Herritar hori: Jaiak Berdintasunez elkarteko kideak gara eta mezu honen bitartez zuregana jotzen dugu hilabete amaiera honetan hasten diren jaietan martxan jartzera goazen emakumeen aurkako sexu-erasoak saihesteko kanpaina aurkezteko. Dakizuenez, gure helburu nagusienetariko bat herriko jaiak giro onez hasi eta amaitzea izaten da; izan ere, nork ez du herriko jaietarako irrika, grina eta nahia? Kuadrilla eguna, marmitakoa, ginkanak, poteoak, kontzertuak.... Lagunekin eta ezagunekin ondo baino hobeto pasatzeko astea da. Urte guztian zehar, oztopoak oztopo, ikusi ezin izan ditugun ezagunak ikusteko momentua. Gozatzeko egunak dira, betiere berdintasunez. Hala ere, zoritxarrez, azken urte hauetan egunerokotasunean pil-pilean dagoen gaia berdintasuna da. Berdintasunera heltzeko hainbat pausu txiki ematen ari gara eta herriko jaietan ere inolako atsedenik hartu gabe pausu hauei eustea beharrezkoa ikusten dugu. Ez dago zalantzarik bidea luzea dela. Beraz, aurtengo jaietarako emakumeen aurkako sexu-erasoak saihesteko kanpaina abiaraztea erabaki dugu, “Ez, ezetz da!” lelopean. Kanpainia sortzearekin batera, zuen kontzientziarekin bat egin nahi dugu, denon artean lortu beharreko lana delako. Honetarako, jai egunetan ekimen batzuk martxan jartzea beharrezkoa delakoan gaude. Askok ez dute egoera honen larritasunaren kontzientzia piztu eta izugarrizko arazoa da. Hori dela eta, “Ez, ezetz da” lelopean, jokabide matxistak salatzea eta emakumeek jaiez beldurrik gabe gozatzeko duten eskubidea aldarrikatzea dira helburu nagusiak. Arestian aipatu bezala, hainbat ekimen martxan jarri nahi genituzke. Lehenik eta behin, jaietan erabiltzen ditugun zapi urdinetan leloa idaztea, baita txosnetan noizean behin lelo honen izenean musika etetea ere. Horrez gain, arazo honen larritasunaren kontzientzia piztea eragin dezaketen pegatinak eta pankartak egingo ditugu. Batzuen ustez, ondo legoke ere eraso sexistak jasan dituzten emakumeen hitzaldiak entzutea. Eguneko ekimenez gain, gauekoak ere martxan jarri nahi ditugu gauean bakarrik ibiltzeko beldur diren emakumeei laguntzeko. Horretarako, Sorgiñe gozoki dendaren aurrean bandera more bat egongo da eta bertan etxera joan nahi duen edozeinek beste bati itxaron diezaioke. Gainera, edozein momentutan edozertarako eskuragarri jarriko da 123 telefono zenbakia, bai zerbait salatzeko bai beharrezko laguntza emateko. Informazio gehiago lortu edo zalantzaren bat argitu nahi izanez gero, hilaren 25ean asanblada txiki bat egingo dugu kanpaina zuzenean aurkezteko. Beraz, anima zaitez eraso sexistarik gabeko jaien alde borrokatzera! Eskerrik asko zure arretagatik. Jaiak Berdintasunez elkartea.