Isua leh Nikodema intawnna (Johana 3:1-8) Gospel Vanlalrinchhana

He bungah hian Isua thusawi pawimawh ber chu Piantharna neih a tul zia min hriattir a ni. He an
inhmuhna hmun hi Jerusalem a ni a, Isua chu Kalhlen ku-ah a tel a, mi tam tak chuan a thil mak tih te
an hmu a, Amah chu an ring tlat a ni (2:23). Temple-ah te ziritirna a pe thin a, Nikodema pawhin a
zirtirna leh a thil mak tih te chu a hmu thin a ni.

1. Pharisai Nikodema
Pharisaite chu sakhaw lama inhmang tak pawl, mi 6,000 aia tam ngai lo, Lehkhaziaktute leh
Israel Dân zirtîrtute’n an hrilhfiah angin dân chipchiar zawng zawng zawm tûra inpe an ni. Pharisaite tan
chuan Mosia Bible bu hmasa pangaa thupek a siam ang kha zawm chu a tawk mai lo. Thupek tin te chu
chiang taka sawifiah leh dan anga siam an duh a ni. Nikodema hi Pharisai a ni mai lo a, Juda te rorelna,
Sanhedrin dintu member sawmsarih zinga mi a ni bawk. Sanhedrin chu Judate rorelna sang ber
(Supreme Court) a ni a, khawvela Juda mi zawng zawng chungah thuneihna a nei a ni. Judate zirtirtu a
ni a, Isua chuan tu nge a nih a hria a, Juda mi tinte pawhin an hre vek a ni.

2. Eng vangin nge zanah a kher kal?

i) Chhun lamah Isua chu mipuiin an bawr luai luai thin a, nitina a hnena lo kal te mamawh a ngaihsak
zia te a hmu a, midangin an chim buai loh laia Isua nêna hun ṭha neih a duh a ni thei.
ii) Nikodema ang mi hian chhun lamah mawhphurhna tam tak an nei a, a thlarau nuna zawhnate chhanna
zawng turin hun a nei tlem hle a, chuvangin a hnathawh ni a zawh veleh Isua chu a zawng chhuak ta a
ni.
iii) Nikodema hian Juda te roreltu upa dang te dodâlna leh nuihzat a duh lo tih hi a ni. Midang te hmuh
loh nan zanah a lo kal a, Pathian Biakin hung chhunga Isua’n a zirtir laia a che vel zawng zawng chu a
en reng a ni. Nikodema chuan puithiam te leh Sanhedrin ten Isua an huat zia leh thik zia chu a hriat vang
a ni.

Nikodema zanah a lo kal chhan chu eng pawh ni se, a thinlungah thil eng nge maw a awm tih a chiang
hle. Isua chuan a neih loh thil a nei a. A thinlunga zawhna chhan loh tam tak neih chuan Isua’n a
chhanna a neih tih a ring a ni. Nikodema chuan Pathian nihna chu Isua hnenah a awm tih a hmu a, Isua
chu Pathian a ni tih a hmu chiang a ni (3:2).

3. I piangthar tur a ni (tuiah leh thlarauah)

i) Tui tih hi nu pum chhunga thla 9 chhung kan awm hnu a, taksa pianna sawina a ni a. Hei hi a ngial a
ngana, zir bing mi (Scholar) thenkhat hrilhfiahna a ni.
ii) Tui hi Pathian thu chhinchhiahna tih a ni a, Ephesi 5:26 “Anni chu tuia sila thu chuan ti faiin a
tihthianghlim theih nan”.
iii) Tui hi Krista lam kan hawi huna kan nunah thlaraua tih thianghlimna leh siam thar lehna entirna tih a
ni.
iv) Tui hi simna entirna tih a ni a, thenkhat chuan Isua sawi tum chu Baptisma a nih an ring a; Baptisma
channa hian kan thinlung chhungril lama nun inthlakthlengna lantirna a ni. Tin, hemi hun lai hian
Baptistu Johana khan simna Baptisma thu a la tlangaupui a ni.

Mi tu pawh, Juda mi ni lo, Juda sakhua zawm duh (saphun) te chu tuia hnim pila a seng luh an ni thin a,
Jentail an nih anga an bawlhhlawhna tlen faina turin tuiah an inhnim pil thin a ni. Isua’n chang 3-ah
Pathian atanga piantharna an neih loh chuan Pathian ram an hmuh theih loh tur thu a sawi a, Nikodema
hian a hriatthiam loh avangin, a hriatthiam theihna turin chang 5-ah chiang zawkin a hrilh ta a ni.

Tawpna
He an inbiaknaa kan tana pawimawh lai ber chu Piantharna chungchang hi a ni a, Nikodema ang
hian Kohhranah nihna pawimawh tak tak te pawh kan lo chelhin, kan hahin kan lo thawh hlawk viau
pawh a ni mai thei. Heng kan nihna te hian Pathian ramah min hruai thleng ngawt dawn lo a, Lal Isua’n
Nikodema hnena a sawi “I piangthar tur a ni” tih hi i hre thar leh theuh ang u.