TGICUF: Thanks God It’s Catch-Up Friday

Sa gitna ng mabilis na pag-unlad ng teknolohiya, kabaliktaran naman ang dulot nito sa

kalagayan ng edukasyon sa Pilipinas. Dahil sa pagkakatengga ng mga mag-aaral nang dalawang

taon dulot ng pandemia, ganoon na lamang ang malaking pagbagsak ng kasanayan ng mga bata

sa pagbababasa at pagbibilang. Paano ba masosolusyonan ang dilemmang ito?

Ayon sa East Asia and Pacific Region report noong 2022: mayroon tayong learning

poverty rate na 91 porsiyento, na itinuturing na isa sa pinakamataas na rate sa mga bansa sa

Silangang Asya. Ang rate ng kahirapan sa pag-aaral ay tumutukoy sa bilang ng mga sampung

taong gulang na mag-aaral na hindi makabasa at makaunawa ng mga teksto o nakasulat na

materyales na naaangkop sa edad. Ibig sabihin, lumalaki ang mga batang Pilipino na hindi

nakakabasa.

Noong Enero 12, 2024 ay iniulat ng Department of Education sa ilalim ng pamumuno ni

Bise Preseidente Sara Duterte na matagumpay na inilunsad ang Catch Up Friday sa mga

pampublikong paaralan sa buong bansa. Ngunit bago pa lamang pumasok ang taong 2024 ay

inanunsyo na nito na magkakaroon ng programa na kung saan ang araw na biyernes ay itatalaga

lamang sa pagbabasa at paglinang sa kasanayan ng mga bata. Sa loob ng isang araw na ito, hindi

magbibigay ang guro ng bagong aralin kundi mas bibigyang prayoridad ang pagpapalakas sa

mga kakayahan at kaalaman ng mga mag-aaral sa mga paksa tulad ng Values, Peace at Health

Education. Hinimok ang lahat na makilahok sa pambansang programa na ito upang pataasin ang

academic performance ng mga mag-aaral partikular ang mababang antas ng kasanayan.

Base sa ibinabang Deped Memorandum 001, s. 2024 ang Catch Up Friday ay mahalaga

sa National Reading and Mathematics Program na kritikal sa mga subprogram ng National

Learning Recovery Program. Bukod dito, ang "Catch Up Friday" ay nagbibigay-daan din sa mga

guro na makapaglaan ng pansin sa mga mag-aaral na may pangangailangan ng dagdag na tulong

o suporta. Sa pamamagitan ng personal na pagsasanay o pagtutok sa mga pangangailangan ng

bawat mag-aaral, masisiguro ng bawat paaralan na walang maiiwang bata at lahat ay mabibigyan

ng pagkakataon na magtagumpay sa kanilang pag-aaral. Ngunit naiwan namang mangha ang

ating sangka-guruan dahil kabababa pa lamang ng memorandum ay agad na itong inimplementa

nang walang maayos na trainings. Ang tanong ng mga guro ay malaking “PAANO?”

Malaki ang tulong ng hatid ng Catch Up Friday sa mga mag-aaral ngunit malaki rin ang

hinaing ng mga guro sapagkat walang ano-ano ay inimplementa ang bagong programa na walang

tulong mula sa itaas. Isang malaking isyu ang kakulangan sa mga kagamitan at recursos na

kailangan upang maisakatuparan ng maayos ang programang ito. Ang kawalan ng sapat na mga

modules, worksheets, at iba pang learning materials ay nagiging hadlang sa epektibong

implementasyon. Sanhi rin ito ng pagkalito sa mga guro sa kanilang pagplano ng kurikulum at

pagtuturo dahil sa pagdagdag ng isang araw ng ibang dynamics sa kanilang klase.

Bukod dito, ang oras din ang isa sa mga pangunahing isyu. Sa gitna ng maraming gawain

at responsibilidad ng mga guro, madalas nilang nararanasan ang kakulangan sa oras upang

maayos na maisakatuparan ang "Catch Up Friday." Ang pagsasagawa ng enrichment activities,

pagsasanay, at personal na pagsasaayos sa mga mag-aaral ay nangangailangan ng malaking

pagtitiyaga at oras mula sa mga guro, na madalas ay limitado na.

Hindi maaaring balewalain ang mga hinaing at saloobin ng mga guro sa "Catch Up

Friday." Mahalaga na makinig ang DepEd sa kanilang mga pangangailangan at magbigay ng

sapat na suporta at kagamitan upang masiguro ang epektibong implementasyon ng programa.

Dapat ding bigyan ng pansin ang pagtitiyak na may tamang koordinasyon at komunikasyon sa
pagitan ng mga guro at ng DepEd upang maiwasan ang kawalan ng katiyakan at pagkalito sa

implementasyon ng mga programa sa paaralan.

Sa kabuuan, habang patuloy ang laban ng edukasyon sa panahon ng pandemya, mahalaga

ang pagsasama-sama at pakikipagtulungan ng lahat ng sektor ng lipunan, partikular na ang mga

guro at Kagawaran ng Edukasyon, upang matiyak na ang bawat mag-aaral ay nabibigyan ng

sapat na oportunidad at suporta sa kanilang pag-aaral. Ang tinig ng mga guro ay dapat ding

maging mahalaga at pangunahing gabay sa pagpaplano at implementasyon ng mga programa

tulad ng "Catch Up Friday" upang matiyak ang tagumpay at masabing “Thanks God It’s Catch

Up Friday”.