Kong ang Bautismo Mahinungdanon pa sa Kaluwasan Nganong Naluwas man Kadtong Kawatan diha sa

cruz nga Walay Bautismo-Luc.23:42-43?

Pasiuna:

1. Kini mao ang kasagaran nga pangutana sa mga denominasyon nga wala magatoo nga mahinungdanon
ang sugo sa pagpabautismo sa kaluwasan.

2. Sa pagtubag sa maong pangutana ania kining pipila ka mga hinungdan kon nganong naluwas kadtong
kawatan didto sa cruz nga matud pa sa mga denominasyon wala mabautismohi:

I. Una,Kini nagapakita nga si Ginoong Hesus adunay gahum dinhi sa yuta sa pagpasaylo sa mga sala sa
tawo(Lucas 5:24).

A. Sama sa iyang gihimo niadtong usa ka paralitico (Luc.5:20).

B. Maingon usab niadtong usa ka babaye (Luc.7:48).

C. Ug kini gibuhat usab niya ngadto kang Zaqueo (Luc.19:9-10).

D. Kini nga mga hitabo lakip ang pagluwas niadtong kawatan didto sa cruz nagapakita nga ang atong
Ginoo dinhi sa yuta siya adunay gahum sa pagpasaylo sa mga sala sa tawo ug kini wala magapakita nga
ang bautismo dili mahinungdanon sa kaluwasan.

II. Ikaduha, Ang sugo sa Ginoo sa pagpamautismo aron ang tawo mamaluwas kini tapus na sa iyang
kamatayon,paglubong ug pagkabanhaw.

A. “Panglakaw kamo sa tibuok kalibutanan ug iwali ninyo ang maayong balita ngadto sa tibuok
kabuhatan,ang motoo ug magpabautismo mamaluwas apan ang dili motoo pagahukman sa
silot”(Marcus 16:15-16).

B. “Paghinulsol kamo ug pabautismo kamo ang matag-usa kaninyo sa ngalan ni Jesucristo alang sa
kapasayloan sa inyong mga sala” (Buh.2:38).

C. “Tumindog ka ug magpabautismo ug hugasi ang imong mga sala” (Buh.22:16).

D. Niini dili ikatingala nganong naluwas kadtong kawatan didto sa cruz nga wala mabautismohi.

III. Ikatulo,Ang mga tawo nga nailalum sa Daang Tugon walay sugo kanila sa pagpabautismo aron
maluwas.

A. Sama kang Noe,Abraham,Moises ug uban pa(Heb.11).

B. Ang sugo sa Daang Tugon aron ang ilang mga sala matabonan mao ang paghalad og baka o kanding
(Heb.10:1-4).

C. Ang Bag-ong Tugon napalig-on lamang kini human sa kamatayon sa Ginoo (Heb.9:15-17). Kini tapus
nga mabungkag ang nahaunang tugon (Heb.10:9; Col.2:14; Efe.2:15).
D. Niini imong maila nga kadtong kawatan didto sa cruz nailalum pa sa Daang Tugon ug wala mailalum sa
Bag-ong Tugon.Busa dili ikatingala nga kadtong kawatan naluwas bisan walay bautismo.

Panak-op:Human napalig-on ang Bag-ong Tugon ang kaluwasan sa tawo pinaagi na sa Maayong Balita
(Rom.1:16; 1 Cor.15:1-4)nga niini gikinahanglan ang pagpabautismo aron ang tawo makadawat kang
Cristo (Gal.3:27)ug maluwas(1 Ped.3:21).