ENG LO AWM RAWH SE

A tirin Pathianin lei leh van a siam a. Tin Lei hi a chhiaa a ruak ngawt a ni a; tui thuk tak chung chu
a thim mup a. Pathian Thlarau chuan tui chungte chu a awp reng a, Tin Pathianin, “Eng lo awm
rawh se,” a ti a. Tichuan eng a lo awm ta mai a, Tin, Pathianin eng chu a en a, tha a ti hle a:
tichuan Pathianin eng leh thim chu a then ta a.

Lei chu nang leh kei hi kan ni a, a tirah chuan kan chhia a kan ruak ngawt a ni tih hi
Pathianin min hrilh chu a ni. Leiah hian khawmual a lo la lang lova tui thuk takin lei chu a
khuh vek a ni, tui thuk tak chung te chu a thim mup a, a tirah chuan thimin min khuh vek a
nih chu. Nimahsela chung zawng zawng chungah chuan Pathian chu a lo la awm a, Pathian
thlarau chuan tui chungte chu a awp reng a ni. Eng a lo awm hma khan, thimin min khuh
mup lai pawh khan Pathian thlarau chuan min awp reng a, min vengin min enkawl reng tho
a nih chu. Mahse eng a lo awm hma chuan lei hi a chhia a a ruak ngawt a la ni.
Pathian Thlarau lo thlen hma khan Pathianin mihring hi a ensan reng reng lova a
khawngaihna leh hmangaihna chuan min tuam reng a, kan chungah ni a chhuahtir a min a
thutiamah a ding nghet a ni. Nimahsela lei chu a chhia a a ruak ngawt a nih avangin
engmah a to thei lova, thil nung a la awm theilo a ni. Mithiamten an han chhut chian chuan
nunna zawng zawng leh tha chakna energy zawng zawng hi eng atanga lo awm a ni tih hi
an hmu chhuak a ni. Chu chu Pathian engkimtitheia remruat a lo ni a. Lei chhia leh ruak
ngawt ah chuan nunna leh chakna a awmtir dawn avangin eng a lo siam ta a ni.
Eng lo awm rawh se. Pathian chuan Lei leh van a siam ah khan a hmasa bera a siam
chu eng a ni ta a ni. I nun leh ka nun thim chhia leh ruak ngawt ah khan Pathianin nunna
leh chakna thil hlu tinreng dah a duh avangin eng lo awm rawh se tiin eng a lo siam ta a ni.
Eng a lo awm chiah khan thim a lo langfiah ta a ni. Kan nunah hian Pathian eng a lo thlen
hma chuan thim hi kan hre thei lova, kan hmufiah theilo a ni. Nimahsela eng a lo awm
chiah hian thim thiltih chu a lo langfiah ta a kan nunah hnawk a lo langfiah ta thin a ni.
Pathian chuan eng chu a en a tha a ti hle a, ti chuan thim leh eng chu a then ta a.
Kan nunah eng a lo luh chiah khan thim nen chuan a inpawl thei tawh lova eng leh thim hi
a awm kawp thei lova Pathian chuan kan nun a thim leh eng chu a then ta a, Eng chu chhun
a vuah a , thim chu zan a vuah ta a ni. Kan nunah eng a lo awm chuan thimin chu chu a
ngam lova, then hran a lo ngai ta a ni. Pathian Thlarau Thianghlim engah chuan thim thiltih
chu a lo langfiah a, miin a nunah thim alo hmu fiah tawh a, Eng chakna hmang chuan thim
chu a nunah thenin a lo awm a, Chhunah a lo leng thei ta a ni.
Hmanah khan thim in ni a, tunah erawh chuan Lalpaah chuan eng in lo nih tak hi;
Lalpa lawmzawng engnge ni tih fiahin, eng fate angin awm rawh u, eng rah chu thatna
leh, felna leh, thutak zawng zawngah a lang si a. Tin thim thiltih rah nei ngai lovahte
chuan telna reng nei suh ula, tel ahnekin a thiam lohzia hriattir zawk rawh u.
Amaherawhchu thil engkim a thiam lohzia hriattira awm hi eng tihlan a ni thin. Tihlana
awm apiang chu eng a ni si a. (Ephesi 5)