兒童及青少年論壇劇場巡迴表演《大聲 SAY NO!

(燈亮)
1. 主持︰大家好！我是今天的主持，喺表演之前，讓我介紹一下以下的論壇劇
場表演。論壇劇場故事主角會遇到一些問題，需要觀眾幫忙尋找一些解決辦
法。我會請你們提議一些建議，你們亦有機會問故事角色問題，我亦會邀請
你們出來取代演員親身嘗試怎樣解決問題。希望大家踴躍參與，事不而遲，
我們先黎睇下故事《大聲 SAY NO!》。

第一場
(地點︰班房)
(音效︰上課鈴聲)
(堅仔、雯雯已坐在自己的位置上，恩恩上)
(恩恩有點不知所措，這時雯雯發現恩恩)
2. 雯：Hi! 你有咩事？
3. 恩︰Hi! 我係新黎插班生。
4. 堅︰插班生？仲係靚女喎！
5. 恩︰(尷尬地) 你好！
6. 堅︰我終於見到曙光，唔駛再淨係對住尐豬扒。
7. 雯︰想死呀！你話邊個豬扒？
8. 堅︰邊個應咪係邊個！
(雯雯走近堅仔，打了他一下，再轉向恩恩)
9. 雯︰我叫雯雯，你叫咩名？
10. 恩︰我叫恩恩！
11. 堅︰恩恩 BB，我係堅仔！
12. 恩恩︰恩恩 BB？你唔好咁叫我啦！
13. 堅仔︰好襯你，係女神我先會咁叫！
(雯雯沒好氣地，睥睨堅仔，再上前拉恩恩至她座位旁)
14. 雯︰你唔駛理佢，你坐我隔離，有咩你可以問我。
15. 堅仔︰問我都得架，我專為靚女服務。
16. 恩恩︰多謝你哋！
(音樂)
17. 雯︰我哋黎緊要做一個社會議題報告，做咩題目好？
18. 恩︰未諗到？
19. 堅︰我哋得三個人梗係諗唔到啦！
20. 雯︰咁快尐搵多尐其他同學加入我哋組啦！
21. 堅︰(問觀眾)有無同學想加入我哋呢？
(主持協助邀請兩個觀眾上台參與)
(堅仔等將數張枱合併，圍坐)
22. 雯︰多謝你哋加入我哋組，其實我有諗過一尐題目，講出黎睇下大家覺得
點？
23. 恩、堅︰好！
24. 雯︰我想做家暴、虐待動物或者性騷擾。
25. 堅︰呢類題目唔易做，你話係唔係，恩恩 BB？
(堅仔有意無意搭著恩恩肩膀，恩感覺不對，稍為移動身體)
26. 雯︰你識咩，呢類題目先有 noise。
27. 堅︰要搵好多有關法例資料架，好多野做，恩恩 BB，你覺得呢？
(堅仔借勢捉著恩恩的手，恩恩即時將手縮回。)
28. 恩︰…我無意見。
29. 堅︰你一定都好似我咁諗，覺得好難，唔想做呢類題目(說著又貼近恩恩)。
30. 恩︰…
31. 雯︰我覺得性騷擾最啱，咁你就知道你性騷擾緊恩恩。
32. 堅︰邊有呀？
(音效)
(演員靜止)
(主持上)
33. 主持︰雯雯聲稱堅仔咁對恩恩係性騷擾，不如我俾大家聽聽佢哋心裡面諗
緊咩，我手按佢哋膊頭，佢哋會講一句內心說話。
(主持順序按雯雯、恩恩、堅仔肩)
34. 雯雯︰成日搏女仔懵！
35. 恩恩︰快尐攞開隻手啦！
36. 堅︰關你咩事，恩恩都無出聲！
37. 主持︰其他同學又點諗呢？(按觀眾同學肩，鼓勵他們講一句內心說話。)謝
謝兩位同學(請他們回座位)，大家又覺唔覺得堅仔咁做係性騷擾？(問觀眾
意見) 為咗想大家了解情況多尐，不如我哋訪問下堅仔同恩恩。
(恩恩、雯雯下)

訪問(Hot Seat)
(堅仔上前，坐下)
38. 主持︰堅仔，我直接問你，你覺唔覺得你性騷擾恩恩？
39. 堅︰無尐咁嘅事，我鍾意恩恩，所以想接近佢多尐。
40. 主持︰你無發覺其實恩恩唔鍾意你觸摸到佢？
41. 堅︰無呀，佢都無出聲拒絕我。
42. 主持︰咁可能係恩恩唔敢出聲，但雯雯已經提醒過你，你仲繼續係咁，唔
通唔係蓄意性騷擾？
43. 堅仔︰佢扮野啫，女仔係咁，如果佢真係介意，佢會同我保持距離，但係
 佢無呀！
44. 主持︰(轉向觀眾)各位同學，有無問題想問堅仔？
(主持鼓勵觀眾發問，演員會因應問題，以角色身份即時作答。)
(註 1︰如接觸到私人部位，已屬性侵)
45. 主持︰唔該堅仔，你可以休息，跟住我哋訪問恩恩
(堅仔下，恩恩上，坐下)
46. 主持︰恩恩，你覺得堅仔平時份人點？
47. 恩︰佢平時無乜點，係把口唔好，口花花撩女仔。
48. 主持︰形容下你同堅仔關係。
49. 恩︰普通同學。
50. 主持︰堅仔唔只一次對你有不同身體接觸，你感覺如何？
51. 恩︰…我好唔鍾意，覺得好唔舒服。
52. 主持︰點解唔出聲阻止佢？
53. 恩︰我唔知點講，好尷尬！
54. 主持︰(轉向觀眾)各位同學，有無問題想問恩恩？
(主持鼓勵觀眾發問，演員會因應問題，以角色身份即時作答。)
(註 2︰恩恩可以考慮答案︰
 我入咗呢間學校唔係好耐，同其他人唔熟，唔知講咗會有咩後果。
 怕以後見面會尷尬！
 驚講出黎無人信。)
55. 主持︰唔該恩恩！
(恩恩下)
56. 主持︰透過訪問，我哋知道恩恩對堅仔行為感到不安、被冒犯，明顯違背
恩恩主觀意願，而堅仔係有明顯意圖作出呢類行為，所以已經構成性騷擾。
咁如果你係恩恩，遇到呢種情況，你會點做？
(問觀眾提議，並邀請觀眾取代演員嘗試親身解決問題，主持及演員會因應要求
及情況即興演出及從旁協助。)
57. 主持︰感謝大家嘅提議，大家嘅方法都有好多值得參考，其實面對一尐認
識嘅人，好似同學，甚至長輩，受害者會覺得較難出聲拒絕或反抗，因為
怕尷尬或以後唔知點面對對方，但係大家唔好怕，如果真係遇到性騷擾，
要勇敢大聲講“唔好”。不如我哋繼續睇下之後發生咩事。
(音樂)

第二場
(地點︰班房)
(雯雯在教恩恩功課、堅仔反常地靜坐一旁畫畫)
58. 雯︰咁你而家識做啦！
59. 恩︰雯雯，好在有你教我，不如我請你食野吖！
60. 雯︰好呀！不過叫埋堅仔，好唔好？
61. 恩︰…
62. 雯︰我知佢之前對你摸手摸腳係佢唔啱，不過我見佢都好似有反省，最近
都無煩住你，你原諒佢啦！
63. 恩︰咁好啦！
64. 雯︰你放心，如果佢再敢掂你一下，我唔放過佢。
65. 恩︰如果佢真係咁做，我會即時大叫唔好。
66. 雯︰你而家勇敢咗好多！
67. 恩︰女仔要識得保護自己。
68. 雯︰講得好！(轉頭望向堅仔)堅仔，我同恩恩去食野，你去唔去？
(堅仔沒有理會，仍在默默畫畫)
69. 雯︰堅仔，我同你講野，你聽唔聽到？
(堅仔仍舊沒反應，雯雯上前拍他，堅仔即時彈起來)
70. 雯︰駛唔駛咁大反應，我好細力！
71. 恩︰堅仔，你做咩？
(堅仔沒有理會雯雯及恩恩，執拾書包準備離開)
72. 雯︰你呢排做咩？好似嬲咗成村人咁！
73. 恩︰有咩唔開心，可以講畀我哋知！
74. 堅︰你唔嬲我？
75. 恩︰你知道唔啱，唔再咁對我就得！
76. 堅︰對唔住！我而家先知我之前行為令你幾不安同討厭，所以我被人攪我
抵死…
77. 雯︰你被人攪？究竟發生咩事？
78. 堅︰無！你聽錯…
79. 恩︰堅仔，如果你發生咗咩事，要講出黎，我哋係朋友，我哋會幫你。
80. 堅︰多謝你，你仲肯當我係朋友。
81. 雯：究竟邊個攪你？
82. 堅︰…我之前喺學校附近，遇到一個大叔問路，佢跟住話請我食野多謝我，
我哋仲交換咗 wechat，佢之後成日會搵我傾偈，每次都請我食野，仲會送
禮物畀我，我諗住無蝕底，咪同佢一直有見面，點知上次…
(音樂)

第三場
(場景︰大叔家)
(大叔及堅仔搬著傢俱上)
83. 大叔︰放喺度得喇！
(兩人放下傢俱)
84. 大叔︰堅仔，唔該你，如果唔係你，我都唔知點搬張梳化返黎。
85. 堅︰小事啦！
(大叔取過一杯飲品給堅仔)
86. 大叔：飲野！
(堅仔接過，飲下)
87. 大叔︰我之前咪話買咗部 Switch，都唔識玩，不如俾咗你，我入房攞俾你，
你坐低等我一陣。
88. 堅︰好呀！
(大叔下，堅仔坐下，過了一會，大叔上，手上拿著 Switch，交給堅仔。)
89. 堅︰真係畀我？
90. 大叔︰梗係！
91. 堅︰多謝你！(開始玩)
92. 大叔︰堅仔，你平時一定做好多運動，我覺得你大隻咗好多！(說著已將手
放在堅仔手臂及背上捏及掃)
93. 堅︰我鍾意打藍球同游水！
94. 大叔︰原來你鍾意游水，唔怪得有胸肌啦！(說著已經將手摸至堅仔胸膛)堅
仔，不如你做我 model，幫我影尐相，我可以俾番人工你。
95. 堅︰影相？
96. 大叔︰我見你身形咁好，可以用黎做目標，激勵我做運動，我都好想你咁
fit，幫下我啦(說罷已取出一千元給堅仔)。
97. 堅︰咁好！
(大叔即時取出電話)
98. 大叔︰咁你擺 pose。
(堅仔擺了不同 pose，大叔影相及不斷讚好)
99. 大叔︰不如除咗件校服，影得清楚尐！
100. 堅︰好似唔係咁好…
101. 大叔︰怕咩？大家都係男仔。
(堅仔開始感覺不對，拿起書包，欲離開)
102. 堅︰我今日有好多功課，我都係走先…
(堅仔忽然覺得頭暈)
103. 大叔︰你點呀？唔舒服？(手扶著堅仔)
104. 堅︰我覺得個頭好暈...
105. 大叔︰咁你不如入房休息一陣！
106. 堅︰…(暈倒)
(大叔見狀，笑，並接近堅仔)
(音效)
(演員靜止)
(主持上)
107. 主持︰大家唔好以為只有女仔先會遇到性侵犯，其實男仔亦都有機會遇到，
 而侵犯者亦可以係異性或同性，可以係陌生人、朋友、長輩。我又問下大
家，如果你係堅仔，你會點做先可以避免發生有可能被性侵事件？
(問觀眾提議，並邀請觀眾取代演員嘗試親身解決問題，主持及演員會因應要求
及情況即興演出及從旁協助。主持亦會引導觀眾在不同時間點介入，如第一次
遇見大叔時，大叔邀請你上他家時等等，並嘗試不同情況的處理方法。)
108. 主持︰不如我哋去番堅仔第一次遇到大叔現場。
(大叔在台上，堅仔上)
109. 大叔︰同學，你好！我想問下半島豪庭點去？
110. 堅︰你直行轉左，再轉左，再行前兩個街口就到。
111. 大叔︰好似好複雜，你可唔可以帶我去？我請你食野報答你吖！
112. 堅︰咁…
(音效)
(演員靜止)
(主持上)
113. 主持︰當時堅仔係有幫大叔，但如果你係堅仔，你會點做？
(問觀眾提議，並邀請觀眾取代演員嘗試親身解決問題)
(註 4︰大叔可能回應情況︰
 如果學生話唔識路、唔肯帶路、或唔接受請食野，嘗試問佢借散銀搭車 ，
因為剛喺內地返黎，無葡幣，話 wechat pay 番俾佢，意圖取得學生聯絡)
114. 主持︰感謝大家嘅提議，其實要保護自己，唔好單獨到其他人家中或密閉
空間，唔好飲用來路不明的飲料，唔好更加唔好貪圖陌生人嘅利誘。好似
堅仔呢個情況，當然最佳辦法就係一開始就拒絕佢，並通知學校老師或家
長，但既然堅仔已經懷疑被性侵，不如我哋睇埋落去，堅仔佢哋又會點處
理。
(音樂)

第四場
(場景︰班房)
(恩恩和雯雯聽完堅仔的敍述後)
115. 雯︰堅仔，咁你暈咗之後發生咩事？
116. 堅︰我唔知！
117. 雯︰你會唔會已經被佢性侵？
118. 堅︰你唔好亂講…應該無…我唔知！
119. 恩︰你有無講俾你父母聽？
120. 堅︰點講，實被佢哋鬧死。
121. 雯︰呢件事根本唔係你嘅錯，你父母會明白架！
122. 恩︰咁你諗住點做？
123. 堅︰我都唔知可以點做！
124. 雯︰不如報警！
125. 堅︰報警咪所有人都知，我仲邊有面見人，何況我唔肯定…
126. 雯︰其實佢觸摸你私人部位，要求你露體及拍攝裸體照片，用猥褻言語挑
逗你，已經構成性侵犯。性侵犯係刑事罪行，唔可以姑息佢，千祈唔好猶
豫，一定要報警求助。
127. 堅︰但係我係自願上去佢屋企，我又收咗佢錢，仲收過佢咁多禮物，佢哋
會信我咩？
128. 雯︰其實佢用金錢同物質引誘你，已經構成“與未成年人進行性交易罪”，
拍攝裸照及色情照片，已經犯咗“與未成年人有關的色情物品罪”，因為
你未成年，佢唔可以以你自願為藉口，佢已經係犯法！
129. 堅︰…
130. 恩︰我知有好多社福機構都有性侵犯支援輔導熱線，一係我哋打去問下應
該點做，或者搵學校社工、老師協助。
131. 堅︰…咁好啦！
(三人下，主持上)
132. 主持︰最後我做個簡單總結，大家要識得保護自己，就算係熟人，都要保
持安全距離。如果有人要觸摸或觀看你私人部位，要明確拒絕，大聲求救，
要盡快離開現場，並講俾你信得過嘅大人聽，尋求協助，儘快報警。 我呢
度有兩個提供性侵犯支援輔導熱線機構名稱及電話(powerpoint)，有問題或
需要協助可以打電話去，有專業輔導員接聽。最後再次多謝今日參與同學
及演員，再見！

~全劇完~

註︰聖公會澳門社會服務處 24 小時性侵犯支援輔導熱線 65339608

澳門防止虐待兒童會 求助諮詢及親子支援熱線 28855218