Juan Sebastian Elkano Getarian jaio zen 1476an eta eskorbutoak jota
itsasontzi batean hil zen 1526. urtean. Munduari bira osoa eman zion lehenbiziko espedizioan parte hartu zuen, azkenengo partea berak gidatuz.
Gaztetan arrantzale izan zen eta kontrabando-merkataritza bidaiak ere egin
zituen; Aljerren aurkako espedizioan eta Italiako konpainietan ere ibili zen. Hogeita hiru urterekin Fernando de Magallanesek Moluka uharteetara antolatutako espedizioan parte hartu zuen; portugaldarrek “espezieen uharteetara” iristeko erabiltzen ez zuten bide berri bat irekitzea zen helburua (ikusi Tordesillaseko Ituna). Cadizetik atera zen bost ontziko espedizioan 1519an, Elkano “Concepción” ontziko maisu zela. Atlantiko Ozeanotik, Ozeano Barera heldu ziren, Magallanes itsasartea deitzen duguna zeharkatuz. Filipinara bi ontzi besterik ez zen iritsi eta Sanlucar de Barramedatik ateratako eskifaiako gehienak gaixorik hil ziren. Macta uharteko erasoan Magallanes hil zuten eta Elkanok Victoria ontziko eta espedizio osoko agintea hartu zuen. Moluka uharteetara zuzendu ziren ondoren; han ontzi bat desegin zen. Hala ere, geratzen zen ontzi bakarra espeziez zamatu eta itzulera-bidaia antolatu zuten.
Hiru urte behar izan zituzten Sanlucar de Barramedara, Cadiz, itzultzeko
(1522). Iristean, 265 marineletik 18 bakarrik ziren. Karlos V.a erregeak Elkano Valladoliden hartu zuen, eta bere armarrian irudi bat ezartzeko baimena eman zion, honako esaldi hau zuela: “Primus circumdedisti me”, munduari bira osoa eman zion lehen ontziburu zen seinale. Lurrari bira osoa eman zion, hala, gure planetaren biribiltasuna frogatuz. Handik hiru urtera beste bidaia batean sartu, eta eskorbutoak jota itsasoan hil zen.