Ngaihdamna hi thil pawimawhber te zinga mi a ni awm e. Pathian leh mihring
inkârah a pawimawh ang bawkin, mihring leh mihring inkârah pawh a pawimawh a. Chhungkuaah pawh sengluh a nih loh chuan, inmihranna bâk hmabak a awm thei lo a ni. Ngaihdamna tel lovin ‘Pathian mi’ a nih theih lo va, Ngaihdamna tel lovin chhungkua a khawsakho theih bawk hek lo a ni. Kohhran hovah ngei pawh hian ngaihdamna tel lo chuan rawng a bawl ho hleih theih loh a ni. Ngaihdamna chungchang hi Bible-ah eng ang takin nge hman a nih a, eng ang taka hmun pawimawh luah nge a nih i lo en ho teh ang. Thlahtu Evi leh Adama te’n thil an tihsual lai khan ngaihdamna hi chelek a nih awm reng reng a lang rih lo va. “In ei chuan in thi ang, a tawh pawh in tawk tur a ni lo” tih a ni. A nih ang taka hman a nih chuan khawvêl hian a dawl zo lova, ‘Bawhchhiatna fa’ kan lo nih phah zo ta a ni. Ngaihdamna chelek a nih loh avângin khawvêl leh a chhunga awm zawng zawng te pawh chu Pathian anchhedawng kan lo ni zo ta a. Natna te, hlauhna te, tlâkchhamna te, ṭahna te leh thihna te chu kan chanpuala a lo ni ta a ni. Amaherawhchu, Ngaihdamna hi chelek rih lo mahse, Khawngaihna lantîr a ni thung a ni. Khawngaihna phei chu hmang lo se Pathian khan Adama te nupa kha tihlum in, a duh phawt chuan vaivut kha mihring dangah a din leh mai thei a ni. Adama te hun a liam a, mihringte chuan Pathian thu an âwih leh ta lova. Hurna leh khâwlohna leh inpawngnêkna in khawvêl chu a lo khat zo leh ta a. Ngaihdamna an chan mai si loh avangin tuilêt râpthlak tak mai chu Nova hun lai khan a thleng leh ta a nih kha. Ngaihdamna tel lo chuan mihring tân pawh, ran tan pawh nun rual a ni lo a ni. Zâwlnei ropui Mosia te, Puithiam hmasaber leh ropui tak Arona te meuh pawh, Massa leh Meriba hmuna Lalpa an chawimawi loh avangin Ramtiam - Kanan thleng zo lovin an boral ve leh ta a nih kha. Ngaihdamna awmlohna hmun chu hmun ṭihbaiawm leh ralṭi a ni a, lungmuanna leh hlimna tak tak a awm thei ngai lova, Zâwlnei ropui te meuh pawh an nun khawchhuah theih lohna hmun a ni. Israel Lal ropui Davida ngei pawh Pathianin ‘Ka rilru ang pu mi’ ti a duhsak taka Israel te lala a siam ni mahse, Pathianin a remtih loh chung pawhin a mite a chhiar a, sipai chakna leh ralthuamte a chapopui takah kha chuan Pathian hremna hmachhawn tur rapthlâk tak tak chi thum zet a hmaah chhawp chhuah a ni ta mai a nih kha! Keini Thangtharte hi thlahtute leh Lalpa Zâwlnei ropuite ai khian kan fel bik êm ni? An bawhchhiatna leh sualna angte khi ti ve lovin kan insûm thei bik em le? Thei bik teh suh e. Pathian khawngaihna leh chhandamna te hre reng chunga awih duh lo leh bawhchhe ṭhin, luhlûlnaa khatte kan ni. Chuti engtin nge kan tih tâk ang? Lalpa Isuan heti hian a ti, “Mi an bawhchhiatte in ngaihdam chuan, in Pa vana miin a ngaidam ve ang che u. Nimahsela, mite in ngaihdam si loh chuan, in Pa in in bawhchhiatte a ngaidam bik lovang.” tiin. Kan sualna leh bawhchhiatna tinrengte hi ngaihdam a nih theih nan ṭhuthluang chunga lo nghah ngawt chi a ni lova, kan chunga thil tisualtute ngaidam thei hawt si lova Pathian ngaihdamna beisei ve ngawt chi lah a ni bawk hek lo. Mahni ngei chêt hmasak a ṭul a ni tih Pathian thu chuan min hrilh a ni. “Inkhawngaih tawna lainatna neiin awm ula, Pathianin Kristaa a ngaidam che u ang bawk i nin ngaihdam tawn rawh u.” (Ephesi 4:32) “Kan sualte thupha kan châwi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni.” (I Johana 1:9) a ti leh bawk a. Tichuan, kan sualna leh bawh chhiatna tinrenga ngaihdam kan nih theih nan kan tih tur Bible-in min hrilh ang hian ti ila, Ngaihdamna famkim Lalpa Isua avang chuan kan chang ngei ang.