Open Bible Stories (obs)

Door43 Preview AURISTEA/pak_obs_text_obs (master) :: Parakanã (pak)

Associação Linguística Evangélica
Missionária

obs 1 : 1 640x360px
 Iypyrogypytawa

Non hekwehe iypyrogi xoporemo: Xenerowete iapoi ywaga, ywya we, xoporemo ipope aka waꞌe 6 koꞌema rehe.
Ywya hypy hekwehe naipopiarihi, homygohoramo hekwehe ywya, iowoni homygohoa, howytekwarohoramo
hekwehe ywya. Namaꞌetywihiete hypy hekwehe ywype aka waꞌeroma. Xenerowete Pytoa hekai ꞌya ꞌarimo.

Iypyrogypytawa re Xenerowete imomeꞌoi: —Taiaraxig!— Iꞌi. Xowe oaraxigamo. Xenerowete hexagi araxiga
ikatoramo, henoi araxiga "ara" po. Hexyi araxiga homyga hi, henoi homygohoa "ypytona" po. Awa ikoꞌemypya.

Mokoi koꞌema re, Xenerowete imomeꞌoi, iapo ywaga ywya ꞌarimo. Xowe mokoi imaxaꞌagi ꞌya: ywya katy, ywate
katy we. Awa imaxaꞌapyra henoi "ywaga" po. Amote katywara oenoi "ywya" po.

Koꞌema iroyꞌyma re, Xenerowete imaxaꞌagi ywya ꞌya hi. Henoi typawa "ywya" po, ꞌya "ywypapawa" po. Xowe
Xenerowete hexaka wemiapoa, aꞌe hexaka ikato, oxa.
Xowe Xenerowete imomeꞌoi: —Ywype, toꞌeꞌe amotemote amaropehawa harym waꞌe, amotemote ꞌywa iꞌa waꞌe
haꞌynia ipope waꞌe.— iꞌi hekwehe. Xowe xoporemo oꞌeꞌeo itymyra. Xowe Xenerowete hexaka wemiapoa, aꞌe
hexaka "ikato", oxa.

— Akomaꞌe okopytao itoi, oxapiro: "Eaaro hypy, orowepypamta." Iꞌi ixope. Einoxi eokwe omaꞌeapo waꞌe imanai
toakwapetym akomaꞌe, imoina taxewepypawypy ne, oxa.

Heꞌyi koꞌema re, Xenerowete imomeꞌoi. Xowe iapo xoporemo maꞌexiroa paranomewara, wyra we amotemote.
Imomeꞌoi maꞌekatoa ixope: —Toxeweꞌyxoho.— Xowe Xenerowete hexaka wemiapoa, aꞌe hexaka "ikato", oxa.

Sexto ikoꞌema re Xenerowete imomeꞌoi: —Toxexagokan xoporemo maꞌexiroa ywy pewara. — Ixexagokantawa
amotemote maꞌexiroa awyri pewara, kaꞌa pewara we, amotemote maꞌexiroa ywype opoxe waꞌe, exa ne
Xenerowete imomeꞌoypy non ixeapoi. Xowe Xenerowete hexaka wemiapoa, aꞌe hexaka "ikato", oxa.
Sexto ikoꞌema re we, Xenerowete imomeꞌoi: —Pexe, xapo rame awaa exa xane non. Awaa taka xoporemo ywyo,
xoporemo maꞌexiroa manataramo.— Iꞌi Xenerowete.

Xowe Xenerowete iapoi akomaꞌe tyxoga po. Xowe howawyo imopytoꞌo imonepa hekatawa ipope. Oenoi awa
akomaꞌe Atao po. Xenerowete oapo kaa kawora ixope, taka ipope, tomaꞌekato hehe.

Kaa kawora pyteripe hekai mokoi ꞌywa. Oxepexowe ꞌywa oporowekowe waꞌe, ꞌywa iroa tomokwaham ikatoete
waꞌe, ikatoyꞌym waꞌe we. Xenerowete imomeꞌoi Atao pe: —Eꞌo ke iꞌoheita xoporemo ꞌywa ꞌa kaa kawora popiara.
Eꞌoeme ke ꞌywa ꞌa tomokwaham ikatoete waꞌe, ikatoyꞌym waꞌe we, eremano rapo.— Iꞌi ixope.

Xowe Xenerowete imomeꞌoi: —Naikatoihi akomaꞌe oxepewei aka, oxa. Namaꞌetywihi maꞌexiroa iroramo,
ipotywonaroma we Atao pe.—Iꞌi Xenerowete.
Xowe Xenerowete imogeri Atao, tokerete opa. Xowe hekyita ixarokyga oxepexowe, iapo koxoramo Atao pe.

Xowe Atao hexaka koxoa, imomeꞌoi: —Einoname! ꞌa rike awa xepirimowara. Hera pota "koxoa!" Xenerowete
iapoi xeraꞌa po, xekyga po we.— iꞌi Atao. Aꞌeramo akomaꞌe ihemi wowa awyra hi, watya re oxowerekao. Eomi
mokonia pota exa oxepexowe awaa non.

Xenerowete iapoi akomaꞌe, koxoa we oxepirimo. Xowe imomeꞌokato ixope: —Heta ke penaꞌyn, penemominoa
we ke, xowe pemotynehem ke ywya.— Xowe Xenerowete omaꞌeo wemiapoa re, aꞌe ikatoete, oxa. Xowe
woryweteramo. Awa sexto koꞌema re.

Xowe sétimo koꞌema re Xenerowete opytoꞌo maꞌexiroa apopapaweripe. Ipytoꞌoi wemiapoa apopawamo,
aꞌeramo inogtei sétimo koꞌema amote koꞌema hi, awa ara re tapytoꞌo ne, oxa. Non hekwehe Xenerowete iapoi
ywya, ywaga we xoporemo ipopiara we.

Xenerowete xeꞌega popewara: Xenexi 1-2

 Maꞌeagawa ikei ywya pope

Atao, watya re horyweteramo kaa kawora pope Xenerowete oxeope hemiapoa pope. Akomaꞌe, watya re
opintexowepe hekai, noxeroxihi oxohi, maꞌeagawa hekwehe nokeihi we ywype. Iatai hekwehe aka kaa kawora
pope, oporogetao Xerexowete pe.

Maxa oporomoawayꞌym waꞌe, imomeꞌoi koxoa pe: —Aꞌete pa Xenerowete imomeꞌoi penope: Peꞌoemete ke ꞌywa
ꞌa mo kaa kawora popiara, iꞌi pa penope?—

Xowe koxoa imomeꞌoi maxa pe: —Iꞌo potata oroꞌo xoporemo ꞌywa ꞌa. Xenerowete imomeꞌoi: "Peꞌoeme ke Etena
kaa kawora pyteri pewara ꞌywa ꞌa, pepakageme we ke hehe, pemano rapo" iꞌi oreope.—

Xowe maxa iꞌi koxoa pe: —Aꞌeteyꞌyma, pehe nepemanoaꞌowihiete. Penowete ikwahawi, pehe ꞌywa ꞌa ꞌo pota
pekwahamta maꞌexiroa xoporemo. Pehe pota exa Penowete non. Pehe pota pekwaham maꞌekatoyꞌyma,
maꞌekatoete we— iꞌi koxoa pe.
Xowe koxoa hexaka ꞌywa ꞌa iaroeteramo, hekwenete xawa, oxa oxeope, aꞌe we ipotari okaꞌakwahamtawa. Xowe
ipyhygi ꞌywa ꞌa, xowe iꞌo, imana ototyra pe ipewera. Aꞌe we iꞌo.

Kowei imaꞌei oxehe ikwahapa opintexowepe rike xaka, oxa. Xowe ipyhyka ꞌywa rawa, hekwehe, oxeowona ipo.

Xowe akomaꞌe, watya re henowi Xenerowete pytapoa kaa kawora pope iatai iharamo. Xowe oxemima ixohi.
Xenerowete henoi Atao: —Mome pa ereꞌyi?— Iꞌi. Atao iatywari: —Aenom nepytapoa kaꞌa kawora ropi nerohawa,
xowe wekyyxeo, opintexowepe ixe aꞌom, aꞌeramo axemim neohi— iꞌi ixope.

Xowe Xenerowete imomeꞌoi: —Awa pa omomeꞌo neope opintexowepe nerekatawa? Ereꞌo pa ꞌywa ꞌa aꞌepe ne,
eꞌoeme ke, aꞌe neope?— Iꞌi ixope. Akomaꞌe iatywata: —Ene eremon xeope koxoa, aꞌe imori xeope taꞌo ne ꞌywa ꞌa,
oxa. Xowe Xenerowete imomeꞌoi koxoa pe: —Maꞌe pa ereapo?— iꞌi. Xowe iatywata: —Maxa xemoawayꞌymi.—Iꞌi.
Xenerowete imomeꞌoi maxa pe: —Amana pota maꞌekatoyꞌyma neope, erepoxe pota eka ywyo, ereꞌo pota eka
ywya rataxiga. Aapo pota ene koxoa re tenexigoeme. Koxoa memyrena, nerehewewara re pota noxoxigoihi.
Koxoa rehewewara pota ikamikamigtari neꞌapinera; ene pota ipytaxa ereꞌoꞌo. —Iꞌi.

Xowe koxoa pe Xenerowete imomeꞌoi: —Neope heta haꞌyete pota ramo nememyra oꞌantata. Erepotarete
etotyte, aꞌe pota nemoropetega.— Iꞌi.

Xowe akomaꞌe pe Xenerowete imomeꞌoi: —Erenom xatya, xowe imoaroyꞌyma xexeꞌega, aꞌeramo einonta ywya
naikatoaꞌowihi aka neope. Ene emaꞌeapohoete ke ywya pope teremoxemotowi temiꞌoa exeope. Eremano pota,
erexewynta yxamo xokwen. — Iꞌi. Akomaꞌe henoi watya Ewa po, xoporemoete goa hya aꞌeramo henoi Ewa po.
Xenerowete hyromonewi maꞌexiroa pirera po Atao, koxoa we.

Xowe imomeꞌoi Xenerowete oxeope: —Goa rame okwaham ikatoete waꞌe, ikatoyꞌym waꞌe we exa Xane non.
Toꞌoeme ke ꞌywa ꞌa oporowekowe waꞌe, aoxeaꞌe rapo hekai.— Iꞌi. Xowe Xenerowete imanai taha Etena kaa
kawora hi. Imagai ywagimewara hatoete waꞌe ohaaro, towygemete goa ꞌywa oporowekowe waꞌe re.

Xenerowete xeꞌega popewara: Xenexi 3

 Amynohoa

Xowe heta amyna imoxewyta, heta hekwehe goa hekai ywype. Heta hekwehe iapoi aka maꞌeagawa,
noporoxigoihi hekwehe aka, oxonopo aka, aꞌeramo hekwehe Xenerowete imomeꞌoi: —Amomamta ywype aka
waꞌe amyn xytaohoa po.— iꞌi.

Noꞌe ikatoete waꞌe Xenerowete pe goa ikatoyꞌym waꞌe pyteripe. Aꞌeramo Xenerowete ipotywoi Noꞌe. Imomeꞌoi
ixope: —Amomamta goa xoporemo amynohoa po, eapo ꞌyhan xytaohoa exeope! — Iꞌi Noꞌe pe.

Xenerowete imomeꞌo Noꞌe toapo ꞌyhan xytaohoa 133 ipokotawa imopokoho, 22 ipokotawa howahapa, 13
ipokotawa imopoꞌoma. Xenerowete imomeꞌoi toapo ꞌyhaxyta ꞌywaꞌa po. —Eapo naꞌiroi eatatawoma, oxoꞌaxoꞌa
rimo iapo, oxepexowe emoapyten ywate, oxepexowe iapo momokwara.— ꞌyhaxytaohoa pope toke Noꞌe, hatya,
taꞌyna, xoporemo maꞌexiroa amotemote ywype aka waꞌe.

Noꞌe imoaroi Xenerowete. Aꞌe waꞌyna iroyꞌym waꞌe re iapoi ꞌyhaxytaohoa exa Xenerowete imomeꞌoi non. ꞌyhara
ixytaohoramo, aꞌeramo ipykopyramo ymaꞌehe hekwehe iapopawi ꞌyhara. ꞌyhara iapo hereka we hekwehe Noꞌe
imomeꞌoi goa pe amynohoa ikyntawoma re, toxemoagypyhyg Xenerowete re, oxa pane. Aꞌe noenowihi xowe
hekwehe hemimomeꞌoa.

Xenerowete imomeꞌoi Noꞌe pe, taꞌyna pe we tomonyhyg heta temiꞌoa oxeope, maꞌexiroa pe we. Iapopawamo,
Xenerowete imanai Noꞌe, hatya, taꞌyna, taꞌyna ratyetoa we toke yhaxytaohoa pope.

Xenerowete imori Noꞌe pe oxepexowe akomaꞌe, koxoa we amotemote maꞌexiroa we, toke yhan xytaohoa pope
ixomyramo amyna hi. Xenerowete imori we 7 maꞌexiroa akomaꞌe, 7 koxoa we iꞌopyra, toapy we Xenerowete pe.
Xoporemo ꞌyhan xytaohoa pope ikekepawamo, Xenerowete hakwapetymi yhan xytaohoa roxoroa.

Iypyrogi hekwehe okyta amyna, maꞌete opika. 40 koꞌemamo, 40 ypytonamo ikyri hekwehe heta amyna. ꞌya we
hekwehe ywya hi iꞌeꞌei heta. ꞌya hekwehe tyapohoramo, iapyrahapapa hekwehe ywytyra xytaohoa.

Xoporemo ywype aka waꞌe hekwehe imanoi. Nomanoi hekwehe ꞌyhan xytaohoa popewara xowe. ꞌyhan xytaohoa
iwewoi hekwehe aka ꞌya ꞌarimo, ipopiara xowe hekwe hekai.
Amynohoa pigamo hekwehe ꞌyhan xytaohoa iwewoi aka ꞌya ꞌarimo, 5 (cinco) imohema xahya. ꞌya hekwehe
iypyroka wypawamo. Kwexare hekwehe ꞌyhan xytaohoa ixeapekagi ywytyra apytera re, xoporemo hekwehe
iapyrahawi ꞌya. Naꞌiroi xahya imohema, iypyroka amote ywytyra apytera oxexaka.

40 (quarenta) koꞌema re Noꞌe imanai anoagawa toexag typam pa ꞌya ywya hi? Oxa. Anoagawa ihai, oxewyta ota,
noexagihi hekwehe ywya.

Amote koꞌema re hekwehe, Noꞌe imohemi xeroxia, ihai hekwehe xeroxia oxewyta ota ꞌyhaxyta pope, noexagihi
hekwehe ywya. Oxepexowe hekwehe imotawai topoa xowe imohem xokweta xeroxia. Aha hekwehe herota oriwa
rawa oxia re. ꞌya hekwehe typawamo, ꞌywa iypyroka wawyahoramo.

Noꞌe hekwehe haaroi oxepexowe imotawao topoa, imohemi xokweri hekwehe xeroxia. Aꞌe maꞌete oxewyn
xokweta, hexagi hekwehe ywya opyrokawoma, aꞌeramo noxewyn xokwerihi. ꞌya hekwehe typawamo ywya hi?
Mokoi xahya imohema, Xenerowete imomeꞌoi Noꞌe pe: —Ene, xaꞌyna re xoporemo maꞌexiroa re peꞌeꞌe yhan
xytaohoa hi— iꞌi. —Heta ke penaꞌyn, heta we ke penemominoa, tepemotynehem ywya.— Iꞌi ixope. Xowe Noꞌe,
waꞌyna re iꞌeꞌei yhan xytaohoa hi.

Noꞌe ꞌyhan xytahoa hi ohema, imoxogi ita oxoapytepytera re. Ipyhygi maꞌexiroa iꞌopyra, ixokao, hapyo imanao
Xenerowete pe. Xowe Xenerowete woryweteramo hemiapya piꞌe retona. Xowe iapo maꞌekatoa Noꞌe pe, taꞌyna
pe we.

Xenerowete imomeꞌoi: —Naapoxokweraꞌowihiete mi maꞌeagawa ywya re. Namomam xokweraꞌowihiete aoxeoho

ywype aka waꞌe amynohoa po, goa maꞌeagawa owoxaeteramo we iapo hekaramo.— Iꞌi. Imomeꞌo ixope
oxomorypa.

Xowe Xenerowete iapo oxepyꞌaham waꞌe aoxehe, hexagokata imohorypawa pinimaramo. Kowekowei
oxepyꞌaham waꞌe ihemamo, Xenerowete, heꞌynia we, heꞌaramo oxomohorypawa re.

Xenexi morogeta popewara: Xenexi 6-8

 Xenerowete iapoi Awaroa re ixomohorypawa

Ikwepawamo amynohoa ywya iapyrahamtawa, goa hekwehe ixeweꞌyxohoi. Heta hekwehe goa oxoxeꞌega po
iporogetai. Aꞌe hekwehe noahyahyihi imotynehemyꞌyma ywya. Aꞌe hekwehe iapo wetomroma.

Goa hetoma pyriwara hekwehe iꞌogohoramo, maꞌete henopa Xenerowete oxeope iporogetatawa. Iypyroka
hekwehe imoxoka tagpokohoa imoxykaka ywaga re. Xenerowete hexagi aoxeoho imaꞌeapo hekaramo, toroapo
ne maꞌeagawa, oxa. —Eino aka pota heta iapoi maꞌeagawa.— Iꞌi Xenerowete.

Xowe Xenerowete imoroni ixeꞌega, amotemote xeꞌega po, imohyahyi xoporemo ywya katy. Hetoma
hemimoxoga henoi Waweo po. "Xeꞌega morontawa" rera Waweo.

Ymaꞌehe hekwehe Xenerowete iporogetai akomaꞌe Awaroa po hen waꞌe pe. Xenerowete imomeꞌoi ixope: —Ekwa
ekaꞌa hi, xeꞌynia pytera hi we, ehem eha aexagokanta neope ywya. Aapo pota maꞌekatoa neope, neraꞌyrena
hetaete. Xoporemo pota ikwahawi nerera. Aapo pota maꞌekatoa nererekakatoetetara pe, maꞌekatoyꞌyma
nererekakatotaryꞌyma pe. Nerehe pota aapo maꞌekatoa xoporemo heꞌynia pe ywype. — Iꞌi Xenerowete.

Xowe Awaroa imoaroi Xenerowete xeꞌega. Aꞌe we herahai watya Xarai, oxeope omaꞌeapo waꞌetoa, xoporemo
omaꞌexiroa. Herahapawi xoporemo Xerexowete ywya oxeope hemiexagokara pope, Kanaꞌa kaꞌa pyri.

Awaroa Kanaꞌa pyri iharamo, Xenerowete imomeꞌoi ixope: —Emaꞌe xoporemo ywya re exeaerowaka. Amana
pota neope neraꞌyrena pe we xoporemo awa ywya neremiexaga. Nekaꞌakwera neraꞌyrena pe.— Iꞌi. Xowe Awaroa
aka eowyime.

Ymaꞌehe Awaroa ihai hexaka Meokixeteke. Xenerowete Ixytaohoa xaxetote. Meokixeteke imomeꞌoi maꞌekatoa
Awaroa pe, einon: —Nerowete Ixytaoho waꞌe, ywaga xara, ywya xara we toapo maꞌekatoa Awaroa pe.— Iꞌi. Xowe
Awaroa 10 maꞌexiroa hi, hekyi oxepexepexowe, imomaꞌamaꞌaka imana Meokixeteke pe.

Heta imoxewyta amyna, Awaroa, watya Xarai re naꞌyrihi we. Xenerowete imomeꞌo xokweri Awaroa pe: —Amonta
neraꞌyroma, neraꞌyreroma we pota exa xahytata heta non. —Awaroa imoakygytai Xenerowete xeꞌega. Aꞌeramo
Xenerowete "akomaꞌe ikatoete waꞌe, maꞌekatoa apotara". Iꞌi hehe.
Xowe Xenerowete oxomorypa Awaroa re taꞌyryꞌymamo we. Ixomorypawa amonamo mokoi awaa oxomorypa. —
Amana pota oxepexowe neraꞌyroma, Kanaꞌa kaꞌa amana pota neraꞌyrenetoa pe.— Iꞌi Xenerowete.

Xenerowete xeꞌega popewara: Xenexi 11-15

 Xenerowete imomeꞌoi Awaraoa pe: neope amana
pota neraꞌyroma

10 imoxewyri amyna Kanaꞌa pyri Awaroa, Xarai re, Xenerowete hekwehe nomorihi we taꞌynroma. Xowe Xarai
imomeꞌoi Awaroa pe: —Naxemomemyrihi Xenerowete Iawe. Ereka ke xeope omaꞌeapote waꞌe taimemyn xawa
xeope.— Iꞌi.

Xowe Awaroa heroꞌapa Hagai. Xowe omemyramo. Awaroa henoi Imaheo po waꞌyra. Xarai imoxari Hagai. Imaheo
ixemotowitawa 13 ramo, Xenerowete iporogeta xokweri Awaroa pe.

Xenerowete imomeꞌo: —Ixe Nerowete Opoahyweteoho waꞌe. Aapo pota xerexomorypawa neope!— Iꞌi. Xowe
Awaroa okopytao oina, ywya re wekwara inoga tamomoxy ne, oxa. Xenerowete aoxe oꞌoma we oporogetao: —
Heta pota amotemote goa roperamo ene. Amana pota Kanaꞌa kaꞌa neraꞌyrena pe nekaꞌakweraramo, ixe pota
Toweteramo aka aoxeaꞌe. Einon ke eapo terexagokan xemoaronawa eapo ke ikyxio iꞌapira pirera xoporemo
akomaꞌe xeꞌynia.— Iꞌi.
— Xarai, neratya imemynta. Ene pota erenoi Ixake po. Ixe pota aapo imorypawa Ixake pe we, taꞌyrena pota
hetaete. Imaheo raꞌyrenroma we pota aapo hetaete. Xerexomohorypawa pota aapo Ixake pe.— Iꞌi Xenerowete.
Iponekwawi Awaroa rera Awaraoa po. —Ixe pota oroapo amotemote goa rowamo, aꞌeramo nerera Awaraoa.—
Iꞌi. Iponekwawi Xarai rera we Xara po. — Moroyroa ixiapyripewara raxyra pirimowara. — Iꞌi.

Xowe Awaraoa iꞌapikyxi xoporemo oxepyri aka waꞌe. Oxepexowe ixemotowitawa, Awaraoa xemotowitawa
hekwehe 100, Xara xemotowitawa hekwehe 90, Xara imemyramo iwaꞌyta Awaraoa henoi hekwehe Ixake po, exa
ne hekwehe Xenerowete imomeꞌoi ixope.

Ixake iawarameramo, "Xenerowete toexagokan xerehe oxemoagypyhykawa", oxa. Imomeꞌoi ixope: — Eraha
rame xaꞌyra Ixake, emon hapyo xeope.— Iꞌi Awaroa pe. Koweniowe Awaraoa imomoxy Xenerowete.

Awaraoa Ixake re hepexoni aha ywya maꞌexiroa rapytawoma. Ixake imomeꞌo: —Ana, xaron xepeꞌawa. Mo pa
mixaragampia akomaꞌe xaapy Xerexowete pe?— Iꞌi ixope. Awaraoa iatywata: — Xenerowete imontari
mixaragampia akomaꞌe xaapy ixope, wetaꞌyn.— Iꞌi Ixake pe.
Xowe ota eope Xenerowete remimomeꞌoa pyri, Awaraoa hamagai waꞌyra Ixake, imoxenoka ita oxoapytepytera
rewara re. Ixokai werehe waꞌyra, xowe Xenerowete imomeꞌo ixope: —Eapoeme, exokaeme xaꞌyra. Akwahawame
wemomoxytawa, wemoaronawa we. Ene "Namanaꞌowihi wetaꞌyn moxepe neope", nereihi xeope.— Iꞌi.

Xowe Awaraoa hexaka mixaragawa akomaꞌe oatowaxia re Xenerowete remimora, yhypotywa re ixamagaramo
tomana waꞌyra ponekwapawamo. Xowe Awaraoa woryweteramo hapyo maꞌexiroa Xenerowete pe.

Xenerowete ikwaweꞌegi Awaraoa pe: —Ene xemoaro ipe. Ene nereihi xeope: "Namanaꞌowihi wetaꞌyn moxepe
neope", aꞌeramo amomeꞌoete neope: Heta pota aapo maꞌekatoa neope. Aapo pota neraꞌyrena hetaete exa
ywagimewara xahytata non. Ene xemoaro ipe, aꞌeramo aapo pota maꞌekatoa xoporemo goa ywya aka waꞌe pe,
neraꞌyrena rehe.— Iꞌi.

Xenerowete xeꞌega popewara: Xenexi 16-22

 Ixake pe Xenerowete wemipotara ropi maꞌexiroa
iapotawa

Awaraoa hekwehe moroyroete, Ixake hekwehe ixemotowipawi, Awaraoa imanai oxeope omaꞌeapote waꞌe,
tomomyro heꞌynia pyteripe taꞌyra Ixake ratyroma.

Ipokoete hekwehe ihai hepexona Awaraoa reꞌynia pyri. Awaraoa pe omaꞌeapote waꞌe Xenerowete hekwehe
herahai Heweka pyri, Awaraoa rywyra remominoa.

Xowe Heweka imomeꞌo: —Aha pota hopi, oxa. Xowe Heweka ihai Awaraoa pe omaꞌeapote waꞌe ropi, taxemen
ne Ixake re, oxa. Heweka iharameramo Ixake hatyramo hehe.

Ymaꞌehe hekwehe Awaraoa imanoi, xoporemo Xenerowete Awaraoa pe, taꞌyrena pe we hemimomeꞌoa, imanai
Ixake pe. Xenerowete hekwehe imomeꞌoi Awaraoa pe: —Hetaete pota neraꞌyrena, nepemoiromawaꞌowihi, —oxa.
Aꞌe rame Heweka, Ixake ratya, naimemyrihi xowe.

Xowe Ixake oporogetao Xenerowete pe Heweka rehe, xowe Xenerowete imori imemyroma oxopirimowara
ixope. Konomia ohyke rewega pope ixonopoi, aꞌeramo imomeꞌoi Xenerowete pe: —Maꞌeramo pa ixopepyri?— Iꞌi
Heweka.

Xenerowete iatywari ixope: —Mokoi konomia nerewega pope, eomi mokonia raꞌyrena pota hetaete.
Noxoxigoaꞌowihi, oꞌarypy waꞌe pota omoaro wehewewara. —Iꞌi Heweka pe.

Heweka imoꞌari omemyra oxopirimowara, ixypya hekwehe ipytomawamo, hapawamo, henoi hekwehe Exaoa po.
Hehewewara ipyhygi oꞌarypy waꞌe pyxoꞌoa, henoi Xako po.

Xenerowete xeꞌega popewara: Xenexi 24:1-25:26

 Xenerowete oapo maꞌekatoa Xako pe

Konomia oxopirimowara, ixoweroxemotowi. Xako opotarete oawyripe akatawa, Exaoa ipotaretei oatatawa.
Heweka hekwehe ipotaretei omemyra Xako, Ixake ipotarete waꞌyra Exaoa.

Ymaꞌehe Exaoa oxewyta oatatawa hi, oteꞌoeteramo. Imomeꞌoi Xako pe: —Emon xeope temiꞌoa xemiapoa ri
xeope taꞌo ne, iꞌi. Xako iatywata: —Emorypy iponekwapa xeope xerexowa exeope hemimonpotahawa, xowe wixe
tamana ne temiꞌoa neope, iꞌi. Xowe Exaoa iponekwawi wowa oxeope hemimonpotahawa temiꞌoa re.

Ixake oꞌaximaweteramo, tamomeꞌo ne wetaꞌyrypya Exaoa pe Xenerowete remiaporoma ixope, Heweka Xako re
imoawayꞌymi Ixake. Ixake naeꞌapyꞌaihi, xowe Xako imonepa wekeꞌyra ryroa, iowoni oxora, opaa we maroxeagawa
pirera po, taxerapawoho ne exa Exaoa non.

Xowe Xako owyka Ixake rehe, imomeꞌo: —Ana, ixe neraꞌyra Exaoa, axan teremomeꞌo xeope Xenerowete
remimonroma xeope, — iꞌi. Ixake hetona Exaoa ryroa piꞌe, xowe imomeꞌoi maꞌekatoa Xako pe. Wetaꞌyrypya
Exaoa pe pa amomeꞌo, iꞌite Ixake.

Exaoa noxigoihi wywyra, wope oxeope hemimomeꞌo potahawa imimamo. Xenerowete remiaporoma imimamo
we. Exaoa naeakaxymihi oxeope maꞌeagawa iapotawa. Xowe Exaoa imomeꞌo oxeope: —Xerowa manonawoma
iwahemetei. Xowe taxoka ne wetywyra Xako.— Iꞌi.

Xowe Heweka henowi Exaoa wywyra imamaitawa. Xowe Heweka imoapatawai Ixake, tomana Xako taka okywyna
pyri.

Xako hekai ohyke Heweka reꞌynia pyri ymaꞌetewe. Irogatoeteramo hekwehe hatya, hekai 12 hekwehe taꞌyra,
oxepexowe taxyra. Xenerowete imori ixope heta maꞌexirohoa hepyete waꞌe.

20 (vinte) amyna imoxewyri, Xako ipokoete aka wope goa hi. Xowe Xako oxewyta Kanaꞌa pyri herahao oxeopi
watyetoa, waꞌyna we, xoporemo maꞌexiroa.
Xako ikyyxei Exaoa hi. —Xexoka pota pa?— Iꞌite oxeamogetao. Aꞌeramo imanai heta weomawa toweraha
wekeꞌyra pe. Ixope omaꞌeapo waꞌe herahai heomawa Exaoa pe. Eipo oxa ixope: —Mia Xako reomawa, neope
omaꞌeapo waꞌe reomawa. Koweita itori.— Iꞌi ixope.

Exaoa heakaxymamo Xako oxeope hemiapoa hi. Aꞌeramo oxowexaka horyweteramo. Xowe Xako hekai
oxyꞌoapyg katoeteramo Kanaꞌa pyri. Ymaꞌehe Ixake omano. Exaoa, Xako re itymi wowa rewera. Xenerowete
Awaraoa re ixomorypawa, maꞌekatoa we imanai Ixake hi Xako pe.

Xenerowete xeꞌega popewara: Xenexi 25:27 a 33:20

 Xenerowete herekakatoetei Xoxe, heꞌynia we.

Ymaꞌehe Xako iꞌaximawamo, imanai Xoxe, wemipotarete, tomaꞌe wekeꞌyna rehe. Hekeꞌyna weomawa herekatawa
re ipokoete.

Xoxe hekwehe tekeꞌyna noxigoihi, wope amote waꞌyna hi ipotareteramo, noxigoihi we hekwehe awome
imoroyroramo hekaramo we. Xoxe owygeteo aha wekeꞌyna re, tekeꞌyna ipyhyka iwepyo Xoxe eomi goa
wepytara pe.

Oawyripe oxewyryꞌyma we, tekeꞌyna imararararagi Xoxe apeyroa, imoawaipapa maroxeagawa rowya po. Hehewe
hexagokari wope pe, aipa maꞌexiroa kaꞌa pewara ipyhygi Xoxe, teꞌi, oxa. Xako naehaeteihi.

Goa wepytara herahai Xoxe Exito pyri. Exito kaꞌa ixytaohoramo, paranoa Niro poywyri, hetaete ipyriwara,
hatoeteramo. Goa wepytara iwepyi Xoxe akomaꞌe itamatareteoho waꞌe pe, taka omaꞌeapoteo iawyripe. Xowe
Xoxe imaꞌeapokatoetei oxara pe, Xenerowete iapoi maꞌekatoa ixara pe Xoxe rehe.
Ixara ratya ipotari Xoxe reroꞌamtawa. Aꞌe Xoxe einon noapoihi. —Aapo rapo maꞌeagawa Xenerowete, wexara pe
we, oxa. Koxoa ipirahyramo, xowe otemonamo: —Xepyhyg Xoxe, oxateo. Aꞌeramo hakwapetymi Xoxe.
Morakwapetymawa pope, Xoxe nopeehawihi Xerexowete rapee ropi akatawa hi. Xowe Xenerowete iapoi
maꞌekatoa ixope.

Mokoi amyna imoxewyta, Xoxe oina morakwapetymawa pope, maꞌeagawa iapoyꞌymeteo. Kwexare Waraoa (Exito
moroyroa ixiapyripewara) hexagi mokoi awomewara, maꞌete imowyata. Waraoa morogetatara nokwahawihi
awome hemiexaga momeꞌonawa.

Xenerowete imori kaꞌakwahawa Xoxe pe tokwaham awomewara momeꞌonawa, aꞌeramo Waraoa imanai toweron
Xoxe morakwapetymawa hi. Xoxe imomeꞌoi awomewara Waraoa pe: —Xenerowete pota imori 7 amynaramo
heta temiꞌoa, xowe 7 amote amyna re heta pota teꞌoa.— Iꞌi ixope.

Waraoa eipoa renopa imamari weꞌa, xowe imaga Xoxe taka moroyroramo wehewewararamo Exito pyri.
7 amyna rehe heta temiꞌoaramo, Xoxe imanai tomonyhyg temiꞌoa heta inoga. Xowe 7 amyna teꞌoramo, Xoxe
iwepywepyi eomia temiꞌoa goa hemiꞌoyꞌym waꞌe pe toꞌo, oxa.

Teꞌoa hekwehe hatoeteramo Exito pyri, Kanaꞌa pyri we. Aꞌepe hekai Xako, xoporemo heꞌynia.

Xowe Xako imana 10 waꞌyna tomomyro temiꞌoa Exito pyri. Tekeꞌyna aha Xoxe pyri torowepy ne temiꞌoa, oxa,
noeꞌapiragihi hekwehe Xoxe tekeꞌyna. Aꞌe Xoxe xowe heꞌapiragi wekeꞌyna.

Xowe Xoxe "aipa axete ixeapokatoi xerekeꞌyna?" Oxa. Xowe Xoxe ikwahapa wekeꞌyna ixeapokatotawa, imomeꞌoi
ixope: —Pekyyxeme, ixe penywyra Xoxe. Pehe peapo maꞌeagawa xewepyo exa omaꞌeapote waꞌe non, aꞌe
Xenerowete iapoi maꞌeagawa maꞌekatoeteramo. Pexan Exito pyri pexeka, ixe pota amana weka temiꞌoa penope,
penatyetoa pe we.— Iꞌi.
Xowe tekeꞌyna oxewyta ota oawyripe, imomeꞌoi wope pe Xoxe rekatawa. Xowe Xako woryweteramo eipoa
renopa.

Xako iꞌaximaweteramo hekwehe, aꞌepe hekwehe ihai Exito pyri oxexyita, xoporemo weꞌynia re. Eowyime
hekwehe hekai. Omanoyꞌyma we hekwehe Xako, imomeꞌoi Xenerowete pe toapo maꞌekatoa oxepexepexowe
taꞌyna pe.

Awaraoa re oxomorypawa, Xenerowete maꞌekatoa we imanai Ixake hi, Xako hi we, 12 taꞌyna pe, heꞌynia pe we.
12 taꞌyna raꞌyrena hekwehe ixeapoi Ihaeo 12 heꞌyiramo.

Xenerowete xeꞌega popewara: Xenexi 37-50

 Xenerowete henoi Moixoa

Xoxe imanoramo heꞌyiwera hekai ymaꞌetewe Exito pyri oxeweꞌyitaoho, heta waꞌyramo. Taꞌyrena hekwehe henoi
Ihaerita po.

Hetaete hekwehe imoxewyri amyna, Ihaerita goa oxapykaoho heta waꞌynamo, aꞌeramo hekwehe Exito pyriwara
ikyyxei ixohi. Exito pyriwara hekwehe naehaxokwerihi Xoxe rehe, xoporemo Exito pyriwara ipotywonawa re we.
Exito pyriwara iypyrogi okyyxeo ihaerita goa hi, hetaete hekwehe Ihaerita Exito pyri hekai. Aꞌeramo hekwehe
Waraoa, Exito manatara, imanai taka Ihaerita goa omaꞌeapoteo Exito pyriwara pe.

Exito pyriwara hekwehe imanai Ihaerita goa tomaꞌeapohoete aka, iapo heta awyra, amote hetoma we imana
toapo. Imaꞌeapohoetetawa herekagawi Ihaerita goa, Xenerowete iapoi maꞌekatoa ixope, aꞌeramo hekwehe heta
taꞌyramo.

Waraoa hexagi hekwehe heta ihaerita goa imemyramo, aꞌeramo hekwehe imanai tomaapan konomia akomaꞌe
iꞌarameramo paranoa Niro ropi.

Xowe koxoa ihaerita reꞌynia memyra akomaꞌe hekwehe, aꞌeramo imimi hereka omemyra, imoiroyꞌyma imohema
xahya.

Imim xokweryꞌyma omemyra, toxokaeme, oxa. Ihyke imonewi arapahe pope omemyra, imana towewoi paranoa
Niro ropi, amaropeꞌawa pyteripe, hemeꞌywa poywyri. Konomia renyra omaꞌeo oꞌoma hehe, taexag ne maranta
pa herekai xekywyra, oxa.

Xowe Waraoa raxyra hexagi arapahe, hexaka konomia ipope, xowe hereka imoxemotowio, exa omemyra non.
Iwepyi hekwehe ihaerita koxoa towereka katoete xeope, oxa. Nokwahawihi eokwexa koxoa konomia hyke. Xowe
konomia oxemotowio opaꞌaka. Xowe heraha Waraoa raxyra pe, xowe imota Konomia renroma Moixoa.

Ymaꞌehe Moixoa oxemotowipapa, hexagi Exito goa omaꞌeapote waꞌe ꞌa ihaerita imopimopigkawa. Moixoa aha
tapotywo ne ihaerita, oxa.
—Naxerexagihi xereꞌynia, oxa. Ixokai Exito pyriwara, ityma heewera. Aꞌe hekwehe hexagi awa rimo Moixoa
remiapoa.

Xowe Waraoa ikwahapa Moixoa remiapoa, imanai toxoka Moixoa, oxa pane. Moixoa ixoni aha Exito hi
awatywyꞌymohoa pope, aꞌepe ixemim katoetei Waraoa porixagawa hi oina.

Exito hi ipokoete, Moixoa hekai mixaragawa rerekataramo awatywyꞌymohoa pyri. Eowyime hatyramo, mokoi
waꞌyramo.

Kwexare Moixoa herekakatoetei mixaragawa, hexagi xowa ꞌywa henyramo, maꞌete okaipapa. Moixoa ihai
hepexona "Taexakato ne maꞌeramo pa nokaipawihi xowa ꞌywa?" Oxa. Iwygetei aha xowe Xenerowete
oporogetao ixope: —Moixo, ekyi epyroa epya hi, aꞌepe ereꞌom aꞌepe ywya xereminogte taporogeta ne neope.—
Iꞌi Xenerowete ixope.
Xenerowete imomeꞌo Moixoa pe: —Aexag weteꞌynia aenom herekagamtawa. Oromana pota wemaꞌeapotaramo
terenohem ihaerita Exito hi herekagamtawa hi we. Amana pota ixope Kanaꞌa kaꞌa, exa ne amomeꞌo rakokwehe
Awaraoa, Ixake, Xako goa pe nonta.—

Moixoa imomeꞌoi: —Xeharamo pota Ihaeo goa, imomeꞌo potari xeope: "Mo pa hera", iꞌi pota xeope. Xenerowete
iatywari: —Xene Ixe, aka ymynoho waꞌe xemori penope. Eipo ere ke imomeꞌo Ihaeo goa pe: "Iawe, Peypya
Rowete, Awaraoa Rowete, Ixake Rowete, Xako Rowete xemori pepyri. Eipo xerera Iawe, aoxeaꞌe." Iꞌi.

Moixoa ikyyxei, aꞌeramo nahapotarihi oporogetao Waraoa pe, noxeꞌegkatoihi hekwehe. Aꞌeramo Xenerowete
imori tekeꞌyra topotywo Moixoa. Xenerowete hekwehe imomeꞌoi Moixoa pe, Arao pe we, "iꞌanomtaroho
Waraoa", iꞌi.

Xenerowete xeꞌega popewara: Exoto 1-4

 10 ikatoyꞌymete

Moixoa, Arao re ihai oporogetao Waraoa pe: —Einon Iawe, Ihaeo goa Rowete imomeꞌoi: Napo aha xereꞌynia.—
Waraoa noenowihi iporogeta. Nomanaihi taha ihaerita goa, aꞌeramo imanai tomaꞌeapohoete imopohiryꞌyma.

Waraoa nomanaihi tahaeme ihaerita goa, aꞌeramo Xenerowete imori 10 ikatoyꞌymete Exito pyriwara pe. Eomia
ikatoyꞌymete rehe Xenerowete hexagokari opoahywa Waraoa pe, amote itopoetoa raꞌowa pe we.

Xenerowete iapoi paranoa Niro towyaramo. Aoxe eino maꞌete imana Waraoa taha ihaerita goa.

Xenerowete imori heta xoꞌia xoporemo Exito ywya pyri. Waraoa imomeꞌoi Moixoa pe toxokapam xoꞌia.
Xoporemo xoꞌia imanoramo, Waraoa iꞌanom xokwerohoramo, maꞌete imana ihaerita goa taha.
Xowe Xenerowete imori heta ꞌawakywa Exito pyriwara pe. Xowe hehewe imota heta merowa. Waraoa henoi
Moixoa, Arao re, tomomam ikatoyꞌymete waꞌe, xowe taha Exito hi. Moixoa oxeamogetao Xenerowete pe, xowe
Xenerowete imanapapa eomi ikatoyꞌymete Exito hi. Xowe Waraoa eomia rexaka, oꞌanom xokwerohoramo,
maꞌete imana ihaerita goa taha Exito hi.

Xenerowete imori maꞌeahya, xoporemo Exito pyriwara reomawa tomano. Aoxe einon Waraoa oꞌanom
xokwerohoramo, maꞌete imana ihaerita goa taha Exito hi.

Xowe Xenerowete imomeꞌo Moixoa pe: —Emaman tatahowa ywate katy, Waraoa rekwapyteripe, — iꞌi. Einon
iapoi iypyroka imowowowowota imopiropirona Exito pyriwara. Naipironihiete hekwehe ihaerita. Xowe Iawe
imoꞌanomohoi Waraoa. Waraoa nomanaihi ihaerita goa taha Exito hi.

Xowe hehewe, Xenerowete imori amyna ita powara irohy waꞌe Exito rehe, toxokapam xoporemo eomi okara
pope aka waꞌe. Waraoa henoi Moixoa, Arao re, xowe imomeꞌoi ixope: —Aapo maꞌeagawa. Pexe, pexeha Exito hi.
— Iꞌi. Xowe Moixoa oxeamogetao Xerexowete pe, xowe amynohoa opika.
Hehewe Waraoa xokwen iapoagapa, oꞌanom xokwerohoramo, maꞌete imana ihaerita goa taha Exito hi.

Xowe Xenerowete imota hetaete tokorohoa toꞌopapam hemityma eomi amyna ita powara irohy waꞌe
remimopepenyꞌyma.

Xowe Xenerowete imota homygohoa, maꞌete oiroramo okoꞌemamo. Homygeteohoramo aꞌeramo hekwehe Exito
pyriwara noꞌeꞌeihi oawyra hi. Ihaerita rekataipe xowe hekwehe iaraxigamo.

Eomia hekwehe pane hexagi 9 ikatoyꞌyma Xenerowete iapotawa, Waraoa aoxe aka oꞌanom xokwerohoramo,
maꞌete imana ihaerita goa taha Exito hi. Aꞌeramo hekwehe Xenerowete ixeamogetai imota mapawete ikatoyꞌyma
Exito rehe, Waraoa tomana ihaerita goa taha.

Xenerowete xeꞌega popewara: Exoto 5-10

 Pakwa morahaitawa

Xenerowete imanai tomomeꞌo Waraoa pe: —Ene imanayꞌyma ihaerita goa taha, axoka pota xoporemo
penaꞌyrypya, peneomawa raꞌyrypya we pota axokapam. — Iꞌi. Henowi hekwehe pane imomeꞌonawa, aꞌepe
Waraoa noxemoagypyhygihi Xenerowete re, maꞌete imoaro Xenerowete xeꞌega.

Xenerowete iapokatoi oxehe oxemoagypyhyg waꞌe raꞌyrypya ixokatawomyꞌyma. Xoporemo heꞌynia hexagi
hekwehe mixaragawa taꞌynpia imaronyꞌym waꞌe, ixokapyroma.

Xenerowete imomeꞌoi ihaerita goa pe: —Pepihim pexeawyra roxoroa mixaragawa taꞌynpia rowya po pipi oxowai,
iꞌarimo we. Pehyn mixaragawa raꞌa tata re, tepeꞌo kowei, pao imomarapyryꞌyma po. Pekoꞌepam ke tepeha we
Exito hi. —Iꞌi ixope.

Ihaerita goa imoaroi xoporemo Xerexowete remimomeꞌoa. Ypytonimo Xenerowete ihai xoporemo Exito kaꞌa
ropi, ixokapapa xoporemo Exito reꞌynia raꞌyrypya.
Xoporemo ihaerita goa roxoroa re hekwehe itowi mixaragawa rowya, aꞌeramo hekwehe Xenerowete ihai xowe
ixohi. Mixaragawa taꞌynpia rowya rexaka maꞌete ixokao ipopiara.

Xoporemo Exito reꞌynia noxemoagypyhygihi Xenerowete rehe, maꞌete imoaro ixeꞌega, aꞌeramo hekwehe
Xenerowete nokwenihiete aha iawyramo, ixokapapa xoporemo Exito reꞌynia raꞌyrypya.

Hakwapetymyra raꞌyrypya, Waraoa raꞌyra we xoporemo taꞌyrypya imanoi. Heta hekwehe Exito reꞌynia hapiroi
waꞌyna rewera.

Ypytonimo xowexepe, Waraoa henoi Moixoa, Arao re, imomeꞌo ixope: —Peenoi xoporemo ihaerita goa tepeha
Exito hi.— Xoporemo Exito reꞌynia we imomeꞌomeꞌoi: —Pekwa Exito hi! —Iꞌi ihaerita goa pe.

Xenerowete xeꞌega popewara: Exoto 11:1 a 12:32

 Exoto - Exito hi iatawa

Ihaerita goa horyweteramo Exito hi ohema. Nomaꞌeapote xokwerihi, ihai hepexona ywya Xenerowete remimon
potahawa. Exito reꞌynia hekwehe imanai xoporemo ihaerita goa pe hemimomeꞌoa, maꞌexiroa hepyete waꞌe.
Amotemote pewara omaꞌeapote aka waꞌe ixemoagypyhygi Xenerowete re, oxeata ihaerita goa re aha Exito hi.

Arimo Xenerowete ihai henone tataxiga rywykygimo, ypytonimo tata rywykygimo. Xenerowete hekwehe hekai
ipyri, ywya hepexon iharamo. Ihaerita goa iha potari hekwehe Xenerowete rewiri.

Kowei Waraoa weꞌynia re hexyi oxeamogetatawa: —Xaron heroxewyta ihaerita goa omaꞌeapote waꞌe, —iꞌi
oxoope. Xowe Xenerowete imoꞌanom xokwetaho Waraoa, toexagokan opoahywa ixytaohoa Xenerowete
xoporemo goa pe. Xenerowete oxepexowe, opoahywete waꞌe Waraoa hi, itopoetoa hi we.

Xowe Waraoa, oporixagawa re ihai ihaerita goa rewiri, toroweron ne heroxewyta exa omaꞌeapote waꞌe non.
Ihaerita goa hexaka Waraoa oporixagawa wepexon itoramo, omaꞌeo wewiri hexaka Ywypapawa Ipytoga,
okyyxeteo, wahewahemamo: —Maꞌe ramo pa xaxan Exito hi? Xamano rame pota!— Iꞌi oxoope.

Moixoa imomeꞌoi goa pe: —Pekyyxeme, Xenerowete ipakagtari penope, tepexokaeme.— Iꞌi. Xowe Xenerowete
imomeꞌo Moixoa pe: —Emomeꞌo goa pe taha Ywypapawa Ipytoga katy hepexona. — Iꞌi Xenerowete.

Xowe Xenerowete hapeꞌai tataxiga po ihaerita goa, aꞌeramo Exito goa noexagihi ihaerita goa.

Xowe Xenerowete imanai Moixoa topoweꞌeg ywypapawa katy. Iapoi ywytohoa tomaxaꞌag ꞌya, xowe ywya
otowypawamo ywypapawa pyteripe. Einon hekwehe iapoi tapee ihaerita goa pe taha oꞌyahapa ꞌyowai.

Ihaeo goa hahawi ywypapawa ropi, itowypawa pytera ropi. Iꞌapyterakwaohoramo ꞌya oxoowai.
Xowe Xenerowete iaopiri tataxiga Exito goa hi toexag ihaerita goa ihatawa. Xowe aha hewiri.

Exito pyriwara ihai hewiri ywypapawa pytera ropi. Ywyowara pya ipaꞌomi, maꞌete oatao. Xowe Exito goa
oapokaita oxoope, okyyxeo: —Pexe xaha ihaerita goa hi. Iawe hekai hopi, opakaka xenerehe. Iꞌi oxoope.

Xowe ihaerita goa oꞌeꞌeo aha ꞌyowai ywypapawa hi, Xenerowete imomeꞌoi Moixoa pe topoweꞌeg xokwen
ywypapawa katy. Moixoa imoaroi xeꞌega, xowe ywypapawa oxewyta iowona xoporemo Exito porixagawa
imoxekyipapa.

Ihaerita goa hexagi Exito goa rewera yxiga pope. Aꞌeramo ixemoagypyhyg Xenerowete rehe, ixemoagypyhygi
Moixoa re we, Iawe xeꞌega momeꞌonara re.
Xenerowete henohemi Ihaerita goa imaꞌeapotetawa hi, manonawa hi we, aꞌeramo horyweteramo. Aꞌe rame
imomoxyi aka Xenerowete. Heta iꞌaꞌagi xeꞌegara morahaitaipe Xenerowete pe, Xenerowete imori Exito
porixagawa hi, aꞌeramo ixeꞌegari Xenerowete pe.

Xenerowete imomeꞌoi ihaerita goa pe, toapo aka Exito hi wenohemtawa Pakwa morahaitawa rera, taeha aka
Exito werekagamtawa re, wenohemtawera re we. Iapoi Pakwa morahaitawa ixokao mixaragawa taꞌynpia
imaronyꞌyma, iꞌo pao imomarapyryꞌyma re.

Xenerowete xeꞌega popewara: Exoto 12:33 a 15:21

 Xenerowete ihaerita goa re ixomohorypawa

Xenerowete herahai ihaerita goa ywypapawa ropi, xowe heraha awatywyꞌymete pyri, heroxykaka ywytyra Xinai
po hen waꞌe. Eopeo imopoꞌomi wyroaga ywytyra koꞌa wyripe. Eowynia ywytyra re hekwehe Moixoa hexagi xowa
ꞌywa tata hapypawyꞌymtawa.

Xowe Xenerowete imomeꞌo Moixoa pe, ihaerita goa pe we: —Pehe xemoaroramo pota, pehe we imoaro
xerexomorypawa, pehe pota xereꞌynia, xeremipotarete. Pehe wexeope xereminoꞌe pota xowe, pehe pota
xemoaro ipe exa xaxetote non.— Iꞌi Xenerowete Moixoa pe.

Goa oxeapokatopapa koꞌema iroyꞌyma re exa ne Xenerowete imomeꞌoi non. Xowe Xenerowete oxexagokan
ywytyra Xinai apyteripe. Goa henowi inarogohoa, hexagi hepixapixawohoa, tataxigohoa we, henowi
takwaragawa ipytawa hatoete we. Xowe Xenerowete imomeꞌo Moixoa pe: —Exeopin exata oxepewei. — Iꞌi.
Aꞌeramo ixeopiri aha Xenerowete pyri.
Xowe Xenerowete imomeꞌo Ihaerita goa re oxomohorypawa: —Ixe Iawe, Pexara, Penowete, Ixe rakokwehe
amohem Exito, penerekagamtawa hi. Pemomoxyeme ke amote, Ixe xowe ke xemomoxy ipe.—

—Peapoeme ke haꞌowa pexexeope, maꞌete pexeꞌyina ke haꞌowa rekwapyteripe pexekopytao, Ixe Pexara,
Penowete, xeogete penehe. Peenoiteeme ke xerera pexeka. Peneha ke setimo koꞌema re, xawato (topoa
tawaypya), aexyi eokwexa koꞌema penope tepeneha xerehe.—

—Pemomoxy pexexope, pexehyke we. Pexoxokaeme ke. Perekaeme ke koxoa pexexatyꞌyma, koxoa we ke
towerekaeme ke akomaꞌe omenyꞌyma. Pemonaeme ke. Petemoneme ke. Pepotareme oxoawyra tareka ne
wexeope, pexexayꞌma, maꞌete ipotata amote ratya, pepotareme oxomena we tareka ne wexeope, maꞌete amote
imaꞌexiroa we ipotata tareka ne wexeope, pexexayꞌyma.—

Xenerowete imopinimi mia 10 xeneremimoaroroma mokoi itapewa rehe, xowe imota Moixoa pe. Xenerowete
imomeꞌo hekatawoma tomoaro, amotemote hemimora we. Amonamo ihaerita goa imoaro Xenerowete
remimomeꞌoa, Xenerowete iapo potari maꞌekatoa ixope, herekakatoeteo we. Amonamo imoaroyꞌyma,
Xenerowete pota nomomoriahowaꞌowihi.
Imomeꞌoi we toapo hemimomeꞌoa ropi hyroaga. Tyroaga "Xenerowete rexakawa" hen waꞌeroma. Mokoita
imoxowaꞌagi xepykam xytaohoa po. Xaxetotetoa moropetega xowe pota ikei xepykawohoa po imoxowaꞌagtawa
pope, Xenerowete rekatawa ryroa, Xenerowete pe xowe hemimonia, eipoa po hekwehe henoi aka Ihaerita goa.

Amome goa imoaroyꞌyma Xenerowete xeꞌega hemimora, eokwexa toweraha oxepexowe maꞌexiroa Xenerowete
remipyroa hapyo warikore apytera re. Xenerowete ryrohaga renone, herahateo Xenerowete pe. Xowe xaxetote
pota ixokai maꞌexiroa Xenerowete remipyroa, ihen howya, hapypapa hete Xenerowete pe, howya po ihywi goa
maꞌeagawa, ipireipapa goa Xenerowete pe. Xenerowete henoꞌei Aroa, Moixoa rekeꞌyra, taꞌyna we Xenerowete
xaxetoteramo taka, oxa.

Xoporemo ihaerita goa ixomorywi imoaro Xenerowete xeꞌega, imomoxyo aka Xenerowete xowe, Xenerowete
reꞌyniamo taraka ne, oxa. Eope amoteramo xowe xepe iapo maꞌeagawa ikatoyꞌymete Xenerowete pe.

Moixoa ikwepaweteramo ywytyra apytera re oporogetao Xenerowete pe ymaꞌetewe. Aꞌeramo ihaerita goa
ikwerairamo haaronawa hi. Xowe ihaerita goa ihai owyka Arao re imomeꞌo ixope: —Eapo oreope topoagawa
raꞌowamo itagawa po, toroenoi ne Xenerowete po.— Iꞌi Arao pe.
Xowe Arao iapoi itagawa po tapiꞌiragawa memyra raꞌowamo. Xowe Ihaeo goetoa imomeꞌoi: —Awa topoagawa
xenerekyi Exito hi.— Iꞌi oxoope. Xowe hapyo maꞌexiroa imomoxyo tapiꞌiragawa raꞌowa. Xowe Xenerowete
opirahyeteramo maꞌeagawa iapotawa re. —Axoka pota xoporemo eomia goa.— Iꞌi Xenerowete Moixoa pe.
Xowe Moixoa oporogetao Xenerowete pe ihaerita goa rehe. Xowe Xenerowete henopa Moixoa porogeta,
aꞌeramo nomomawihi.

Xowe Moixoa ota ywytyra hi, hexaka haꞌowa, opirahyeteramo, ipopekao itapewa, Xenerowete 10
xeneremimoaronawa hehe imopinimyra.

Xowe ipyhygi haꞌowa, imoꞌimoꞌio, imomarapa howa ꞌya re, xowe imana toꞌyꞌo Ihaeo goa. Xowe Xenerowete imori
ikatoyꞌyma goa pe, heta tomano.

Xowe Moixoa oxeopita aha oxewyta ywytyra re. Oporogetao Xenerowete pe goa maꞌeagawa apotawa re,
tomokaxym. Xenerowete henowi Moixoa porogeta. Xowe weakaxymamo imaꞌeagawa hi. Moixoa imopinimi
Xenerowete xeꞌega 10 xeneremimoaronawa amote itapema rehe, iponekwapa wemipopeka. Xowe Xenerowete
herahao ihaerita goa ipokoete ywytyra Xinai hi, herahao ywya wemipyroa hepexona henone aha.

Xenerowete xeꞌega popewara: Exoto 19-34

 Iatai xowe aka awatywyꞌymete pyri

Xenerowete imoꞌei Ihaerita goa xoporemo hemimoaroroma re, exa ne ixomorywi non. Xowe ihaerita goa aha
ywytyra Xinai hi. Xenerowete herahai ihaerita goa, ywya wemipyroa hepexona. Eowynia ywya pyri aka waꞌe henoi
Kanaꞌa po. Xenerowete hekwehe ihai ihaerita goa renone Kanaꞌa pyri, ixexagokari tataxiga rywykygimo.

Xenerowete ymaꞌetewe ipyroi ywya wemimanaroma Awaroa pe, Ixake pe, Xako pe, taꞌyrena pe we. Ymaꞌetewe
hekwehe eowyi hekai heta goa amotemote pewara. Eomia goa hekwehe henoi Kananea po. Kananea goa
hekwehe nomomoxyihi Xenerowete, maꞌete imoaro we Xenerowete aꞌeteohoa, imomoxyi hekwehe aka
topoetoagawa raꞌowa, heta we hekwehe iapoi aka maꞌeagawohoa.

Xenerowete imomeꞌoi ihaerita goa pe: —Xee einoxi ke penoꞌemam kananea goa eowynia ywya pexexeope
xeremimanaroma hi. Pexomoryweme ke pexekakatoetetawoma hehe, maꞌete pexexatyramo hehe. Pemopepema
ke xoporemo itopoa raꞌowa. Amonamo imoaroyꞌyma xexeꞌega, pemoaro rapo pexeka itopoa raꞌowa, maꞌete
rapo pexeka xemoaro.— Iꞌi Xenerowete.
Ihaerita goa Kanaꞌa re owahema, Moixoa henoꞌei 12 akomaꞌetoa, oxepexepexowe Ihaeo reꞌyite, imomeꞌo
katoetei ixope, ywya rexakawoma akomaꞌetoa we: —Tomaꞌe ke kananea goa rehe, hatoete pa, amonamo
watoyꞌymamo?— Iꞌi ixope.

12 akomaꞌetoa ihai Kanaꞌa kaꞌa pyri, omaꞌeo hehe 40 okoꞌemamo, xowe oxewyta ota, imomeꞌo: —Ywya
ikatoeteramo imoxehom katoeteo hemityma.— Eipo iꞌi we: —Heta hetoma rapeatara hatoeteramo, ipyriwara
ixytaohoramo! Xane xerepakaka hehe, aꞌe pota xenexokapamta!— Iꞌi.

Kowei mokoi akomaꞌe ywya rexakara Xoxoꞌe, Karewe re imomeꞌoi: —Aꞌeteohoa Kanaꞌa pyriwara ixytaohoramo,
watoeteramo, xane xaxokapamta, Xenerowete pota ipakagi xeneope hehe.— Iꞌi.

Goa noenomkatoihi Karewe, Xoxoꞌe xeꞌega re, aꞌeramo ipirahyeteramo Moixoa pe, Arao pe we. Eipo iꞌi ixope: —
Maꞌe ramo pa rakokwehe orereroripe ka katy, ꞌoga ywya ikatoyꞌyma pyri? Araka amo rakokwehe rike Exito pyri,
toromanoeme ne makakawa pyri, oreratyetoa, oreraꞌyna we towerahaeme mo exa omaꞌeapote waꞌe non, — iꞌi.
Imamaita hekwehe Moixoa, Arao re, toroexag ne amote oromoroyroramo "torereraha ne Exito pyri." Iꞌi oxoope.
Xowe Xenerowete ipirahyeteramo goa oxehe ixemoagypyhygyꞌymamo, xowe ota oxexagokata Tyroaga
Xenerowete Rexakawa pope, imomeꞌo goa pe: —Pehe nepekaihi xekaty, aꞌeramo pota peka pexeatao xowe
awatywyꞌymohoa pyri, xoporemo eomine 20 ikwenetei ixemotowitawa eomia pota imanopamtari
awatywyꞌymohoa pyri. Xoxoꞌe, Karewe re xowe pota nomanoaꞌowihi awatywyꞌymohoa pyri. Ike potari ywya
xeremipyroa pope.— Iꞌi Xenerowete.

Xowe ihaerita goa eipoa henopa, naeaeteihi omaꞌeagawa rehe, xowe oxeapokato aha opakaka Kanaꞌa goa rehe.
Moixoa imomeꞌoi ixope pane: —Pekwaeme! Xenerowete pota nepepotywoihi. — Iꞌi. Imoaroyꞌyma ixeꞌega, aha
xowe opakaka Kanaꞌa pyriwara re.

Ipakakawipe Xenerowete nopotywoihi. Aꞌeramo hekwehe heta imanoi, kananea goa herekai opakakawa. Ihaerita
omanoyꞌym waꞌe, ihai Kanaꞌa kaꞌa hi, oatao xowe aka awatywyꞌymohoa pyri, 40 imoxewyta amyna.

40 imoxewyta amyna oatao xowe aka awatywyꞌymohoa pyri, Xenerowete hekwehe imori xoporemo ixope
hemipotara. Imori hekwehe ixope pao ywaga hi, "mana" po hen waꞌe; Xenerowete we hekwehe imori ixope,
wyra iporoipipia "kotonia" po hen waꞌe toꞌo haꞌa, oxa. 40 imoxewyta amyna, oatao awatywyꞌymohoa pyri, hyroa,
ipyroa we hekwehe notaragihi, maꞌete ipyroa we oawayꞌymynamo.
Xenerowete imoꞌeꞌei ꞌya ita xytaohoa hi ixope, exane Aꞌe xowe iapoi aka non, imoꞌeꞌeo ꞌya ixope. Einoxi hekwehe
ihaerita goa heroxeꞌegi aka Xenerowete, Moixoa we, iporogetai xemimi hehe. Einoxi xekwehe Xenerowete
imoaroi Awaraoa, Ixake, Xako re oxomorypawa.

Amoteramo ihaerita goa pe namaꞌetywi ꞌya toꞌyꞌo, xowe Xenerowete imomeꞌo Moixoa pe: —Exeꞌeg ita xytaohoa
pe, toꞌeꞌe ꞌya ixohi— iꞌi. Moixoa nomoaroihi Xenerowete xeꞌega, ihaerita goa remiexagamo, aꞌeramo inopoi
mokoi ita oywyra po. Xowe oꞌeꞌeo ꞌya ita hi. Xenerowete ipirahyeteramo Moixoa pe, eipo iꞌi ixope: —Ene
nerekeaꞌowihi ywya xeremipyroa pope.— Iꞌi.

40 imoxewyta amyna, oatao awatywyꞌymohoa pyri, xoporemo Xenerowete reroxeꞌekara hekwehe imanoi. Xowe
Xenerowete heraha xokweta ihaerita goa ywya wemipyroa poywyri. Moixoa hekwehe iꞌaximaweteramo, aꞌeramo
Xenerowete henohemi Xoxoꞌe taka ipotywonaramo. Xenerowete hekwehe imomeꞌo Moixoa pe: —ymaꞌehe pota
amon amote wexeꞌega momeꞌonara exa ene non.— Iꞌi hekwehe ixope.

Xenerowete imomeꞌoi Moixoa pe toxeopin aha ywytyra apyteripe, toexag ywya wemipyroa. Moixoa hexagi ywya,
aꞌe Xenerowete nomanaihi toke ipope. Xowe Moixoa omano, ihaerita goa 30 ikoꞌemamo hapiro Moixoa. Xoxoꞌe
iponekwawi aka Ihaerita goa moroyroramo. Xoxoꞌe moroyroramo hekatawa hekwehe ikatoeteramo, imoaroi
hekwehe Xenerowete xeꞌega, oxemoagypyhyka we hehe.

Xenerowete xeꞌega popewara: Exoto 16-17; Numero 10-14, 20, 27, Deuteronomio 34
 Ywya Xenerowete remipyroa

Hyꞌy rame, ihaerita goa toke rame ywya ipyromyra pope, Kanaꞌa. Xoxoꞌe imanai mokoi akomaꞌe tomaꞌe hetoma
rehe, Kanaꞌa ywya pyri, Xeriko retoma pyri. Xeriko ropiahawa hekwehe ixytaohoramo. Eowyime hekwehe hekai
koxoa oxepyroyꞌym waꞌe, hera Haawe, aꞌe hekwehe ipotywoi imima mokoi akomaꞌe retoma re omaꞌe aha waꞌe,
imohema imana hetoma hi. Iapoi hekwehe einon oxemoagypyhyg hekwehe Xenerowete aꞌeteohoa re. Hetoma
re omaꞌe aha waꞌe, imomeꞌoi, Haawe pe: —Noroxokaꞌowihi ene, nereꞌynia we, Ihaeo goa Xeriko retoma
imogomogoiramo ipyriwara we.— Iꞌi.

Ihaerita goa Kanaꞌa kaꞌa pope oke potata, iꞌyahawi hekwehe paranoa Xotao ropi. Xenerowete imomeꞌoi Xoxoꞌe
pe: —Emomeꞌo xaxetote goa pe aꞌe hypy taha tenone.— Xaxetote goa hekwehe ipomi opya paranoa Xotao.
Xowe hekwehe paranoa opytao ywypawamo, xowe hekwehe ihaerita goa ꞌya typawa ropi, exa ywya ropi aha
non.

Xowe Xotao ropi iꞌyahawamo, Xenerowete imomeꞌoi Xoxoꞌe pe Xeriko retoma re ipakakawoma. Ihaerita goa
imoaroi Xenerowete xeꞌega, xaxetote, porixagawa re iwagi Xeriko retoma re oxepexowe koꞌema re, 6
okoꞌemamo.
Setimo okoꞌemamo, iwagi 7 (sete) Xeriko retoma re. Mapawete re xaxetote goa ipyi takwaragawa, xowe
porixagawa xoporemo hahemohoramo.

Xowe Xeriko retoma ropiahawa okoita! Xowe ihaerita goa imogomogoita xoporemo Xeriko retoma, exa ne
Xenerowete imomeꞌoi ixope non. Haawe, heꞌynia re xowe hekwehe noxokaihi, aꞌe hekwehe ixeari ihaerita goa
reꞌyiramo. Xowe hekwehe amote pewara henopa Xeriko retoma imogomogoitawa, aꞌeramo hekwehe ikyyxetei
ihaerita goa hi, "opakaga po ota orerehe no", oxa.

Xenerowete hekwehe imomeꞌoi ihaerita goa pe: —Toapoeme takaeme opaxeramo amotemote Kanaꞌa goa
pyriwara re,— oxa. Xiweonita goa, ihai otemonamo Xoxoꞌe pe, ipokoete pewara ore, iꞌite ixope, aꞌeramo
hekwehe ihaerita goa iapoi oxomorypawa hehe, maꞌete imomeꞌoypyo Xenerowete pe.

Ihaerita goa ipirahyeteramo xiweonita goa oxeope itemonamo. Einoxi iapoi ixope wemimomeꞌoa oxomorypawa,
Xenerowete rekwapyteripe iapoi aꞌeramo. Xowe amote pewara, amoheo po hen wa'e, ikwahapa xiweonita goa
ihaerita goa re ixomorypawa, taka ikaty. Xowe oxeꞌata amotemote pewara, toropakag ne xiweonita goa re.
Iypyroka opakaka hehe, xiweonita goa imanai oxeꞌega momeꞌonara taha Xoxoꞌe pe imomeꞌo: —ton orepotywo
— oxa.
Xoxoꞌe imoxomonyhygi xoporemo ihaerita goa porixagawa makakara, taraha ne iypytomokohoa ropi oroxykaka
xiweonita goa re, oxa. Kwarahya hemyꞌymamo we, kowei ipakagi amohea reꞌynia re.

Xenerowete ipakagi Ihaeo pe eokwexa koꞌema rehe. Xenerowete iweꞌapytoni amohea reꞌynia topakag oxowehe,
imogoi we ita xytaohoa. Aꞌeramo heta amohea reꞌynia ixokai.

Xenerowete we imopytai kwarahya ihaerita topakagypy amohea reꞌynia re, oxa. Eokwexa koꞌema re Xenerowete
ihaeo goa pe imanai towereka opakakawa.

Xowe Xenerowete imomapa eomia Kananea goa porixagawa, heta amotemote pewara Kananea reꞌynia
oxomonyhyg oxeata, toropakag ne ihaerita goa re, oxa. Xowe Xoxoꞌe, ihaerita goa re imomapa xowe.

Xowe hereka amohea reꞌynia hi opakakawa, Xenerowete imaxaꞌaxaꞌagi iywya wemipyroa 12 ipewewera, xowe
imanamana oxepexepexowe Ihaeo reꞌyite pe. Xowe Xenerowete oapo maꞌekatoa Ihaeo goa pe, Ihaeo
akakatoeteo xoporemo goa oxepoywyriwara rehe.

Xowe Xoxoꞌe oꞌaximawamo. Oxomonyhyg xoporemo Ihaeo goa, iwehao goa Xenerowete pe ywytyra Xinai pyri
wemimoꞌekwera rehe. Ihaeo goa imomeꞌoi: —Araka pota oroxemoagypyhygeteo Xenerowete re, imoaroi
hemimora. —Iꞌi ixope.

Xenerowete xeꞌega popewara: Xoxoꞌe 1-24

 Moroyroa Ihaeo potywonara

Xoxoꞌe manoramo, ihaerita goa nomoaroxokwerihi Xenerowete xeꞌega, maꞌete iapo we hemimora, maꞌete
imomapa Kananea okaꞌa popewara. Xowe Ihaeo goa iypyroka imoaro kananea goa topoetoa raꞌowa,
weakaxymamo Xenerowete Iawe Aꞌeteohoa hi. Ihaeo goa hekwehe namaꞌetywihi moroyro ixiapyripewara,
aꞌeramo oxepewepewei iapoi aka wemipotara.

Ihaeo reꞌynia hekwehe nomoaroihi Xenerowete xeꞌega, aꞌeramo Xenerowete imanai ixiwaryꞌyma topakag ihaerita
rehe, tomim imaꞌexiroa, imogomogoita iawyra. Ymaꞌetewe, ihaerita goa nomoaroihi Xenerowete xeꞌega aka,
ixiwaryꞌyma herekagaweteo, aꞌeramo hekwehe ihaerita goa imomeꞌoi omaꞌeagawa Xenerowete pe, torepotywo
ne, oxa.

Xenerowete imori moroyroa ipotywonaroma, tomomam ixiwaryꞌyma, ihaerita ixewyri akakatoeteo. Kowei
hekwehe ihaerita goa heakaxymamo Xenerowete hi, oxewyta imoaro xokweta topoetoa raꞌowa. Aꞌeramo
Xenerowete hekwehe iapoi mixianita goa ipoywyriwara, imanai topakag hehe, hereka opakakawa.
7 (sete) imoxewyta amyna mixianita ipyhygi xoporemo Ihaeo remityma. Ihaerita goa hekwehe ikyyxeetei,
amome hekwehe oxemima itakwara ropi. Hyꞌy rame, ihaerita goa oxeꞌegahyoho oxapiro Xenerowete pe: —
torepotywo ne, — oxa.

Kwexare, oxepexowe akomaꞌe Ihaeo reꞌynia, hera Xiteao, mixianita goa hi okyyxeo, heroxemimi hekyo wemityma
raꞌynia. Iawe ywagimewara itori Xiteao pyri, oporogetao ixope: —Xenerowete hekai nepyri, ene akomaꞌe
makakara hatoete waꞌe. Ekwa hekyita Ihaeo goa mixianita goa herekagamtawa hi. —Iꞌi.

Xenerowete imomeꞌoi Xiteao pe tomogomogoi wope ita oxoapytepyteri pewara topoa raꞌowa pe hemiapoa.
Xiteao ikyyxei goa hi, aꞌeramo haaroi taomyg ypytonimo, taapo ne einon oxa. Ipoywyri iapoi iyahoa ita
oxoapytepyteri pewara, xowe hehe maꞌexiroa Xenerowete remipyroa hapyo, Xenerowete Aꞌeteohoa pe.

Oxeꞌiwe koꞌemawyꞌymamo, goa hexagi ita oxoapytepyteri pewara imogomogoiramo, xowe opirahyeteramo. —
Imamaita Xiteao toroxoka ne, —oxa. Tope imomeꞌoi ixope: — Maꞌeramo pa pepotywo pexetopoa raꞌowa?
Amonamo aꞌe Xeneroweteramo, napo aꞌe oxepotywo!— Goa ixeꞌega renopa, noxokaihi Xiteao.
Xowe mixianita goa oxewyta hetaete herota makakara, toromim ne ihaerita goa maꞌexiroa, oxa. Xiteao
imoxomonyhyka Ihaeo reꞌynia topakag we hehe, oxa, makakaipe ahayꞌyma we imomeꞌoi Xenerowete pe toapo
mokoi maꞌexiroa toroexag ne, "aipa axete pota orowereka oropakakawa Ihaeo katy?" Oxa.

Ixypya maꞌexiroa hemiaporoma, Xiteao ipaekyi tyroa aꞌywera ywype, xowe imomeꞌo Xenerowete pe oxeꞌiwe we
ꞌyapya tomoakym tyroa aꞌywera, maꞌete imoakyma ywya. Xenerowete iapoi hemimomeꞌoa. Iroa maꞌexiroa
hemiexagokaroma, Xiteao imomeꞌoi Xenerowete pe ꞌyapya tomoakymam ywya, maꞌete imoakyma tyroa aꞌywera.
Xowe Xenerowete iapoi hemimomeꞌoa. Eomia rexaka, Xiteao oxemoagypyhyg oxehe, ikwahawi Xenerowete
hekyi taka Ihaeo moroyroramo ipotywonaramo, towereka mixianita goa re opakakawa.

Xowe 32 mio (trinta e dois mil) makakaroma itori Xiteao pyri, Xenerowete —hetaete porixagawa makakara, —iꞌi
Xiteao pe. Xowe Xiteao imomeꞌoi: —Mixianita goa hi okyyxe waꞌe pe, toxewyn aha oawyripe, —iꞌi ixope. 22 mio
(vinte e dois mil) porixagawa makakara ihai oawyripe. Xowe Xenerowete imomeꞌo Xiteao pe: —Hetaete we
porixagawa makakara.— Xowe Xiteao imanapapa werehe, 300 (trezentos) porixagawa xowe aka ipyri.

Eokwexa ypytonimo, Xenerowete imomeꞌoi Xiteao pe: —Ekwa mixianita goa ixagapotawa pyri, tereenom
oxoope iporogetatawa, tepekyyxeme pexeka ixohi.— Xowe Xiteao oxypa aha mixianita goa ixagapotawa pyri,
xowe henopa mixianita porixagawa oiroa pe awome wemiexaga imomeꞌoramo ixope. Iroa iatywari: — Awome
neremiexaga imomeꞌoi Xiteao makakara pota xenemomawi.— Iꞌi. Xowe Xiteao eipoa renopa, ixeꞌegari
Xenerowete pe, imomoxyo.
Xiteao oxewyta aha oporixagawa pyri, xowe imanamana takwaragawa, xaꞌeꞌoma hyrokwera, ehiretoma kanynia
pirimowara. Hekwara pyi hekwehe imima xaꞌeꞌoma pope, mixianita makakara toexageme we henya, oxa, xowe
hekwehe aha iaerowaka mixianita goa ixagapotawa.

Xowe Xiteao oxeꞌeka oporixagawa makakara pe, xowe ikao xaꞌeꞌoma, henohema kanynia xaꞌeꞌoma hi, xoporemo
ipyi takwaragawa, wahemohoramo: —Oxepexowe kyꞌepokoa Xenerowete re, Xiteao rehe we!— iꞌi.

Xenerowete iweꞌapytonohoi mixianita goa, iypyroka ixokaxokao weꞌyite, xowe oxona aha. Xowe Xiteao henoina
xoporemo oporixagawa oawyripe aha waꞌe, torepotywo ne aha mixianita goa rewiri, oxa. Ixokai hekwehe 120
mio (120 mil) mixianita makakara, imoꞌeꞌeo hekwehe mixianita reꞌynia korera okaꞌa hi. Eokwexa re Xenerowete
hekyi Ihaeo herekagamtawa hi.

Goa ipotari hekwehe pane Xiteao moroyroramo ixiapyripewaramo hekatawa. Aꞌe hekwehe Xiteao nakapotarihi.
Xiteao imomeꞌo weꞌynia pe: —Tomon amoa mixianita goa koakygimewara oro powara xeope.— iꞌi. Heta
hekwehe heꞌynia imanai oro ixope.
Oro weꞌynia oxoope hemimora po, Xiteao iapoi xaxetote apeyroa pirimowara, xowe ihaerita goa iypyroka
imomoxyo iapeyroa exa topoa raꞌowa non. Xowe Xenerowete imota maꞌeagawa ihaerita goa pe, topoa raꞌowa
imomoxy hekaramo, imanai ixiwaryꞌyma topakag hehe. Hyꞌy rame, xowe ihaerita goa oxeꞌegahyo oxapiro
Xenerowete pe, torepotywo ne, oxa. Xowe Xenerowete imota amote moroyroa ipotywonaroma ixope toekyi
ixiwaryꞌyma herekagamtawa hi.

Ymaꞌetewe ihaerita goa iapoi aka maꞌeagawa, Xenerowete imota ixope maꞌeagawa. Xowe ihaerita goa imomeꞌoi
omaꞌeagawa wemiapoa Xenerowete pe. Xowe Xenerowete imota amote moroyroa ipotywonaroma, toekyi
ixiwaryꞌyma herekagamtawa hi. Ymaꞌetewe hekwehe heta imanai ihaerita goa pe moroyroa ipotywonaroma,
toekyi ixiwaryꞌyma herekagamtawa hi.

Hyꞌy rame hekwehe ihaerita goa imomeꞌoi Xenerowete pe tomon oreope moroyroa ixiapyripewaroma exa ne
goa ipoywyriwara non. Ipotari hekwehe moroyroa ixiapyripewara ipokohoa, hatoete waꞌe, taha henone ixope
makakawipe. Xenerowete nopotarihi hemimomeꞌoa, einoxi hekwehe imori ixope imoroyroroma ixiapyripewara
exa ne imomeꞌoi non.

Xenerowete xeꞌega popewara: Morogetakwaparetetoa 1-3; 6-8

 Xenerowete xomohorytawaTawia re

Xaoa hypy hekwehe ihaerita goa moroyroa ixiapyripewara. Aꞌe hekwehe iaroeteramo, oxytaohoramo exa ne
ihaerita goa ipotari non. Xaoa hekwehe ikatoeteypyramo Ihaeo moroyroa ixiapyripewaramo akaypyo, hehewe
iypyroka maꞌete imoaro Xenerowete xeꞌega. Aꞌeramo Xenerowete hexagi —amote akomaꞌe taka moroyroa
ixiapyripewaramo Xaoa ponekwapawamo.—

Moroyroa ixiapyripewaramo aka waꞌeroma hera Tawia. Aꞌe hekwehe awaramete, mixaragawa rerekatara, Werem
pyriwara, Ihaeo kaꞌa pewara. Aꞌe hekwehe mapawete towa raꞌyra, aꞌe we iaroeteramo, watoeteramo. Kwexare
wowa mixaragawa rerekao ixokai xawapipymohoa, amoteramo ixokao ehiraragawa xytaohoa (Urso). Tawia
hekwehe noxemohemteihi aka, ikatoeteramo, oxemoagypyhyka Xerexowete re, imoaro ixeꞌega we.

Tawia hekwehe moroyrohoroma, makakara hatoeteroma we. Oawarameeteramo we ixokai makakara ixytaohoa,
hera Goria. Goria makakara oporoxokatawa ikwahaparete, aꞌe hekwehe hatoeteramo, Ihaeo goa xiwaryꞌyma,
wiritea reꞌynia hi. Ixokayꞌyma we,Tawia imomeꞌoi ixope: —Ene erexan xerehe herota kyꞌepokohoa, oꞌywaxiohoa,
exeatawohoa we, aꞌe ixe axan ihaerita makakara Rowete rera re, aꞌene eremamai eꞌoma.— Xowe Tawia ipyhygi
wyra ꞌakamekawa, imamata ita Goria rekwaripe. Goria omano! Xenerowete ipotywoi Tawia toxoka Goria, hekyi
we Ihaeo goa wiritea goa herekagamtawa hi. Amoteramo we Tawia heta hekwehe herekai ihaerita goa
xiwaryꞌyma hi opakakawa, xowe Tawia hekwehe heꞌynia imomoxyi aka, herekagampotahawa hi. Amoteramo we
Tawia heta hekwehe herekai ihaerita goa xiwaryꞌyma hi opakakawa, xowe Tawia hekwehe heꞌynia imomoxyetei
aka.
Xaoa imoxari aka Tawia, taxoka ne oxa pane hekai hehe. Tawia hekwehe ixemimi aka ixohi. Amoteramo Xaoa ihai
imomyro Tawia taxoka ne, oxa. Okeo aha itakwara ropi Tawia xeminawa pope, aꞌe noexagihi. Tawia hexagi Xaoa,
aha ipoywyri, eoperamo we mo ixokai, aꞌe noxokaihi xowe. Tawia hekwehe iapeyroa xowe imararagi, taexagokan
ne ixope ixoka potahawyꞌyma oxa. Nakapotarihi moroyroa ixiapyripewaramo iponekwapawamo. Tawia noxokaihi
Xaoa naworywihi rapo Wetowete, oxa. Xenerowete imagai Xaoa moroyroramo, ihaerita goa imomeꞌoramo.

Hyꞌy rame Xaoa imanoi opakakaipe. Xowe Tawia imagai taka moroyroa ixiapyripewaramo Ihaeo goa pe.
Moroyroramo aka ikatoeteramo, aꞌeramo goa ipotaretei. Xenerowete iapoi maꞌekatoa Tawia pe, aꞌeramo Tawia
hekwehe hekakatoetei. Tawia ihai heta makakawipe. Xenerowete iapoi towereka ymyn. Tawia ipoxykai
Xeroxarem wetoma, aka eowyime imoxytaoho ipotapyreteramo (capital). Tawia moroyroramo hekaramo Ihaeo
reꞌynia hekwehe heta imaꞌexiroramo, watoeteramo we.

Xowe Tawia oxeamogetao. —Tamoxog ne Xenerowete awyroma, xoporemo ton, imomoxyo, hapyo maꞌexiroa
ipope Xenerowete pe, — oxa. 400 (quatrocentos) hekwehe imoxewyri amyna, ihaerita goa aka imomoxyo
Xenerowete, hapyo maꞌexiroa ixope maꞌexiroa pirera raga rokara pope, Moixoa remiapoa pope.

Xenerowete imanai taha Tawia pyri Natag, Xenerowete xeꞌega momeꞌonara, tomomeꞌo ixope: —Tawi, eneyꞌymta
neremoxogihi xeope xeawyroma, ene moroxokatara, aꞌeramo neraꞌyra pota imoxogi xeawyroma. Neraꞌyrena
pota hekaymyni Ihaeo moroyroramo. Eokwe Xenerowete henohemi toapokato goa imaꞌeagawa hi. Mexia
(Xenerowete remimonroma) wepota neraꞌyrena mo no!— Natag iꞌi Tawia pe.
Eipoa renopa, Tawia kowei imomeꞌoi Xenerowete pe: —Nekatoete xeope!— iꞌi, oxeꞌegata Xerexowete pe.
Xenerowete oxeope maꞌexirohoa hemiaporoma re. Tawia nokwahawihi Xenerowete hemiapotawoma, aꞌe
hekwehe ixemoagypyhygetei hemiaporoma rehe. Xowe Xenerowete imori hekwehe Mexia 1000 (mil) amyna
imoxewyramo wixe.

Tawia hekwehe moroyroramo hekai ymaꞌetewe, iapo maꞌekatoa xoporemo goa pe, imoaro Xenerowete xeꞌega,
aꞌeramo Xenerowete iapoi maꞌekatoa ixope. Oꞌaximawereramo Tawia iapoi maꞌeagawa, ikatoyꞌymete
Xenerowete pe.

Amoteramo, xoporemo oporixagawa ipokoete makakawipe iharamo, Tawia ikeri, okaropapa. Opaka, imaꞌei
momokwara ropi, xowe hexaka koxoa iaroete, hera Watexewa, ixahogamo.

Tawia imaꞌetei amo kwe katy, aꞌe nomaꞌeteihi, xowe imanao toweron Watexewa ipyri. Aꞌe heroꞌawi, xowe imana
taha oxewyta oawyripe. Amoteramo Watexewa imanai weꞌynia tomomeꞌo Tawia pe oporoꞌatawa rehe.
Watexewa totyra, hera Yria, Tawia moroxokatara ikwahaparete hekwehe. Tawia hekwehe imanai Yria, toxewyn ota
makakawa hi. Xowe imana taha oawyripe. Toweroꞌam watya, oxa pane. Yria hekwehe nopotarihi. —Nahaꞌowihi
weawyripe, wepaxetoa makakawipe hekaramo, — iꞌi oxeope. Xowe Tawia imana xokweta Yria imoxewyta
makakawa pyri, porixagawa moroyroa pe imomeꞌoi: —Tenonete ke taha Yria, toxoka ixiwaryꞌyma. — Iꞌi.

Xowe Yria manoramo, Tawia watyramo Watexewa re. Kwexare Watexewa imoꞌari omemyra. Xenerowete
ipirahyete Tawia remiapoa re. Xowe Xenerowete imana Natag taha Tawia pyri, tomomeꞌo ixope imaꞌeagawa Yria
xokatawa re, hatya rerekatawa re we. Tawia imomeꞌoi maꞌeagawa wemiapoa Xenerowete pe. Xenerowete
heakaxymamo imaꞌeagawa hi. Omanoyꞌyma we Tawia hekai imoaro Xenerowete xeꞌega, einoxi aka maꞌeagawa
oxehe ikoiramo.

Tawia maꞌeagawa wepytawamo Xenerowete Tawia raꞌyra ixokai. Heta we hekwehe Tawia reꞌynia, ixoweroxeꞌegi,
oxoxokao, opakaka oxowehe Tawia hekaramo we. Tawia hekwehe hetygi watoa pipiere. Tawia iapoi hekwehe
maꞌeagawa Xenerowete pe, einoxi Xenerowete iapoi wemimomeꞌokwera Tawia pe. Amoteramo Tawia Watexewa
imomoroꞌai. Konomia rera Xaromao.

Xenerowete xeꞌega popewara: 1Xamoꞌeo 10; 15-19; 24; 31; 2Xamoꞌeo 5; 7; 11-12
 Moroyroa imaxaꞌaxaꞌagtawa

Ymaꞌehe Tawia imanoi. Xowe taꞌyra Xaromao aka moroyroramo ixiapyripewara Ihaeo goa pe iponekwapawamo.
Kwexare Xenerowete imomeꞌoi Xaromao pe: —Maꞌe pa erepotan taapo ne neope? —Iꞌi ixope. Xaromao
imomeꞌoi Xenerowete pe: —Emon xeope kaꞌakwahawa,—iꞌi. Xenerowete horyweteramo Xaromao remimomeꞌoa
rehe. Xenerowete hekwehe imokaꞌakwahawetei Xaromao. Namaꞌetywihi amote okaꞌakwahawete waꞌe exa aꞌe
non, heta we imaꞌexiroroma imota ixope. Heta we Xaromao ikwahawi maꞌexiroa, heta we hekwehe iapoi
maꞌekatoa xoporemo goa pe moroyroramo aka.

Xaromao imoxogi Xeroxarem pyri Xenerowete awyroma, eokwene towa imoxogi werehe. Tawia hekwehe
inogatoetei awyra apotawoma. Xaromao Xenerowete awyra iapopawamo hekwehe, ihaerita goa hetygi hekwehe
maꞌexiroa pirera awyra. Iypyroka imomoxyo Xenerowete iawynte pope, hapyo maꞌexiroa Xenerowete pe
Xenerowete awyra rokara pope. Xenerowete hekwehe hekai weꞌynia pyri, iapoi maꞌekatoa opoahywa po oawyra
pope aka.

Xaromao iypyrogi imoaroyꞌyma Xenerowete xeꞌega, watyramo 1000 (mil) koxoetoa rehe, heta koxoa amotemote
pewara, eomine Xenerowete nomanaihi taatyeme hehe, topoetoa raꞌowa hekwehe imoaroi aka. Exa wope,
oꞌaximaweteramo ixywatawaramo, iapo maꞌeagawa Xenerowete pe, iypyroka imomoxyo watyetoa topoetoa
raꞌowa.
Imaꞌeagawa wepytawamo Xenerowete pota imaxaꞌagtari mokoi Ihaeo moroyroramo hekatawa, Xaromao
manoramo pota.

Xowe Xaromao manoramo, haꞌyra Howoao, iꞌanomoho waꞌe, aka moroyroa ixiapyripewaramo wowa
ponekwapawamo. Ihaerita goa imoxomonyhygi, toroexag ne moroyroamo hekatawa, oxa. Imomeꞌo ixope
werekakatoetetawoma, Xaromao hekwehe heta imanai tomaꞌeapo heta we. Imana tomon tamatare (imposto)
moroyroa ixiapyripewara pe.

Howoao noenowihi ixeꞌega, aꞌeramo iatywari: —Pexeamogeta pa xerowa pexexerekagamtawa re? Ixe wixe pota
amomaꞌeapohoete awa, penerekagaweteo we.— Iꞌi ixope

Eipoa renopa, 10 Ihaeo reꞌyte noxigoihi Howoao, nopotarihi moroyro ixiapyripewaramo oxeope hekatawa.
Mokoi xowe Ihaeo reꞌyite hekai Howoao katy, Xotaa po henoi rame.
10 Ihaeo reꞌyite, Rowoao xiwaryꞌyma, hexagi oxepexowe akomaꞌe, hera Xerowoao, moroyroa ixiapyripewaramo
ixope aka waꞌe. Mia 10 Ihaeo reꞌyite, ixaꞌagi Xotaa hi, Xotaa pyriwara mokoi Ihaeo reꞌyite. Ihaeo hekai ꞌyawyra
katy oawyromipe.

Xerowoao noxigoihi aka Xerexowete, aꞌeramo iapoi Ihaeo reꞌyite toapo maꞌeagawa Xenerowete pe.
Nomomoxyxokwerihi Xerexowete awyra pope Xotaa kaꞌa pyri, aꞌeramo iapoi "mokoi topoa raꞌowa goa pe
tomomoxy", oxa.

Xotaa reꞌyite re hekwehe noxoxigoihi aka Ihaeo reꞌyite, aꞌeramo hekwehe ipakagi aka oxowehe.

Ihaeo ywya pyriwara moroyroa ixiapyripewara hekwehe xoporemo naikatoihi. Heta moroyroa ixiapyripewara
hekwehe ihaerita goa ixokai, ixokai hekwehe taraka ne iponekwapa moroyroa ixiapyripewaramo, oxa.

Xoporemo moroyroa ixiapyripewara, heta goa Ihaeo pyriwara imomoxyi topoa raꞌowa, amome imoaro topoa
raꞌowa heroꞌawi koxoa oxepyroyꞌym waꞌe, amome ixokao waꞌyna hapyo topoetoa raꞌowa pe.
Xotaa moroyroa ixiapyripewara Tawia raꞌyrena. Amome hekwehe moroyroa ixiapyripewara ikatoeteramo, iapo
maꞌekatoa goa pe, imomoxyo we Xerexowete. Amome we hekwehe Xotaa moroyroa ixiapyripewara naikatoihi,
imima goa tamatare, topoa raꞌowa imomoxyo, hapyo we waꞌyna topoa raꞌowa pe. Heta we Xotaa pyriwara
hekwehe noxigoihi Xerexowete, imomoxyo we topoa raꞌowa.

Xenerowete xeꞌega popewara: 1Moroyroa Ixiapyripewara 1-6; 11-12

 Xenerowete xeꞌega momeꞌonaretoa

Ihaeo hekaramo we Xenerowete imori oxeꞌega renopara momeꞌonara. Xenerowete xeꞌega renopara hekwehe
akomaꞌe henowi hekwehe Xenerowete xeꞌega, xowe imomeꞌo goa pe.

Akawe moroyroa ixiapyripewaramo Ihaeo goa pe hekaramo. Eria hekwehe Xenerowete xeꞌega renopara
momeꞌonara. Akawe hekwehe naikatoihiete, aꞌe hekwehe imorywi goa tomomoxy topoa raꞌowa, Waꞌao po hen
waꞌe. Kwexare Eria Xenerowete poahywa po, imomeꞌoi Akawe pe: —Nokyraꞌowihi amyna Ihaeo kaꞌa pe. Ixe
imomeꞌoramo xowe pota ikyri.— Iꞌi Eria ixope. Aꞌeramo Akawe ipirahyramo ixope.

Xowe Xenerowete imomeꞌoi Eria pe: —Ekwa exemima awatywyꞌymohoa pyri, iypykonia poywyri, Akawe potan
nexoka.— Aꞌeramo hekwehe Xenerowete imanai wyra toweraha aka pao, maꞌeaꞌa, Eria pe toꞌo,
koꞌemawyꞌymamo, karowamo we. Xowe hekwehe aripe ꞌya ymaꞌetewe wypapapaweteramo. Akawe
oporixagawetoa re imomyroi pane Eria, maꞌete hexaka.
Eria ihai goa pyteripe ipoywyriwara pyri. Eowyime hexagi koxoa imen mano waꞌe, imemyra re. Aripe nahemiꞌoihi
werehe, pipi herekai temiꞌoa. Einoxi herekakatoetei Eria oxepyri. Aꞌeramo Xenerowete imanai topaweme ixohi
oꞌia xaꞌe pope, maꞌete imokapawa we torixaꞌe pope. Einonamo hekwehe iꞌoi aka eomia teꞌohoa ikoiramo. Eria
hekwehe eowyime hekai heta imoxewyta amyna ipyri.

Naꞌiroihi amyna imoxewyta, 6 xahya we, xowe Xenerowete imana Eria toxewyn Ihaeo kaꞌa pe, taha imomeꞌo
Akawe pe amyna ikytawoma re. Akawe Naꞌiroihi amyna imoxewyta, 6 xahya we, xowe Xenerowete imana Eria
toxewyn Ihaeo kaꞌa pe, taha imomeꞌo Akawe pe amyna ikytawoma re. Akawe Eria rexaka eipo iꞌi ixope: —Ka wixe
pa ene Ihaeo goa mowyantaryꞌyma.— Iꞌi Eria pe. Eria iatywari: —Aripewarohoa nerehe einon, ikoi teꞌohoa,
xereheyꞌym! Ene wixe nereakaxym Iawe hi, Xenerowete aꞌeteohoa hi, imomoxyo topoa raꞌowa Waꞌao po hen
waꞌe. Ekwa imoxonyhyka xoporemo Ihaeo goa, xoporemo Waꞌao xeꞌega momeꞌonaragawa ywytyra Karamero
pyri.— Iꞌi ixope.

Xoporemo Ihaeo goa itori, 450 (quatrocentos) Waꞌao xeꞌega momeꞌonaragawa we itori ywytyra Karamero pyri.
Xowe Eria imomeꞌo goa pe: —Aipa nonta peka iponekwapa, pexexeamogetatawa? Pemomeꞌo aoxexowe Iawe
Xenerowete aꞌeteohoramo, eokwexa imomoxyo. Amonamo Waꞌao aꞌeteohoramo, eokwexa imomoxyo, peexag
pexexemimomoxyroma.— Iꞌi Eria goa pe.

Xowe henoina Waꞌao xeꞌega momeꞌonara goa pe. Eipo iꞌi: —Pexoka tapiꞌiragawa akomaꞌe, iapokato ita
oxoapytepytera rewara re, pewenyeme ke tata. Moa imota ywaga hi iwenyo tata, eokwexa Xenerowete
aꞌeteohoa.— Xowe Waꞌao xeꞌega momeꞌonara apopawi iapokatopapa, maꞌete imoxapoꞌo tata.
Xowe Waꞌao pe oporogetao, oxapiro: —Enom orexeꞌega, Waꞌao!— Oxapiro wahewahemamo apokohoa pope
pane, oxekyxikyxio pane kyꞌeꞌia po, maꞌete iatywata xowe.

Karowamo Eria iapokatoi Xenerowete pe wemiapyroma. Imomeꞌo goa pe tohen 12 xaꞌeꞌoma popewara ꞌya,
maꞌeaꞌa rehe, xepeꞌawa rehe we, ywya warikore iaerowakawa imotynehema ꞌya po.

Xowe Eria oporogetao Xenerowete pe: —Wexan, Wetowete, Awarao, Ixake, Xako Rowete, exagokan kare Ene
Ihaeo Rowete, ixe nemaꞌeapotara. Xeatywaripe xoporemo goa aꞌom waꞌe, tokwaham Ene Xerowete aꞌeteohoa.—
Iꞌi Eria Xenerowete pe.

Kowei Xenerowete tata imori ywaga hi, hapypapa maꞌeaꞌa, xepeꞌawa, ita ywya. iakymam waꞌe we. Xowe goa
eomia rexaka, oxemamata ywype eipo iꞌi: —Iawe Xenerowete! Iawe Xenerowete! —Iꞌi Xenerowete pe.
Eria imomeꞌoi goa pe: —Pemanaeme taha Waꞌao xeꞌega momeꞌonaragawa mo!— Goa ipyhygi xoporemo Waꞌao
xeꞌega momeꞌonaragawa, herahao paranoa Kixom pyri, eopeo ixokaxokao.

Eria ixerowagi moroyroa ixiapyripewara Akawe pe, eipo iꞌi ixope: —Kowei exewyn eha hetoma pyri, eokwe itori
amyna okynta.— Kowei ywaga howapiꞌonohoramo. Kowei okyta amyna, wepixapixawohoramo we. Xenerowete
hekwehe imomawi ꞌya rypamtawa re. Aꞌene hekwehe imori xowe non hekwehe hexagokari Aꞌe xowe
opoahymtawa, Aꞌeteohoa Xenerowete.

Xowe Eria rehe we, Xenerowete hexagi Erixeo taka Xenerowete xeꞌega renopara momeꞌonaramo. Xenerowete
imori opoahywa Erixeo pe, toapo aꞌene Xenerowete xowe iapoi. Xenerowete xowe toapo einom Naama pe.
Naama ixiwaryꞌyma porixagawa moroyroa. Naama mironohoa okaꞌeyꞌymete waꞌe herekaramo. Naama hekwehe
henowi Erixeo re imomeꞌonawa. Xowe hekwehe aha imomyro tamomeꞌo ne ixope, taxekataꞌag ne, oxa. Erixeo
hekwehe imogetai xowe taha 7 (sete) oxeapomipomio paranoa Xotao po.

Naama hekwehe ipirahyramo, maꞌete oxepomi potata paranoa Xotao po, naxekataꞌagaꞌowihi pa? Iꞌite hekwehe.
Xowe iponekwapa oxeamogetatawa, aha paranoa Xotao pyri, 7 oxeapomipomio. Xowe hekwehe ohema ꞌya hi,
ipira hekwehe kowei opin kaworamo! Xenerowete hekwehe ikataꞌagi.
Xenerowete hekwehe heta imori oxeꞌega renopara momeꞌonaroma. Xoporemo hekwehe eomia imogetai pane
Ihaerita goa, topohin topoa raꞌowa momoxytawa hi. Towerekakatoete weꞌynia imomoriahopa we. Xoporemo
hekwehe Xenerowete xeꞌega renopa momeꞌonara imomeꞌoi tomomeꞌo omaꞌeagawa Xenerowete pe,
pepohiryꞌymamo pota, imoaroyꞌyma, pexeka Xenerowete xeꞌega, Xenerowete pota imori maꞌeagawa penope. Iꞌi
Ihaeo goa pe.

Aꞌepe heta goa hekwehe noenowihi Xenerowete xeꞌega renopara remimomeꞌoa. Nomoaroihi hekwehe
Xenerowete xeꞌega, herekagawetei we Xenerowete xeꞌega momeꞌonara, amome hekwehe ixokai we. Kwexare
hekwehe Xenerowete xeꞌega momeꞌonara Xeremia, imogei imoina ꞌyxeꞌekwarera typam waꞌe pope, tomano, oxa.
Aꞌe hekwehe moroyroa ixiapyripewara imomoriahowi. Xowe imana oxeope omaꞌeapo waꞌe, towenohem
ywykwara hi, imanoyꞌymamo we.

Noxigoihi hekwehe pane Xenerowete xeꞌega momeꞌonara. Einoxi hekwehe imomeꞌoi Xenerowete remimomeꞌoa.
Imomeꞌoi hekwehe goa pe: —Pexearekayꞌymamo Xenerowete pota pemomam iwepyo pemaꞌeagawa.—
Imomeꞌoi we Xenerowete remimonroma Mexia rehe.

Xenerowete morogeta popewara: 1Moroyroa Ixiapyripewara porogeta 16-18, 2Moroyroa Ixiapyripewara porogeta
5, Xeremia 38
 Okaꞌa hi Xoteo goa heratawa, okaꞌa pope
ixewyhawa

Ihaeo reꞌyite moroyroramo hekatawa ꞌyawyra katy, ꞌyaoꞌe katy Xotaa moroyroramo hekatawa. Ihaeo pyriwara,
Xotaa pyriwara we maꞌeagawa iapoi Xenerowete pe, maꞌete imoaro Xenerowete re oxomorypawa, ywytyra Xinai
pyri wemiapoa. Aꞌeramo Xenerowete imori oxeꞌega momeꞌonara tomomeꞌo ixope, toetyg omaꞌeagawa, toxewyn
Xenerowete pe, imomoxyo Iawe, exane Xenerowete aꞌeteohoa non. Aꞌe hekwehe goa noenomtarihi, maꞌete
imoaro we.

Xowe Xenerowete imanai Ihaeo xiwaryꞌyma tomogomogoi Ihaeo moroyroramo hekatawa, Xotaa moroyroramo
hekatawa we. Imperio Axiria (moroyroramo hekatawa ixytaohoa) ipyriwara ikatoyꞌymete waꞌe, hatoete waꞌe we.
Ikekei imogomogoita Ihaeo kaꞌa. Ixokao heta Ihaeo goa, heta hekwehe herahao imaꞌexiroa hepyete waꞌe,
hapypapa werehe Ihaeo ywya.

Axiria pyriwara oywya pyri herahai Ihaeo moroyroetoa, goa itamatareete waꞌe we, maꞌexiroa moxogara we,
ywaꞌa re omaꞌeapo waꞌe we, metao re omaꞌeapo waꞌe we, awyra apotara we. Imaga Ihaeo pyri itamatareyꞌym
waꞌe xowe.
Xowe Axiria goa herota amote goa imokekeo taka Ihaeo kaꞌa pope. Eomia amote pewara goa imoxog xokweri
hetoma hemimogomogoikwera, hatyramo we hekwehe Ihaeo raxyna re, eowyime aka waꞌe re. Ihaeo pyriwara
amote pewara re haꞌyn waꞌe rera "Xamaria pyriwara."

Xotaa pyriwara hexagi Xenerowete Ihaeo pyriwara pe, maꞌeagawa ixope imontawa oxeꞌega imoaroyꞌymamo.
Aꞌepe hekwehe xoteo goa hekai imomoxyo topoetoa raꞌowa. Kananea goa topoa raꞌowa imomoxyo we.
Xenerowete imori pane hekwehe oxeꞌega momeꞌonara, tomomeꞌo xexeꞌega ixope, oxa pane. Goa noenowihi
xowe oxeope hemimomeꞌoa.

Axiria goa Ihaeo kaꞌa imogomogoitawa, 100 (cem) amyna imoxewyramo. Hehewe Xenerowete imori
Nawykotonoxo, Wawironia moroyroa ixiapyripewara, topakag Xotaa moroyroramo hekatawa rehe. Wawironia
Imperio (moroyroramo hekatawa ixytaohoa), hatoete waꞌe. Aꞌeramo Xotaa moroyroa ixiapyripewara ikwahawi
opakakawa herekatawyꞌyma. Tamanoeme ne we, maꞌete xereꞌynia we tomanoeme, oxa, hekai ixope omaꞌeapote
waꞌeramo. Imana aka tamatare Wawironia moroyroa ixiapyriwara pe, exa iwepytawa non amyna reherehe.

Ymaꞌehe, Xotaa moroyroa ixiapyripewara nakaxokwerihi Wawironia katy. Aꞌeramo Wawironia porixagawetoa
ixewyri ota, opakaka Xotaa goa rehe, ipoxykao Xeroxarem retoma, imogomogoita Xenerowete awyra.
Herahapapa hetoma pyriwara maꞌexiroa hepyete waꞌe, Xenerowete awyra popiara we.
Oxekaty heka xokweryꞌymtawa wepytawamo, Xotaa moroyroa ixiapyripewara raꞌyna hekwehe Nawykotonoxo
porixagawa ixokaxokai hemiexagamo. Xowe hekwarywo taeꞌapyaeme xokwen. Herahao Xotaa moroyroa
ixiapyripewara Wawironia pyri, tomano wakwapetymawa pope, oxa.

Nawykotonoxo oporixagawetoa re herapawi werehe xoporemo Xotaa pyriwara Wawironia pyri. Imagai hekwehe
eomi itamatareyꞌym waꞌe xowe totym aka okaa. Eokwe hekwehe Xotaa goa okaꞌa hi herahatawa xypya.
Xenerowete imanai toakwapetym weꞌynia imaga amote ywya pyri. Imana taka ipokoete ywya ixope hemimana
hi.

Einoxi Xenerowete maꞌeagawa weꞌynia pe, imohawa imanai ipokoete ikaꞌa hi. Xenerowete naeakaxymihi goa hi.
Maꞌete weakaxymamo wemimomeꞌokwera hi we. Xenerowete aoxe aka herekakatoeteo weꞌynia. Oporogetao
aka ixope oxeꞌega momeꞌonara po. Axete hekwehe Xenerowete imomeꞌoi 70 amyna imoxewyramo pota Xotaa
goa ixewyntari, ota. Okaꞌa Xenerowete oxeope hemimora pyri.

70 amyna imoxewyramo Xiro, Pexia moroyroa ixiapyripewara, ipakagi Wawironia re, xowe hereka Pexia
opakakawa. Ihaerita goa hekwehe henoi Xoteo po rame. Xoporemo hekwehe xoteo goa hekai Wawironia pyri.
Howyrowe eomi iꞌaximam waꞌe xowe, heharamo oywya Xotaa rehe.
Pexia pyriwara hatoeteoho waꞌe, imomoriahowi we hekwehe goa eomine hekai iywype moroyroramo mia. Xiro
moroyroa ixiapyripewaramo Wawironia pyri aka we, iapoi maꞌekatoete: —Xoteo goa taha oxewyta okaꞌa pyri. —
Iꞌi. Imana we tamatare ixope tomoxog xokwen we Xenerowete awyra, oxa. 70 amyna imoxewyta ipokoete aka
okaꞌa hi. Pipi hekwehe xoteo goa ixewyri Xeroxarem pe, okaꞌa Xotaa pyri.

Xowe ota, xoteo goa oxewyta okaꞌa Xotaa pyri. Xowe imoxog xokweta Xenerowete awyra. Iapo we wetoma
ropiahawa toaerowag Xeroxarem retoma amote pewara hi, hopiahawa pype hekwehe 2,5 metro. Einon hekwehe
xoteo goa hekai amote pewara moroyroamo ixope. Akarameo hekwehe Xenerowete kaꞌa hemipyroa pope,
imomoxyo we Xenerowete, Iawyra pope exane hekwehe tamoitoa iapoi aka non.

Xenerowete xeꞌega popewara: 2Moroyroa Ixiapyripewara 17; 24-25, 2Crônicas 36; Esdras 1-10; Neemia 1-13
Xenerowete imomeꞌoi Mexia wemimonroma goa pe

Ixypyeteramo Xenerowete iapokatoi Mexia rohawoma. Aꞌe imomeꞌoi ixypyeteramo Wemimonroma rehe Atao,
Ewa pe Etena kaa kawora pyri. Imomeꞌoi we hekwehe iꞌantari Ewa memyrena pyteripe, oxepexowe akomaꞌe
maxa Xatanaxa pirimowara xokataroma. Xatanaxa hekwehe ixeapoi exa maxa non. Xowe otemonamo,
imoawayꞌyma Ewa. Mexia pota ixokai Xatanaxa exa maxa 'a ikamikamika nonta. Eipoa hemimomeꞌoa Mexia re
hekwehe iporogetai Xatanaxa aoxeaꞌe ixokatawoma re.

Ymaꞌetewe Xenerowete imomeꞌoi Awaraoa pe: —Nerehe pota aapo maꞌekatoa xoporemo tapiꞌapiꞌana pe ywype.
— Iꞌi Iawe. Eipoa hemimomeꞌoa iapoi Mexia tohawa rehe: —Mexia hekwehe Awaraoa raꞌyrena herori goa
mokatotawa xoporemo ywype aka waꞌe, maꞌeagawa hi hekyitawa we.—

Xenerowete imomeꞌoi Moixoa pe: —Ymaꞌehe pota amon amote wexeꞌega momeꞌonaroma, exa ene non.
Amonta wepoahywa ixope, moroyro xytaohoramo taka xereꞌynia pe, toapokato we xereꞌynia.— Iꞌi Xenerowete.
Eomia xokwen imomeꞌoi Mexia rohawoma rehe.
Xenerowete imomeꞌoi Tawia, Ihaeo moroyroa ixiapyripewara pe: —Neraꞌyrena pota aꞌene amonta, eokwexa pota
aoxeaꞌe hekai moroyro ixiapyripewaramo xereꞌynia pe. —Iꞌi Tawia pe. Eomia hexagokari Mexia Tawia raꞌyreramo
hekatawoma.

Xenerowete imomeꞌoi Xeremia pe: —Aapo pota xomorohypawa iyahoa weteꞌynia pe. Exa ne Ihaeo goa re aapo
rakokwehe xomorypawa ywytyra Xinai pyri nonyꞌymta. Wexomorypawa iyahoa pota amopinimta
wetemimonroma pinima goa ꞌapinera pope, namopinim xokweraꞌowihi itapewa re. Goa pota xepaxeeteramo
hekai, xereꞌyiteramo. Xereakaxymta imaꞌeagawa hi.— Iꞌi Xenerowete Xeremia, oxeꞌega momeꞌonara pe. Mexia
pota iapoi einon.

Xenerowete xeꞌega momeꞌonaretoa imomeꞌoi: —Mexia pota hekai Moroyro ixiapyripewaramo, Xenerowete
xeꞌega momeꞌonaramo we, xaxetoteramo we. Xenerowete xeꞌega momeꞌonara eomine henowi Xenerowete
xeꞌega. Xowe imomeꞌo goa pe. Mexia Xenerowete remimonroma pota, Xenerowete xeꞌega momeꞌonara
aꞌeteohoa, imoaroi xoporemo Xerexowete xeꞌega, ipotywo goa tokwaham katoete Xenerowete remipotara.—

Ihaeo xaxetoxetoa moroyroa hapyi maꞌexiroa hekwehe goa maꞌeagawa rehe. Xenerowete hekwehe ipyhygi
hemiapya hekyita goa maꞌeagawa. Ihaeo xaxetotetoa moroyroa hapyi maꞌexiroa hekwehe goa maꞌeagawa rehe.
Xenerowete hekwehe ipyhygi hemiapya hekyita goa maꞌeagawa. Einon hekwehe hapyi aka maꞌexiroa
Xerexowete pe "maꞌeagawa aapo". Xaxetotetoa moroyroa we hekwehe iporogetai goa rehe. Mexia maꞌeagawa
apotaryꞌymete, aꞌeramo xaxetotetoa moropetega ikatoete waꞌe. Aꞌe we pota imanoi aoxeaꞌe goa maꞌeagawa
ihypa. Aꞌe pota heakaxymamo oxepexowe aoxeaꞌe goa maꞌeagawa hi.
Moroyroa ixiapyripewara eokwene hekai moroyroramo goa pe, morogetakwaparete ikatoete we goa pe. Mexia
pota eokwe moroyroa ixiapyripewara ikatoete waꞌe. Aꞌe pota iapygi oina wamonia Tawia renawa re. Aꞌe pota
hekai moroyroramo ixiapyripewara xoporemo goa pe aoxeaꞌe. Exa morogetakwaparete nonta iapopotari
maꞌekatoa xowe okaꞌakwahawa po, hemiapoa pota ikatoete xowe.

Xenerowete xeꞌega momeꞌonara hekwehe imomeꞌoi heta Mexia rohawoma rehe. Marakia hekwehe imomeꞌoi
Mexia renone pota itori Xenerowete xeꞌega momeꞌonara ixypyramo. Ixaꞌia we hekwehe imomeꞌoi Mexia pota
iꞌari koxarameete pope noweroꞌawihi hekwehe akomaꞌe. Mikea we hekwehe imomeꞌoi Mexia pota iꞌari Werem
retoma pyri.

Xenerowete xeꞌega momeꞌonaretoa we hekwehe imomeꞌoi Mexia remiaporoma we. Ixaꞌia hekwehe imomeꞌoi
Mexia Garirea pyri hekatawoma. Iworywete potari heaeteyꞌym waꞌe. Oxemaana waꞌe we pota imoxyꞌoapyg
katoetei. Eomi omaꞌeapote aka waꞌe pe we imomeꞌo potari ihemtawoma re. Hakwapetymyra pe we pota
imomeꞌoi iꞌeꞌetawoma re we. Aꞌe we imomeꞌoi Mexia pota imokatoi iawaipa waꞌe, iapyayꞌym waꞌe, heꞌapyꞌayꞌym
waꞌe we, oxeꞌegyꞌym waꞌe we, iapaapan waꞌe we pota.

Xenerowete xeꞌega momeꞌonara Ixaꞌia hekwehe imomeꞌoi Mexia pota naixigopyrihi, maꞌete opotapyramo we.
Amote Xenerowete xeꞌega momeꞌonaretoa imomeꞌoi Mexia xokatara pota. Amome imamari mokoi pi itaꞌia
iapeyroa re. Oxepexowe pota ipaxe hexagokantari ixiwaryꞌyma pe. Xakaria Xenerowete xeꞌega momeꞌonara
imomeꞌoi we hekwehe ipaxe pota ipyhygi 30 (trinta) itapema itaxiga powara, hexagokantawa wepytawamo.
Xowe imana ixiwaryꞌyma pe toweraha ixokao.
Xenerowete xeꞌega momeꞌonaretoa we hekwehe imomeꞌoi Mexia xokatawoma rehe. Ixaꞌia imomeꞌoi hekwehe
goa pota inimonimori hehe, ixaixaitari we, inoponopo we. Goa we pota ikotogtari we oꞌywaxiagawa po hete pe,
imano potari ianopa heta hahya, imano potari maꞌeagawa iapoyꞌyma.

Xenerowete xeꞌega momeꞌonaretoa imomeꞌoi we hekwehe: —Mexia pota ikatoeteramo maꞌete iapo maꞌeagawa.
—Iꞌi. Goa imaꞌeagawa re Xenerowete imori wepytawa ixope. Goa omaꞌeagawa re, imanopotahawa re, Mexia
imanoi iponekwapa. Xenerowete hekwehe hexagi goa maꞌeagawa mokatotaroma. Mexia manonawa imowyg
xokweri Xenerowete re goa. Einon hekwehe iapoi Xenerowete imoxykaka goa, Mexia manonawa re.

Xenerowete xeꞌega momeꞌonaretoa imomeꞌoi we hekwehe: —Mexia pota imanoi pane, aꞌe pota Xenerowete
imokweram xokweri. — Iꞌi hekwehe. Mexia manonawa re, ikweram xokwentawa re, Xenerowete iapopotari
imokato goa maꞌeagawa, iapo iyahoa goa re oxomorypawa.

Heta hekwehe oxeꞌega momeꞌonaretoa pe, hexagokari Mexia rohawoma Xenerowete ixope. Eomi Xenerowete
xeꞌega momeꞌonaretoa hekwehe noexagihi hekwehe Mexia rohawa. Mapawete hekwehe Xenerowete xeꞌega
momeꞌonaretoa imomeꞌoi Mexia rohawoma re. Xowe 400 (quatrocentos) amyna imoxewyta mapawete
imomeꞌotawera hi. Xowe wixe Xenerowete imota Mexia eope oxaweripe.

Xenerowete xeꞌega popewara: Xenexi 3:15, 12:1-3, Deuteronomio 18:15; 2 Xamoꞌeo 7; Xeremia 31, Ixa'ia 59:16;
Tani'ꞌeo 7; Marakia 4:05; Ixaꞌia 7:14; Mikea 5:2; Ixaꞌia 9:1-7; 35:3-5; 61; 53; Xaomo 22:18; 35:19; 69:4; 41:9; Xakaria
11:12-13, Ixaꞌia 50:6, Xaomo 16: 10-11
 Iohane iꞌantawa re

Hetaete amyna ixewyramo (séculos) Xenerowete imota ywagimewara, oxeꞌega momeꞌonaretoa we toporogeta
weꞌynia pe. 400 (quatrocentos) hekwehe imoxewyri amyna Xenerowete maꞌete oporogetao xokweta goa pe.
Tepaxawyꞌyime ywagimewara herota Xenerowete xeꞌega, imomeꞌo xaxetote Xakaria pe, iꞌaximawete waꞌe.
Xakaria, watya Erixawete re hekwehe ixemoagypyhygetei aka Xenerowete re. Aꞌe naimemyrihi xowe hekwehe.

Ywagimewara imomeꞌoi hekwehe Xakaria pe: —Neratya pota imemyntaramo, neraꞌyra rera pota Iohane.
Xenerowete Pytoa pota hekai ipope, aꞌe pota iapokatoi goa Mexia rohawoma renone!— Iꞌi hekwehe. Xowe
Xakaria eipoa renopa, iatywari: — Ixe, wetatya re, oreꞌaximawete toreraꞌyn ne, maranta pa akwaham aipa aꞌete
eremomeꞌo? — Iꞌi hekwehe Xakaria.

Ywagimewara iatywari Xakaria: —Xenerowete xemori, taron ne imomeꞌo morogeta ikatoete neope. Ene
nerexemoagypyhygihi xexeꞌega re, aꞌeramo pota nexeꞌekaxymta eka, toꞌarypy neraꞌyra. — Iꞌi hekwehe Xakaria
pe. Eoperamo we Xakaria ixeꞌekaxymamo, xowe ywagimewara aha ixohi. Xowe Xakaria eope hi aha oawyripe
oxewyta. Xowe hatya hekwehe oporoꞌaramo.
Erixawete iporoꞌatawa 6 xahya, xowe eokwene ywagimewara oxexagokan xokweta, oporogetao Maria pe.
Erixawete Maria re hekwehe tapiꞌante. Maria hekwehe nowerekaihi we akomaꞌe mo, ipyroi hekwehe hereka Xoxe
po hen waꞌe pe. Ywagimewara eipo oxa Maria pe: —Ene pota neporoꞌa, eremoꞌanta ememyra. Iexoa po ke
eenoi. Aꞌe pota Xenerowete ixytaoho waꞌe raꞌyra, Aꞌe pota hekai moroyroramo aoxeaꞌe.— Iꞌi ywagimewara Maria
pe.

Maria iatywari: —Maranta pa xeporoꞌa, naroꞌawihiete akomaꞌe mo?— Iꞌi. Ywagimewara imomeꞌokatoi ixope: —
Xenerowete Pytoa pota itontari nerehe, Xenerowete poahywa pota nemomoroꞌai. Aꞌeramo pota nememyra
namaꞌetywihi maꞌeagawa hehe, Xenerowete raꞌyrete pota.— Iꞌi Maria pe. Maria imoakygytai ywagimewara
xeꞌega, ipotareteo we.

Ywagimewara oxeope iporogetapawamo we. Xowe Maria ihai hexaka Erixawete. Erixawete henopa Maria
wenoinawa. Xowe imemyra oxetyxetyka ohyke rewega pope. Xowe eomi mokonia koxoa imomeꞌo opa,
woryweteramo. Xenerowete oxehe eomia iapotawa. Maria hekai hekwehe Erixawete pyri imoiroyꞌyma imohema
xahya. Xowe oxewyta ota oawyripe.

Erixawete omemyra imoꞌata. Xakaria re hekwehe henoi Iohane po, exa ne ywagimewara hekwehe imomeꞌo ixope
non. Xowe Xenerowete iapo Xakaria toxeꞌeg xokwen, eipo oxa Xakaria: —Xenerowete, Ene nekatoete xeope. Ene
nereha xokwen xeꞌynia re! — Iꞌi Xakaria Xenerowete pe. —Ene wetaꞌyn, ene pota ereka Xerexowete ixytaoho
waꞌe xeꞌega momeꞌonaramo, ene pota eremoꞌe goa toetyg maꞌeagawa apotawa hi!— Iꞌi Xakaria Iohane pe.

Xenerowete Xeꞌega popewara: Roke 1

 Iexoa iꞌantawa

Maria ipyroi akomaꞌe ikatoete pe Xoxe po hen waꞌe. Xowe Xoxe ikwahapa Maria iporoꞌatawa. Ikwahawi we
imomoroꞌatawyꞌyma, aꞌeramo Xoxe ixeamogetai, aetyg xemimta Maria, amoxeroxi rapo, oxa. Einon
iapoyꞌymamo we ywagimewara itori oporogetao ixope awome.

Ywagimewara imomeꞌoi Xoxe pe: —Xoxe, ekyyxeme hereka Maria xatyramo. Konomia hewega popewara
Xenerowete Pytoa iapoi. Maria memyra pota akomaꞌe. Penoi ke Iexoa po, (hera momeꞌonawa "Iawe
oporomokato waꞌe"). Aꞌe pota hekyi goa maꞌeagawa iapotawa.— Iꞌi hekwehe.

Xowe einon Xoxe watyramo Maria re, heraha oawyripe watya, maꞌete heroꞌapa, toꞌarypy imemyra, oxa.

Iexoa ꞌantawa re iwahemeteramo, Homano moroyroa imanai xoporemo goa taha oxewyta oxypya ꞌantaweripe
tomopinim hera. Xoxe, Maria re, ixowerahai ipokoete Naxare hi Werem pyri. Tawia raꞌyrena hekwehe Xoxe, Maria
re, Werem Tawia retoma.
Xowe ota Werem pyri, namaꞌetywihi hekwehe ixope ikehawoma. Aꞌeramo hekwehe maꞌexiroa heomawa awyra
pope ikeri. Eowynia pope imoꞌari omemyra. Xowe ihyke hekwehe inogi maꞌexiroa karotawa pope, namaꞌetywihi
hekwehe ixope topatawa. Xowe henoina omemyra Iexoa po.

Eokwexa ipytonimo, amome mixaragawa rerekatara eopeo ipoywyri herekai omixaragawa. Tepaxawyꞌyime
ywagimewara ota wenyꞌonyꞌogamo. Xowe hexaka okyyxeteo ixohi. Xowe ywagimewara imomeꞌoi ixope: —
Pekyyxeeme, aron morogeta katoa penope! Mexia, moromokatotara iꞌari Werem pyri.— Iꞌi ixope.

—Pekwa imomyro konomia! Peexagta maꞌexiroa karotawa ryroa pope, iowon inogamo.—Tepaxawyꞌyime
ywagimewara heta ixexagokari ywagime, xowe oxeꞌegata: —Namaꞌetywihi amote exa Xenerowete non,
Xenerowete omoxyꞌoapyg wemipotara ywype! — Iꞌi oxeꞌegata.

Kowei mixaragawa rerekataretoa ihai Iexoa romtaipe, hexaka maꞌexiroa karotawa ryroa pope inogamo, exane
ywagimewara imomeꞌoi non. Horyweteramo. Maria we hekwehe horyweteramo. Xowe mixaragawa
rerekataretoa oxewyta ota omaꞌeo omixaragawa re. Oxeꞌegata, imomoxyo Xenerowete, xoporemo maꞌexiroa
wemienowa re, wemiexaga re we.
Amoteramo, akomaꞌetoa okaꞌakwahawete waꞌe, kwarahya hemawa katywara, hexagi xahytata amotete. Ikwahawi
xahytata hepei xoteo moroyroa ixiapyripewara iyahoa. Itori ipokoete hi, imomyro eokwexa moroyroa, ota
Werem pyri hexaka awyra aꞌepe Iexoa, tope, ihya we itowi.

Xowe eomia akomaꞌetoa okaꞌakwahawete waꞌe hexaka Iexoa ihyke re, okopytao opa, imomoxyo. Imota Iexoa pe
maꞌexiroa hepyete waꞌe, xowe oxewyta aha oywype.

Xenerowete xeꞌega: Mateo 1, Roke 2

 Iexoa omoxepomi Iohane

Iohane, Xakaria raꞌyra, Erixawete memyra, ixemotowi. Aka Xenerowete xeꞌega momeꞌonaramo. Hekai hekwehe
awatywyꞌymohoa pyri, iꞌo aka ehira kaꞌa pewara, tokora we. Iohane ryroa hekwehe iapoi kamero rawa po.

Heta hekwehe ihai goa henopa Iohane imomeꞌonawa. Eipo oxa: —Pexeareka, peetyg maꞌeagawa apotawa,
Xenerowete xoporemo xeneope moroyrohoramo hekatawoma re, iwahemetei!— iꞌi.

Iohane remimomeꞌoa renopa heta goa ixearekai. Hetygi maꞌeagawa apotawa. Xowe Iohane imoxepomio. Heta
Xoteo moroyroa itori we toremoxepomi ne Iohane, oxa. Aꞌe noetygihi xowe maꞌeagawa apotawa, maꞌete
imomeꞌo oxehe Xenerowete pe omaꞌeagawa re.

Iohane imomeꞌoi ixope: —Pehe exa maxa oporoꞌo waꞌe non! Pexeareka, peetyg maꞌeagawa apotawa, iapokato
pexexekatawa. Xoporemo ꞌywa eomine naiꞌakatoihi, eomia pota hetyg, imana tata pe.— Iꞌi Xoteo moroyroa pe.
Iohane iapoi exane hekwehe imomeꞌoi Xenerowete xeꞌega momeꞌonaretoa hehe non: —Amana pota wexeꞌega
momeꞌonara henone penope. Eokwene goa iapokatoi tapee, Xerexara pe taha hopi.— Iꞌi hekwehe.

Amome xoteo goa imomeꞌoi Iohane pe: —Ene pa Mexia? — Iꞌi ixope. Iohane iatywari: —Ixeyꞌym Mexia, xerehe
we pota itori oxepexowe awaa imomoxypyreteoho waꞌe. Ixe xeporoipipi, aꞌe xytaohoramo xeohi, ixeyꞌym
imomoxypyrete taha ne imohita ipyroa.— Iꞌi hekwehe.

Kwexa koꞌema re, Iexoa itori Iohane pyri, taxemoxepomi ne, oxa. Iohane Iexoa rexaka, eipo iꞌi: —Peexagame, ꞌa
wixe mixaragawa ta'ynpia, Xenerowete remimora, awa pota hekyi xoporemo goa maꞌeagawa!— Iꞌi Iohane.

Iohane imomeꞌoi Iexoa pe: —Ene imomoxypyrete xeohi, ene wixe xemoxepomipe.— Iexoa iatywari: —Ene
xemoxepomipe, einon Xenerowete ipotari. — Iꞌi Iexoa. Xowe Iohane imoxepomio Iexoa, exate maꞌeagawa
iaporamo non.

Iohane imoxepomipawi Iexoa, xowe Xenerowete Pytoa ota exa xeroxia non Iexoa re opyroka, Xenerowete
imomeꞌoi ywaga hi: —Ene xeraꞌyra xeremipotarete, ene xeworypara.— Iꞌi Iexoa pe.
Xenerowete hekwehe imomeꞌoi Iohane pe: —Xenerowete Pytoa pota ixywi ota, akomaꞌe neremimoxepomia re,
eokwe xeraꞌyrete.— Iꞌi hekwehe. Oxepexowe Xenerowete hekai. Iohane imoxepomi Iexoa, xowe henopa
Xenerowete towa xeꞌega, hexagi we Xenerowete Pytoa.

Xenerowete xeꞌega popewara: Mateo 3, Mako 1:9-11, Roke 3:1-23

 Xatanaxa iaꞌagi Iexoa toapo maꞌeagawa

Iohane imoxepomipawi Iexoa. Hehewe Xenerowete Pytoa weraha Iexoa awatywyꞌyime, 40 koꞌema, 40 ypytona re
we, Iexoa nokaroihi aka. Xowe Xatanaxa aha ipyri, tamomirahy ne, toapo maꞌeagawa, oxa pane.

Xatanaxa iaꞌagi, imomeꞌoi Iexoa pe: —Xenerowete raꞌyra pa ene? Eapo wixe ita paoramo tereꞌo. —Iꞌi ixope.

Iexoa iatywari: —Xenerowete xeꞌega pope imomeꞌoi: "Awaa nakaihi temiꞌoa re xoweyꞌym, xoporemo Xenerowete
xeꞌega remimomeꞌoa re we!" Iꞌi ixope.

Xowe Xeroxarem retomime herahai Iexoa, imoꞌoma Xenerowete raga iapyropaipe, eipo iꞌi Iexoa pe: —Amonamo
ene Xenerowete Raꞌyra amo, exan exemamata ywy pe. Xenerowete xeꞌega imopinimyra imomeꞌoi: "Xenerowete
omana pota neope ywagimewara; Nepyhygtari tereꞌareme". —Iꞌi Xatanaxa Iexoa pe
Iexoa iatywari: —Xatanai, amote Xenerowete xeꞌega popewara po, eipo iꞌi: "Eaꞌageme Xenerowete, Nexara!" —
Iꞌi Iexoa ixope.

Hehewe Xatanaxa hexagokata xoporemo amotemote ywya, hexagokata ywya arotawa we, maꞌexirohoa moroyro
ixiapyripewara rekatawa we. Eipo iꞌi: —Ene ekopytao neroiramo, wemomoxyramo, amana pota xoporemo mia
neope. — Iꞌi Iexoa pe.

Xowe Iexoa iatywari: —Ekwa xeohi, Xatanai! Xenerowete xeꞌega imopinimyra imomeꞌoi: "Ekopytao eꞌyi
Xenerowete Exarete rekwapyteripe xowe, emomoxy Aꞌe xowe!" —Iꞌi Iexoa

Iexoa nomoaroihi Xatanaxa xeꞌega. Xowe Xatanaxa aha ixohi. Xowe ota ywagimewaretoa herekakatoeteo,
imogaro we.

Xenerowete xeꞌega popewara: Mateo 4:1-11, Mako 1:12-13, Roke 4:1-13

 Iexoa iypyrogi omaꞌeapotawa

Iexoa ixepipyhygetei, aꞌeramo noapoihi Xatanaxa remipotara. Xowe Xenerowete Pytoa herahao Iexoa Garirea
katy. Garirea retomime tope goa pyri. Eowyime, amotemote pyri ihai imoꞌeo goa. Xoporemo hexagi, henowi
imoꞌenawa, xowe imamata weꞌa, oporogeta katoeteo hehe. Xoporemo eowyimewara henowi hemiapoa
momeꞌonawa.

Xowe, Iexoa aha Naxare retomime, aꞌepe ixemotowi. Topoa tawaramo ihai xoteo rekataipe imomoxyo
Xenerowete. Eopeo hekwehe henoi aka Moixoa remimopinimkwera, Xenerowete xeꞌega momeꞌonaretoa
remimopinimkwera we. Eokwexa re hekwehe imanai Iexoa pe: "Ixaꞌia remimopinimkwera toenoniahyoho
xoporemo goa pe," oxa. Iexoa iaxawagi, xowe henoina ipewera goa pe.

Ipinima hemienoina eipo iꞌi: —Xenerowete omon opytoa xeope. Xerenoꞌemi taraha ne xeꞌeg katoa
itamatareyꞌym waꞌe pe, imaꞌexiroyꞌym waꞌe pe we; xemori we tamoꞌeꞌe ne hakwapetymyra. Aꞌe xemori we
takataꞌag ne heꞌapyayꞌym waꞌe, taweꞌapya ne. Tapotywo ne heꞌaeteyꞌym waꞌe we; Aꞌe xemori tamomeꞌo ne ꞌo
rame koꞌema eope ixaweripe, Xenerowete Raꞌyra oapokato pota weꞌynia.— Iꞌi.
Xowe henoimapa, Iexoa howapyka ipinima. Xowe oapyka. Goa eopeo ꞌom waꞌe ikwahawi Xenerowete xeꞌega
popewara hemienonia, imomeꞌoi Mexia rehe. Xowe Iexoa imomeꞌoi ixope: —Pehe peenopawame xeremienonia.
Kare ixeapoi eomia xeremienoenonia.— Iꞌi. Xoporemo goa ikwawi, imamata weꞌa! Oporogetao oxoope: —
Maꞌeramo pa iporogeta katoetei? Orokwaham Xoxe raꞌyra pane. — Iꞌi oxoope.

Iexoa imomeꞌo: —Namaꞌetywihi imomoxypyra Xenerowete xeꞌega momeꞌonara oꞌaweripe. Eria Xenerowete
xeꞌega momeꞌonara hekaramo we, naꞌiroihi amyna imoxemyta, 6 xahya we, maꞌete okyta amyna. Heta
rakokwehe teꞌoa Ihaeo ywype. Heta koxoetoa imen mano waꞌe rakokwehe Ihaeo pyri. Xenerowete nomanaihi
Eria topotywo imen mano waꞌe Ihaeo pyriwara. Eria ipotywoi oxepexowe koxoa imen mano waꞌe amote pewara.
— Iꞌi Iexoa.

Iexoa aoxe oꞌoma we, imomeꞌo: —Erixeo rekaramo, heta goa ipiropironamo maꞌeahya herekao Ihaeo pyri
rakokwehe. Erixeo rakokwehe nokataꞌagi amoa. Erixeo ikataꞌagi Naama, xoteoyꞌyma, Ihaeo xiwaryꞌyma
porixagawa moropetega xowe. — Iꞌi. Xoteo eopeo ꞌom waꞌe, Iexoa remimomeꞌoa renopara, ipirahyeteramo.
Nopotarihi Xenerowete maꞌekatoa amote pewara pe iapotawa, xoteo goa pe xowe iapotawa ipotari.

Xowe xoporemo Naxare pyriwara opirahyeteramo, herahao herohema tekatawa rowaypya hi, heroxeopita
ywytyra apyteripe "toromaman ne, imana ixokao", oxa. Iexoa oxewyta ota, ipytera ropi, ahao Naxare hi. Maꞌete
omanoramo.
Xowe Iexoa aha xoporemo Garirea kaꞌa ropi, heta goa hekwehe ihai ipyri, herahao iawaipam waꞌe, heꞌapyayꞌym
waꞌe we, iꞌapyayꞌym waꞌe we, oxeꞌegyꞌym waꞌe we, itawa waꞌe we Iexoa tomokato, oxa. Xoporemo hekwehe
Iexoa ikataꞌagi.

Heta we hekwehe herahai goa owera rerekatara Iexoa pe. Owera hekwehe imoaroi Iexoa xeꞌega, oꞌeꞌeo aha,
oxeꞌegahyo ixope: —Ene Xenerowete raꞌyrete!— Iꞌi Iexoa pe. Goetoa eomia rexaka, ikwawi imamata weꞌa,
imomoxyo Xenerowete.

Xowe Iexoa hexaka 12 akomaꞌe, apotora po hen waꞌe. Apotora goa hekwehe ihai aka Iexoa ropi, hemimoꞌeramo
hekai, hexaka xoporemo hemiapoa, henopa xoporemo hemimomeꞌoa.

Xenerowete xeꞌega popewara: Mateo 4:12-25; Mako 1:14-15, 35-39, 3:13-21; Roke 4:14-30, 38-44
 Xamaria pyriwara ikatoete waꞌe re iporogetakwera

Moixoa xeꞌega mopinimarete ota owyka Iexoa re, amomeꞌo pota, "aipa ikwahawi, tamoxeroxi ne", oxa pane. —
Wemoꞌenan, maꞌe pa aapo taka ne Xenerowete pyri ywagime aoxeaꞌe? — Iꞌi ixope. Iexoa iatywari: —Maꞌe pa
Moixoa hekwehe omopinim eomia rehe?— Iꞌi Iexoa ixope.

—Ene epotan Exarete, Aꞌe Xenerowete, ene epotan xoporemo epytoa po, xatoa po we, xoporemo xete po we,
exeamogetatawa po we. Epotan ke epoywyriwara we, exa erexepotan non — iꞌi Moixo xeꞌega mopinimarete.
Xowe Iexoa iatywari: —Ikatoete nexeꞌega. Xeha eomia rehe, ene tereka we Xenerowete pyri ywagime.— Iꞌi.

Moixoa xeꞌega mo'enara taexagokan ne wekatoetetawa, maꞌekatoa apotawa, exane Moixoa xeꞌega pope
imopinim non. Xowe imomeꞌo Iexoa pe: —Awa pa xepoywyriwara?— Iꞌi.

Iexoa iatywari, imomeꞌo morogeta ixope: —Kwexare hekwehe oxepexowe akomaꞌe xoteo reꞌynia ihai, Xeroxarem
hi Xeriko katy.—
Xoteo reꞌynia iha hekaramo, imonaoho waꞌe ipyhygi pee ropi, herahapapa xoporemo imaꞌexiroa. Inoponopo
ixokao werehe. Xowe aha ixohi, herahao hyroa we, inoga pee ropi tomano, oxa.

—Ikwepawamo, ota xoteo xaxetote aha eokwexa pee ropi. Xaxetote hexaka akomaꞌe imimyra, inoponopomyra,
owaka ixohi, amote katy aha. Noexagagaihi akomaꞌe inopomyra, aha xowe ixohi.—

Hehewe ota Rewia reꞌynia eokwexa pee ropi, (Rewita goa ipotywoi hekwehe aka xaxetoxe Xenerowete raga
pope). Rewita hexaka akomaꞌe ywyo itowamo, amote katy okwapa owaka ixohi, maꞌete hexagagao akomaꞌe
inopomyra."

—Ikwepawereramo ota Xamaria reꞌynia eokwexa pee ropi. (Xamaria reꞌynia xoteo raꞌyrena. Amote pewara re
imen waꞌe memyna. Aꞌeramo Xamaria re xoteo goa noxoxigoihi). Xamaria reꞌynia hexaka xoteo inoponopomyra,
xowe imomoriahopa. Oxypa xomento ape hi, ikwata ipirona ixohi.
—Xamaria reꞌynia imopoꞌomi akomaꞌe ywya hi, imomata oxomento apei, herahao awyra pyri iwepyo
oxokehakehawa ixope, "tom oxekataꞌaka", oxa.

—Kwexare aha potata, Xamaria reꞌynia imanai tamatare awyra xara pe, eipo iꞌi ixope: "Emaꞌe ke hehe xeope,
tamatare ipotan xokweta ke, emomeꞌo xeope. Wexewyta we, tamana ne neope", iꞌi ixope.

Xowe henoina Waꞌao xeꞌega momeꞌonara goa pe. Eipo iꞌi: —Pexoka tapiꞌiragawa akomaꞌe, iapokato ita
oxoapytepytera rewara re, pewenyeme ke tata. Moa imota ywaga hi iwenyo tata, eokwexa Xenerowete
aꞌeteohoa.— Xowe Waꞌao xeꞌega momeꞌonara apopawi iapokatopapa, maꞌete imoxapoꞌo tata.

Xenerowete Xeꞌega popewara: Roke 10:25-37

 Awarame tamatarete waꞌe

Kwexare, awarame moroyroa itamatareete waꞌe ihai owyka Iexoa re, imomeꞌoi ixope: —Wemoꞌenan, ikatoete
waꞌe. Maꞌe pa aapo taxeymyn ne weka ywagime Xenerowete pyri?— Iꞌi ixope. Iexoa iatywari: —Maꞌeramo pa
xerenoipe ikatoete waꞌe po?— Iꞌi Iexoa ixope. —Xenerowete xowe ikatoeteramo, oxepexowe. Ywagime aoxeaꞌe
eka potata emoaro Xenerowete Xeꞌega.— Iꞌi ixope.

Awarame iatywari: —Mo amoa pa Xenerowete Xeꞌega amoaro? — Iꞌi. Iexoa iatywata: —Eporoxokaeme ke.
Erekaeme ke amote xatyꞌyma. Emonaeme ke. Etemoneme ke. Emomoxy ke xope, ehyke we, epotarete ke
exepoywyriwara exa ene erexepotarete non.— Iꞌi Iexoa ixope.

Awarame iatywari: —Ixe amoaro xoporemo Xenerowete Xeꞌega wewoxaeteramo we. Maꞌe pa aapo xokwen taka
ymyn ne ywagime?— Iꞌi. Iexoa imaꞌei hehe, ipotareteo, imomeꞌoi ixope:

—Amonamo maꞌekatoa xowe iapopotata, ewepypam emaꞌexiroa, imana tamatare eomi itamatareyꞌym waꞌe pe.
Aꞌeramo pota ereka maꞌekatohoa ywagime. Xowe exata xeropi.— Iꞌi.

Awarame eipoa renopa, naeaeteihi, heta hekwehe itamatare, nomanapampotarihi hekwehe otamatare amote
pe. Aꞌeramo iwagi, xowe aha.

Xowe Iexoa imomeꞌoi wemimoꞌe pe: —Mara pa iha potari tamatareohoa rerekatara okeo Xenerowete pyri
ywagime? Eomia hatoeteramo ixope. Maran amo pa kamero ikei itaxowa kwara ropi? Maranta pa iha potari
tamatareohoa rerekatara ywagime? Eomia hatoeteramo ixope.— Iꞌi.

Eipoa renopa, hemimoꞌe ixemaanai, imomeꞌoi Iexoa pe: —Awa wixe pota pa aha ywagime? Namaꞌetywihi awaa
maꞌekatoa apotara, aꞌeramo namaꞌetywihi awaa taha Xenerowete pyri ywagime. Awa pota pa aka aꞌepe
Xenerowete hekai moroyrohoramo?—

Iexoa iatywari: —Goa oxepewei noxeapokatoeteihi, Xenerowete xowe toapokato. Xenerowete iapoi xoporemo
wemipotara.—
Xowe Pero imomeꞌoi Iexoa pe: —Wexan, oronog xoporemo oromaꞌexiroa, araka neropi. Maꞌe pota pa
Xenerowete imori oreope orewepytawamo?— Pero iꞌi Iexoa pe.

Iexoa iatywari: —Xoporemo awaa eomine inogi oawyra, wywyra we, wenyna we, wowa we, waꞌyna we,
imomytapapa, ota xeropite. Eomia pota opyhygta hetaete amotemote maꞌexiroa ꞌao ywype. Hehewe omano we,
heka potari Xenerowete pyri aoxeaꞌe. Heta eomine ixeamogetai aka, "tenone akatawa re", eomia pota tewiriete
hekai. Eomine hekai imomoxypyreteramo ꞌao ywype, nakaꞌowihi imomoxypyreteramo ywagime. Eomine
Xenerowete hypy imomoxyo, tewiriete hekai ꞌao ywype. Eomia wixe pota imomoxypyreteramo hekai ywagime.—
Iꞌi Iexoa.

Xenerowete xeꞌega popewara: Mateo 19:16-30, Mako 10:17-31, Roke 18:18-30

 Omaꞌeapote waꞌe oporoxigoyꞌym waꞌe morogeta

Kwexare, Pero imomeꞌoi Iexoa pe: —Wexan, maran pa amokaxym wetywyra wexeope maꞌeagawa iapotawa? 7
xowe pa?— Iꞌi Pero. Iexoa iatywari: —Einon no weyꞌym, Pero, eweꞌyxoho sete 70 re. Aoxe einon teremokaxym
xywyra maꞌeagawa exeope iapotawa.— Iꞌi. Eipo iꞌi Iexoa kowekowei tomokaxym maꞌeagawa oxeope iaporamo
we, oxa. Tamomeꞌo katoete ne Pero pe, oxa, Iexoa imomeꞌoi morogeta ixope:

—Xenerowete ywagime hekatawa, exa moroyroa ixiapyripewara ꞌao ywype hekatawa non. Eowyime hekwehe
heta goa nowepyihi Moroyroa ixiapyripewara pe. Oxepexowe hekwehe akomaꞌe nowepyihi moroyroa pe, 160
mio (cento e sessenta mil) amyna imoxewyhawa towepy ixiapyripewara pe.

—Moroyroa ixiapyripewara hexaka oxeope omaꞌeapo waꞌe owepypamtawyꞌyma, aꞌeramo imanai: "Ewepy
xoporemo imaꞌexiroa, awa akomaꞌe, hatya we, taꞌyna we, tomaꞌeapote aka, taxewepy ere ne," iꞌi moroyroa.

—Eipoa renopa, omaꞌeapo waꞌe, okopytao itoi oxemaanao, imomeꞌo oxapiro moroyroa rekwapyteripe: "Eaaro
hypy, orowepypamta." Iꞌi ixope. Moroyroa imomoriahowi oxeope omaꞌeapo waꞌe. Aꞌeramo heakaxymamo
xoporemo hemiapoa hi. Xowe imana taha.

—Xowe ohema omaꞌeapo waꞌe aha, hexaka akomaꞌe 4 xahya re owepytaryꞌyma xowe. Pipi hekwehe nowepyihi.
Moroyroa ixiapyripewara pe wixe iwepytawyꞌyma hetaete pane. Aꞌepe heakaxymamo ixohi. Aꞌe eokwexa
akomaꞌe iꞌi amote akomaꞌe pe: "Ewepy xeope, xeohi xemipyhyka!" Iꞌi ixope.

— Akomaꞌe okopytao itoi, oxapiro: "Eaaro hypy, orowepypamta." Iꞌi ixope. Einoxi eokwe omaꞌeapo waꞌe imanai
toakwapetym akomaꞌe, "imoina taxewepypawypy ne", oxa.

—Amome amote omaꞌeapo waꞌe, hexagi eino iaporamo, opirahyramo ixope. Xowe aha imomeꞌo xoporemo
moroyroa ixiapyripewara pe.

—Eipoa renopa, imanai toenoi eokwexa omaꞌeapo waꞌe, eipo iꞌi ixope: "Omaꞌeapo waꞌe ikatoyꞌym waꞌe! Ene
erexapiro imomeꞌo xeope, tamokaxym ne xewepypamtawyꞌyma. Xowe ixe imokaxyma. Ene we amo rike ereapo
einon eokwexa akomaꞌe re. Eremomoriahowa mo rike, exane oromomoriahom non." Opirahyeteramo moroyroa
imanai oporixagawa toakwapetym eokwexa omaꞌeapo waꞌe ikatoyꞌyma, aoxeaꞌe imoina, taxewepypawypy ne,
oxa.—

Eipoa imomeꞌomapa, eipo iꞌi Iexoa: —Einonta Xerowa ywagime aka waꞌe iapoi exa moroyroa ixiapyripewara
oapo non. Pexexywyna axeeteramo maꞌeagawa pexexeope iapotawa re, imokaxymyꞌymamo, Xerowa iapopotari
einon penehe.— Iꞌi Iexoa.

Xenerowete xeꞌega popewara: Mateo 18:21-35

 Iexoa imogaroi 5 mil awaa

Iexoa imanai wemimoꞌe heta amotemote hetoma pyri, tomoꞌe Xenerowete xeꞌega re goa, oxa. Xowe oxewyta
ota, imomeꞌo xoporemo wemiapoa ixope. Aꞌeramo Iexoa wemimoꞌe re ihai ywypapawa rowai, awatywyꞌyime,
opytoꞌo ypyo. Okekeo ꞌyhara pope aha ꞌyowai.

Heta goa hexagi Iexoa, wemimoꞌe re ꞌyhara pope iharamo. Xowe goa aha oxona ꞌya remeꞌywa ropi. Aꞌe ypy aha
ixohi henone. Xowe aha ꞌyowai Iexoa wemimoꞌe re, heta goa itowi henone haaro.

Heta goa, 5 mil akomaꞌe xowe, maꞌete imoiro koxoa, konomia re. Iexoa imomoriahowi goa, ixope eomia goa exa
mixaragawa haaronaryꞌyma non, oxepewei aka, wekaxyma. Aꞌeramo Iexoa imoꞌei goa, ikataꞌaka we iawaipam
waꞌe.

Karowamo, Iexoa remimoꞌe imomeꞌoi ixope: —Karopam, namaꞌetywihi temiꞌoa wepytawamo. Emana goa taha,
towepy temiꞌoa oxeope hetoma ipoywyriwara pyri. — Iꞌi.
Iexoa iatywari: —Pehe pemogaro! — Iꞌi. Hemimoꞌe iatywari. —Maranta pa oromogaro xoporemo? 5 pipi xowe
pao, mokoi ipira we orowereka! — Iꞌi Iexoa pe.

Iexoa imomeꞌoi wemimoꞌe pe tomomeꞌo goa pe toxemaxaꞌagxaꞌag 50 (ciquenta) awaa oxomonyhynyhyka.

Imana toapyapyg we, amaropehawa pope.

Xowe hehewe, Iexoa ipyhyka 5 pao, mokoi ipira, omaꞌeo ywaga re: —ikatoete! —Iꞌi Xenerowete pe.

Xowe Iexoa iypyroka imaxaꞌaxaꞌaka pao, ipira we. Imana wemimoꞌe toweraha goa pe imoaꞌyina. Imanamana
temiꞌoa goa pe, maꞌete opapa! Xoporemo ikaroi oꞌytaropapawamo.
Xowe okaropapa goa, hemimoꞌe imonyhygi imotynehema 12 arapahe temiꞌoa korera po. Eomia temiꞌoa, 5 pao,
mokoi ipira korera, Iexoa iweꞌyxohoi imogaro heta goa ipo.

Xenerowete Xeꞌega popewara: Mateo 14:13-21, Mako 6:31-44, Roke 9:10-17, Iohane 6:5-15
 Iexoa iatai aha ꞌya ꞌarimo

Iexoa imanai wemimoꞌe tokeke yhara pope, taha ꞌyowai henone. Hekai imanapawypyo goa, taha oawyripe, oxa.
Xowe iapawamo, aha oxepewei oxeopita ywytyra re, oporogetao Xenerowete pe ꞌo ypytonamo.

Einonamo hemimoꞌe, taraha ne ꞌyowai, oxa pane. Ypyaxexete, ꞌya pyteripe xowe hekai, kwarywytoa, ityreꞌia re
hatoeteramo ixope, ipyworahyrahyo pane.

Xowe oporogetapapa Xenerowete pe, Iexoa aha hepexona wemimoꞌe ꞌyhara katy. Oatao aha ywypapawa ꞌarimo!

Xowe hemimoꞌe Iexoa rexaka, okyyxeteo ixohi. Owera pa? Oxateo. Iexoa ikwahawi ikyyxetawa, aꞌeramo imomeꞌo
ixope: —Pekyyxeeme, Xene ixe!— Iꞌi ixope.
Xowe Pero imomeꞌo ixope: —Wemoꞌenan, aipa ene, xemana ipe wixe exepyri, ꞌya ꞌarimo taata ne weha.— Iexoa
iatywari: —Erexapa, Pero!— Iꞌi.

Xowe Pero ohema ꞌyhara hi, aha oatao ꞌya ꞌarimo hepexona Iexoa. Xowe omaꞌeteo Iexoa hi, omaꞌeo ꞌya
apipemohoa re, kwarywytohoa re we.

Okyyxeo, iypyroka oxepomio, wahewahemamo: —Wemoꞌenan, xepotywo ipe!— Iexoa kowei opoweꞌeka,
ipyhyka ipaa. Xowe imomeꞌo Iexoa ixope: —Akomaꞌe pipiete oxemoagypyhyg waꞌe! Maꞌeramo pa
naxemoakygytaihi ipe? —Iꞌi ixope.

Xowe Pero, Iexoa re oxowerokeo ꞌyhara pope, kowei kwarywytoa ywypapawa tyreꞌia we ixemomigi. Eomia
rexaka, hemimoꞌe imamari weꞌa. Okopytao opa, imomoxyo Iexoa imomeꞌo: —Axete, ene Wexan, Xenerowete
raꞌyra!— Iꞌi ixope.

Xenerowete Xeꞌega popewara: Mateo 14:22-33, Mako 6:45-52, Iohane 6:16-21

 Iexoa kataꞌagi akomaꞌe owera rerekatara, koxoa we
iawaipawa waꞌe ikataꞌaka.

Kwexare Iexoa wemimoꞌetoa re ihai ꞌyopawa rowai, oꞌeꞌeo Xenexare katy.

ꞌyhara hi iꞌeꞌeramo, akomaꞌe owera rerekatara itori oxona Iexoa pyri.

Eokwexa akomaꞌe hatoeteramo. Aꞌeramo nopyhygihi hekwehe. Amome goa hekwehe hamagai pane ipaa, ipya
we topahoma hatoete po, imanahapapa xowe oxeohi.

Eokwexa hekwehe hekai tywya pyri, wahemteramo aka ypytonimo, arimo we. Opintexowepe hekwehe hekai,
oxekyxikyxio ita po.
Xowe eokwexa akomaꞌe ota, okopytao oina Iexoa renone. Iexoa imomeꞌoi owera akomaꞌe popewara pe: —Ehem
akomaꞌe hi!— Iꞌi ixope.

Akomaꞌe owera rerekatara ixeꞌegahyi: —Maꞌe pa erepotan xeohi, wexan Iexoa, Xenerowete Xytaohoa raꞌyn?
Oremanaeme ipe ke maꞌeahyoho pe!— Iꞌi. Iexoa imomeꞌoi ixope: —Mo pa nerera?— Iꞌi Iexoa. Aꞌe iatywari: —
Heta xerera, heta ore aꞌeramo.— Iꞌi. (Owera ipopewara, exa 6 mio (seis mil) porixagawa non, aꞌeramo hera Heta).

Xowe owereteohoa ixapiroi, imomeꞌo Iexoa pe: —Oremanaeme ipe ke taraha ne, oga ywya hi.— Iꞌi. Eope
ywytyra poywyri hekwehe heta taxaorona, hekai okaro. Owera imomeꞌoi Iexoa pe: — Oremana ipe torokeke ne
heromia taxaorona pope. — Iꞌi Iexoa pe. Aꞌeramo Iexoa: —Pekwa!— Iꞌi ixope.

Owerohoa iꞌeꞌei akomaꞌe hi, aha okekeo taxaꞌorona pope, aꞌeramo taxaꞌorona ixoni aha, oxypa okokoita
ywypapawa pope, oxeekyipapapa. 2 mio (2000 mil) hekwehe eope hekai taxaꞌorona.
Taxaꞌorona rerekataretoa hekwehe hexagi einon Iexoa iaporamo, oxona aha oxopyteripe imomeꞌomeꞌo
xoporemo Iexoa remiapoa goa pe. Aꞌeramo goa ihai Iexoa pyri, hexaka akomaꞌe owera rerekatara, iapyg
itoiramo, ixyromonewamo, ixemomimawamo, xene iꞌeꞌemawi owera ixohi.

Aꞌeramo goa ikyyxetei Iexoa hi, goa imomeꞌo taha Iexoa, oxa. Aꞌeramo ikekei Iexoa wemimoꞌe re ꞌyhara pope
taraha ne, oxa. Xowe ota akomaꞌe eokwene herekaypyi owera, imomeꞌoi Iexoa pe: —Taha ne, neropi!— Iꞌi oꞌoma.

Iexoa iatywari: —Norowerahaꞌowihi wexeopi, exewyn eha eawyripe, imomeꞌomeꞌo epaxetoa pe. Xeꞌynia pe we
xoporemo Xenerowete exeope iapotawa, emomeꞌo we ke emomoriahomtawa ixope.— Iꞌi Iexoa ixope.

Xowe akomaꞌe aha imomeꞌomeꞌo xoporemo goa pe, Iexoa oxehe iapotawa. Hemimomeꞌoa renopa xoporemo
goa imamari weꞌa.
Iexoa oxewyta aha ꞌyowai, itoramo, heta goa ixomonyhygi, iaerowaka. Oxopepypepyta torowyg ne hehe, oxa.
Ipyteripe hekwehe oxepexowe koxoa, 12 imoxewyri amyna wowy ymynamo aka. Imomawi hekwehe otamatare.
Moromopoꞌomara heta iwepyo, taxekataꞌag ne, oxa pane. Maꞌete oxekataꞌaka xowe.

Henowi hekwehe heta Iexoa goa ikataꞌakawa imomeꞌonawa. Aꞌeramo hekwehe ixeamogetai: —Ixe amonamo
wewyka Iexoa ryroa re, xekataꞌagta.— Iꞌi oxeope. Aꞌeramo hekwehe Iexoa rewiri itori, owyka Iexoa apeyroa re.
Kowei hekwehe, wowytagamo, oxekataꞌaka!

Iexoa hekwehe ikwahawi. Xowe kowei imomeꞌo: —Awa pa owyg xerehe? — Iꞌi. Hemimoꞌe iatywari: —Ereexag
heta goa neaerowagi, wexan, oxopepypepyta amotemote katy, aꞌepe eipo ere?— Iꞌi Iexoa pe.

Koxoa eipoa renopa okopytao itoi Iexoa pya poywyri. Opapypapyka, okyyxeo. Xowe imomeꞌo Iexoa pe hehe
owygtawa, okataꞌagtawa we. Iexoa imomeꞌoi ixope: —Erexekataꞌag exemoagypyhykawa po, ekwa exyꞌoapyg
katoeteramo.— Iꞌi.

Xenerowete Xeꞌega popewara: Mateo 8:28-34, Mako 5:1-20, Roke 8:26-39

 Akomaꞌe haꞌynia tymara iporogeta

Kwexare, Iexoa imoꞌei heta goa, ꞌyopawa remeꞌywa re. Ikei ꞌyhara pope, heroxemokwatarereo toenom goa, oxa.

Iapygi oina, imoꞌeo goa pe, omomeꞌo morogeta ixope: —Akomaꞌe ihai ityma haꞌynia, imaaparamo, amome
haꞌynia iꞌari pee ropi. Wyra hexaka, ota iꞌo eomia haꞌynia.

—Amote haꞌynia iꞌari ywya re, aꞌepe heta ita. Kowei haꞌynia oxehopa, hapa noywypyhygkatoihi pipi ywya ramo.
Aꞌeramo kwarahya ipeo, oxyxygamo, kowei omano.

—Amote haꞌynia iꞌari xowa pyteripe. Haꞌynia ixehowamo. Xowa imamymamyni, imomano, maꞌete oꞌaramo.
—Amote haꞌynia iꞌari ywya ikatoete pope. Aꞌe haꞌynia ixehowi, oxytaramo, heta oꞌaramo. Amome mia iꞌa 30
(trinta), amote raꞌynia iꞌaramo 60 (sessenta), amote raꞌynia 100 (cem) iꞌa. Eipoa renopara, toenom katoete.— Iꞌi
Iexoa.

Hemimoꞌe nokwahawihi hemimomeꞌoa. Aꞌeramo imomeꞌoi ixope: —Emomeꞌo kato morogeta oreope.— Iꞌi
ixope. Xowe Iexoa imomeꞌo kato: —Haꞌynia exa Xenerowete xeꞌega non. Haꞌynia pee ropi oꞌan waꞌe exa amome
goa oenom Xenerowete xeꞌega, nokwahawihiete non. Aꞌeramo Xatanaxa itori, herahao ixohi ixeꞌega.

— Amote haꞌynia iꞌari ywy ita pope, nahapaihi, exa goa opotan Xenerowete xeꞌega renopawa, xowe
woryweteramo imoaro non. Xowe maꞌeagawa oxehe itoramo, ixigoyꞌyma we, xowe opohita Xenerowete re
oxemoagypyhykawa hi.

—Amote haꞌynia iꞌari xowa pyteripe exa goa henowi Xenerowete xeꞌega imoaro non. Xowe okwepawamo aka
owyaryꞌyma tamatareohoa rehe, oxeamogetao amote maꞌexiroa re, wemipotara xowe iapo. Ipytopyka
Xenerowete xeꞌega ipopewara, wekatawa re we. Aꞌeramo noapoihiete Xenerowete maꞌeapotawa, pipiete
oꞌaramo.
—Amote haꞌynia iꞌari ywy katoa pope exa goa oenom Xenerowete xeꞌega. Aꞌe omoaro non, weharamo
Xenerowete xeꞌega re. Aꞌe iapo aka Xenerowete maꞌeapotawa xowe, heta oꞌaramo.— Iꞌi Iexoa ixope.

Xenerowete xeꞌega popewara: Mateo 13:1-8, 18-23, Mako 4:1-8, 13-20, Roke 8:4-15
 Iexoa imomeꞌo amote morogeta we

Iexoa imomeꞌoi heta amote morogeta, tamoꞌe ne Xenerowete moroyrohoramo hekatawa re, oxa. Oxepexowe
imomeꞌoi non: —Xenerowete moroyrohoramo hekatawa exa motata raꞌynia non. Akomaꞌe itymi okaa pope.
Pekwaham motata raꞌynia haꞌyipipiramo.

—Motata raꞌynia oxehopa, oxemotowio oxytaohoramo amote ꞌywa hi, kaa kawora pyteripe oꞌoma.
Ixytaohoeteramo wyra heta opyroka hehe, amome iapo waytya hakoa re.— Iꞌi ixope.

Iexoa imomeꞌo xokweri amote morogeta: —Xenerowete moroyrohoramo hekatawa exa imomarapawa non,
koxoa imoꞌahyꞌahyina pao rehe, imomarapapa xoporemo awaxiꞌiagawa. —

—Xenerowete moroyrohoramo hekatawa exa maꞌexiroa hepyete waꞌe, exa awaa itymi kaꞌa pe non. Ikwepawamo
amote akomaꞌe hexagi eomia maꞌexiroa hepyete waꞌe, woryweteramo. Xowe itym xokweta. Xowe aha oawyripe,
iwepypapa xoporemo omaꞌexiroa, tawepy ne eope ywya maꞌexiro hepyete waꞌe ryroa, oxa.—
—Xenerowete moroyrohoramo hekatawa exa perora iaroete waꞌe, hepyete waꞌe we, (perora ipixiga iakypoꞌa
kawora). Perora wepytara, hexaka perora iaroeteramo, aha iwepypapa xoporemo omaꞌexiroa, tawepy ne
eokwexa perora iaroete waꞌe, oxa.

Xowe Iexoa imomeꞌo xokweta amote morogeta, tamoꞌe ne goa, oxa. Amome goa ixeamogetai "Xenerowete
orepotaretei, maꞌekatoa ore iaporamo." Iꞌi oxeope. Eomia goa noxigoihi weꞌynia. Iexoa imomeꞌoi: —Mokoi
akomaꞌe ihai Xenerowete raga pope oporogetao Xenerowete pe. Oxepexowe tamatare pyhykara, iroa xoteo
moroyroa.

—Xoteo moroyroa iporogetai non Xenerowete pe: "Ikatoete, Wetowete, ixe naapoihi maꞌeagawa, exa heromia
akomaꞌetoa imonaoho, amote naikatoihi, amote hereka oxowatya, maꞌete exa heromia tamatare pyhykara
nonyꞌym."

—"Ixe nakaroteihi weka neope, wekoꞌekoꞌemamo mokoi. 10 wemaꞌexiroa, tamatare we hetaramo, amana
Xenerowete pe oxepexowewara wetemipyhyga", iꞌi xoteo moroyroa Xenerowete pe.
—Eokwexa tamatare pyhykara ipokoete itoi, ywya re xowe omaꞌeo. Ikwahawi maꞌeagawa wemiapoa. Oxepoxiꞌa
noponopo, hexagokata oxearaꞌagtawa, oporogetao Xenerowete pe: "Wetowete, xemomoriahowipe, ixe
maꞌeagawa apotara," iꞌi.

Xowe Iexoa imomeꞌo: —Amomeꞌo pota penope aꞌete: Xenerowete oenom tamatare pyhykara remimomeꞌoa.
Weakaxymamo tamatare pyhykara remiapoagawa hi. Xenerowete nopotarihi xoteo moroyroa remimomeꞌoa
porogeta. Xenerowete ipotarete oxemoenteyꞌym waꞌe, omoxeroxi pota goa oxemoete aka waꞌe.—

Xenerowete xeꞌega popewara: Mateo 13:31-33, 44-46, Mako 4:30-32, Roke 13:18-21; 18:9-14
 Towa ikatoete waꞌe porogeta

Kwexare, Iexoa imoꞌei heta goa, tamatare pyhykaretoa, amote maꞌeagawa apotaretoa Iexoa remimomeꞌoa
renopara.

Amome xoteo moroyroetoa pyteripe ikwawi. Hexaka Iexoa maꞌeagawa apotaretoa herekakatoete exa opaxetoa
nonamo. Iypyroka oporogetagapa Iexoa re opa. Xowe Iexoa imomeꞌoi morogeta ixope:

—Akomaꞌe mokoi taꞌyra. Taꞌyra awarame imomeꞌo wowa pe: "Ana, emoꞌaꞌyi emaꞌexiroa oreope, emon
xemaꞌexiroroma". Aꞌeramo towa imanamanai waꞌyna pe imaꞌexiroroma.

—Xowe taꞌyra awarame kowei imoxeaꞌeꞌata xoporemo maꞌexiroa. Xowe aha ipokoete. Eowyime imomapa
xoporemo tamatare, iapo maꞌeagawa re.
—Ikwepawamo, okoita teꞌoa goa re. Aꞌe we oteꞌoramo. Namaꞌetywihi itamatare towepy temiꞌoa oxeope.
Aꞌeramo ihai omaꞌeapo taxaꞌorona re oxemoryryita. Oteꞌoeteramo, iꞌoheita taxaꞌorona remiꞌoa.

—Amoteramo, taꞌyra awarame oxeamogetao oxehe: "Maꞌe re pa aka ꞌome? Xerowa awyripe imaꞌeapotara heta
temiꞌoa, imokoreri, ixe herekao ꞌome teꞌoa. Aha pota wetowa awyripe, amomeꞌo pota ixope: Ana, xemaga ipe
emaꞌeapotaramo."—

Xowe aꞌe opoꞌoma aha oxewyta wowa awyripe. Kwexete hexagi towa pee ropi, imomoriahopa. Xowe oxona aha,
iaxowona waꞌyra, hatypypytepyteta we.

"Ana, aapoagawete Xenerowete pe, neope we, xerenonieme xokweripe ke xaꞌyra po." Iꞌi wowa pe.
—Towa oenoi omaꞌeapotara, imomeꞌoi ixope: "Eron tyroa iaroete waꞌe, hyromonepa xeraꞌyra. Eron
koakygimewara we imonepa ikoakygime. Eron myroa we ipyromonepa. Exoka tapiꞌiragawa memyra ikyraoho
waꞌe, xaapo morahaitawa xytaohoete. Xaexagokan xerexorypawa xoporemo goa pe. Ka xeraꞌyra exa omano,
okweram xokweta non! Ikaxymypyi, hexag xokweta no!" —

—Einon towa iapoi morahaitawa waꞌyra xewyramo. Xowe taꞌyrypya itori oxewyta oawyripe omaꞌeapotawa hi.
Henopa morahaitawa xeꞌegara. Xowe imomeꞌo maꞌeapotara pe: "Maꞌe pe pa morahaitawa?" Iꞌi ixope.

—Imaꞌeapotara imomeꞌo ixope: "Nerywyra oxewyn ota. Aꞌeramo nerowa iapoi morahaitawa ixope."
Ipirahyeteramo tekeꞌyra wowa pe. Aꞌe nokepotarihi morahaitaipe. Xowe towa ohema ota imogetao toke
morahaitaipe woryweteramo, oxa pane, aꞌe nahaihi okeo.

—Taꞌyrypya imomeꞌo wowa pe: "Ixe amaꞌeapote aoxeaꞌe neope exa maꞌeapotara non. Ixe oromoaro ymyn weka.
Ene neremorihiete mixaragawamo xeope, taapo ne morahaitawa wepaxetoa re. Eokwexa neraꞌyra orame waꞌe,
imomawi oxeope neremimana tamatare maꞌeagawa re. Xowe oxewyta ota, ene iapo ixope morahaitawa, ixokao
tapiꞌiragawa memyra ikyraoho waꞌe ixope".
—Towa iatywari: "Wetaꞌyn, ene ereka xepyri, aꞌeramo xoporemo xemaꞌexiroa neapoa. Ixe aapo morahaitawa
taexagokan ne wetorywa, nerywyra exa omanoypy, okweram xokweta no non. Okaxymypyo, hexag xokweta no."

Xenerowete xeꞌega popewara: Roke 15:11-32

 Iexoa oxeweny

Iexoa oxeopita ywytyra ropi, oporogetao Wope pe, Xenerowete pe. Pero weraha oxeopi, Xiagoa we, Iohane we.
(Iohane oporomoxepomi waꞌeyꞌym).

Iporogetaramo, hekwara henyꞌogamo, exa kwarahya non. Hyroa we henyꞌogahyohoramo exa hepixam waꞌe non.

Tepaxawyꞌyime mokoi akomaꞌe akaypy waꞌekwera itori Iexoa pyri, wenyꞌogamo. Moixoa hera. Amote akomaꞌe
rera Eria. Xenerowete xekwehe imanai oxeꞌega ixope. Xowe ota Iexoa pyri, oporogetao Iexoa pe Xeroxarem pyri
ixekyitawoma rehe.

Moixoa Eria re oporogetao opa Iexoa pe. Pero imomeꞌoi: —Wexan, ikatoete araka neropi. Tapyxa oroapo pota
penope. Oroapo pota tapyxa neope, amote Moixoa pe, amote Eria pe.— Pero oporogetateo.
Ixeꞌegamo, ixywi ota hehe tataxiga henyꞌogohoa, iowona. Xenerowete oporogetao tataxiga pope: "Eope
xeraꞌyra, xeremipotarete. Aꞌe xeworywetei. Peenom xeraꞌyra xeꞌega." Iꞌi. Hemimoꞌe ixemaanai, oꞌata ywype
okyyxeo.

Xowe Iexoa ipyhyka, imomeꞌoi ixope: —Pekyyxeeme! Pepoꞌom!— Iꞌi ixope. Xowe hemimoꞌe opoꞌoma,
omaꞌemaꞌeo, maꞌete hexaka akomaꞌetoa, Iexoa xowe oꞌoma eopeo.

Oxypa ota ywytyra hi Iexoa imomeꞌoi eomi wemimoꞌe iroyꞌym waꞌe pe: —Pemomeꞌoeme ypy ke, pexexemiexaga.
Koweita amano, wekwerapa xokwen. Aꞌeramo wixe ke pemomeꞌo amotemote pe ꞌao pexexemiexaga.— Iꞌi Iexoa

Xenerowete xeꞌega popewara: Mateo 17:1-9, Mako 9:2-8, Roke 9:28-36

 Iexoa omokweram xokwen Raxaroa

Kwexare Iexoa henowi Raxaroa iawaipaweteramo imomeꞌonawa. Raxaroa, wenyna Maria, Marita re, Iexoa
paxetoa. Iexoa imaꞌehytawa henopa, imomeꞌo: —Eomia maꞌeahya norihi noxokaꞌowihi, itori hexagokata
Xenerowete poahywa, tomomoxy Xenerowete ixytaohoete we. — Iexoa ipotaretei hekwehe Marita, ipykyꞌyra we,
Raxaroa we. Aꞌepe Iexoa mokoi ikeri akataipe.

Xowe Iexoa imomeꞌoi wemimoꞌe pe: —Pexe, xaxewyn Xotea pyri. — Iꞌi. Xowe hemimoꞌe iatywari: —Wemoꞌenan,
naikwepawihiete we goa Xotea pewara nemamaitawa, erexewynta pa eha? — Iꞌi Iexoa pe. Iexoa imomeꞌo: —
Xenepaxe Raxaroa oken opa, einonta aha imomaka. — Iꞌi.

Hemimoꞌe iatywari: —Wexan, amonamo oketa opa Raxaroa, ikato pota ramo. — Iꞌi Iexoa pe. Iexoa remimoꞌe
ixeamogetai Raxaroa oken xowe pa. Iꞌite. Iexoa imomeꞌoi Raxaroa manonawa rehe, maꞌete imima: —Omano
Raxaroa. Naikaihi eopeo hexagyꞌyma imanonawa, aꞌeramo xerorywete, einonamo pota pehe peexag
nepemoakygytaꞌowihi, pexexemiexaga, xowe pota pexemoagypyhyka xerehe. — Iꞌi.
Raxaroa manonawa irogatoeteramo, okoꞌemamo Iexoa wetomime itoramo. Xowe Marita ienopa kwepe Iexoa on
iꞌiramo, aꞌe "aha howaxio taexag ne," oxa. Xowe Marita imomeꞌo Iexoa pe: —Wexan, ꞌao nekaramo amo
nomanoihi xekywyra, aꞌe akwaham. Einoxi Xenerowete iapopotari xoporemo neremimomeꞌoa.

Iexoa iatywari: —Iexoa ixe, eokwene amana hekatawa, eokwe oporomokweram waꞌe, aoxeaꞌe taka okwerapa.
Eokwene ixemoagypyhygi xerehe omano pota, ikweram xokwentari. Eokwene xerehe ixemoagypyhygi
nomanoaꞌowihiete. Erexemoagypyhyg pa eomia re?— Iꞌi Marita pe. Marita iatywari: —Aꞌe Wexan,
axemoagypyhyg nerehe, ene Xenerowete raꞌyra ywype hemimora (Mexia).— Iꞌi Iexoa pe.

Xowe Maria ota Iexoa roinaipe. Kowei hexaka, okopytao oina ipya poywyri. Eipo iꞌi: —Wexan, ꞌao nekaramo amo
nomanoihi amo xekywyra!— Iꞌi Maria. Iexoa imomeꞌoi goa pe: —Mome pa penog hewera? — Iꞌi Iexoa. —Pee,
exan hexaka, wexan.— Iꞌi goa iatywata. Xowe Iexoa hapiro.

Tywya, itakwarohoa pope, ita po hakwapetymyrohoa. Iexoa ihai eopeo. Aꞌe imanai: —Pexyi ita!— Iꞌi goa pe.
Marita imomeꞌoi: —Wexan, irogatoete ikeri itymawa. Aꞌe rimo inemeteramo.— Iꞌi.
Iexoa iatywari: —Ixe amomeꞌo ne neope. Exemoagypyhyka xerehe, ereexagta Xenerowete poahywa, aꞌe ne
neope. —Iꞌi Iexoa ixope. Xowe hexyita ita hywya rakwapetymawa.

Iexoa omaꞌeo ywaga re, eipo oxa: — Ana, Ene nekatoete, Ene xerenowipe. Akwaham xerenowymyn ipe.
Amomeꞌo eipoa neope, ꞌa itowi goa omaꞌeo, xerehe toxemoagypyhyg, Ene naka xemoripe.— Iꞌi Iexoa
Xenerowete pe. Eipo oxa oxeꞌegahyoho: —Raxaro, ehem exata okope pe!— Iꞌi ixope.

Raxaroa ohema ota. Hamagamagai omano waꞌe hamagatawa po. Xowe Iexoa iꞌi: —Pekwaram xepykawagawa,
napo ke aꞌete oatao.— Iꞌi Iexoa. Heta xoteo reꞌynia eomia rexaka ixemoagypyhygi Iexoa re.

Xoteo moroyroetoa imoxari Iexoa ipoahywamo. Xoporemo goa hehe iporogeta katoeteramo. Aꞌeramo imamai
Iexoa Raxaroa re.

Xenerowete Xeꞌega popewara: Iohane 11:1-46

 Hexagokata Iexoa

Amyna xewyhawa reherehe xoteo goa iapoi aka Pakwa morahaitawa, torereha ne Exito hi ymaꞌetewe oroypya
rekyitawa re, oxa. Nomoiroihi imoxewyta amyna imoꞌeo aka Iexoa wemimoꞌe pe. Xowe Iexoa imomeꞌoi
wemimoꞌe pe: —Pexe, xaha Pakwa morahaitawipe Xeroxarem pyri, eowyime pota xexokai.— Iꞌi.

12 hemimoꞌe pyteripe hekai akomaꞌe, Xota po hen waꞌe. Eokwexa hekwehe herekai apotora goa tamatare. Xota
ipotaretei hekwehe tamatare, aꞌeramo hekwehe pipi imimi aka tamatare oxeope. Xeroxarem pyri ota Iexoa goa
re. Xota aha Xenerowete raga maꞌeapotara moroyroa pe oporogetao. Ikwahawi hekwehe eomia Iexoa
imamaitawa. Aꞌeramo ihai oporogetao ixope: —Aexagokanta Iexoa penope tepexoka, xewepyipe tamatare po.—
Iꞌi Xota ixope. Eomia akomaꞌetoa hekwehe noxemoagypyhygihi Iexoa Mexiaramo hekatawa re.

Xaxetote moroyroramo hekwehe hekai xoteo goa moroyroa pyteripe. Iwepyi Xota 30 itapema itaxiga powara po
toexagokan Iexoa oreope, oxa. Xenerowete xeꞌega momeꞌonara remimomeꞌokwera ropi einon iapoi. Xota eomia
re eino ixomorywi. Xota ipyhyka tamatare. Xowe aha, oxeamogetao: "Maranta pa apotywo toakwapetym Iexoa?"
Oxa.
Iexoa iapoi Pakwa morahaitawa wemimoꞌe re Xeroxarem pyri. Okaro opa, Iexoa ipyhyka pao, imaxaraxaraka,
imanamanao wemimoꞌe pe: —Ka, exa xerete non, amana wetete penehe. Xeharamo ke no, peapo pexeka. Pao
imaxaraka, iꞌo, pexexeharamo xerehe.— Einon Iexoa imomeꞌoi wete hehe omanotawoma re.

Hehewe ipyhygi owa rya torixaꞌe pope, imomeꞌo: —Ka peꞌyꞌo ipo, exa xerowya non. Xerowya oxehenta xeohi,
ihypa pemaꞌeagawa penohi, mia Xenerowete xomorypawa iyahoa. Eino ke peapo pexeka, tepeneha we xerehe,
mia po pexeꞌyꞌo pexeka. — Iꞌi Iexoa.

Iporogetai we Iexoa wemimoꞌe pe: —Oxepexowe pepyteri pewara xerexagokantari. — Iꞌi. Oxemaanao hemimoꞌe,
imomeꞌoi oxoope: —Awa pota pa rimo Iexoa rexagokantara xene pyteripe? —Iꞌi oxoope. Iexoa imomeꞌoi: —
Eokwene amana pota ixope pao, eokwexa pota xerexagokantaroma. — Xowe imanai pao Xota pe.

Xowe Xota iꞌo pao, Xatanaxa okeo ipope. Homymawamo, Xota aha ohema, "tapotywo ne xoteo moroyroa
toakwapetym Iexoa", oxa.
Okaropapa, Iexoa wemimoꞌe re ihai oxeopita Axeitona ꞌywa ywytyra pyri. Iexoa imomeꞌoi: — Kare ypytonimo
pota xoporemo pehe pexonta pexeha xeohi, xemoina oxepewei. Xenerowete xeꞌega pope imopinim inoga:
"Axoka pota Mixaragawa raaronara. Xowe xoporemo mixaragawa opyamoramo oahyahyina." —Iꞌi Iexoa.

Pero iatywari: —Xoporemo pota pane ixoni neohi, ixe pota nahaꞌowihi neohi!— Iꞌi Iexoa pe. Xowe Iexoa iatywari
Pero: —Xatanaxa pepotari xoporemo, aꞌe ixe aporogeta nerehe, Pero, taatoete nexemoagypyhykawa. Einoxi
pota kare ypytonimo, wyrapaxe ixeꞌegyꞌymamo we, ene eremomeꞌo pota imoiroyꞌyma "Naexagihiete eokwexa!"
Ere pota xeope.— Iꞌi Iexoa ixope.

Pero imomeꞌoi Iexoa pe: —Xexoka potari we pane, namomeꞌoaꞌowihi norokwahawihi, wexayꞌyma!— Xoporemo
amote hemimoꞌe we eipo oxa.

Xowe Iexoa aha wemimoꞌetoa re Xexemani po hen waꞌe pyri. Imomeꞌoi wemimoꞌe pe, toporogeta Xenerowete
pe, tomoaroeme we Xatanaxa xeꞌega. Iexoa ihai oxemokwatata, oporogetao oxepewei Xenerowete pe.

Iexoa nomoiroihi oporogetao Xenerowete pe: —Ana, maran amo pa, erexyi xeohi xexekyitawa? Namaꞌetywihi pa
amote xoporemo goa maꞌeagawa ihymtawoma? Imaꞌetywyꞌymamo ke eapo xerehe xemipotara! —Iꞌi. Iexoa
naewarihiete. Ipiryꞌaxa opoka exa wya towya non. Xowe Xenerowete imota ywagimewara towato, iwewata, oxa.

Iexoa Xenerowete pe oporogeta reherehe, itori wemimoꞌe pyri, hexaka iken ikwawamo. Mapawete re itori Iexoa
imomaka wemimoꞌe, eipo iꞌi ixope: —Pepapag! On xerexagokantara.— Iꞌi.

Xota itori xoteo moroyroa ropi, herota heta porixagawa we, heta we goa itori, herota kyꞌepokoa, ywyra aꞌywera
we. Xota aha Iexoa pyri, imomeꞌo: —Wemoꞌenan, axan!— Xowe hatypypyteta, einon ixomorywi xoteo moroyroa
re, hexagokata Iexoa ixope toakwapetym. Iexoa imomeꞌoi Xota pe: —Xota, ene xerexagokaripe ixope,
xeratypypyteta. — Iꞌi ixope.

Porixagawa iaerowaka Iexoa toroakwapetym ne, oxa, Pero hekyi okyꞌepokoa, inami manaka xaxetoxe moroyroa
pe omaꞌeapo waꞌe namia. Iexoa imomeꞌoi Pero pe: —Einoneme, emonem ekyꞌepokoa, ixe ipotata amo,
amomeꞌo amo Wetowa pe tomon heta ywagimewara taxepotywo ne. Aꞌe amoaro pota Wetowa xeꞌega. —Xowe
Iexoa inoga opa akomaꞌe namia re, imokaꞌeo ixohi. Xowe hakwapetyma Iexoa, hemimoꞌe xoporemo oxona aha
ixohi hakwapetymamo.

Xenerowete xeꞌega popewara: Mateo 26:14-56, Mako 14:10-50, Roke 22:1-53, Iohane 18:1-11
 Morogetakwaparete pyri Iexoa re iporogetatawa

Ypyaxei, porixagawa herahai Iexoa xaxetote moropetega pe tomomeꞌomeꞌo ixope: —Aipa axete iapoi
maꞌeagawa?— Oxa. Kwexete, Pero oxepewei ihai heta goa rewiri. Tawa pope Iexoa herokeramo, Pero okopepe
iꞌomi. Xowe tata omoxapoꞌo goa okopepe, Pero oxepeꞌeo oina ipoywyri.

Awa rowaypype xoteo moroyroetoa iypyrogi oporogetao Iexoa rehe, henowi heta goa: —maꞌeagawa iapoi, —
iꞌiteramo. Amotemote imomeꞌo imoxekwahawyꞌyma otemonamo. Aꞌeramo xoteo moroyroete noexagihiete
Iexoa maꞌeagawa iapotawa. Xemim iꞌomi Iexoa.

Hehewe, xaxetote moropetega imaꞌetei Iexoa re, imomeꞌo ixope: —Emomeꞌo, aipa Xenerowete Mexia ene?
Xenerowete aka ymynoho waꞌe raꞌyra pa ene?— Iꞌi ixope.

Iexoa iatywari: —Ixe, Xenerowete raꞌyra. Ene pota xerexagipe Xenerowete poywyri xeapyg xeroiramo, ywaga hi
xeroramo we — Iꞌi. Xowe xaxetote moropetega opirahyramo, imararaka oapeyroa, xowe wahemamo, imomeꞌo
amote pe: —Amote xeꞌega xaenom xokwereme Iexoa rehe imomeꞌonawa! Pehe peenon: "Ixe Xenerowete
raꞌyra," iꞌiramo." Maꞌe pa xaapo hehe? —Xaxetote moropetega iꞌi amotemote pe.

Xowe xoporemo xoteo moroyroa iatywari: —Pexe, tomano wixe ke!— Iꞌi oxoope. Xowe hekwata Iexoa, imamata,
onimonimota hehe, inoponopo we.

Okopepe Pero ꞌomamo, Xaxetote moropetega pe omaꞌeapo waꞌe koxoa, omaꞌeo hehe, imomeꞌo ixope: — Ene
we ereka Iexoa ropi!— Iꞌi ixope. Pero iatywari: —Maa, naexagihiete eokwexa!— Iꞌi pane Pero. Kwee amote koxoa
oexag, imomeꞌo xokweri ixope. Pero itemon xokweramo. Kwee amote ikwaweꞌeg xokweri ixope: —Orokwaham,
ene we ereka Iexoa ropi, pehe Garirea pyriwara!— Iꞌi ixope.

Pero imomeꞌoi: —Eokwexa akomaꞌe ixe hexagamo, Xenerowete toapo xeope maꞌeagawa!— Iꞌi ixope. Eipo
iꞌiramo, ixeꞌegi wyrapaxe. Iexoa owaka omaꞌeo Pero rehe.

Pero ohema aha, oxapiroeteo. Xowe Xota Iexoa rexagokantara, henopa xoteo moroyroetoa, "xaxoka ke Iexoa",
iꞌitawa imomeꞌonawa. Xowe aha oxearekaeteo, xowe oxexokao.
Oxeꞌiwe koꞌemawyꞌymamo, xoteo moroyroetoa herahai Iexoa Piratoa pe, Homa moromanatara, imanai hekwehe
goa toxoka maꞌeagawa apotara aka. Xowe Piratoa imomeꞌo Iexoa pe: —Xoteo moroyroa ixiapyripewara pa ene?
— Iꞌi Iexoa pe.

Iexoa iatywari: —Ene eipo ere, moroyroramo xerekatawa ꞌao ywypeyꞌym. ꞌao ramo amo, xeope omaꞌeapo waꞌe,
ipakagi amo xerehe. Axan ywype, tamomeꞌo ne aꞌete Xenerowete rehe, wexa. Xoporemo aꞌete potahara henowi
xexeꞌega.— Iꞌi. Xowe Piratoa imomeꞌoi ixope: —Maꞌe pa aꞌete?— Iꞌi.

Xowe Iexoa pe oporogetapapa, Piratoa ixewyri aha oporogetao goa pe: —Naexagihiete awa akomaꞌe
maꞌeagawa iapotawa. — Iꞌi Piratoa xoteo moroyroa pe, goa pe we. Xoporemo oxeꞌegahyo: —Exoka ꞌywa
howahapyra re ekaꞌekag!— Iꞌi oxeꞌegahyoho. Xowe Piratoa iatywata: —Maꞌeramo pa axoka pota? Noapoihi
maꞌeagawa. — Iꞌi pane ixope. Xowe goa oapokapokaxahyoho. Xowe Piratoa nomoaroihi, imomeꞌo: —Aꞌe
noapoihi maꞌeagawa.—Iꞌi pane.

Piratoa ikyyxei hekwehe goa rapo naxexigoihi, oxa. Imanai Iexoa oporixagawa pe, toweraha ikaikaka ꞌywa
howahapyra re. Xowe Homa porixagawa imopimopigi Iexoa topahoma pymohoa po. Omonem we hekwehe
ixohi moroyroa ixiapyripewara ryroa, imonepa iꞌa re akykwahawa xowa powara. Ixaixaita, imomeꞌo: —Peexag,
xoteo moroyroa ixiapyripewara!— Iꞌi goa pe.

Xenerowete xeꞌega popewara: Mateo 26:57 a 27:26; Mako 14:53 a 15:15; Roke 22:54 a 23:25; Iohane 18:12 a 19:16
 Iexoa ikaikagi ꞌywa howahapyra rehe

Ixaixai, inoponopo Iexoa. Xowe porixagawa herahao torokarokag ne, oxa. Imanai Iexoa towereka ꞌywa
howahapyra, hehe okaokagtawoma, omanotawoma.

Porixagawa herahai Iexoa, ywytyra pyri "Iꞌapinekwera", ywytyra rera. Ipokapokagi itaxowohoa po ipaa, ipya we.
Iexoa oporogetao Xenerowete pe: —Ana, goa nokwahawihi wemiapoa, aꞌeramo xeakaxym imaꞌeagawa hi.— Iꞌi
Iexoa. Piratoa imanai hekwehe tomopinim "Xoteo moroyroa ixiapyripewara" ywaꞌa re. Xowe imana tokag ywaꞌa
Iexoa ꞌarimo.

Porixagawa imamari itaꞌia, toroexag ne "Awa pota pa wereka iapeyroa?" Oxa. Nokwahawihi Xenerowete xeꞌega
pope einon iapotawa re hemimopinima: "imaxaꞌaxaꞌagi xeapeyroa, imamari itaꞌia, hexaka xeapeyroa
rerekataroma." Iꞌi imopinima ymaꞌetewe.

Iexoa ꞌywa howahapyra, imonaoho waꞌe pyteripe iꞌomi. Ixyke katy oxepexowe, iroa ipewera katy. Oxepexowe
ixaixai Iexoa. Xowe iroa heroxeꞌegi: —Nerekyyxeihi pa Xenerowete hi? Maꞌeagawa xaapo, aꞌeramo xaxekyita.
Iexoa noapoihi maꞌeagawa.— Iꞌi. Xowe oporogetao Iexoa pe: —Iexo, moropetegamo eeka ke exewyta xeha
xerehe.— Iꞌi Iexoa pe. Iexoa iatywari: —Amomeꞌo neope, kare pota ereka xepyri ywagime.— Iꞌi ixope.

Heta goa, xoteo moroyroa re ixaixai Iexoa, imomeꞌoi ixope: —Aipa axeete ene Xenerowete raꞌyra, exym wixe
exata ꞌywa howahapyra hi, exekataꞌaka toroxemoagypyhyg ne wixe nerehe.— Iꞌi ixaixaita.

Kwarahya pyteripe, iwewi kwarahya, womygohoramo. 3 arowamo (3 hora) ixawi kwarahya xokwen.

Xowe Iexoa iapokai: —Aapopam! Ana, wepytoa amana terereka exepyri.— Iꞌi. Oꞌaxoraramo, xowe omano. Imano
rame ramo we ywya ipapygohoi. Kwee Xenerowete raga pope xepykawagawa itaragi oxopytera ropi.

Omanonawa ropi, Iexoa ipiawagi pee goa pe taha Xenerowete pyri. Oxepexowe porixagawa xoporemo eomia
rexaka, imomeꞌoi: —Axete herike awa akomaꞌe noapoihiete maꞌeagawa, Xenerowete raꞌyrete herike.—Iꞌi.
Xoxe, Nikotemo re xoteo moroyroa hekwehe. Ixemoagypyhygi hekwehe Iexoa re, Xenerowete remimora re
(Mexia). Iexoa manoramo, aꞌe oxoweraha imomeꞌo Piratoa pe: —toroweroxym ne Iexoa rete ꞌywa howahapyra
hi, ityma, — oxa. Xowe heroxypa Iexoa rete iowona xepykawa po, imonepa itakwara ropi. Hakwapetyma
itakwara roxoroa ita ixytaohoa po.

Xenerowete xeꞌega popewara: Mateo 27:27-61; Mako 15:16-47; Roke 23:26-56; Iohane 19:17-42
 Iexoa ikweram xokweri omanonawa hi

Oxeꞌiwe Iexoa ikaikagtawa hi. Amome xoteo moroyroa Iexoa Xenerowete raꞌyra re oxemoagypyhygyꞌym waꞌe,
ihai imomeꞌoi Piratoa pe: —Iexoa eokwe itemonoho waꞌe, "wemano pota, akweram xokwen", koꞌema iroyꞌyma
rehe.— Iꞌi Piratoa pe. —Emana porixagawamo, toaaro hewera ryroa, hemimoꞌe rapo aha, henohema hewera,
xowe "okweram" oxateo rapo xeneope.— Iꞌi.

Einonamo Piratoa imanai porixagawa: —Peraha porixagawetoa pexexeopi, toaaro itakwara roxoroa hete ryroa,
peaaro katoete ke, pexexopa.— Xowe porixagawa aha, haaro opa itakwara roxoroa Iexoa rete ryroa, tomimeme
we amote ota, oxa.

Iexoa itymi hekwehe, oxeꞌiwe xowe xepe topoa tawaramo, xoteo goa opytoꞌo oawyripe. Maꞌete aha hexaka
tywya, imoaro Moixoa xeꞌega. Amote koꞌema re, koꞌemawyꞌymeteramo koxoetoa ihai herahao xemopiꞌetawa
toromopiꞌe ne Iexoa rewera, oxa.
Tepaxawyꞌyime, ywya opapykaho, ywagimewara oxexagokata, wenyꞌonyꞌogamo, exa kwarahya non. Hexyita ita
xytaohoa itakwara roxoroa rakwapetymawa, oapyka oina hehe. Porixagawetoa itakwara roxoxoroa raaronara
okyyxeo, iꞌari ywype exa omano waꞌe non.

Xowe koxoetoa aha itakwara pyri, ywagimewara imomeꞌoi ixope: —Pekyyxeeme, nakaihi ꞌao Iexoa. Ikweram
xokweri omanonawa hi, exa naka imomeꞌoi non. Pemaꞌe wixe itakwara rowaypya re, tepeexag namaꞌetywihi!— Iꞌi
ywagimewara. Xowe koxoetoa okekeo hexaka itakwara rowaypya, hexaka Iexoa nogawa pane, maꞌete hexaka
Iexoa rewera!

Xowe ywagimewara imomeꞌo koxoetoa pe: —Pekwa, imomeꞌo Iexoa remimoꞌe pe, okweram xokwen Iexoa
omanonawa hi. Garirea pyri pota ihai pepyri! Pexe ke rimo ixope.— Iꞌi ywagimewara.

Xowe koxoetoa oxona aha, woryweteramo, imomeꞌo xeꞌeg katoa Iexoa remimoꞌe pe.

Koxoetoa oxewyta ota, toromomeꞌo ne hemimoꞌe pe xeꞌeg katoa, oxa. Iexoa ixexagokari ixope pee ropi. Iexoa
rexaka okopytao itowi imoxykaka wekwara ywya re, imomoxyo. Iexoa imomeꞌo ixope: — Pekyyxeeme! Pekwa
imomeꞌo xeremimoꞌe pe, taha Garirea pyri, eowyime pota xerexagi.— Iꞌi Iexoa koxoetoa pe.

Xenerowete xeꞌega popewara: Mateo 27:62-28:15; Mako 16:1-11; Roke 24:1-12; Iohane 20:1-18
 Iexoa ixewyri aha ywagime

Iexoa kweram xokweramo, mokoi hemimoꞌe ihai amote retomime. Pee ropi iporogetai aha oxoope Iexoa rehe.
Ixokatawera rehe we. Imanoyꞌymamo we, ixeamogetai hekwehe Iexoa Mexiaramo heka ymyntawa re. Aꞌe rame
imanoi. Koxoetoa imomeꞌoi oreope: —Okweram Iexoa!— iꞌi. Nokwahawihi aipa rimo aꞌete, oxa.

Iporogeta iharamo, Iexoa iwahemi ota hehe. Ahao hopi. Noꞌeapiragihi Iexoa. Xowe Iexoa imomeꞌo ixope: —Maꞌe
pexe pa pexeporogetao?— Iꞌi ixope. Xowe imomeꞌoi ixope Iexoa xokatawa rehe. Einon ixeamogeta akomaꞌe
rehe: "Amote hi pa itori? Tokwahaweme Iexoa xokatawa, Xeroxarem pyri". —iꞌite.

Iexoa imomeꞌo katoi Mexia rehe, exa Xenerowete xeꞌega pope imopinim inoga non. Heharamo Xenerowete
xeꞌega momeꞌonara remimomeꞌokwera re: "Mexia herekagamtawoma re, imanotawoma re, koꞌema iroyꞌyma re
ikweram xokwentawoma re we." Iexoa iꞌi ixope. Xowe aha oxykaka hetoma pyri homyhomygamo.

Akomaꞌetoa henoi Iexoa ton iawyripe. Xowe Iexoa aha hopi. Okaropotata, Iexoa ipyhygi pao, imomeꞌo
Xenerowete pe "Ikatoete", oxa. Xowe imaxaꞌaxaꞌaka pao. Tepaxawyꞌyime akomaꞌetoa heꞌapiragi Iexoa. Xowe
eowynia hi ikaxymi Iexoa.

Xowe eomi mokonia imomeꞌoi oxoope: — Xehe rike Iexoa! Nonamo rike xenexyꞌoa horyweteramo, Xenerowete
xeꞌega xeneope imomeꞌo katoeteramo!— Iꞌi oxoope. Kowei oxoweraha, oxoweroxewyta Xeroxarem pyri,
imomeꞌo amote Iexoa remimoꞌe pe: — Iexoa ikweram xokweri! Oroexag, oroporogeta we ixope!— Iꞌi imomeꞌo.

Wemimoꞌe iporogetai itowamo, tepaxawyꞌyime Iexoa itori oxehopa ipyteripe, imomeꞌo: —Pexyꞌoapyg katoete
pexeka!— Iꞌi. Eipoa renopa, hemimoꞌe: —Owera pa?— Iꞌite. Xowe Iexoa imomeꞌoi ixope: —Maꞌeramo pa
pekyyxe, maꞌete imoakygytao we? Pemaꞌe xepaa re, xepya re we. Owera namaꞌetywihi hete exa ixe non.— Iꞌi
Iexoa. Xowe "taexagokan ne ixope oweryꞌyma ixe", oxa, Iexoa imomeꞌoi toweron temiꞌoa. Xowe herota ipira
heypyra ixope, xowe Iexoa iꞌo ipira.

Xowe Iexoa imomeꞌoi. —Amomeꞌo naka, eomine Xenerowete xeꞌega imomeꞌoi xerehe. Axeeteramo einon
ixeapoi imomeꞌonawa ropi.— Iꞌi Iexoa. Xowe Iexoa imogei wemimoꞌe ꞌapinera pope Xenerowete xeꞌega,
tokwahawame. Eipo iꞌi we: — Imopinim ymaꞌetewe hekwehe Mexia herekagamtawoma re, imanotawoma re,
koꞌema iroyꞌyma re ikweram xokwentawoma re we.— Iꞌi.
—Eipo iꞌi we wemimopinima pope: "Xeremimoꞌe pota imomeꞌo potari aka xoporemo goa pe, toxearaꞌag
omaꞌeagawa hi. Xenerowete taekaxym imaꞌeagawa hi." Xeremimoꞌe pota iypyrogi imomeꞌo eomia rehe
Xeroxarem pyri. Einonta hekai imomeꞌomeꞌo amotemote pyri xoporemo goa pe. Pehe pemoꞌe mia maꞌexiroa
xoporemo xeremiapoa rexaka." Iꞌi Iexoa.

40 koꞌema rehe, Iexoa heta ixexagokari aka wemimoꞌe pe. Kwexare 500 awaa ixomonyhykaipe ixexagokari Iexoa.
Xoporemo eopeo ꞌom waꞌe hexaka! Amotemote koꞌema re, Iexoa hexagokari okweramtawa xoporemo
wemimoꞌe pe. Iexoa imoꞌeo we Xenerowete moroyrohoramo hekatawoma rehe.

Iexoa imomeꞌoi wemimoꞌe pe: —Xenerowete imori poahywa xeope xoporemo ywagimewara rehe, ywy pewara
poahywa rehe we. Aꞌeramo amana rame tepeha xoporemo goa pyri, kaꞌa pe aka waꞌe pyri tepemoꞌe tepeapo
xeremimoꞌeramo. Imoxepomio Xenerowete rera re, Taꞌyra rera re we, Xenerowete Pytoa rera re we. Pemoꞌe ke
tomoaro xoporemo penope xeremimomeꞌoa. Peneakaxymeme ke aka ymynta pepyri!— Iꞌi Iexoa.

40 (quarenta) ikoꞌemamo Iexoa kweramtawa hi, xowe imomeꞌoi wemimoꞌe pe: —Pehememe ypy ke Xeroxarem
hi. Peaaro ke, pexexopa Penowete Xerowa tomorypy Opoahywa penope. —Iꞌi. Xowe Iexoa oxeopita aha
ywagime. tataxiga heꞌai hemimoꞌe hi. Iexoa iapygi oina Wowa xaho katy, xoporemo maꞌexiroa moroyrohoramo
aka.

Xenerowete Xeꞌega popewara: Mateo 28:16-20; Mako 16:12-20; Roke 24:13-53; Iohane 20:19-23; Apotora
remiapoa 1:1-11
 Ikerexa iypyrokawa

Ywagime ahayꞌyma we Iexoa imomeꞌoi wemimoꞌe pe, tahaeme Xeroxarem hi. Oxeꞌixeꞌiwe xoporemo Iexoa
remimoꞌe oxomonyhyka aka "toroporogeta ne oxopyri Xenerowete pe", oxa.

Amyna xewyra reherehe, Pakwa morahaitawa hi 50 (cinquenta) ikoꞌemamo, ikwepawamo xoteo goa iapoi amote
morahaitawa, Petekoxi po hen waꞌe. Eokwexa morahaitawa iapoi "toroexagokan ne Xenerowete pe
oroxorywetetawa, oreremitym rekyitawa re", oxa. Aꞌeramo xoporemo xoteo ota amotemote hi, oxomonyhyka
Xeroxarem pyri. Iexoa ywagime iatawa hi, 10 koꞌemamo. Xoteo iapo petekoxi morahaitawa.

Aoxeoho Iexoa re oxemoagypyhyg waꞌe opa oxomonyhyka. Tepaxawyꞌyime henowi exa ywytoa hatoete waꞌe
xapepoa non, imotynehema awyra itomtawa. Xowe ota exa tata renya non xoporemo iꞌapytera re. Xenerowete
Pytoa poahywa imotynehemi xoporemo Iexoa remimoꞌe, iypyroka oporogetao amotemote po oporogetao
oxoporogeta hi wemikwahawyꞌymkwera po.
Ymaꞌetewe hekwehe xoteo Xenerowete momoxytara ota amotemote ywya hi, itori akaeteo Xeroxarem pyri.
Henopa oxeꞌega po iporogetaeteteramo, maꞌexiro xytaohoa rehe, Xenerowete opoahywa po iaporamo. Henopa
amotemote hi on waꞌe, ixeꞌegteite po ixoope iporogetaramo, aꞌeramo imamata weꞌa.

Amome Iexoa oxemoagypyhygyꞌym waꞌe eipo oxa: —Heta iꞌoi ripo owa rya iram waꞌe, aꞌeramo ikaꞌoi. Iꞌi. Xowe
Pero opoꞌoma, imomeꞌo ixope: "Weteꞌyi, pexeapyka katoete, mia awaa nokaꞌoihi, exa pehe pexeamogeta non!
Peexag kare ꞌome, Xenerowete imori Xoꞌeo pe tomopinim ymaꞌetewe: "Xoporemo ywya ipam wereheramo pota,
amonta Wepytoa ratoa tomotynehem awaa". Iꞌi hekwehe Xenerowete Xoꞌeo pe.

Pero aoxe oꞌoma we, oporogetao: —Ihaeo reꞌyi, Iexoa akomaꞌeramo iapoi maꞌexiroa ixytaohoa Xenerowete
poahywa po, exane Xenerowete xowe iapoi non. Oporomaana waꞌe hexagokari raka Xenerowete poahywa po.
Einon raka pehe peexag pane, einoxi pehe ixokao Iexoa, ꞌywa howahapyra re ikaikaka!

—Iexoa imanoi pane, aꞌe Xenerowete kowei imokweram xokweri imanonawa hi. Einon iapoi, "taexagokan ne
wetemimomeꞌokwera ropi", oxa: —Ene, Xenerowete, naxenogihi ipe tamano ne, maꞌete inoga xerete, tainem
xerywya pope. Ixe neope omaꞌeapokatoete waꞌe, nexeꞌega moaronarete.— Iꞌi hekwehe Xenerowete. Ore
oroexag Iexoa ikweram xokweramo, aꞌe ikwerawetei.
—Iexoa itoi oapyka Xenerowete okwetawa katy, moropetega imomoxypyrete renawa re. Iexoa imori oreope
Xenerowete Pytoa, exa naka imomeꞌoi oreope non. Xenerowete Pytoa poahywa remiapoa peexag, henopa we
ꞌao.— Iꞌi Pero.

—Pehe pekapekag ꞌywa howahapyra re eokwexa akomaꞌe Iexoa. Axeeteramo Iexoa xoporemo Xenexara, aꞌe
Mexia we!— Iꞌi Pero.

Xowe goa henopa Pero imomeꞌonawa, axeete ixearekai. Xowe imomeꞌoi: —Wetywyneto, maꞌe pa oroapo
Xenerowete taekaxym oremaꞌeagawa hi?— Iꞌi.

Pero iatywari: —Oxepexepexowe pehe pexewyn Xerexowete pe, hetyka pexemaꞌeagawa. Xowe pexexepomio
Iexoa Kirioa rera re. Xowe Xenerowete taekaxym pemaꞌeagawa hi. Xowe Xenerowete tomon Opytoa penope we.
— Iꞌi Pero.

Heta 3 mio (3000 mil) awaa hekwehe imoakygytai Pero imomeꞌonawa. Oxeata Iexoa rewiri aka waꞌe ramo,
eokwexa ara re. Xowe Iexoa remimoꞌe imoxepomi xoporemo goa, eomia 3 mio (3000 mil) awaa hekai ikerexa
katy, Xeroxarem pyri.

Mia awaa imoaroi apotora goa omoꞌenawa. Aka okaro aoxeoho, oporogetao Xenerowete pe koꞌema reherehe,
woryweteramo. Imoayina oxoope xoporemo omaꞌexiroa. Xoporemo eowyimewara hexaka eomia, oporogeta
katoeteo aka hehe. Koꞌema reherehe heta goa oxemoagypyhyka Iexoa Kirioa rehe.

Xenerowete xeꞌega popewara: Apotora remiapoa 2

 Itamatareyꞌym waꞌe ikataꞌagtawa

Kwexare hekwehe Pero, Iohane ihai Xenerowete ragime, oexag akomaꞌe itawa waꞌe, itoi oerota toxoroa poywyri.
Ierori oina tomon tamatare iponekwapampiamo, oxa.

Aꞌe Pero omaꞌeteo akomaꞌe itawa waꞌe imomeꞌo ixope: —Emaꞌe orerehe! Naxetamatareihi. Aapo pota rame
neope, Iexoa Kirioa omon opoahywa xeope, torokataꞌag ne. Ere epoꞌom, eatao!— Iꞌi Pero ixope.

Kowei Xenerowete ikataꞌagi itawa waꞌe. Xowe iypyroka oatao, oweweweweo, oxeꞌegata Xenerowete pe.
Xoporemo goa Xenerowete raga rokara pope ꞌom waꞌe hexagi, imamata weꞌa okwapa.

Kowei heta goa oxomonyhyka toroexag ne, akomaꞌe ikataꞌapyra, oxa. Xowe Pero imomeꞌo goa pe: —Maꞌe ramo
pa pehe pexemaanaete? Oropoahywa poyꞌym orokataꞌag akomaꞌe itawa waꞌe. Iexoa poahywa po,
ixemoagypyhykawa hemimora po we!—
—Pehe imomeꞌo rakokwehe Homano moroyroa pe toxoka Iexoa. Pehe einon iapo, peapo Xenerowete remimora
Mexia toanog haꞌya, imanonawa hemimomeꞌokwera ropi. Pehe pexoka Iexoa, Aꞌe xoporemo tekowe xara.
Xenerowete imokweram xokweri manonawa hi. Pexearaꞌagame, hetyka pexemaꞌeagawa. Pexexewyta
Xenerowete pe, tohym pemaꞌeagawa penohi.— Iꞌi Pero.

Xenerowete raga moroyroetoa ipirahyeteramo Pero pe, Iohane pe we hemimomeꞌoa rehe. Hakwapetyma,
imonepa morakwapetymawa pope. Heta goa ixemoagypyhygi Pero remimomeꞌoa re, oxemoagypyhyka Iexoa
rehe. Oxemoagypyhyg waꞌe hekwehe 5000 (cinco mil) akomaꞌe xowe, maꞌete imoiro koxoa, konomia Iexoa re
oxemoagypyhyg waꞌe.

Kwexa koꞌema re xoteo moroyroetoa herahai Pero, Iohane re, xaxetote moropetega pe, amote xaxetote
moroyroa reꞌynia we imomeꞌoi Pero pe: —Awa pa omon penope watoa, tepekataꞌag awa akomaꞌe itawa waꞌe?—
Iꞌi Pero pe.

Pero iatywari: —Eope akomaꞌe pepyriwara. Iexoa, Mexiaramo, ikataꞌag opoahywa po. Pehe rakokwehe pekag
Iexoa ꞌywa howahapyra re, Xenerowete imokweram xokweri. Aꞌe hekai, pehe nepepotarihi pane, namaꞌetywihi
amote taxeneapokato, Iexoa poahywa xowe xeneapokatoi!— Iꞌi Pero moroyroetoa pe.
Eipoa renopa, xoteo moroyroetoa imamari weꞌa. Hexagi Pero, Iohane re oxeope imomeꞌoramo, maꞌete okyyxeo
ixohi. Ikwahawi eomia akomaꞌetoa imopinima ipe nahaihiete, ipira xokatara hekwehe. Heharamo Iexoa ropi
hekatawera re, aꞌeramo imomeꞌoi imamaita we Pero, Iohane re, tomomeꞌo xokwereme Iexoa rehe goa pe. Xowe
xoteo moroyroetoa imana taha.

Xenerowete xeꞌega popewara: Apotora remiapoa 3:01 a 4:22

 Piripe omomeꞌo Exiopia Pyriwara Moroyroa pe
Iexoa re

Ikerexa (Igreja) ypykwera moroyroa pyri, hekai oxepexowe akomaꞌe Etewoa po hen waꞌe. Xoporemo ikwahawi
Etewoa ikatoeteramo, hekai Xenerowete Pytoa ipope, kaꞌakwahawa we. Aꞌe hekwehe iapoi heta maꞌexiroa
opoahywete waꞌe, Xenerowete xowe remiapoa. Wemimomeꞌoa po iapoi goa toxemoagypyhyg Iexoa re.

Kwexare Etewoa Iexoa re goa imoꞌe iꞌomamo. Amome xoteo goa Iexoa re oxemoagypyhygyꞌym waꞌe ihai
heroxeꞌeka. Opirahyeteramo, itemonamo, Xoteo moroyroa pe: —Ore oroenom Moixoa re, Xenerowete re we
maꞌeagawa imomeꞌoramo!— Iꞌite, otemonamo. Aꞌeramo hakwapetymi Etewoa, herahao xaxetote moropetega
pyri, amote xoteo moroyroetoa pyri we. Herahao we heta itemonoho waꞌe taitemon we hehe ixope, oxa.

Xaxetote moropetega imomeꞌoi Etewoa pe: —Aipa aꞌete eipo ere?— Etewoa iatywari, iwehao heta Xenerowete
maꞌexiro katoa hemiapoa rehe, Awaraoa pe iapotawa imoxykaka Iexoa rehe. Einoxi hekwehe hekai Xenerowete
reꞌynia maꞌete imoaro ixeꞌega. Eipo iꞌi we: —Pehe peꞌanomete, maꞌete imoaro Xeꞌega, nepepotarihi pexeka
Xenerowete Pytoa, exane hekwehe iapoi aka peypya non, maꞌete ipotata aka Xenerowete, ixokaxokao hekwehe
aka Xenerowete xeꞌega momeꞌonara. Pehe wixe peapo maꞌeagawa ixytaohoa. Pehe pexoka Mexia!— Iꞌi Etewoa
Eipoa renopa, xoteo moroyroetoa ixeꞌapykwaꞌai toroenoweme ne Etewoa remimomeꞌoa, oxa. Opirahyeteramo,
ixeꞌegahyohoi. Herotyryryka herohema, heraha hetoma hi, okopepe. Imaparita hehe, imanoramo ehe opohita.

Omanoyꞌyma we, Etewoa ixeꞌegahyohoi: —Iexo, xemana ipe xowe ke exepyri!— Iꞌi. Xowe okopytao oina, eipo iꞌi
we: —Wexan, emomoriahom xowe ke, xexokatara re.— Iꞌi. Hehewe oxerepa, omano.

Ipyteripe iꞌomi akomaꞌe awarame, Xaoro po hen waꞌe. Ipotari akomaꞌetoa Etewoa ixokatawa. Omaꞌeo oꞌoma
akomaꞌetoa apeyroa rehe, Etewoa re ita imamapam itowamo. Eokwexa koꞌema rehe Xeroxarem pyri heta goa
iypyrogi imamaita Iexoa katy aka waꞌe. Aꞌeramo ixoni aha amotemote pe. Einoxi imamai pane aka Iexoa katy aka
waꞌe, imomeꞌomeꞌo xowe aka Iexoa xeꞌega amotemote pyri.

Iexoa katy aka waꞌe iha xemimi Xeroxarem hi oxona. Piripe we oxepewei iha xemimi Xamaria retoma pyri.
Eowyime imomeꞌoi Iexoa xeꞌega re, heta awaa ixemoagypyhyg Iexoa re. Hemimomeꞌoa re Xenerowete imokatoi
xoporemo. Kwexare Xenerowete ywagimewara imomeꞌoi Piripe pe, taha ywyowara rapee ropi
awatywyꞌymohoipe. Xowe aha ywyowara rapee ropi. Piripe hexagi Exiopia pyriwara moroyroa imomoxypyrete,
ywyowaragawa pope iapyg itoiramo. Xowe Xenerowete Pytoa imomeꞌoi Piripe pe: —Ekwa, ewygeteo,
eporogetao eowynia akomaꞌe pe. — Iꞌi ixope.
Piripe aha tapiꞌiragam ywyowaragawa poywyri. Aꞌe henoi akomaꞌe Exiopia pyriwara Xenerowete xeꞌega
momeꞌonara Ixaꞌia remimopinima henoiramo. "Aꞌe herahai exa mixaragawa ixokapyroma non. Exa mixaragawa
oxeꞌegyꞌym waꞌe non, xemim iꞌomi. Goa noapoihi maꞌekatoa ixope, nomomoxyihi. Aꞌe ixokao we."

Xowe Piripe imomeꞌoi ixope: "Maꞌe pa erenom ipinima xemienonia pope?" Iꞌi ixope. Exiopia pyriwara iatywari:
"Namaꞌetywihi imoꞌenara xeope, aꞌeramo nakwahawihi. Eapyg exata xepoywyripe. Imomeꞌo kato xeope. Aipa
rimo Ixaꞌia oxehe iporogetai? Amonamo amote akomaꞌe re iporogetai?" Iꞌi Piripe pe.

Piripe iypyroka imomeꞌo ixope: —Xenerowete xeꞌega momeꞌonara Ixaꞌia iporogetai Iexoa re. —Iꞌi. Xowe Piripe
we imoꞌei amote Xenerowete xeꞌega Iexoa rehe hemimopinima, imomeꞌo kato ixope.

Aꞌe ahao oxykaka ꞌyopawa re. Exiopia pyriwara imomeꞌoi Piripe pe: —Emaꞌe pe ripo ꞌya, xemoxepomipe amo?—
Iꞌi. Exiopia pyriwara imanai toweropyta ywyrowaragawa ꞌya poywyri.
Piripe Exiopia pyriwara re oxypa ꞌype. Piripe imoxepomio Exiopia pyriwara. Xowe aꞌe oxowerohema ꞌya hi,
Xenerowete Pytoa herahai Piripe Exiopia pyriwara hi. Kowei Xenerowete Pytoa herahai Piripe amote pe,
tomomeꞌo morogeta katoa Iexoa re.

Exiopia pyriwara ikwahawamei Iexoa rehe. Aꞌeramo ihai oxewyta woryweteramo oawyripe.

Xenerowete Xeꞌega Apotora remiapoa 6:5-15; 7:54- 8:1; 8:26-40

 Paoro hekaramei Iexoa katy

Xaoro eokwene ipyhygi hekwehe akomaꞌetoa apeyroa Etewoa ixokataramo. Eokwexa hekai opirahyramo Iexoa
katywara pe. Iawyawynte pe Xeroxarem pyri ihai hakwapetyma koxoa, akomaꞌe we Iexoa katy hekaramo. Xowe
Xaxetote moropetega iapoi ipinima Xaoro pe, taha Tamako katy hakwapetyma Iexoa katywara eowyime aka
waꞌe, herota ixoka morakwapetymawa pope Xeroxarem pyri.

Xowe Tamako piara ropi, tepaxawyꞌyime ywaga hi Xaoro pe henyꞌonyꞌogamo iaerowaka. Xowe Xaoro oꞌata
ywype. Aꞌe henowi amote xeꞌega wenoiramo: —Xaoro, Xaoro, maꞌeramo pa ereka xerehe?— Iꞌi ixope. Xaoro
oxemaanao, iatywari: —Awa pa ene, Wexan?— Iꞌi. Xowe Xaoro henowi oatywaramo: —Ixe Iexoa, eokwene ereka
hehe, ixigoyꞌyma!— Iꞌi ixope.

Xaoro opoꞌoma ywya hi, maꞌete weꞌapyaramo. Aꞌeramo ipaxetoa ipapyhygi, heraha Tamako pyri. Aꞌe naꞌiroihi
okoꞌemamo maꞌete okaro, maꞌete oꞌyꞌo we.
Hekai Tamako pyri oxepexowe Iexoa katy aka waꞌe, Anania po hen waꞌe. Xenerowete imomeꞌoi ixope: —
Exeapokato, ekwa Xaoro roinaipe, enog ke epaa iꞌapinera re. Xowe taeꞌapya xokwen.— Iꞌi Anania pe. Xowe
Anania iatywata: —Wexan, heta goa imomeꞌoi xeope Xaoro rehe. Maꞌeagawa Iexoa katywara rehe hemiapoa re.
— Iꞌi. Xenerowete iatywari: —Ixe aenoi eokwexa akomaꞌe tomaꞌeapo moromoꞌenaramo xeope. Aꞌeramo ekwa
ipyri. Aꞌe pota omomeꞌo maꞌekatoa xoteoyꞌyma pe, Ihaeo pyriwara pe we, aꞌe pota ixemonari xerera rehe. —Iꞌi
Xenerowete.

Xowe Anania ihai okeo Xaoro pyri. Xowe iꞌapytepyhyka Xaoro, imomeꞌo ixope: —Iexoa xemon, aꞌene rimo
oxexagokan pee ropi neope. Aꞌeramo axan nepyri, teremaꞌe xokwen, wexa. Xenerowete Pytoa taka nepope. — Iꞌi
Xaoro pe. Kowei Xaoro heꞌapya xokweramo. Xowe Anania imoxepomi. Xowe Xaoro okaro, hatoa oxewyta.

Xaoro iypyrogi imomeꞌo Xenerowete xeꞌega xoteo Tamako pyriwara pe: —Iexoa Xenerowete raꞌyra!— Iꞌi. Xoteo
goa eipoa renopa, imamari weꞌa, imomeꞌoi we: — Eokwexa akomaꞌe hekwehe Iexoa katywara xiwaryꞌyma. Kare
aꞌe we hekai Iexoa katy rame!— Iꞌi imamata weꞌa. Xowe Xaoro imomeꞌo kato xoteo goa pe Xenerowete xeꞌega,
hexagokata Iexoa Mexiaramo itohawa.

Ymaꞌehe Xoteo ixomorywi toroxoka ne Xaoro, oxa. Inoga porixagawa toxorohoa pyri toaaro, toxoka we, oxa.
Xaoro ikwahawi omamaitawa. Ypytonimo Iexoa katywara imonewi Xaoro arapahe xytaohoa pope. Xowe imoxypa
arapahe pope, imohema hetoma ropiahawa ropi rokope katy. Xowe Xaoro aha oxemima eowyina hi. Aka
imomeꞌomeꞌo Iexoa rehe amotemote pyri, oxa.
Xaoro ihai Xeroxarem pyri, howaxio Iexoa remimoꞌekwera. Eowyime imomyroi Iexoa remimoꞌekwera, xoporemo
hekwehe ikyyxetei ixohi. Xowe Wanawe, Iexoa katywara, ipotywoi heraha Xaoro apotoretoa pyri. Eopeo
imomeꞌoi: —Xaoro nokyyxeihi Xerexara rehe imomeꞌo Tamako pyri.— Iꞌi apotoretoa pe. Xowe wixe topotan.

Iexoa katywara ixoni aha Xeroxarem hi, omamairamo. Amome aha Axiokia pyri. Eowyime omomeꞌo Xenerowete
Xeꞌeg katoa Iexoa rehe. Axiokia pyriwara heta hekwehe xoteoyꞌyma, xoteo hekwehe pipi hekai eowyime. Heta
xoteoyꞌyma ixemoagypyhygi Iexoa rehe. Xaoro, Wanawe ropi ihai imoꞌeo xokweta Iexoa rehe
oxemoagypyhygame waꞌe, iworyweteo we. Axiokia pyriwara goa hekwehe henoi Iexoa katywara aoxehe henoi
"Kiritoꞌia" po.

Kwexare hekwehe Axiokia pyriwara Iexoa katywara iporogetai opa Xenerowete pe, maꞌete okaro we
torepiꞌoneme ne Xenerowete pe, oxa. Xowe Xenerowete Pytoa imomeꞌo ixope: —Pexyi rame Wanawe, Xaoro re,
toapo xemaꞌeapotawa xeope.— Iꞌi Xenerowete Pytoa. Aꞌeramo Iexoa katywaretoa Axiokia pyriwara inogi opaa
hehe, oporogetao Xenerowete pe hehe, imana taha imomeꞌo Iexoa rehe amotemote pyri. Xowe aha imoꞌeo heta
amotemote pyriwara, toxemoagypyhyg aka Iexoa re.

Xenerowete xeꞌega popewara: Apotora remiapoa 6:8-8:3; 9:1-25; 11:25-26

 Paoro, Xira re Wiripo pyri hekatawa

Xaoro hekwehe ihai amotemote pe Homa kaꞌa ropiropi, aꞌeramo homano xeꞌega po ixenoi Paoro po. Kwexare
Paoro, opaxe Xira re ixowerahai Wiripo pyri, toromomeꞌo ne Xenerowete xeꞌeg katoa Iexoa rehe eowyime, oxa.
Aꞌe ihai ywy ꞌomime, aꞌepe ixomonyhygi aka xoteo goa oxeamogeta Xenerowete pe. Eopeo hexagi koxoa tyro
pytoga hepyete waꞌe wepytara, hera Rixia. Rixia ipotaretei, oxemoagypyhyka we Xenerowete re.

Xenerowete iapoi Rixia tomoakygyta Paoro xeꞌega Iexoa rehe imomeꞌonawa. Paoro, Xiria rehe imoxepomi Rixa,
xoporemo heꞌynia we. Rixia henoi Paoro, Xira re we ton, akaypyo xeawyripe, oxa. Aꞌe aha hopi.

Wiripo pyri aka Paoro, Xira rehe. Koꞌema reherehe ihai oxomonyhyka Iexoa katywara re ywy ꞌomime,
oxeamogetao Xenerowete pe. Ihai reherehe koxarame, omaꞌeapote waꞌe, topiwara oxepope herekatara, ihai
Paoro rewiri. Topiwara ipopewara hexagokari ixope, ymaꞌehewaroma aka. Aꞌeramo heta hekwehe ipyhygi
tamatare oxaretoa pe.
Eokwexa koxarame ihai Paoro, Xira rewiri. Oxeꞌegahyoho, eipo oxa: —Mia akomaꞌetoa Xenerowete Ixytaoho
waꞌe pe omaꞌeapo waꞌe. Aꞌe pota pemoꞌe potari maranta pa Xenerowete peapokatoi?— Iꞌi koxarame. Einon
hekai iapo koꞌema reherehe, imomirahyo Paoro.

Kwexare ixeꞌegahyoho xokweramo, Paoro ixerowagi, omaꞌeo hehe, eipo oxa topiwara ipopewara pe: —Iexoa
Kirioa rera re, ehem ixohi! — Iꞌi Paoro. Kowei topiwara ohema koxoa hi.

Xowe koxarame xaretoa ikwahapa topiwara ixohi imohemamo, opirahyeteramo. Koxarame xeꞌega re noropyhyg
xokweraꞌowihi tamatare hemimomeꞌoa re xokwen, oxa.

Xowe goa herahao Paoro, Xira rehe, Homano moroyroa pe, tomopimopig. Xowe hakwapetyma imowapa.

Xowe heraha Paoro, Xira re morakwapetymawa rowaypype, hatoete pope, hamagao imomyka ipya. Einoxi
Paoro, Xira rehe Xenerowete pe oxeꞌegata opa, oypyꞌaxeiramo haꞌaka mipaa imomoxyo Xenerowete.
Tepaxawyꞌyime, ywya opapypapykaho. Xoporemo morakwapetymawa roxoroa oxakwapetymawaka,
hakwapetymyra itatopahoma hamahagatawa otataka.

Xowe morakwapetymara opaka, hexaka morakwapetymawa roxoroa xepiawagamo, xowe okyyxeteo. Hekyita
kyꞌe ipokohoa taxexoka ne, oxa. Ikwahawi hekwehe hakwapetymyra hemamo. Homano moroyroa ixokai
hekwehe aka morakwapetymara hakwapetymyra imanaramo. Xowe Paoro oxeꞌegahyoho eipo oxa ixope: —
Einoneme, exexokaeme, xene ꞌa orom!— Iꞌi.

Morakwapetymara ikyyxetei, opapypapyka oina. Xowe imomeꞌo Paoro, Xira pe we: —Maꞌe pa aapo Xenerowete
pe taxeapokato ne?— Iꞌi. Paoro iatywari —Exemoagypyhyg Xenexara Iexoa Kirioa re, Xenerowete teneapokato
ene, xoporemo neawyripe aka waꞌe we!— Iꞌi. Xowe morakwapetymara herahao Paoro, Xira we oawyripe, ipireita
inoponawa rowya ixohi. Xowe Paoro imomeꞌo Xenerowete xeꞌeg katoa Iexoa rehe xoporemo morokwapetymara
awyra pope aka waꞌe pe.

Xowe morakwapetymara, xoporemo heꞌynia we oxemoagypyhyka Iexoa rehe. Xowe Paoro, Xira re imoxepomio
xoporemo. Iapo temiꞌoa oxeope, xoporemo iꞌo woryweteramo okwapa.
Xowe koꞌemawyꞌymamo morogetakwaparete Wiripo pyriwara imanai tomohem Paoro, Xira we
wemiakwapetyma. Imomeꞌoi ixope taha hetoma hi. Xowe hekwehe aha potata, oxomomeꞌo Rixia pe, opaxetoa
pe we. Xowe aha eowynia hi, mome aha imomeꞌomeꞌoi Xeꞌeg katoa Iexoa rehe, heta goa oxeata Ikerexa re.

Paoro, Iexoa katywara moroyroetoa re, ihai amotemote hetomime, imomeꞌo, imoꞌeo we Xeꞌeg Katoa Iexoa rehe.
Aꞌe we hekwehe imopinimi aka heta hemimopinima Ikerexa pe, iworyweteo Iexoa katywara. Amome eomia
hemimopinima imopinimi inoga Xenerowete Xeꞌega Pope (Biblia popewara ramo).

Xenerowete xeꞌega popewara, Apotora remiapoa 16:11-40

 Iexoa Mexia ymaꞌetewe iypyromyra

Xenerowete xoporemo maꞌexiroa iapoypyramo, xoporemo ikatoeteramo, maꞌe omaꞌetywamo maꞌeagawa. Atao,
Ewa re hekwehe ixopotaretei. Ipotareteo we Xenerowete, oxeꞌegata Ixope hexagokata imomoxytawa.
Namaꞌetywihi hekwehe maꞌeahya, maꞌete manonawa we. Einon hekwehe Xenerowete ipotari xoporemo
maꞌexiroa pe.

Xatanaxa hekwehe ixyromonewi maxaramo, imoawayꞌyma Ewa kaa kawora pyri. Atao, Ewa re nomoaroihi, iapo
maꞌeagawa Xenerowete pe. Hemiapoa rehe, xoporemo awaa imaꞌeahyramo, omano we.

Atao, Ewa re maꞌeagawa hemiapoa hehewewara naikatoihiete. Aꞌe hekai hekwehe Xenerowete xiwaryꞌymamo.
Eokwexa koꞌema rehe xoporemo awaa oꞌarypyo we ipotari maꞌeagawa apotawa. Aꞌeramo xoporemo Xenerowete
xiwaryꞌymamo hekai. Awaa maꞌeagawa nomoxykagihi Xenerowete re. Aꞌeramo Xenerowete ixeamogetai, awaa
oxehe imowym xokwentawoma rehe, iapokatotawoma rehe we.
Xenerowete hekwehe imomeꞌoi "Ewa oxepexowe imemyrena pota ikamikamigtari Xatanaxa ꞌapinera; Xatanaxa
pota ipyxoꞌope iꞌoi". Iꞌi. Eipoa remimomeꞌoa Mexia ixokatawoma rehe. Xenerowete imokweram xokwentari
koꞌema iroyꞌymamo rehe. Einon Mexia pota imomawi Xatanaxa poahywa aoxeaꞌe. Ikwepa katokatoramo
Xenerowete hexagokari hekwehe Iexoa Mexiaramo itohawa.

Xenerowete hekwehe imomawi xoporemo ywype aka waꞌe, ꞌya po. Einoxi imori hekwehe yꞌaxytaohoa oxehe
oxemoagypyhyg waꞌe pe tomoxekyxeme we ꞌya, oxa. Xoporemo awaa iapoi maꞌeagawa, aꞌeramo pota einon
xoporemo imomamtari. Einoxi hekwehe Xenerowete imori Iexoa, toexagokan tapee eomi Oxehe
oxemoagypyhyg waꞌe pe, tomokato we xoporemo oxehe oxemoagypyhyg waꞌe xowe.

Heta hekwehe amyna oxewyta (centenas), xaxetote goa hekwehe ixokai maꞌexiroa, hapyo Xenerowete pe goa
maꞌeagawa rehe. Einon imoꞌei hekwehe goa pe maꞌeagawa iapotawa iwepytawoma rehe. Eomia maꞌexiroa
hemiapya noekyihi hekwehe maꞌeagawa ixohi. Xaxetote moropetegamo Iexoa ikatoete amotete xaxetotetoa hi.
Iexoa imanoi goa maꞌeagawa ihypa aoxeaꞌe. Aꞌe heakaxymamo oxepexowe aoxeaꞌe goa maꞌeagawa hi. Aꞌeramo
Xaxetote moropetega ikatoete waꞌe. Iexoa heromanoi oxehe goa maꞌeagawa.

Xenerowete hekwehe imomeꞌoi Awaraoa pe: —Heta pota aapo maꞌekatoa xoporemo goa ywype aka waꞌe pe
nerehe.— Iꞌi Xenerowete. Iexoa hekwehe Awaraoa raꞌyrera. Xenerowete iapoi maꞌekatoa xoporemo amotemote
pewara pe Iexoa rehe. Xoporemo Iexoa rehe oxemoagypyhyg waꞌe imokatoi, imaꞌeagawa we imokaxym ixohi,
aka Awaraoa raꞌyrenaramo.
Xenerowete hekwehe imomeꞌoi Awaraoa pe ꞌtomon hapyo waꞌyra Ixake xeopeꞌ, oxa. Awaraoa waꞌyra
hapyꞌymamo we, Xenerowete imori oxepexowe mixaragawa. "toapy Ixake ponekwapawamo", oxa. Xoporemo
xane xamano xeremaꞌeagawa rehe. Einonamo Xenerowete imori hekwehe Iexoa, exa Xenerowete mixaragawa
imopyra non, tomano xeneponekwapa.

Xenerowete hekwehe mapawete 10 ikatoyꞌyma imota Exito rehe. Xoporemo Ihaerita reꞌynia hekwehe ixokai
mixaragawa memyra imaꞌeahyꞌym waꞌe, ipihipa howya po oawyra roxoroa. Xenerowete hexaka wya hoxoroa re,
ikwena, xowe hekwehe aha. Einon hekwehe noxokaihi heta Ihaerita raꞌyrypya ipopiara. Einon hekwehe iapoi
Pakwa.

Iexoa exa Pakwa xenemixaragawa taꞌynpia non. Aꞌe Mixaragawa imaronyꞌym waꞌe, maꞌeagawa apotaryꞌyma.
Imanoi hekwehe xoteo goa Pakwa morahaitawa iaporamo. "Awaa oxemoagypyhyka Iexoa rehe taxemokato ne",
oxa. Howya ihypa xoporemo imaꞌeagawa. Hekyita manonawa iymynoho waꞌe hi, Xenerowete pirahya hi we.

Xenerowete hekwehe iapoi Ihaerita goa re oxomohorypawa, weꞌynia weminoꞌe rehe. Aꞌe rame Xenerowete iapoi
Iexoa re iyahoa ixomorypawa xoporemo xeneope. Aꞌeramo ixomorypawa rehe, xoporemo amotemote pewara
hekaramei Xenerowete raꞌyramo rame. Taka Xenerowete raꞌyramo toxemoagypyhyg xowe Iexoa re, ipotata exa
omokatotaramo non.
Moixoa hekwehe Xenerowete xeꞌega momeꞌonara imomoxypyrete waꞌe. Imomeꞌo aka hekwehe Xenerowete
xeꞌega. Iexoa wixe hekwehe Xenerowete xeꞌega momeꞌonara imomoxypyreteoho waꞌe. Iexoa aꞌe Xenerowete.
Aꞌeramo xoporemo Iexoa remimomeꞌoa, Xenerowete imomeꞌona imo wixe. Xoporemo maꞌexiroa hemiapoa,
exane Xenerowete remiapoa non. Aꞌeramo wixe Iexoa henoi Xenerowete Xeꞌega po. (Xeꞌega ixeapoi
akomaꞌeramo).

Xenerowete hekwehe imomeꞌoi moroyroa ixiapyripewara Tawia pe: —Neraꞌyrera pota hekai aoxeaꞌe
moroyroramo xereꞌynia pe.— Iexoa Xenerowete raꞌyra, Mexia we, Tawia raꞌyrera we heka potari moroyro
ixiapyripewaramo oymynohoramo.

Tawia hekwehe hekai Ihaeo moroyroa ixiapyripewaramo. Iexoa xoporemo maꞌexiroa moroyrohoete
ixiapyripewara! Itontari kowei, aka potata moroyroho ixiapyripewareteramo iapo ikatoete waꞌe. Xowe
imoxyꞌoapyg katoeteo, imaga xoporemo weꞌynia aoxeaꞌe.

Xenerowete xeꞌega popewara: Xenexi 1-3, 6, 14, 22; Exoto 12, 20; 2 Xamoꞌeo 7; Hewereo 3:1-6, 04:14 - 05:10, 07:01
- 08:13, 9: 11-10:18; Apocalipse 21
 Iyahoa Xomorypawa Xenerowete rehe

Kwexare ywagimewara imomeꞌoi hekwehe koxarameete pe, Maria po hen waꞌe pe. Nowerekaihi we akomaꞌe mo.
—Ene pota eremoꞌan Xenerowete Raꞌyra —iꞌi ywagimewara. Einon hekwehe Maria imoꞌari, Iexoa akomaꞌe
rerekayꞌymeteo. Henoi omemyra Iexoa po. Aꞌeramo Iexoa akomaꞌe, Xenerowete we Iexoa.

Iexoa hekwehe hekai iapo maꞌexiroa opoahywete waꞌe Xenerowete xowe remiapoa. Oatao aha ꞌya ꞌarimo,
imoxemomika kwarywytohoa, ꞌytereꞌiohoa we. Ikataꞌaka heta goa iawaipam waꞌe. Imoꞌeꞌeo owera, topiwara we
goa hi. Omano waꞌe imokweram xokweta. Iweꞌyitaoho 5 pao, mokoi ipira, imogaro 5000 mio (cinco mil)
akomaꞌe, koxoetoa we, konomitoa we.

Iexoa hekwehe hekai moromoꞌenara xytaoho waꞌeramo, Xenerowete raꞌyra. Aꞌeramo hekwehe imoꞌenawa
imomeꞌo katoetei. Imoꞌei hekwehe xane xapotarete we amote awaa exa xane xaxepotan non.

Aꞌe we imoꞌei ixypyramo xapotarete Xerexowete hypy, amote xerexeꞌynia hi, xeremaꞌexiroa hi we, tamatare hi
we.

Iexoa we imoꞌei Xenerowete moroyrohoramo hekatawa hepyeteohoramo, amotemote maꞌexiroa xeneremiexaga

hi. Hepyete waꞌe xoporemo xeneope Xenerowete katy xenekatawa. Xenerowete taxenekataꞌagypy ne wixe
xenemaꞌeagawa hi, aꞌeramo xaka Xerexowete pyri moroyrohoramo hekataipe.

Iexoa we imoꞌei amome pota ixemoagypyhyg xerehe. "Ixe tamokato ne", iꞌi. Amote amome pota
noxemoagypyhygi xerehe. Eomi xerehe oxemoagypyhyg waꞌe exa ywya ikatoete waꞌe non. Henopa xexeꞌeg
katoa oxeope, aꞌeramo amokato pota. Amote eomi xerehe oxemoagypyhygyꞌym waꞌe exa ywya pymohoa, pee
ropiwara non. Haꞌynia oꞌata pee ropi, maꞌete oxeꞌopa, maꞌete oxemotowio, maꞌete oꞌaramo. Einon eomine
nopotarihi Iexoa, maꞌete henopa we ixeꞌega. Eomia pota nokeaꞌowihi Xenerowete moroyrohoramo hekatawa
pope.

Iexoa we imoꞌei Xenerowete ipotaretei maꞌeagawa apotara, "tamokato ne imokaxyma imaꞌeagawa, taka
xeraꞌyramo", oxa.
Iexoa we imoꞌei Xenerowete noxigoihiete maꞌeagawa. Atao, Ewa re imaꞌeagawa imoawaipawi xoporemo
taꞌyrena. Aꞌeramo xoporemo goa iapoi maꞌeagawa. Maꞌeagawa imagai goa exa Xenerowete xiwaryꞌymamo non.

Xenerowete ipotaretei xoporemo ywype aka waꞌe. Aꞌeramo imori Waꞌyn Moxepe tomano maꞌeagawa rehe,
xoporemo Hehe oxemoagypyhyg waꞌe toxemokwatareme we Xenerowete hi. Nomomoriahowihi rapo
Xenerowete maꞌeagawa hemiapoa rehe. Xoporemo goa Iexoa re oxemoagypyhyg waꞌe pota aoxeaꞌe pota
Xenerowete pyri hekai!

Xenemaꞌeagawa xenemopiꞌoni Xenerowete pe, aꞌeramo xamano amo aoxeaꞌe xeremaꞌeagawa rehe. Xenerowete
amo xenemanai xamano aoxeaꞌe. Xenerowete ipyhygi xenemaꞌeagawa imana Iexoa pe. Iexoa ꞌywa howahapyra
re imanoi xenemaꞌeagawa rehe, iworypa Xenerowete xenerehe.

Iexoa noapoihiete maꞌeagawa, einoxi ixemori haꞌyanopa, omano we xeneponekwapa, exa maꞌexiroa imoronyꞌym
waꞌe, ixokapyra Xenerowete pe non. Iexoa einon iaporamo Xenerowete imokaxymi xoporemo goa hi maꞌeagawa
iaporamo. Iexoa xenemaꞌeagawa rehe imanoramo, Xenerowete imokatoi xoporemo maꞌeagawa, eomi
ikatoyꞌymete waꞌe we!
Maꞌekatoa xowe iapotawa nomokatoihiete goa. Namaꞌetywihiete amote maꞌexiroa xane, taxenemowyg
Xenerowete rehe, oxepewei iapo. Iexoa xowe ipirei xenemaꞌeagawa. Ene ke ixemoagypyhyg Iexoa rehe,
Xenerowete Raꞌyramo hekaramo exemoagypyhyg ke hehe. Exehe eponekwapawamo imanonawa re ke
exemoagypyhyg. Xenerowete imokweram xokwentawa re we ke ixemoagypyhyg, tereka Xenerowete
paxeteramo.

Xenerowete pota imokatoi xoporemo goa Iexoa re oxemoagypyhyg waꞌe. Xowe eomine imogei oxepope
oxaramo, omoꞌenaramo we. Nomokatoaꞌowihi goa Iexoa re oxemoagypyhygyꞌym waꞌe. Xenerowete naehaihi
neremireka re, netamatare re. Amonamo tamatareohoramo, amonamo tamatareyꞌym waꞌe re. Amonamo
akomaꞌeramo, koxoramo, amonamo awarameramo, towymynaramo, maꞌete nerekatawa re we. Xenerowete
nepotaretei, ipotari terexemoagypyhyg Iexoa re, taka nepaxeeteramo.

Iexoa nerenoi terexemoagypyhyg Hehe. Exepomio we, terexagokan Hehe exemoagypyhykawa. Ene
erexemoagypyhyg pa Iexoa Mexiaramo hekatawa re? Iexoa Xenerowete raꞌyn moxepe rehe we pa? Erekwaham
pa maꞌeagawa apotaramo ene ekatawa, Xenerowete emomoriahomtawyꞌyma we? Ene erexemoagypyhyg pa
Iexoa eponekwapawa ꞌywa howahapyra re, emaꞌeagawa rehe? Imanonawa re einon Xenerowete
tenemomoriahom we.

Amonamo ene exemoagypyhyka Iexoa, exehe iapotawa rehe, ene pota ereka Iexoa katy aka waꞌeramo,
kiritoꞌiaramo! Xenerowete nerenohem Xatanaxa rekatawa homygohoa hi, nererota araxiga pope, Xenerowete
moroyroramo hekatawa pope. Xenerowete hekyi neohi nerekagamtawa. Imota neope iyahoa nerekatawa,
tereapo maꞌekatoa xowe.
Aꞌeramo ene ereka rame kiritoꞌiaramo. Iexoa neponekwapawamo imanoramo Xenerowete imokaxymi
nemaꞌeagawa. Aꞌeramo rame ene Xenerowete raꞌyra, ipaxeete we, eneyꞌym ixiwaryꞌyma rame.

Ene Xenerowete raꞌyramo, raxyramo we, Iexoa pe omaꞌeapo waꞌe. Ipaxeramo we, einonamo pota ene erepotanta
iapo Iexoa moꞌenawa. Einoxi kiritoꞌiaramo eka we pota erepotanta maꞌeagawa apotawa. Xenerowete
itemonyꞌymete waꞌe imomeꞌoi teremomeꞌo xoporemo emaꞌeagawa ixope, taekaxym ixohi. Aꞌe we pota imori
neope watoa teneratoete maꞌeagawa eꞌaꞌagtawa hi.

Xenerowete imomeꞌoi tereporogeta ixope exeamogetatawa po. Henoenoina Ixeꞌega pinima, exeꞌegata eka
ixope, terexagokan imomoxytawa amote Iexoa katy aka waꞌe pyri. Emomeꞌo ke amotemote pe Iexoa hehe
iapotawa re. Xoporemo eomia maꞌexiroa nepotywo potari, terepotarete eka Xenerowete newatoeteo we,
nexemoagypyhykawa oxytaohoramo we.

Xenerowete xeꞌega popewara: Homa pyriwara 3:21-26, 5:1-11; Iohane 3:16; Mako 16:16; Koroxenxe pyriwara 1:13-
14; 2Texaronika pyriwara 5:17-21; 1Iohane 1:5-10
 Iexoa ixewyntawoma

Ymaꞌetewe (2 mil anos) heta henowi goa Xeꞌeg Katoa Iexoa, Mexia rehe, amotemote pyri. Aꞌeramo hetaete goa
ixemoagypyhyg hehe, iweꞌyita ikaty aka waꞌe (Ikerexa). Iexoa hekwehe imomeꞌoi: —axewynta xoporemo
maꞌexiro pawamo, —iꞌi. Eoperamo ixawete re nowahemihi we, ixewyntari ota exane imomeꞌoi non.

Xane Iexoa xewyntawoma haaroramo, Xenerowete ipotari xane xaka iapo maꞌekatoa xowe, eomine hekai iapo
maꞌeagawa mia hi, xeneremiapoa toexagokan ixope, xoporemo goa pe Xenerowete xane imoaronawa,
imomoxytawa we. Aꞌe we ipotari xane xamomeꞌomeꞌo amote awaa pe Aꞌepe hekai Moroyrohoramo hekatawa
rehe. Iexoa ywype aka we imomeꞌoi: —Xeremimoꞌe pota imomeꞌoi aka Xeꞌeg Katoa xoporemo ywype aka waꞌe
pe, toenom Xenerowete moroyrohoramo hekatawa rehe imomeꞌonawa, einonamo pota axewynxokwenta.— Iꞌi
Iexoa

Hetaete we goa nokwahawihi we Iexoa rehe. Ywagipe oxewyryꞌyma we, Iexoa imomeꞌoi kiritoꞌietoa pe taha
imomeꞌomeꞌo Xeꞌeg Katoa oporomokato waꞌe eomine nokwahihi Iexoa rehe mia pe. Eipo iꞌi: —Pekwa,
imoꞌemoꞌeo xerehe xoporemo goa pyri ixope—. Eipo iꞌi we: —Kaa popewara, hemityma iapypawamo, aꞌe pota
ihai hekyita rame.— Iꞌi Iexoa.
Iexoa imomeꞌoi we: —Omaꞌeapote waꞌe imomoxypyryꞌyma, ixara wixe imomoxypyrete. Exa ne moroyroetoa
ywype aka waꞌe naxexigoihi, einonta pehe we nepexigoihi, penerekaagapa, pexokao we Xerehe
pexemogypyhygamo. Einoxi ke pehe maꞌeagawa ꞌa ywype pexexehe ikoiramo, pekweraxeme ke xeohi, emaꞌene
Ixe areka Xatanaxa hi, einon ke pehe peka imoaro Xexeꞌega, ywya ipawamo pota eino pehe iaporamo pota
Xenerowete pota pemokatoi!— Iꞌi Iexoa.

Iexoa imomeꞌoi morogeta wemimoꞌe pe tokwaham katoete maran ta pa goa Xenerowete herekai ywya
pamtaramo? oxa. Eipo iꞌi: —Akomaꞌe ihai kaa pope ityma awaxiꞌiagawa raꞌynia ikatoete waꞌe, xowe aha oketa,
ikewyri ixiwaryꞌyma ihai ityma haꞌynia ikatoyꞌyma irawete waꞌe, hemityma pyteripe, xowe aha ixohi.—

—Xowe hemityma oꞌeꞌeo, imaꞌeapotara hexaka, imomeꞌo oxara pe: "Wexan, haꞌynia katoete naka eretym non,
mara wixe te mi ikatoyꞌyma iꞌeꞌei ipyteripe?— Iꞌi. Xowe kaa xara iatywata: —Xenexiwaryꞌyma xawa itymi.— Iꞌi
ixope —I'i Iexoa imomeꞌo.

—Imaꞌeapotara imomeꞌoi oxara pe: "Xaekyekyi pa mia hemityma ikatoyꞌyma?" Kaa xara iatywata: "Pekyixeme
pekyipawa po, awaxiꞌiagawa ipyteripe, napo oxemotowio xowe wixe xamaxaꞌag, ixoka awaxiꞌiagawa raꞌynia
iawyra pope, eomi ikatoyꞌyma imoxomyhyka xahapypam we". Iꞌi ixope. — Iꞌi Iexoa.
Iexoa remimoꞌe nokwahawi morogeta momeꞌokatoetetawa, aꞌeramo imomeꞌoi Iexoa pe tomomeꞌo kato oreope,
oxa. Xowe imomeꞌo kato ixope: —Akomaꞌe kaa xara haꞌynia ikatoete tymara exa Mexia non. Ikaa exa xoporemo
ywype aka waꞌe non. Haꞌynia ikatoete itymyra exa goa Xenerowete pyri aka waꞌeroma non.— Iꞌi Iexoa.

—Haꞌynia itymyra ikatoyꞌyma exa goa Oporoxigoyꞌymoho waꞌe katywara non. Ixiwaryꞌyma haꞌynia ikatoyꞌyma
tymara exa Xatanaxa non. Haꞌynia rekyitawa exa ywya pamtawoma non, haꞌynia rekyitara exa Xenerowete
ywagimewara non.— Iꞌi Iexoa.

—Ywya pawamo pota, Xenerowete ywagimewara pota imoxomonyhygi xoporemo goa Xatanaxa pe omaꞌeapo
waꞌe, okatywara we. Imaapata tataohoa hakoweteoho waꞌe pope, eopeo pota ixaꞌai aka wahyeteramo,
ixeꞌarekatawohoa ixope. Aꞌe pota Xekatywara henyꞌonyꞌogtaramo exa kwarahya non, aꞌepe ne Xenerowete hekai
moroyrohoramo Aꞌe pyri pota.— Iꞌi Iexoa

Iexoa imomeꞌoi we, —axewynta ywype ywya pawyꞌymamo we. —Iꞌi. Ixewyntari ota exane ihai oxeopita ywagime
nonta. Iexoa itontari tataxiga ꞌarimo, akomaꞌe rete pirimo. Eomine Iexoa katywara omano waꞌe, hypy pota
ikweramtari omanonawa hi, aha hexaka Iexoa tataxigime.
Eomine Iexoa katywara omanoyꞌymamo waꞌe we pota Iexoa xewyramo ixeopintari eomine omanonawa hi
ikwerawi, mia re pota oxopyri ihai hexaka Iexoa. Xoporemo pota hekai Ipyri. Iexoa pota hekai weꞌynia pyri,
xoporemo pota ixyꞌoapyg katoeteramo aka, aoxeaꞌe Iexoa pyri.

Iexoa imomeꞌoi amonta xoporemo wexehe oxemoagypyhyg waꞌe pe moroyrohoa akygyroa. Hekapotari
moroyrohoramo Xenerowete pyri, xoporemo pota ixyꞌoapyg katoeteramo aka, aoxeaꞌe Xenerowete pyri.

Xenerowete nomomoriahowaꞌowihi Iexoa re oxemoagypyhygyꞌym waꞌe. Imaapantari tataohoa pope, eomia pe

pota nopawaꞌowihiete haꞌya ixope, tataohoa pota nowewaꞌowihiete, hapypamtari aka koꞌema reherehe, ewoꞌia
we pota iꞌoꞌoi hereka aoxe aꞌe.

Iexoa oxewyta pota, imomamtari Xatanaxa, xoporemo eomine hekai ixope moroyroramo mia we. Iexoa pota
imaapari xoporemo eomia ꞌyopawagawa tataohoa pope, aꞌepe pota Xatanaxa hekai okaipapa aoxeaꞌe, ipyri pota
hopi aka waꞌe, Xenerowete moaronaryꞌyma imaapari tataohoa pope we.
Atao, Ewa re nomoaroihi Xenerowete xeꞌega, herota maꞌeagawa xoporemo ywype aka waꞌe pe, aꞌeramo
Xeneroweete imori maꞌeagawa ywya pe, —Amomamta xoporemo, amote pota aapo ywya, ywaga we ikatoete
waꞌe. —Iꞌi hekwehe Xenerowete.

Iexoa xoporemo weꞌynia re pota hekai ywya yahoa pope. Aꞌe pota hekai ipopiara pe moroyrohoramo aoxeaꞌe.
Xoporemo pota ihypawi heꞌya. Namaꞌetym xokweraꞌowihi xaꞌa, teaeteyꞌyma, maꞌeagawa, hahya, imanonawa we.
Iexoa pota moroyroa ikatoete waꞌe ramo hekai, iapo maꞌekatoete xowe weꞌynia pe, aoxeaꞌe pota hekai weꞌynia
ipyri.

Xenerowete xeꞌega popewara: Mateo 24:14; 28:18; Iohane 15:20; 16:33; Apocalipse 2:10; Mateo 13:24-30, 36-42;
1Texaronika pyriwara 4:13 a 05:11; Xiagoa 1:12; Mateo 22:13; Apocalipse 20:10, 21:01-22:21