HMEICHHIA

- C. Lalchhuanliani

THUHMAHRUAI

Khawvel mihring zahve ngawt mai hi hmeichhia kan ni a, kan pawimawhna chu sawi loh
pawhin a chiang sa hle awm e. Taksa chakna lam thuah a âwm nêm zawk kan nih avangin,
mipa an fin leh fin loh azirin hmeichhiate kan zalên thei a, rah behin kan awm thei bawk a.
Hmeichhiaten kan pianpui finna leh talent kan par chhuahpui theihna khawtlang leh ramah
chuan hmasawnna thlentu kan ni thei a. Mizoram tun dinhmunah phei chuan hmeichhiate hi
kawng engkima ram leh khawtlang khai dingtu, workforce lian tak kan ni. Chuvangin,
keimahni ngei pawhin kan nihna leh dinhmun kan hriat chian a, kan awmna hmun apianga
malsawmna ni thei tura kan inbuatsaih a pawimawh. Chumi atan chuan a hnuaia thute hi
ngaihtuah ho atan ka rawn chhawp chhuak a ni.

HMEICHHIA CHU TU NGE A NIH?

Bible-a inpuang Pathian betu kan ni hi kan vannei ngawt mai! Chanchin Ṭha avang hian
khawvel hmun tinah mihring dinhmun chawi san a ni a; hmeichhiate dinhmun pawh a sang
zel a. Mizoramah ngat phei chuan kan dinhmun a ziaawm tawh hle. Kan thuziakah hian
hmeichhiate kan zahawm dan te, zahawm lehzual turin eng nge kan tih theih tih te sawi kan
tum dawn a ni.

1. Pathianin uluk tak leh zahawm takin hmeichhia a siam

Hmeichhiate hi Pathianin uluk tak leh zahawm taka a duan kan ni a. Pathian Thu sawitu
pakhat phei chuan fiamthuin, “Pathianin a aite chhin nan mipa a siam phawt a, a dawtah uluk
takin hmeichhia a siam thung” tiin a sawi. Bible chuan Pathianin mipa nak ruh hmangin
hmeichhia a siam a ti a; a chhîp sam hmanga siam a ni lo va, a kephah hmanga siam a ni hek
lo va, a lai taka mi - nak ruh hmanga siam a ni. Chuvangin, hmeichhia hi mipa chunga leng
tur emaw, mipa rah beh tur emaw ni lovin mipa nen intluk tlanga leng tur kan ni.

2. Hmeichhia chu ‘tifamkimtu’ a ni

Genesis 2:18-ah chuan mipa ṭanpui turin hmeichhia Pathianin a siam tih kan hmu bawk a;
mipa amahin a famkim lo va, a tifamkim turin Pathianin hmeichhia a siam a ni. Hmeichhe
dinhmun hi a ropuiin a zahawm hle. Hmeichhiate tel lo chuan khawvela thil eng mah hi a
famkim lo a ni ti ila, kan sawi uar lutuk awm lo ve.

3. Hmeichhiate hi khawvel tinuamtu kan ni

Pathian Thu chuan hetiang hian hmeichhe fel chungchang a sawi a:

A kut mi rethei lamah a phar a,

A ni, renchhamte thlengin a ban phâk a. (Thufingte 31:20)

Hmeichhiate hian mi dang khawngaihna leh lainatna an ngah zual tiin kan sawi thei awm e.
Mi khawsak harsate ṭanpui thuah te, mi lungngaite hnem thuah te hmeichhiate hi a thawh
hlawk pawl an ni fo.
Bible-ah pawh Dorki chanchin kan hmu a: an awmna khua Joppa-ah chuan a thil ṭha tih
avangin mi ngainat leh zah a hlawh a, puan ṭhui thiam a nih hmang ṭangkaiin an khuaa
hmeithaite tan puan a ṭhuisak ṭhin. A thih niah pawh a ruang bulah hmeithaite an pung
khawm a ni (Tirhkohte 9: 36-42).

Tunlaiin nursing care tel lovin kan awm thei tawh lo va, damloten nurse-te an
thlamuanpui em em ṭhin. Tun ang taka nursing care a lo ṭhan lenna chhan hi Florence
Nightingale-i hmalakna vang a ni a. Kum zabi 19-naa Crimea indonaah sipai hliam tam
tak a enkawl a, chuta ṭang chuan nurse dinhmun pawimawhzia hriain a rawn chawi vul ta
a ni.

Kan chenna India ram ngeiah pawh, mi chanhaite enkawl kawngah Mother Teresa-in a
thawh hlawk hle a. India rama Kristian awm tawhte zingah a lar ber hial awm e.
“Tawngtaina hmui aiin tanpuitu kut a thianghlim zawk” tiin a sawi hial a nih kha.

Mi dangte ṭanpuitu nihna hi hmeichhe nihnaa bet tel, hmeichhiate tizahawmtu a ni.

4. Chhungkaw khai din kawngah hmeichhiate dinhmun a pawimawh

Pathian Thu chuan, hmeichhe fel dinhmun hetiang hian a sawi a:

Khawvâr hmain a tho va,

A chhûngte ei tûr a pe ṭhîn a,
A chhiahhlawh nulate hnênah an tih tûrte a hrilh ṭhîn. (Thufingte 31:15)

An chhûng khawsak dân a en ṭha a,

Dâwngdahna chhang a ei lo. (Thufingte
31:27)

Hmeichhiate hian chhungkaw khawsak rel fel kawngah dinhmun pawimawh tak kan
luah. Kan ṭawng tu huat thu suh ah, hmeichhiate tel lo chuan chhungkaw khawsak hi a
ho thei khawp mai. Zing thawh aṭanga zan mut thlengin, chhungkaw khawsak rel fel hi
hmeichhe kutah a tla fo.

Ei leh in thuah te, in chhung khur enkawlnaa mawhphurhna sem zai thuah te,
hmeichhiaten mawhphurhna kan la a. Hmeichhe fel leh taima chuan chhungkua a
tizahawm a, amah ngei pawh a zahawm a ni.

Pathian Thu chuan hmeichhe fel chungchang heti hian a ti a:

Huan tûr a ngaihtuah a, a lei a,

Ama kutkawih ngeiin grêp huan a siam ṭhîn. (Thufingte 31:16)

Tunlai khawvelah chhungkaw hma lam hun – in leh lo sak thuah te, hna zawn thuah te,
fate hma lam hun ruahman lawk thuah te hmeichhiain mawhphurhna kan la ta fo mai.
Hman lai anga, “Hmeichhia leh chakaiin sakhua an nei lo” tih te, “Hmeichhe finin
tuikhur ral a kai lo” tih te kha sawi a inhmeh lo tial tial a ni.
5. Zah kai khawpin hmeichhiate mahni kein kan ding ve thei ta

Pathian Thu chuan hmeichhe khawsak ṭha chungchang heti hian a sawi zel a:

A silhfên chu chakna leh ropuina a ni a,

Hun lo la thleng tûr atân pawh a nui a. (Thufingte 31:25)

Heta ‘ropuina’ tih hi ‘zahawmna’ tiin a dah theih bawk ang. Hmeichhia, mahni kea ding thei
khawpa chhel chu a ropui a, a zahawm a ni. Tunlai khawvelah phei chuan hei hi a dik
lehzual. Mizorama district hrang hrang thlir ila, dinhmun pawimawh – DC thlengin
hmeichhia kan nei ta fur mai. Hman laia hmeichhiate chhungte leh pasalte thu thua awm tur,
aw pawh nei ve mang lo tura ngaihna kha kan kalsan tial tial a. Tunlai khawvela
damkhawchhuak tur chuan hmeichhia pawh chak a ngai a, chhel a ngai a. Mahni ke pawha
ding thei tura inbuatsaih a ngai tawh a. Chutiang hmeichhia chu an zahawm a ni.

6. Hmeichhiate hi chhungkuaa Lalpa maicham tinungtu an ni

Pathian Thu chuan hetiang hian a ti a:

Duhsakna hi bumna a ni a, hmêlṭhatna chu engmahlo a ni;

Lalpa ṭihtu hmeichhia erawh chu fak a ni ang. (Thufingte 31:30)

Khawi hmunah pawh, Bible chhiara, ṭawngṭaia, inkhawm tlat mi chu an zahawm ṭhin.
Mizorama chhungkaw tam takah hian chhung inkhawm vawng nung tlattu chu nu ber an ni
fo. Pathian lam hawi tura chhungkua kai her lui tlattute hi nu an ni fo ṭhin. Hmeichhia,
Pathian lam awn tlattu chu a zahawm a ni.

TLANGKAWMNA

Tuna kan Mizoram dinhmun thlirin, kawng tinrengah hma sawn turin tihtakzeta beih a ngai
tawh tih a lang. Hmeichhiate hi kan awmna hmun ṭheuhah chhungkaw kai hruaitu,
khawtlang leh ram thlenga aw nei thei kan ni tawh a. Mizoram chhiat leh ṭhat hi kan kutah a
awm tak meuh a ni. A chunga kan nihna kan sawite hi chiang takin ngaihtuah ila, kan
pianpui finna leh talent hmanga kan khawtlang leh ram khai chhuak turin i pen chhuak ang
u.