakataka na vanua se qele ka vakacabora lesu vua na Kalou na i sevu ni ka eda rawata se
da tea. Nida rawata vakavinaka e vica na ka oqo ena macawa oqo eda sa na dolava kina na
katuba ni noda vakataucokotaka na noda i tavi kei na noda i lesilesi me vaka e kacivi keda kina
na Kalou. Ena yaca ni Kalou na Tamana, Na Kalou na Luvena, kei na Kalou na Yalo Tabu,
EMENI.