唔駛客氣

第一場
時：日
地：studio 樓下
人：豪，賢，慈

許賢去探豪哥，豪哥落樓下接佢

賢（神色有點忐忑）：哈囉豪哥，駛乜落嚟接我呀，我都嚟過咁多次啦。
豪（沒有為意）：唔駛客氣啦，嗰兩步路。
賢：唔係呀，其實呢⋯⋯
豪：得啦你唔好咁婆媽。
賢：喔，好啦。
豪（細細聲）：嘖⋯⋯（眼神有點不滿，賢沒有察覺）
賢：咁⋯⋯上去囉？
豪（眼角見到街角推紙皮車的鮑姐版阿慈）：咪住！你等一等我先。

豪跑過去，賢莫名奇妙

豪（溫柔)：婆婆，啲紙皮好重㗎，我幫你推啦！
慈：唔駛呀，我自己得㗎啦⋯⋯（按：車上只有兩張報紙，慈推得很輕鬆）
豪：唔駛客氣啦！我幫你推一段，有幾閒姐！

豪哥強行搶過手推車，怎料他推得有點吃力

慈：我要攞啲報紙返屋企睇，但我屋企有啲遠喎！
（豪想不到原來婆婆收報紙是自用，雙眼一白，但很快回復正常）
豪：喔，得啦我幫你！唔駛客氣呀！（吃力地開始推車）
慈（無奈）：咁好啦，不過你要快手啲啦，我趕住返去睇試當真謝票場呀！
（豪見慈老實不客氣，車又很難推，有點生氣，但很快變回正常）

豪（轉頭向呆在原地的賢）：喂我幫婆婆推一推，你上去先呀，當自己屋企
得㗎啦唔駛客氣。
(扔鎖匙給賢）
賢：吓⋯⋯喔⋯⋯（望一望四周）

豪望著賢眉頭一皺，搖一搖頭，然後繼續推車

第二場
時：夜
地：studio
人：豪，賢，Jessica

豪渾身大汗回到 studio，窗外天已黑，賢在沙發上睡覺，沒有脫鞋，豪很不
滿。賢聽到聲音，醒。

賢：豪哥你返嚟啦，我等你好奈啦。
豪（沽沽自喜）：無計啦，頭先個婆婆，一個人點推到部車呀。你有事走先
呀嘛，駛乜係度等我咁客氣呀？
賢：唔係呀豪哥，我呢⋯⋯
豪（打斷）：喂我買咗魚蛋呀，整粒呀，唔駛客氣！
賢：唔駛啦豪哥，我頭先叫咗下午茶，依家仲飽緊。
豪（不悅，觀眾自行腦補「又唔叫」）：唔係呢，食啦真係唔駛客氣。

一番推讓

賢： 好啦好啦（食一粒魚蛋）哇，好彈喎！（再食一粒）

豪因賢多食了一粒魚蛋，又有點生氣

豪：喔，啱食咪食多啲囉，唔駛客氣呀！（不停餵賢食魚蛋）
賢：咦豪哥你唔食嘅，你都食啦，唔駛客氣喎！
豪（開心）：多謝！（食了一粒魚蛋）

Jessica (身份：豪女友)入 studio

豪：咦 Caca 今日點解會上嚟嘅，你唔係要拍嘢咩？

Ca：係呀，所以咪上嚟囉。
豪：吓，你拍咪拍囉，唔駛客氣喎，我唔會嬲你拍得夜㗎喎。

Ca 望向賢，示意他開口

賢（欲言又止）：豪哥呀，其實呢⋯⋯
豪：吓，你有嘢咪講囉，唔駛客氣喎。
賢：即係呢⋯⋯（豪開始不耐煩）
豪：妖，叫你講就講啦，都話咗唔駛客氣囉，有無尊重過我㗎姐！
Ca：妖，你唔講我講啦！我中意咗許賢，許賢都中意我，我地已經一齊咗！
癡線，係樓下等咗你成日，無啦啦走咗去推車，嘥 Q 哂我啲時間！

豪晴天霹靂，說不出話來
（插：腦海浮現出早上賢忐忑的神情，以及發現鏡頭角落的 Jessica）
Jessica 走去拖著賢的手，露出十分甜密的表情
賢：其實呢⋯⋯就係咁囉⋯⋯咁你成日⋯⋯又話當自己屋企嘛⋯⋯咁⋯⋯當
當吓⋯⋯（一邊說，Jessica 一邊餵賢食魚蛋）豪哥，你會成全我地㗎可？

賢和 Jessica 看著豪，豪接近崩潰，來回影著三人，緊張氣氛

豪（把心一橫，拍枱大怒）：屌！你地當我咩人！咁都要問嘅！唔準同我客
氣！
賢/Ca（驚喜）：多謝豪哥！你真係好人啦！

豪聽到二人說多謝，大吃一驚，開始有點眼淚
定鏡豪，不停重播「多謝豪哥！你真係好人啦！」

豪（有點害羞地笑）：唔駛客氣，咁咪幾好。

-完-