MARSO 24, 2024 - DOMINGO

Domingo de Ramos san Pasyon san Ginoo

Domingo san Alay Kapwa

Mga pinalangga na mga kamaranghod:

Tuna san pag-abre san Kwaresma hasta yana aton gin-andam an aton mga puso
paagi sa pagbasol kag paghimo sin kaayuhan. Yana na adlaw nagkatiripon kita agod
ibarita kaupod an entiro Simbahan an pagtuna san selebrasyon san Misteryo Paskwal
san aton Ginoo, an iya Pagsakit kag Pagkabuhay Gihapon. Kay sa pagtuman sani na
misteryo siya nagsulod sa sadiri niya na siudad san Jerusalem. Kaya, nauupdan san
tanan na pagtuod kag debosyon, aton dumdumon an pagsulod san Ginoo sa syudad para
sa aton kaligtasan, nagasunod sa iya nga inagihan, agod, ginhimo na parabahin san iya
grasya sa Krus, kita man magka-igwa sin bahin sa iya Pagkabuhay Gihapon kag sa iya
buhay.
Yana amo an Domingo san Alay-Kapwa kag tungod sani magkakaigwa sin second
collection.
Ini na selebrasyon san Eyukaristiya ginahalad man sa mga masunod na intensyon:
_________. Gina-esponsoran ini san Santa Misa san _________.
An mangungulo san aton selebrasyon amo si ________. Magtindog kag kantahon an
kanta sa pagtuna.

PAGDUMDOM SAN PAGSULOD

SAN GINOO SA JERUSALEM

Prusisyon

Padi: Sa ngaran san Ama kag san Anak, kag san Espirito Santo.
Tanan: Amen.
Padi: An grasya san aton Ginoong Jesukristo, an pagkamuot san
Dios kag an pagpausad san Espirito Santo mapa sa iyo tanan.
Tanan: Amen.

Padi:

Domingo de Ramos san Pasyon san Ginoo Page 1

N amumut-an na mga kaigmanghudan, sa pagtuna san
Kwaresma gin-andam naton an aton mga puso paagi sa
penitensya kag sa mga himo san pagkamuot. Yana na adlaw
nagatiripon kita agod kaupod an entiro Simbahan tunaan naton
an misteryo paskwal san aton Ginoo, na amo an iya pagti-os kag
pagkabuhay gihapon, na sa pagtuman sani nagsulod siya sa iya
siudad san Jerusalem. Kaya ngani, sa pagdumdom na may tanan
na pagtuod kag debosyon, sani na nagaligtas na pagsulod,
sunudon ta an Ginoo, agod kita na ginhimo na kadamay san krus
paagi sa grasya, magkaigwa man lugod sin parte sa pagkabuhay
gihapon kag sa iya buhay.

Mangadye kita
ODios na makagagahom hasta na lang,
pabanala san imo bendisyon + ini na mga lukay,
agod kami na nagasunod kan Kristo na Hade,
na nagalipay,
makaabot man lugod , paagi sa iya
sa wara’n katapusan na Jerusalem.
Siya na nabubuhay kag nagahade
sa mga panahon san mga panahon.
O kaya
Dagdagi an pagtuod san mga nagalaom sa imo,
O Dios,
kag pamati-a na may kaluoy
an mga pangadye san mga nangangamuyo,
agod kami na nagapakita yana san mga lukay
para kan Kristo na nanggana,
magdara lugod sa imo bunga
san mga maayo na himo sa iya.

Domingo de Ramos san Pasyon san Ginoo Page 2

Siya nabubuhay kag nagahade
sa panahon san mga panahon.
R. Amen.
Kag ginawirikan an mga lukay sin bendita na wara’n ginasabi:

TUIG B
EBANGHELYO Mc. 11:1-10

An Ginoo mapa sa iyo.

Kag sa imo espirito.

P agbasa sa banal na Ebanghelyo susog kan Marcos

Glorya sa imo, Ginoo.
“Mapalad siya na nagapakadi sa ngaran san Ginoo.”

S adto na panahon, san nagahalapit na sinda sa Jerusalem,

pag-abot ninda sa Betfage, sa bukid san mga Olibo, ginsugo
ni Jesus an duha niya na disipulos, kag ginsabihan sinda:
“Magpakadto kamo sa baryo sa unahan niyo kag may makikita
dayon kamo na usad na nakahigot na babayé na asno na
kaupod an tinday. Hubadi niyo ini kag daraha didi sa akon. Kun
may magsabi sin ano man sa iyo, sabaton niyo: ‘An Ginoo
nagakinahanglan sani, kag ibabalik man niya ini dayon.” Nangyari
ini agod matuman idto na gin-surmaton san propeta: Sabihi niyo
an anak na babaye san Sion: “Kitaa, magaabot an imo Hade na
mabuot, nakasakay sa usad na babayé na asno, kag sa usad na
tinday; ugbon san pangtrabaho na hayop.” Naglakat an mga
disipulos kag ginhimo an ginsugo sa inda ni Jesus. Gindara ninda
an asno na babayé kag an tinday, kag ginpangbutang an inda

Domingo de Ramos san Pasyon san Ginoo Page 3

mga alikboy sa likod sani, kag ginpasakay siya ninda. Damu-
damo na mga tawo an nagpangbuklad san inda mga alikboy sa
dalan, kag an iba naman nang-urutod sin mga sanga san mga
kahoy kag ginpangbutang ini sa dalan. An mga tawo na nasa iya
unahan kag nasa iya likudan nagsiriyak: “Osana sa anak ni David!
Mapalad siya na nagapakadi sa ngaran san Ginoo! Osana sa
pinakahitaas na kalangitan!” Pagsulod ni Jesus sa Jerusalem, an
bilog na siudad nagsaramok kag an mga tawo naghurunga: “Sin-o
ina?” Kag an nagtiripon na mga tawo nagsabat: “Amo ina si
Jesus, an propeta na taga Nazaret sa Galilea.”
Ebanghelyo san Ginoo.

Halip-ot na homiliya.

Pag-agda
Padi: Irugon ta, mga namumut-an na kaigmanghudan, an mga
two na nagasiriyak sin pag-omaw kan Jesus, kag magpadayon
kita sa katuninungan.

o kaya:
Padi: Hamos na, maglakat kita sa katuninungan, kag irugon ta an
mga tawo sa Jerusalem na gin-omaw si Jesus bilang Hade kag
Ginoo.

Mga kanta sa prusisyon:

Salmo 23, Salmo 46, Kanta kan Kristo na Hade

Pagsulod san prusisyon sa simbahan:

Domingo de Ramos san Pasyon san Ginoo Page 4

R. Pagsulod san Ginoo sa banal na siudad, an mga kabataan na
Hebreo, na nagapahayag san pagkabuhay gihapon san buhay,
“nagkaranta na may mga ramos san mga palma: Osana sa
kaitaasan!
V. San mabati-an san mga tawo na nagaabot si Jesus sa Jerusalem
nagruluwas pagsugat sa iya. Nagkaranta na may mga ramos san palma:
Osana sa kaitaasan!

MISA

Pakatapos san prusisyon o san solemne na pagsulod, an padi nagatuna san Misa
sa gintiripon na pangadye:

LITURHIYA SAN SURMATON

Komentarista: Ini na misteryoso na Suruguon naga-

representar san maabot na si Jesus na
nagatukoy sa iya sadiri na Suruguon na
nagalibre san tanan na tawo.

Pagbasa I Isa. 50:4-7

Pagbasa libro ni propeta Isaias
Gintukduan san Ginoong Dios an akon dila
agod makaaram ako pagsurmaton sa napapagal.
Kada aga gina-andam niya an akon talinga
agod makapamati ako sa ginatukdo niya.
Gin-abrihan an akon talinga san Ginoong Dios
kag dili ako nag-ato, dili ako nagtalikod.
Ginhatag ko an akon likod sa mga parabunal,
an akon pisngi sa mga nagbugnot san akon barbas;
dili ko gintahuban an akon bayhon

Domingo de Ramos san Pasyon san Ginoo Page 5

 sa mga insulto kag mga luda.
Ginabuligan ako san Ginoong Dios,
kaya dili ako nasasakitan,
kaya nagatuas an akon bayhon sugad san bato,
kag aram ko na dili ako maa-aluhan.
Surmaton san Ginoo.

Salmo Responsorio Sal 22:8-9.17-18.19-20.23-24

R: Dios ko, Dios ko, nano kay ginpabayaan mo ako?

An tanan na nakakita sa akon ginatuyâ ako.

ginatiwi ninda an nguso, ginapiling-piling an ulo.
Ginhatag niya an iya sadiri sa Ginoo; sa iya siya idulag!
Aagawon niya siya, kay naiilaan siya san Ginoo.
R: Dios ko, Dios ko, nano kay ginpabayaan mo ako?

Ginpatalibudan ako sin mga ido;

usad na pundok san mga maraot nagtiripon sa akon.
Linuho ninda an akon mga kamot kag tiil;
mabibilang ko an tanan ko na mga tul-ang.
R: Dios ko, Dios ko, nano kay ginpabayaan mo ako?

Ginbarahin ninda an akon kayamitan

Kag an akon bado ginripahan
Pero ikaw Ginoo, ayaw pagharayo!
O akon kusog, magdali ka san pagbulig sa akon.
R: Dios ko, Dios ko, nano kay ginpabayaan mo ako?

Ibabalangibog ko an imo ngaran sa akon kaigmanghudan;

sa tunga san pagtiripon oomawon ko ikaw:
kamo na may pagkahadlok sa Ginoo, omawa siya!
O tanan na kaanakan ni Jacob, ibantog siya!

Domingo de Ramos san Pasyon san Ginoo Page 6

Galangan niyo siya, tanan na kaanakan san Israel!
R: Dios ko, Dios ko, nano kay ginpabayaan mo ako?

Komentarista: An glorya ni Jesus nagahale sa bilog na

pagwagwag san sadiri. An iya pagsakit kag
pagkamatay amo an iya kadayawan.

Pagbasa II Fil. 2:6-11

Pagbasa sa surat ni apostol Pablo sa mga taga Filipos
Si Kristo, apesar san iya pagka-Dios,
dili ginbale an iya sadiri na dapat maghuyot
san iya pagkapareho sa Dios.
Pero gin-ubos pagwagwag an iya sadiri
kag gin-ako an pagka-uripon,
kag nagin kapareho san mga tawo;
nagpakita sa tanan na bagay bilang tawo,
mas nagpakumbaba pa gayod,
nagin masinunod hasta sa kamatayon,
kag sa kamatayon sa krus.
Kag tungod sani, ginpahitaas gayod siya san Dios,
kag ginhatagan siya sin ngaran
na labaw sa tanan na iba na ngaran;
agod an tanan na bagay
sa kalangitan, sa duta kag sa ubos san duta,
iluhod an tuhod sa ngaran ni Jesus
kag an tanan na dila ibalangibog si Jesukristo na Ginoo,
para sa glorya san Dios Ama.
Surmaton san Ginoo.

Aklamasyon Fil 2:8-9

R. Omawon ka, Ginoong Jesukristo, Hade san wara'n katapusan na
glorya! V. Para sa aton si Kristo nagin masinunod hasta sa kamatayon,

Domingo de Ramos san Pasyon san Ginoo Page 7

hasta sa kamatayon sa krus. Tungod sani, ginpahitaas gayod siya san
Dios kag ginhatagan siya sin ngaran na labaw sa tanan na iba na ngaran.
R. Omawon ka, Ginoong Jesukristo, hade san wara'n katapusan na
glorya!

Ebanghelyo Mc.14:1-15:47

An Pasyon san aton Ginoong Jesukristo susog kan Marcos

Glorya sa imo, Ginoo.
J = Jesus * I = Nagaistorya * S = Nagasurmaton

I. Duha ka adlaw antes san Paskwa kag san kapiestahan san Tinapay na
Wara’n Lebadura, naghanap an mga puno na padi kag mga eskriba
sin paagi na lipaton si Jesus para maarestar siya kag ipapatay.
Nagsabi sinda:
S. “Dili dapat sa adlaw san kapiestahan agod wara’n mangyari na kasamukan
sa mga tawo.”
I. Nasa Betania si Jesus sa balay ni Simon na dati leprusuhon. San siya
nasa may lamesa, nag-abot an usad na babaye na may dara na
surudlan na alabastro na puno sin mahal na pahumot na himo hale sa
tunay na nardo. Binuong niya an surudlan kag ginbubo an pahumot
sa ulo ni Jesus. May nagkapira didto na nagkaururit kag nagpasarabi-
sabi:
S. ”Nano kay ginsayang lang an pahumot? Pwede ibaligya ini na pahumot sin
sobra pa sa tresyentos na denaryo, kag ihatag an kwarta sa mga pobre?”
I. Kag nagkaururit sinda sa iya. Nagsabi si Jesus:
J. “Pabay-i lang siya. Nano kay ginapaki-araman niyo siya.
Nagtuman siya sin maayo na himo sa akon. Kaupod pirme
niyo an mga pobre kag pwede niyo sinda himu-an sin maayo
maski san-o na gusto niyo, pero dili niyo ako pirme kaupod.
Ginhimo niya an iya makakaya; ginlahidan na niya sin pahumot
an akon lawas antes ini ilubong. Sa kamatuodan ginasabi ko
sa iyo na maski diin sa bilog na kinab-an na ipahayag an

Domingo de Ramos san Pasyon san Ginoo Page 8

 ebanghelyo an iya ginhimo iga-istorya man na may
pagdumdom sa iya.”
I. Si Judas Iscariote, usad san Dose, nagpakadto sa mga puno na padi
agod ipadakop ninda si Jesus. Pakabati sa iya, nagkarilipay sinda kag
gintugaan ninda siya na hahatagan sin kwarta. Kag naghanap siya san
tama na panahon agod ipadakop siya. Sa una na adlaw san
kapiestahan san Tinapay na Wara’n Lebadura, kun san-o ginahalad an
kordero san Paskwa, nagsabi sa iya an iya mga disipulos:
S. “Diin mo gusto na magpakadto kami para mag-andam agod makakaon ka
san Paskwa?”
I. Ginsugo niya an duha san iya mga disipulos na an sabi:
J. “Kumadto kamo sa siudad kag didto may masusugat kamo na
usad na lalake na may dara na tubig sa tibod; sunuda niyo siya
kag sabihan niyo didto an tag-iya san balay na susuludan niya:
Nagsabi an Maestro: Hain an akon kwarto na kakaunan ko
san Paskwa kaupod an akon mga disipulos? Ipapakita niya sa
iyo an usad na dako na kwarto sa itaas na sangkap sin mga
kagamitan kag nakahanda na an tanan; maghanda kamo didto
para sa aton.”
I. Lumakat an mga disipulos, kag pagsulod ninda sa siudad, nakit-an
ninda sugad san ginsabi sa inda, kag nagpreparar sinda para sa
Paskwa. Pagkahapon, nag-abot siya kaupod an Dose. Kag san sinda
nasa lamesa kag nagakaraon, nagsabi si Jesus:
J. “Sa kamatuodan ginasabi ko sa iyo, tatrayduran ako san usad
sa iyo, na nagakaon kaupod ko.”
I. Nagtuna sinda na magmundo, kag nagpasarabi –sabi:
S. “Ako ba?”
I. Kag ginsabihan niya sinda:
J. “Siya usad sa Dose na magadutdot sa plato kaupod ko.
Magataliwan an Anak san tawo, sugad san nakasurat
mapadapit sa iya, pero kamakaluluoy man sana na tawo na

Domingo de Ramos san Pasyon san Ginoo Page 9

 matraydor san Anak san Tawo! Mas maayo pa sana na tawo
kun wara na lang siya ig-anak?”
I. Pagkaraon ninda, kinuha niya an tinapay, kag pakapasa-lamat,
pinihak ini kag hinatag sa inda na an sabi:
J. “Kuhaa niyo, ini an akon lawas.”
I. Pakatapos, kinuha niya an kalis kag nagpasalamat, ginhatag ini sa
inda, kag nag-irinom sinda tanan didi. Kag nagsabi siya:
J. Ini an akon dugo, dugo san pakigsumpaan, na ginpabulos para
sa kadamuan. Sa kamatuodan ginasabihan ko kamo, dili na
ako magainom san bunga san ubas hasta sa adlaw na paga-
inumon ko ini na bag-o sa kahadi-an san Dios.”
I. Pakakanta san salmo, lumuwas sinda pakadto sa bukid san mga Olibo.
Ginsabihan sinda ni Jesus:
J. “Kamo tanan, mangluluya an iyo buot, kay nakasurat:
Papatamaan ko an pastor kag magaburulag an mga karnero.
Pero sa akon pagkabuhay gihapon, maga-una ako sa iyo sa
Galilea.”
I. Kag sinabihan siya ni Pedro:
S. “Maski mangluya an buot san tanan, dili gayod ako.”
I. Ginsabihan siya ni Jesus:
J. “Sa kamatuodan ginasabihan ko ikaw: yana, sani mismo na
gab-i, antes magturaok an manok, ninegaran mo ako sin tulo
ka beses.”
I. Pero nangusog gayod siya pagsabi:
S. “Kun kinahanglan gayod na mamatay ako kaupod mo, dili ko ikaw ninegaran.”
I. Sugad man an ginsabi san tanan. Nag-abot sinda sa usad na hardin na
ginatawag Getsemane, kag ginsabihan niya an iya mga disipulos:
J. "Mag-iringkod kamo didi mientras ako maga-pangadye."
I. Inupod niya sinda Pedro, Santiago kag Juan, kag nagtuna si Jesus
pagbatyag sin grabe na kahadlok kag kaguol. Ginsabihan sinda ni
Jesus:

Domingo de Ramos san Pasyon san Ginoo Page 10

J. "An akon kalag mamamatay sa kamundo. Maghulat kamo didi
kag magbantay."
I. Pakatapos, nagpauru-unhan siya, naghapa sa duta kag nagpangadye
na kun pwede palihison sa iya ini na oras. Kag nagsabi siya:
J. “Abba, Ama! Mahihimo mo an tanan, ipaharayo ini na kalis sa
akon! Pero mangyari lugod ini dili sa kagustuhan ko, kundi sa
kagustuhan mo."
I. Pagbalik niya, naabtan niya sinda na turog kag ginsabihan niya si
Pedro:
J. "Simon, turog ka ba? Dili ka ba makabantay sin maski usad
lang na oras. Magbantay kamo kag magpangadye agod dili
makasulod sa sugot; desidido an espirito, pero an lawas
maluya."
I. Nagpaharayo gihapon siya kag nagpangadye na ginasabi an pareho na
mga surmaton. Pagbalik, naabtan niya sinda na turog, kay nagbug-at
kaayo an inda mga mata sa kapiraw, kag dili ninda aram kun nano an
isasabat sa inda. Nagbalik siya sa ika tulo na beses kag ginsabihan
sinda:
J. "Mangaturog na kamo kag magdeskanso! Tama na, nag-abot
na an oras: Kitaa, an Anak san Tawo ipapadakop sa mga
kamot san mga parakasala. Buhat kamo, hamos na kita! Kitaa,
halapit na an tawo na matraydor sa akon."
I. Kag insigida, mientras nagasurmaton pa siya, nag-abot si Judas, usad
san Dose, kag kaupod niya an damo na tawo na may mga espada kag
mga baston na ginsugo san mga puno na padi, mga eskriba kag mga
namumuno san lungsod. An nagtraydor sa iya naghatag sa inda sani
na senyas na an sabi:
S. "An hahadukan ko, amo ina sya; dakupa niyo siya kag daraha niyo na
gwardiado sin maayo."
I. Naghalapit siya kag nagsabi:
S. "Rabbi."

Domingo de Ramos san Pasyon san Ginoo Page 11

I. Kag hinadukan niya siya. Kinaputan dayon ninda siya kag inarestar.
Usad sa mga miron, pakahugot san espada, tinigbas an suruguon san
puno na padi kag pinalong an iya talinga. Ginsabihan sinda ni Jesus:
J. "Tulisan ba ako na dapat kamo magluwas para dakupon ako
na may mga espada kag baston? Uru-adlaw nasa tunga niyo
ako para magtukdo sa templo, kag dili niyo ako inarestar. Pero
ini para matuman an mga Kasuratan."
I. Binarayaan siya ninda kag nagdurulag sinda tanan. May usad na
batan-on na nagsunod sa iya, nakakuruhob lang sin habol. Dinakop
niya sinda, pero binayaan niya an habol na amo an nakaptan lang
ninda kag dumulag siya na huba. Gindara ninda si Jesus sa puno na
padi, kag didto nagkatiripon an tanan na puno san kapadi-an, mga
namumuno san lungsod kag mga eskriba. Nagsunod sa iya si Pedro sa
harayo hasta sa sulod san patyo san puno na padi, kag umingkod siya
kaupod an mga suruguon kag nagpainit sa may kalayo. An mga puno
san kapadi-an kag an bilog na Sanhedrin naghanap sin testigo kontra
kan Jesus para ipapatay siya, pero wara sinda sin nakit-an. Damo an
nagtestigo sin buwa kontra sa iya, kaya an inda mga ginsarabi dili
nagkauruyon. Pero may nagkapira na nagtindog sa pagtestigo kontra
sa iya, na an sabi:
S. "Nabati-an namon siya na nagsabi: Rurubaon ko ini na templo na himo san
mga kamot san tawo kag sa sulod sin tulo ka adlaw matindog ako sin usad
na dili himo san mga kamot san tawo."
I. Pero maski didi sani dili nagkauruyon an inda ginsarabi. Tumindog
an puno na padi sa tunga san katiripunan kag ginhunga si Jesus, na an
sabi:
S. "Wara ka ba sin isasabat sani? Nano an ginasabi ninda kontra sa imo?'
I. Pero nagpuyo siya kag wara magsabat. Ginhunga gihapon siya san
puno na padi, kag ginsabihan siya:
S. "Ikaw ba an Kristo, an Anak san Paladan?"
I. Nagsabat si Jesus:

Domingo de Ramos san Pasyon san Ginoo Page 12

J. "Ako!" Kag makikita niyo an Anak san tawo na naga-ingkod sa
tuo na kamot san Gahom, kag nagapakadi sa mga dampog sa
langit."
I. Ginisi san puno na padi an iya mga bado kag nagsabi:
S. "Kinahanglan pa ba naton sin mga testigos? Nabati-an niyo an pagbasang-
basang sa Dios; nano sa paghuna niyo?"
I. Ginsentensyahan siya san tanan na dapat siya patayon. Nagtuna an
nagkapira na ludaan siya, tahuban an iya bayhon kag sampadungon,
pakatapos sabihan:
S. "Tigmaha daw."
I. Binalbag siya san mga suruguon. Mientras si Pedro nasa patyo sa
ubos, nag-abot an usad na suruguon na babaye san puno na padi kag
pakakita kan Pedro na nagapainit, kinita siya kag ginsabihan:
S. "Kaupod ka man ni Jesus, an tawo na taga Nazaret."
I. Pero nagnegar siya:
S. " Dili ko aram kag dili ko nasasabutan an gusto mo sabihon."
I. Lumuwas siya sa patyo kag nagturaok an manok. An babaye na
suruguon, pakakita sa iya, nagtuna naman pagsabi sa mga miron:
S. "Usad sa inda ini na tawo."
I. Pero nagnegar gihapon siya. Taud-taod nagsabi gihapon an mga
miron kan Pedro,
S. "Usad ka man gayod sa inda, kay taga Galilea ka."
I. Kag nagtuna siya pagmaldisyon kag pagsumpa.
S. "Dili ko kilala ina na tawo na ginasabi niyo."
I. Sa ikaduha na beses nagturaok an manok. Nadumduman ni Pedro an
surmaton na ginsabi sa iya ni Jesus: Antes magturaok an manok sin
duha na beses, ninegaran mo ako sin tulo na beses. Kag dili niya
napugulan na tumangis. Pagkaaga, an mga puno na padi kaupod an
mga namumuno san lungsod, mga eskriba kag an entiro na Sanhedrin
nagtiripon kag nagkauruyon kun nano an himuon. Pinagapos ninda si

Domingo de Ramos san Pasyon san Ginoo Page 13

 Jesus kag ginpasunod siya kag dinara kan Pilato. Ginhunga siya ni
Pilato.
S. "Ikaw ba an hadi san mga Judiyo?'
I. Kag nagsabat siya:
J. "Ikaw an nagasabi sani."
I. Ginhimu-himuan siya sin damo na akusasyon san mga puno san
kapadi-an. Ginhunga gihapon siya ni Pilato,
S. "Wara ka ba sin isasabat sani? Kitaa, damo an akusasyon ninda sa imo!"
I. Pero wara na magsabat si Jesus, ano pa nangawa si Pilato. Para sa
kapiestahan, nakaugali-an niya na magpaluwas sin usad na priso na
inda ayuon. May usad na tawo na ginatawag Barabas na nasa
prisuhan kaupod an mga rebelde; siya nakapatay san magkaigwa sin
karibukan. Pagsarakat san mga tawo, nagtuna sinda pag-ayo san
pirme ginahatag niya sa inda. Ginsabat sinda ni Pilato:
S. "Gusto ba niyo na buhi-an ko sa iyo an hadi san mga Judiyo?"
I. Aram niya na gindara siya san mga puno na padi sa iya tungod sa
pagkaawa. Pero ginsulsulan san mga puno na padi an mga tawo agod
buhi-an niya sa inda si Barabas. Nagsabat si Pilato:
S. "Nano man an hihimuon ko sa iya na ginatawag niyo na hadi san mga
Judiyo?"
I. Nagsiriyak sinda:
S. "Ipako siya sa krus!"
I. Pero nagsabi sa inda si Pilato:
S. "Nano an ginhimo niya na maraot?"
I. Kag nagsiriyak sinda sin mas makusog:
S. "Ipako siya sa krus!"
I. Kay gusto pa-unrahan ni Pilato an mga tawo, binuhi-an sa inda si
Barabas, kag pakapabunali sa iya, hinatag siya sa inda agod ipako
siya sa krus. Ginpasunod siya san mga soldados sa Pretoryo na nasa
sulod san palasyo, kag gintiripon ninda an entiro na batalyon.

Domingo de Ramos san Pasyon san Ginoo Page 14

 Binadu-an ninda siya sin pula, kag pakabiribid sin katunukan na
magin kuruna, binutang ini sa iya ulo. Nagtuna sinda sa pagsaludar
sa iya:
S. "Mabuhay an hadi san mga Judiyo!"
I. Kag ginparapalô ninda an iya ulo sin tukod, ginparaluda-an siya,
ginluhud-luhudan sa pagsamba sa iya. Paka-entremis sa iya, hinuba sa
iya an pula na bado kag ginsul-ot an dati niya na bado, pakatapos,
ginpasunod ninda siya paluwas agod ipako siya sa krus. Ginpirit
ninda an usad na naga-agi na hali sa uma, si Simon na taga Cirene, na
amo an ama ni Alejandro kag Rufo, agod pas-anon an iya krus.
Pakatapos, ginpasunod ninda si Jesus sa lugar na ginatawag na
Golgota, na an gusto sabihon lugar san mga bungo, kag ginduhulan
ninda siya sin bino na ginsakutan sin mira, pero naghabo siya. Kag
ginpako ninda siya sa krus, kag ginbarahin-bahin an iya mga yamit,
kag ginripa ninda ini agod maarman kun nano an makukuha san kada
usad. Ika tulo na oras san ginpako ninda siya sa krus. An nakasurat
na akusasyon sa iya nagasabi: An hadi san mga Judiyo. May duha
man na kawatan na ginpako sa krus kaupod niya, usad sa iya tuo kag
usad sa iya wala. Gin-insulto siya san mga nagalabay kag nagsabi na
nagapiling-piling an mga ulo:
S. "Aha! Ruruba-on mo ngay-an an Templo kag ititindog mo ini sa sulod sin tulo
ka adlaw! Aber, iligtas daw an imo sadiri; lumusad ka dida sa krus!"
I. Sugad man, ginpara-insulto siya san mga puno na padi kag mga
eskriba na an sabi:
S. "Ginsalbar niya an iba, pero dili niya kaya salbaron an iya sadiri! Kitaon ta
daw kun maglusad man gayod yana sa krus an Kristo na hade san Israel,
agod makita namon ini kag magtuod kami."
I. Kag ginpara-insulto man siya san mga kaupod niya na nakapako sa
krus. Pag-abot san ika unom na oras, nagdulom an bilog na duta hasta
sa ika siyam na oras. Sa ika siyam na oras sumiyak si Jesus sa
makusog na boses,
J. "Eloi, eloi, lama sabachtani?"
I. Na an gusto sabihon:

Domingo de Ramos san Pasyon san Ginoo Page 15

J. "Dios ko, Dios ko, nano kay ginpabayaan mo ako.?"
I. Nagkapira san mga miron, pakabati sani, nagsabi:
S. "Kitaa, ginatawag niya si Elias!"
I. Dumalagan an usad agod idutdot an espungha sa suka, kag pakabutang
sa usad na tukod, gintunol sa iya agod inumon, na an sabi:
S. "Hulat anay, kitaon ta kun magpakadi si Elias para hali-on siya sa krus."
I. Pero si Jesus sumiyak sin makusog kag nabugtu-an sin gininhawa.
An belo san Santuaryo natunga paggisi tuna sa taas paubos. An
senturyon na nagatindog sa atubangan niya, pakakita na sugad an
pakabugto san iya gininhawa, nagsabi:
S. "Matuod man gayod na Anak san Dios ini na tawo."
I. May nagkapira man na mga babaye na nagamarasid sa harayo.
Kaupod ninda si Maria na taga Magdala, si Maria na iloy ni Santiago
na mas batan-on kag ni Joset, kag si Salome. Nagsunod sinda sa iya
kag nagsirbe sa iya san nasa Galilea pa siya, kag damo man na iba na
babaye an nagsagka sa Jerusalem kaupod niya. Pagkahapon, tungod
kay Adlaw san Preparasyon—na an gusto sabihon, bisperas san
Sabbath—nag-abot si Jose na taga Arimatea, usad na ginahangad na
miembro san Sanhedrin, mismo siya nagahulat san kahadi-an san
Dios, kag maisog na nagpakadto siya kan Pilato agod ayuon an
bangkay ni Jesus. Nangawa si Pilato na namatay siya dayon, kag
pakatawag san senturyon, ginhunga kun dugay na siya namatay.
Pakaarami niya sa senturyon, ginhatag niya an bangkay kan Jose.
Pakabakal sin habol, linusad niya siya sa krus, kag pakaputos sa habol
linubong ini sa usad na rulubngan na gintigib sa bato. Pakatapos
ginpaligidan niya sin dako na bato sa pwertahan san rulubngan.
Ginmasdan ni Maria na taga Magdala kag ni Maria na iloy ni Joset
kun diin siya ginlubong.

A n Ebanghelyo san Ginoo.

R. Pag-omaw sa imo, O Kristo.

Homiliya

Domingo de Ramos san Pasyon san Ginoo Page 16

Ginapahayag an Nagatuod ako
Pangamuyo san lungsod:

S a pagsulod ni Jesus sa Jerusalem, ginsugat siya san mga tawo

na baga’n Hade kag Mesiyas. Ayuon ta an grasya na magsunod sa
iya hasta sa krus, agod makabahin man kita san iya pagkabuhay gihapon.
GINOO PAMATI-A AN AMON PANGAMUYO
o kaya:
GINOO, KALUY-I AN MGA KATAWUHAN MO.
.

1. An bilog na Simbahan, na nagaprusisyon niyan na may dara na

ramos, na sa paglakaton niya didi sa duta na puno sin kasakitan,
mag-isip pirme na sa urhi si Kristo an manggagana sa tanan. Mag-
ampo kita.
2. An mga ginhatagan sin katungdan sa pag-ataman san panglawas
na kaayuhan san tanan, na dili magtiwala sa sadiri na kusog, kundi
magbantay kag magpangadye agod dili mahulog sa sugot. Mag-
ampo kita.
3. An mga nalulubong sa kasal-an, kasakitan kag kawara’n paglaom,
na makaabot man sa inda an kaligtasan na hinimo ni Jesus para sa
tanan paagi san iya pag-ako san aton pagkatawo. Mag-ampo kita.
4. An mga nagatalinguha na mabuhay kag mangabuhay susog sa
inda pagsunod kan Kristo, na mahatagan sin bag-o’n kusog sa
pagsugat sa tanan na sugot san buhay na amo an dalan pakadto sa
pagkabuhay gihapon. Mag-ampo kita.

S a amon pag-upod sa iya kamatayon, pasunuda an amon isip sa

iya kamatuodan, pakusuga an amon buhay sa halimbawa san

Domingo de Ramos san Pasyon san Ginoo Page 17

iya pagkamatay, agod makabahin kami san kahadi-an na imo
gintuga, sa panahon na wara’n katapusan. R. Amen.

Domingo de Ramos san Pasyon san Ginoo Page 18