Metakognitibong Pagbasa
Ang pagbasa ay pagkilala sa mga simbolong nakalimbag.
Sa pamamagitan ng pagbabasa ay nagkakaroon ng
ugnayan ang manunulat at mambabasa. Mayroong mga
estratehiya sa pagbasa, isa na rito ang metakognitibong
pagbasa. Ang metakognitibong pagbasa ay:
 Isang pamamaraan o estratehiya sa pagbasa
upang lubos na maunawaan ang binasang
teksto.
 Estratehiyang ginagamit ng mga mambabasa
upang lubos na maunawaan ang nilalaman ng
teksto sa pinakamataas na antas ng pagkatuto.
 Pagsasagawa ng mga pagpapakahulugan,
pagbubuo ng katanungan, pagbibigay hinuha o
pagkukuro, pagbubuo ng kaisipan ukol sa
binasa, o sa kabuuan ay pagsasagawa ng
pagsusuri.
 Pag-uugnay ng dating kaalaman sa bagong
impormasyong nababasa.
 Kung batid at isinasagawa ng mambabasa na
kailangan niyang maunawaan at matandaan ang
kaniyang binabasa ay nagsasagawa siya ng
metakognitibong pagbasa.
Mga Elemento ng Metakognitibong Pagbasa
Sa pagbabasa ay may prosesong sinusunod, at sa
prosesong ito ay nakapaloob ang mga elemento ng
metakognitibong pagbasa. Tingnan ang graphic
organizer sa ibaba.
Proseso ng Metakognitibong Pagbasa
Gaya ng iba pang paraan ng pagbasa, ang
metakognitibong pagbasa ay may sinusunod na
proseso.
Bago Magbasa
Ito ang pagbuo ng mga palagay o hinuha ukol sa kung
ano ang paksa ng teksto. Bumubuo rin ng palagay ang
mambabasa sa kung ano ang layunin ng manunulat sa
pagbuo ng paksa. Ang mga hinuha ng mambabasa ang
nagiging batayan upang sila ay makalikha ng sariling
interpretasyon.
Halimbawa:
 Ano ang ginamit na istilo ng may akda?
 Kailan naisulat ang akda?
Habang Nagbabasa
Ang anotasyon at pag-aanalisa ay nakatutulong upang
lubos na maunawaan ng mambabasa ang binasang
teksto. Ang anotasyon ay maaaring isagawa sa
pamamagitan ng pagkilala sa kahulugan ng mga salita,
pagbuo ng mga katanungan sa isipan ng mambabasa, at
pagbabalangkas ng mga pangyayari. Samantalang sa
pag-aanalisa ay sinusuri ang katotohanan at konklusyon
ng mga pahayag ng may-akda.
Halimbawa:
 Ano ang mensaheng nais ipabatid ng may akda
sa mga mambabasa?
 Alin sa mga pangyayari sa akda ang nagaganap
pa rin sa kasalukuyan?
Pagkatapos Magbasa
Sa bahaging ito ng pagbasa ay naipakikita ang pag-
unawa at interpretasyon ng mambabasa sa binasang
teksto.
Halimbawa:
 Ano ang buod ng binasang teksto?
 Anong aral ang natutuhan mo mula sa binasang
teksto?
Mahahalagang Kaalaman
 Ang metakognitibong pagbasa ay isang
estratehiya upang lubusang maunawaan ang
teksto.
 Binubuo ng mga elemento ang proseso ng
metakognitibong pagbasa: bago magbasa,
habang nagbabasa, at pagkatapos magbasa
 Ang mga manunulat ay nagagawang makipag-
ugnayan sa kapwa sa pamamagitan ng pagbasa
ng tao ang kaniyang isinulat.
 Naisasagawa ang metakognitibong proseso ng
pagbasa kung ang mga elemento ng pagbasa ay
nagagawa ng mambabasa.