Alam mo ba kung ano ang gusaling ito? Mahalaga ang pangyayaring
naganap dito. Basahing mabuti ang mga pangungusap at subukang sagutin ang mga tanong pagkatapos.
Ito ang Simbahan ng Barasoain sa Malolos, Bulacan. Makikita rin ang
larawan ng simbahan na ito sa lumang sampung piso dahil mahalaga ang ginampanan ng gusaling ito sa kasaysayan ng Pilipinas. Sa pagnanais ng mga Pilipino na maging malaya, minarapat nilang tumawag ng kongresong bubuuin ng mga kinatawang halal ng mga lalawigan. Noong Setyembre 15, 1898, pinasinayaan ang Kongreso ng Malolos sa Simbahan ng Barasoain. Ang mga kinatawan nito ay ang 85 mamamayang nabibilang sa may mataas na pinag-aralan, matalino, at mayroong kaya sa buhay. Naihalal ang mga pinuno ng Kongreso na sina: Pedro Paterno bilang Pangulo; Benito Legarda bilang Pangalawang Pangulo; at Gregorio Araneta at Pablo Ocampo bilang mga Kalihim. Napakahalaga ng Kongreso ng Malolos sa kasaysayan. Kabilang sa mga naisagawa ng Kongreso ay ang mga sumusunod: 1. Pagpapatibay ng kalayaan ng Pilipinas. 2. Paggawa ng Saligang-Batas ng Malolos. Binuo ng 19 na mga kagawad ang tatlong sipi ng Saligang-Batas na isinumite upang pag-aralan. Ang mga ito ay ang plano ni Mabini, plano ni Paterno, at plano ni Calderon. Pagkatapos ng masusing pag-aaral, napili ng komite ang plano ni Calderon. Sa pamumuno ni Felipe G. Calderon, ang mga kinatawan ng kongreso ay naghanda ng Saligang Batas. Ang Saligang Batas ng Malolos ay nagtadhana ng isang pamahalaang demokratiko. 3. Pinagtibay ang Konstitusyon ng Malolos. Noong Nobyembre 29, 1898, pinagtibay ng mga kagawad ng kongreso ang konstitusyon. Itinatag ng konstitusyon ang isang malayang Republika ng Pilipinas. Pinasinayaan ang Unang Republika ng Pilipinas noong Enero 23, 1899 at si Heneral Emilio Aguinaldo ang nahalal bilang unang pangulo nito. Ang itinatag na Republika ng Pilipinas ay binubuo ng tatlong sangay: Tagapagpaganap o ehekutibo Tagapagbatas o lehislatibo Hudikatura Ang mga ito ay may magkahiwalay ang kapangyarihan. Pinaghiwalay rin nito ang tungkulin ng simbahan sa tungkulin ng estado. Ang mga karapatan ng tao, ang kapangyarihan at tungkulin ng mga opisyal ng pamahalaan ay nakasulat din dito. May kalayaan ang mga mamamayan sa pagpili ng kanilang relihiyon. Ang kapangyarihan sa paggawa ng batas ay nakaatang sa Asamblea at ang mga kasapi nito ay inihalal ng mga tao. Ang Pangulo ay ang tumatayong tagapagpaganap kasama ang pitong kalihim. Ang mga kalihim ay hinirang ng Pangulo at ang mga ito ay mananagot sa Kongreso.