LAAITUI EBC PAWLPI PHUT

SIA ZA HAWNG (H/A) TANGTHU TOM

Pu Ral Hnok (သံ ကြိုးတံ တားအဆောက်အဦးနှ င့်ပရိဘောဂ) leh Pi Par Ciin te sung panin 10/4/1945 (Tue) ni-in
Matupi Myone, Sur khua ah suak hi. Suahpih laizom unau pasal 4 leh numei khat hi -in amah anih na a hi hi.
A sanggam te;
1. (U Lei Uk (J/K) + Daw Phun Hel
2. (U Za Hawng (H/A) + (Daw Ngun Bong) + (Daw Huai Zam)
3. U Sang Cin (H/M-BEPS) + Daw Ral Ding
4. U Ki Mang (Accountant G-II, DBK) + Daw Hlei Zing
5. Daw Ngun Zing (Sister, Kalay Hospital) + (U Ram Thang)

Zi leh ta neih na:

1968 kum in Nu Ngun Bang (Higth School final)tawh ki tengin Tanu nih nei uh hi. A tanu te innkuan :
1. Daw Par Hluan Zing @Ciin MawMaw, BA. + Peter Vungh Cin Thawng(Lailui), @Peter Thawng,
Myoma Tedim aa Peter Manzaih siapa tawh tapasal 2 leh Tanu 4 nei uh hi.
2. Daw Tial Vang Meng@MeMe + U Naing Win (Magwe) tawh kiteng in Tanu 3 nei uh hi.
Nu Ngun Bang in a nusiat ciangin 1974 kumin Nu Huai Zam Cing (Midwife)tawh kitengin tanu khat nei
hi. A tanu:
1. Daw Khin Htwe Oo@Htwe Oo, BA + U Thi Min (Aungchantar) tawh kiteng in tanu khatnei uh hi.

Sangkahna:
Matupi myo ah sang kahin lai hat mahmah ahih man in scholarship zong na ngah hi. 1962 kum in
Matupi panin Tan 10 ong a, tua kum in amah bek ong ahih manin Ygn ah H/A (Health Assistant) Tentan kah
pah thei hi.

Kumpi nasepna mun teng:

Yangon pan H/A Tintan aman ciangin Matupi myone Lailenpi khua RHC ah, Thantlang Myone
Cangtak khua RHC ah , Salen khua RHC ah, Mindat Myone Vuilong khua RHC ah, Tedim Myone Laaitui
khua RHC ah, Hakha Myone Dauchim khua RHC ah, Tedim Myone Suangzang khua RHC leh Dolluang
khua RHC ah, Kalaywa myone Aungchantar RHC cihte ah H/A sem kawikawi hi. Aungchantar RHC panin
kumcing penson la in tengsuak pah uh hi.

Pianthakna leh Pasian nasepna

 1975 kum in Mindat khua panin na piangthak hi. A pianthak ciangin Pasian a it mahmah na tawh
kizui in Mindat myone Vuilong khua ah a sep sungin zong kumsim in Lungdambawl la in pawlpi mite tawh
bawlkhawm den uh hi. Laaitui hong tun ciangin zong inn 4 tawh kipawl in EBC pawlpi phut uh hi. Pawlpi
mite lungdambawl bawlpih den hi. Kalaymyone Aungchantar atun ciangin zong pawlpi ah lungdambawl
bawlpih den hi.

Sia Za Hawng hong nusiatna

Aungchantar khua ah a sepsung 2002 kumin cidam takin kumcing Pension la hi. Pensioan alak
ciangin Aungchantar khua mah ah tengsuak in, 21/3/2017 kum in ih Biak Pasian kiang hong ciahsan hi. A zi
S/m Nu Zam in zong a tenna uh Aungchantar khua mah pan in 1998 kum in minsiat puamsiat na omlo in
kumcing pension la in 2015 kum in Ih Biak Pasian angliim hong zuat san hi.
Laaitui EBC Pawpi in Pawlphut khat ahihna phawkna leh amau innkuan phawkden nadingin pawlpi
ading leh khua leh tui ading a nasep nate tampi sung pan in ih ciapteh theih teng kaikhawm in ih suahsak ahi
hi. Hih laibu tawh Sia Za Hawng te innkuan pahtawina ih pia hi.

Sia Za Hawng tawh a kithuahden Tawngpi@Rev.Thang Za Khup in Siapa amuh na leh amah tawh a
kithuah khakna te.
1. Mindat Myone Vuilong khua panin 1980 kum April kha sungin Laaitui khua hong tung in 1986 kum
in Hakha Myone Dauchim khua ah piang kik uh hi.
2. Laaitui khua hong tun ciangin Tuiphum pawlpi ah kikhawm uh hi. A kikhop ciangin Upa te in
Sermon na leh Pianthakna tetti panna hun pia thei zel uh hi. Tua pen kei kumkhat leh alang sung
tangsuah ka hih man-a katheih ahi hi. Hehpihna hanga gupna a kingahna thu te a gengen ciangin a
nunung lam ciangin makai lam ten gupkhiatna thu sang theilo ahih manin hun pia nuam nawn lo uh
hi. Tua bangin pianthakna thu a kigen theihloh ciangin Sia Za Hawng in pianthakna thu nuamtak aa
gentheih nadingin Pawlpi khat aa ih din kul ding hi cih ngaihsun in Pu Khup Dal kiangah a gen leh
Pu Khup Dal in "bang kul ding a; ih sih teh hong vui ding ahi kei de" ci aa, Sia En in "ih sih teh
hongvui ding Pasian in hong pia peuhmah vak e" a kicih uh bel ka bil kha in ka za lai hi. Sia Za
Hawng pen Pawlpi khat-a dinding a-pulak masa in ka ngaihsun hi.
3. Cina avel ciang leh mi -inn ah natveh-a apai ciangin Pasian thu genpih masa in thunget na zong
neihpih tangtang hi. Lokuan ten lokuan na pan gen pih in, khualzin ten khualzin na ah agen dan mah
hi pah hi. Tua hun lai in muhpeuh tuahpeuh tungah Pianthak na thu bekbek mah ki nakgen mahmah
hi.
4. EBC Pawlpi a din uh ciangin EBC pawlpi sungpan asi masapen Pi Dah Zen Cing (En Tuang' nu) hi
in tua ki vui nading Namsau mai ah luang khamin si vuipa hi ci in ka ciamteh hi.
5. Nu Maw Maw gensa mah bangin Lungdambawl leh kumthak amau innkuan in la in vok go in kum 2,
kum 3 sung bang la in amau inn ah ki ne hi.
6. Veng naupang te hong zolna in nitak in Manglai leh Kawl lai zong tawmveivei sung hong sinpih in
Zato veng khangno te hong zol den hi. Tua khangno te Pianthakna thu genpih in EBC ah kikhoppih
hi.
7. Kei mahmah zong Piangthak te hua in ka pianthak ding lau aa hong ankhing kholh te ane nuamlo pa
nangawn hong ngah khia veve ahih manin Pasian mizat khat hi ci-in kaciam teh hi. Tua bek tham lo
tu ciangciang Pasian nasem khat ka hihna ama hong makaihna leh Pasian nasepna hi ci in kagen
behnuam hi. Ka pianthak khit asawt lo in Tedim ah hong paipih in Sia En Cin zawnin Tedim EBC
Pawlpi te muandeuhdeuh te kiang hong paipih in huhna ka ngen uh aa, ka ngah teng uh tawh pawlpi
Amplifier ding ka lei uh hi. Pawlpi neih masak pen hi pah hi.
8. Tua hun lai in Zato veng khangno teng ki thanop suah in kikhawm ngeingai in tu-nidong mah-in
Zato veng (Mualveng sungteng) pen EBC pawlpi inn leh minal atam penna vengkhat hong suakpah
hi. Tua hun lai-in Meiso pi te kizat hun lai ahih man-in a meipi bawl laitak khawng va lawn siatsak
khial mahleng hong tai het lo hi. Kikhopman ciangin ko Zato veng lam tam ka hih manun meipi
ciahpih in a tawi khawng kikhel in nuam ka sathei mahmah uh hi. Sia Za Hawng pen Meipi kem hi
liang hi.
9. 1983 kum April kha sungin Pawlpi khangno te tawh mi 10 kim, Phaiza khua ah Gospel ka pai uh hi.
Tua banah Tuitawh khua ah zong amau nupa leh Sia En te nupa makai in khangno pawlkhat tawh
Gospel ka pai theizel uh hi.
 10. Pasian phatna thupi asa khat ahih manin Luigal vengah Pu Suang Thang te inn Biakinn in akizat lai
in kalnih sung Solfa hong hilh hi.
11. 1984 EBC Gambup Si-huai zin do ding masiah zong Meeting tut tangtang zong aom lam tel keng.
Siahuanpa thuthu akimang hi ci -in thei ingh. Mipil mahmah khat leh khantohna adeih mahmah khat
hi ci-in ka ngaihsun hi. Tua tham lo in khawmpi sung adingin amau inn mah ah tangval pawl leh
nungak pawl ci in Action phuaih nih in hong khen in, a nupa un action hong sinpih ngeekngeek uh
hi. Tua hun sung-a hong niangtui bawl uh, ka niangtui nek teng uh zong kum khat sungin ane zolo
tam mahmah dingin ka um hi.
12. Hih khawmpi tungtang aa action lak Tangval Action te leh nungak Action piah te Sia Khawmpau in
hong pakta ahih manin ka group nih un Tedim ah hong sam in Sia Za Hawng mah makai in Tedim
EBC Pawlpi leh Leilum EBC Pawlpi ah Gospel ka pai ngeingai uh hi. Sia Za Hawng in Kawlpau in
thugen in U Suan Mung in kamphen aa tha kingah thei mahmah hi. Nuam kasa mahmah uh hi.

(Tangval action phuaih leh Nungak action phuaih teng Tedim ah Sia Khawmpau in man hong kizaih pih
hi)

13. Pastor leh Pawlpi sia ahih loh hangin EBC Pawlpi sungah Ama thuhilh hun tampen dingin ka um aa,
aman Kawl pau in thugen in U Suan Mung in eipau in kam phen hi. U Suan Mung in tel mahmah in
ka um hi.
14. Pawlpi in zin aki neih ciangin amau kiang kitung sakin Zato innlui tawh kopin Leilum khangno te
bang tawh ki thuah mahmah in amau inn aa omkhop khawng phawklai ingh. Cihnop na ah zindo
siam mahmah in mu ingh.
15. Thuman thutak upna laigil alen khat in mu ingh. Banghanghiam cihleh Amau tawh hong tungkhawm
ahi S/m Zamzadim te AG pawlpi ahih manin amau leh tangsuak pawlkhat te, Gospel hong pai ten
AG suah ding hong kunh mah leh-uh ut lo in EBC mah ah hong dinpih hi. S/m Zamzadim in
khangno pawlkhat AG pawi hong simpih kawikawi hangin Sia Za Hawng mah nungzuih ding ki ut
zaw in kimuang zaw ngiat hi. Tua pen KST lamlahna leh Pasian mizat khat ahihna ka pulakna ahi hi.
16. Topa thupha piak sum te zeeksiam na tawh 1985 kum in Jeep khat lei in Khua leh tui inzong kiphat
tuampih mahmah hi.
17. Pawlpi zong it mahmah ahih manin Pawlpi mi ding angah theih nading leh Pawlpi mi ahisa te akip
nadingin mi hehpih in apuan silhlai, bombi tenlai, a khedap bulhlai mah suahkhia in mi pia kawikawi
hi. A tanu Mawmaw genna ah ka mai ah khedap bulh lo-a pai ka muh teh pia lo in om thei keng ci
ngiat hi cihi. Tua bek hilo in annektawm haksate, mi cimawh te, a neihval hi peuhmah lo in pia khia
tangtang hi. Piakkhiat hat in, Cingh ngiat in, mi hehpihna lungsim zong nei ngiat hi. Hih thu te
ahuampi a ih genna bek hi a, angah, asangte in theihna tek gending hi leng kicing zaw leh ettehhuai
leh aciin huai tampi omlai ding hi.
18. Deihsakna a neihzia gen lai leng; Laaitui Zato khawk ci-in khuakim khua 8 ah zin den in Zato va
hong denin Khuasung Hausa Upa te tawh ki mutuah den hi. Tua banga azin ding ciangin alawm
dingin kei bek hong zang ngiat hi. Lawm ten ‘Sia huan pa Laa’ hong ci liang uh hi. Nuam dinglah hi
lo, Heh dinglah hi lo. Kei hong deihdiakna khat bek gen leng, ama lungsim leh avan zat te telpen leh
thumang pen kahih cianga hong deih ahi hi. Zatui Zatang hawm bek hilo, khua sung thu leh Pasian
thu mah gen denhi. Amai ah Sia huan nih leh thum om in ama khit teh tampi mah hong om aa, amah
zah aa khuakim khua pam ah a zin kawikawi leh Pasian lam aki pia amah bang om kasa nai kei hi.
19. ZATO LAM A NASEPNA
Ama vaihawmna tawh ka huanthang uh a innmun-awng pen Malaria inspector quater dingin inn 2
lam hi. Pu Dai Khua Pau te khualai ah inn a kituah toh ciangin a innmun uhzong Zato quater dingin
ngen in zangh pah hi. RHC Inn ding zong alam hi. Ama om nawnloh teh ut bangin ki to keekin sang
huangin kikoih ziau hi. Khua leh tui leh EBC pawlpi te ading in ahih theih zahin na hong sem hi.
Hong deihsakna bel lamdang sa ingh. Topa minthanna hi ta hen. Amen.