#karakinananti

TE ANTI AE ARANAKI BWA TE MWAMWAANG

Iroun Teifanning Hiland Eyeland

I aon te aba ae Tabuaeran ao bon iai te taura ae konaa ni karikia bwa te kaibuke ao man konaa naba n
riki bwa te ai ma ngaia ti aki ti ngaia ma ngaia e konaa naba bita am taratara.

Te karaki aio bon karakinau ma au karo n te ririki 2004.

E uara ti a nako kee!

N te kaawa ae Betania ao e rangi ni bwaabwainaki ngkoa te karekare n te karewe (te aiai). N taai naba
akanne ao a rang bwainaki te nako ni korokarewe i buakonikai n te rereua i mataniwiin te nei bwa a rang
taatari, ngaia are e rangi ni babaneakinaki te nako ni korokarewe iai.

Ngai ngkane n te tai ane i primary (Class 6), ao tamau ngkane bon kaain naba te karekare n te tai anne. I
aki totoki ni iriria ni koro karewe. I nonoriia kaaina aika a rang mwaiti.

Te bwakantaai teuana ao I a manga ira naba tamau nako ni korokarewe. E rangi ni mwaiti ana karewe
tamau bwa onokai nakon itikai. N te bwakantaai anne ao a bane ana karewe tamau ao ti a manga tiku ni
kabongnga bwa ti na tau mwanai. Ti a rianna nako tanrake bwa ti na kabonnga ao ti a okira naba te nei n
tau mwanai iai.

Kaanga e a bong bwa tao ai mwiin 7pm, ao e a moanna n roko te maroaa i rou. I a tuanga tamau bwa ti
nang oki nningai nakon te rereua n tau mwanai ngkai e a roo. E a kaekaai tamau, “Ti a kamaanna riki
bwa e aenako raoi iai te mwanai.” I a karauai n tekateka i rarikin tamau ma te maroaa. Bon i nanon iraua
te miniti ao e a karina naba ni kaoti te taura mai i nano mai meang ae kaanga tein te bwaatoro. E aki
nooria tamau ma I nooria ao I a karaua n tataraia. E a tabe riki ni bubuura ootana, ao ngai i rou I taku n
au iango bwa tao te booti n akawa. I a tuanga naba tamau, “Papa tera te taura aarei? Te booti n akawa?”
E nooria tamau ao bon i nanon tataraakina ao e a tabe naba ni bubura kaanga ni uakaan nakoira ma
teina ae ai bon tein raoi te kaibuke ma taurana. Ngke I nooria n aekakina aarei ao e a bon tata naba
manawau ao man kiba nakon tamau bwa n na tobwaaki bwa I a maroaa. I nanon naba butina aarei nako
ni bakatekea maiaki ngke e a manga bitaki te kaibuke aarei nakon te tooti ae kaanga e a manga toka i
aon te booti ae biriaitua ootana ni karokoa e a tei kaanga i akuun bwaro n nao. E bon aki maan teina
aarei ao e a birirake naba nako eeta mai maiakira.

Ngai ngke I noora te aekaki aarei ao I a rang maroaa ao e a kaan ae n nang tang. I a tuanga tamau bwa ia
maroaa ti a riai n oki

Eaki kabanetai tamau ma ti a bon oki naba (e aki kan kabatia te kabwararia bwa e ataia ae n nang tang
tatakaarua)

Ti a rianna n oki nakon te rereua ao a nim baiu ni bain tamau. E a bon rootai te maroaa ae rangi ni
korakora. Ngke ti roko n ara tokotuu ni karewe ao ti anaa ara bwaketi bwa ti nang tau mwanai. I a
tuanga tamau bwa ea tau bwa ti nang riai n oki bwa I a maroaa ao I a tang ni kan oki.

E a ira nanou tamau ngaia are ti nang oki ma e a manga uringa ana karewe te kaina ae tuai koroia ae e a
bon tibwa niiria ae te tabo n ari. Ti a rianna nako aana. I a taua te tooti mai nano ao ngaia e a
tamwarake. I nanon ana tai ni korea ana karewe aei ao e a noora naba te rebwerebwe ae buti i nanon te
rereua (te rereua aio e bokaboka nanona ao e aki konaa ni buti te rebwerebwe i nanona). E nooria ma
ngai I aki nooria. E kabaitiia tamau n ruo rikaaki bwa i rouna I nooria naba. I nanon ruona rikaaki ngke
taraa aana ao e a roko naba i nano. I rouna e a roko ma ngke e a kanakoa baina ma waena man te nii
bwa i rouna e a roko ma bon te kubanako ngke e a kaantaningaia bwa e nang toko waena ma aakea ana
anga bwa e a kaaki baina man te nii ao waena e a nako man te mwaneka ( ai bon ti 3 riki te mwaneka
rikaaki ao ea roko i nano ). E a kubanako bwa e ataia ae nang bwaka i aon tano.

I a rang kubanako ngke I bon tabe n tootinna ngke e ruo rikaaki ao e a bon kaaki naba baina ma waena
ngke e a bon bobukitaua naba i rarikiu. "Papa! Papa! Ko aera?" E kubanako bwa i rouna e mii. E kataia n
teirake ma marakin nuukana ma ngke e reke teirakena ao e a uringa te rebwerebwe are buti i nanon te
rereua.

Teirakena aarei ao ti a bon kabaitiira naba n oki, ma i nanon are ti nang roko n te kawai iaan taian ren ao
ti a kubanako ngke e a bon uararake naba te buakonikai man iteran te rereua. E a ura te ai ni urarake
taian kaina. Ti a tan rikaaki ao ai bon te ura korakora. I taetae i nanou, “Ai kaawara te kaina ao karewe
naba ake i rarikina!” Ao maroaau ae rang korakora. Ti aki kan tabe iai ma ti a bon oki naba.

Ti a roko n te auti ao e a tuangai tamau, “Natiu ko noori baika ti kaaitiboo ma ngaia akekei? Bon TE
MWAMWAANG! Te taura are bibita rabwatana ao man kaburea naba am taratara ngke ko nooria ngke I
bwaka. E bure au tai bwa ngai i rou I a roko i nano ma ngaia I tuai. Ngke I a bwaka ao I aataia ae kaburea
au taratara.” E manga titirakinai tamau man reitianako, “Ko noora te rebwerebwe ngke buti i nanon te
rereua?” I kaekaa tamau ae I aki nooria.

”Ko aki nooria kee ma ngai I nooria ngaia are I a bon kabaitiiai naba n ruo nakoim bwa ngai i rou ko
noooria ma I ataia ngke I a bwaka bwa e roko ni kaburea au taratara. Te ai are ura aarei bon rabwatana
naba. Tiaki te ai.”

Ngkanne ningabog ngkana ko noora te tabo are e ura iai te ai ma ngkana ko nooria ao ane ana akea
mwiin te ura.

Bon nte bwakantaai are i mwiina ao I a manga ira naba tamau ao I a nooria ae ngaia bon akea mwiin te
ura n te tabo are ti noora iai te ura.

Kam rabwa n ami wareware.

Ti na bane n tekeraoi man ami tabo aika a kakaokoro!