Tama lamang na sa buwan ng Hunyo nagsisimula ang klase sa Pilipinas.p
Hindi magandang ideya na gayahin ang ibang bansa pagdating sa kung anong buwan dapat nagsisimula ang pasukan. Nakabatay dapat sa klima o nakatakdang panahon ang tamang desisyon kung kailan nga ba dapat pumasok ang mga mag-aaral. Batay naman sa DepEd chief na si Secretary Armin Luistro, nakabubuti lamang sa iilang rehiyon o parte ng bansa katulad ng NCR ang nasabing paglilipat ng buwan kung kailan magsisimula ang klase. Kung tutuusin, maaaring hindi maganda ang idulot o di kaya’y walang mapakinabangan ang karamihan sa populasyon ng iba’t ibang rehiyon sa mungkahing iyon. Ayon din kay Sec. Luistro, sinubukan na noon ng DepEd (1970s) na ilipat ang simula ng klase sa Setyembre ngunit hindi ito umubra dahil sa parehong katwiran o dahilan. Makikita rin natin na maraming “holidays” tuwing bakasyon. Nakasanayan na, na tuwing Mahal na Araw ay nagpapahinga ang mga estudyante at hindi pumapasok sa paaralan. Ang pagkakaroon ng pasok sa buwan ng Abril at Mayo ay hindi makatarungan sapagkat ang panahon ng tag-init ay hindi tamang oras para mag-aral ang mga estudyante. Hindi sila makakapagpokus sa kanilang gawain. Tatamarin silang mag-aral dahil sa sobrang init ng panahon. Pati ang mga guro ay hindi gaganahan na magturo. Hindi na dapat ilipat pa sa buwan ng Setyembre ang simula ng pasukan sapagkat alalahanin natin na ang mga buwan na nakaatay para sa bakasyon ay nakasanayan na at praktikal para maglaro at magsaya ang mga bata. Hindi naman natin gugustuhin na nakatunganga lamang sila at walang ginagawa sa panahon ng tag-ulan. Dapat na bigyan ng sapat na panahon ang mga mag-aaral na magbakasyon at magliwaliw pagkatapos ng taon na kanilang pinaghirapan para sa pag-aaral. Ngunit, dahil sa patuloy na pagbabago-bago ng panahon. Hindi na katulad ng nakasanayan natin ang nangyayari. Ang pinakamabuting gawin ay paghandaan ang bawat panahon. Hindi masama ang pagbabago o paglilipat ng buwan ng pagpasok; dapat lamang natin isaalang-ala kung nakabubuti ba o nakakasama ang panahon ng araw na iyon. Ang pinakaimportante ay natututo ang bawat mag-aaral nang masaya at maginhawa.