ZIRLAI 10 : ISRAELTE SUALNA

Vawiin hian Israelte chunga Pathian lungawi loh thu leh thinur thu kan zir dawn a. Hnam
tihmawh tak, Pathian chawimawi tha duh lo, Pathian hruaina te, an tana a thiltih mak zawng
zawng leh an chunga a thatzia pawh hre tha duh lo an nih thu kan zir dawn a ni.

(1) Israel ten Lalpa an chawimawi duh lo (43:22-24)

He lai thu hi saltan hma lam hun anih hmel a, a chhan chu inthawina ran leh rim tui
chungchang hi sal tanna hmun Babulon-ah temple a awm loh avangin inthawina hlan theih a
ni lo va. Zawlnei hian hmanlai sal tan hmaa zawlnei ropui Hosea, Amosa, Mika leh Jeremia te
ang bawk khan Israel fate dik lohna huaisen takin a sawi chhuak a ni.
Isaia 43:22
- He lai Bible changah hian Israel ho sakhaw biak dan chu takna nei lo, ning hmel pu tak
chunga kalpui mai mai ang niin Isaia chuan a sawi.
- “Aw Jakob-ho nangni zawngin mi ko si lo va.... mi ning zawk a nih hi,” tiin Israelte dinhmun
dik tak a sawi.
- Rilru inhawng leh duh tak takna tel lovin a mawiah an inthawi mai mai thin.

Isaia 43:23-24
- Pathian chuan a phut chu tihtakzeta chibai buk leh thinlung taka inthawina hlan a ni a; chu
a thil beisei chu a mi, a hmangaih em emte hnen atangin a dawng si lo, “In inthawina lamte
chuan mi chawimawi ngai hek lo,” a ti a ni.
- An sual phurh hna thawktu atan leh tirhchhiah ang maia chhawr atan chauh Pathian chu
an hmang a. Chutiang atan chauh chuan an duh a ni tih hre reng chungin Pathian chuan a
hmangaih em avangin a ngaidam leh mai thin zawk a ni!

(2) Lalpan a mite a ngaidam (43:25)

- “Kei, keimah ngei hi, keimah leh keimah avang ngawtin...” tia amah leh amah a inchhalna
hian Pathian lalzia, misual ber pawh ngaidam theitu a nihzia a tifiah a, a lungawi lo chung
pawha ngaidamna thu lo tlazep hramte hian Pathian chungnunzia leh hmangaihna ngahzia a
tifiah hle.

(3) Israel sualnate (43:26-28)

- He lai changah hian Israelte chu thiamthu sawi tur an neih chuan sawi turin a sawm a.
Court rorelna hmaa thiam loh chantir thu thinur taka sawi chhuak ang maiin a cho a ni. An
thalhtu bul, Jakoba atang renga bumtu, bumna hmanga fa u nihna chhuhtu a nih thu a sawi.
- “In palaite pawhin ka lakah an bawhchhia a,” tih thu a, ‘In palai’ a tihte hi zawlnei der ho, lal
leh mipuite ti lawm tura a tha lam ngawt dik lo taka puangtute sawina a ni. Bible lehlin
tharah chuan ‘in hruaitute’ tiin a dah a. Hei hian sakhaw hruaitu, Puithiamte pawh a kawk
thei ang.

Tlipna:
Israelte nun atang hian keini pawhin hengahte hian inenfiah vena tur kan nei:
(1) Lalpa rawngbawl hna kan thawh dante hian belhchian a dawl em?
(2) Kan Pathian be hmelte hi ning hmel kan lo pu ve ang em?
(3) Covid hri leng avanga kum 2 zet kan inkhawm theih loh hnua hun tha lo inher chhuakah
hian phurna thar nen Biakin kan pan hlawm em?
(4) Pathian biaa kan tawngtaina te hi chhut chiang ila, Pathian hi tirhkah ang lekah kan lo
hmang ve em? Kan sual min phurhsak tur chauhvin kan lo duh ve em?