9.

E nab’e qati’t qamam

Are ri qatz’aq Uk’u’x Kaj
Uk’u’x Ulew
Ri xkichomaj uwinaqirik nab’e qachuch
Kachi’l ri nab’e qamam.
Tzij wi chi sib’alaj je’lik kika’yib’al.
Nim ajno’jib’al
Nim keta’mab’al are chi’ xewinaqirik.
Ruk’ ri qanan pa kik’aslemal
Ri qatat tz’aqat kib’antajik xkina’o
Nim ki’kotemal xkina’o

Are wa kib’i.
Kaja paluna uk’ulaj B’alam Kitze’
Chomija’ are uk’ulaj B’alam Aq’ab’
Tz’ununija’ ub’i uk’ulaj Majuk’utaj
Kak’ixaja’ uk’ulaj ri IQ’ B’alam.
Are wa’ qati’t qamam,

Xkiya’ k’aslem ruk’ kalk’wa’l

Jalajoj tinamit xek’iyik, chi uwachulew.
Qas xaq xuw kitzij xkikojo
Chech uwinaqirik ri Qanan Ulew

- ¡Chaqab’ana le Ulew! Xecha’.

Qanan Ulew chi upam taq ja’ xel uloq-
 Xkijach kib’ ri ja’.
Pacha’ mayul,
Pacha’ sutz’ uwinaqirik Ulew!
Xewinaqir juyub’
Xewinaqir taq’aj,
Xek’iy nima’q taq k’ich’elaj,
Jalajoj taq uwach k’iche’laj!.
Ri ja’, ri nima’q ja’
Pa paqalem pa xulinem,
Xkiriq ri kib’e
Ruk’ ki’kotemal xkichaple’j b’inem,
Xik’anik!
Ri Ajtz’aq, ri Ajb’it xkib’ij
¡Je’lik! Umajib’al ri qab’it